Unicode
ဖူဟန် တည်ငြိမ်စွာ ပြန်ဖြေလာသည်။
"ကိုယ်ပြောနေတာလည်း အရေးကြီးတဲ့ကိစ္စပဲ"
"ခင်ဗျားပြောတဲ့ အရေးကြီးကိစ္စကြီးက ဘာလဲဗျ။ ခင်ဗျားပြောတော့ ဒါတွေကို ပစ္စည်းပြည့်အောင်ပဲ ဝယ်ခဲ့တာဆို၊ ဒါပေမယ့် အခုကျတော့ ဘာလို့ ခင်ဗျား ရွေးထားတဲ့ အရောင်မဟုတ်ဘူးလို့ ပြောနေရတာလဲ။ ပြီးတော့ ခင်ဗျား ယုန်နားရွက်တွေ ဝယ်ထားရင်လည်း ခင်ဗျားဘာသာ ခင်ဗျားပဲဝတ်။ ကျွန်တော့်ကို လာစိတ်တောင်မကူးနဲ့"
သူ အော်ထည့်လိုက်တာတောင် ဖူဟန်က အေးအေးဆေးဆေးပင်။ သူက ညင်သာစွာ မေးလာခဲ့သည်။
"မင်းမကြိုက်ဘူးလား"
“အင်း! ဒါမျိုး ဝတ်တာက ဘာအကျိုးရှိမှာလဲ"
ယွီကျစ်ယွီ ယုန်နားရွက်ကို အသာလေးထိကြည့်လိုက်တော့ အထိအတွေ့က ကိုင်လို့ ကောင်းနေသည် - နူးညံ့တဲ့ အမွှေးပွလေးတွေက ပျော့အိအိဖြင့်ပင်။ လက်ချောင်းနဲ့ အသာလေးပွတ်ကြည့်လိုက်တာနဲ့ အမွေးလေးတွေအတိုင်း လျှောဆင်းသွားတာ အနည်းငယ် ခံစားလို့ကောင်း၏။
မသိစိတ်ကပင်၊ သူ နောက်ထပ်နှစ်ကြိမ်လောက် ထပ်ကိုင်ကြည့်မိသွားသည်။
ဖူဟန်က ယုန်နားရွက်ကို လှမ်းပေးလာပြီး မေးလိုက်သည်။
"အရာရှိဝေက မင်းကို ဘာတွေပြောလို့လဲ"
ဒီမေးခွန်းက ယွီကျစ်ယွီအား ယုန်နားရွက်တွေကို ငြင်းဆန်မဲ့စကားကို ပိတ်ဆို့လိုက်နိုင်သည်။
ယွီကျစ်ယွီလည်း ဒီအတိုင်းပဲ လက်ခံလိုက်ပြီး၊ လက်ထဲမှာ ကိုင်ထားကာ ထပ်ထိနေရင်း ဆိုလိုက်သည်။
"ကျပ်တိုက်အသားနေရာမှာ ပါတဲ့ လိပ်စာကို ကျွန်တော် သူ့ကို ပေးခဲ့တယ်။ သူ စစ်ဆေးကြည့်တော့ အဲဒီနေရာက တစ်ချိန်တုန်းက သံမဏိစက်ရုံဟောင်းဖြစ်ခဲ့တယ်တဲ့။ အလောင်းကို စက်ရုံထဲက မီးပြင်းဖိုနဲ့ ဖျက်ဆီးပစ်ခဲ့တယ်လို့ သံသဃရှိနေတယ်။ အခုတော့ စက်ရုံမရှိတော့ဘူး၊ မျက်မြင်သက်သေဖြစ်တဲ့ ယိချန်ဆီကနေပဲ သဲလွန်စ တစ်ခုခုရှိသေးလားလို့ပဲ ထပ်ရှာနိုင်တော့မယ်"
"မင်း သူ့ကို ကူပြီး မေးမြန်းပေးချင်တယ်ပေါ့"
"ဟုတ်တယ်လေ။ ယိချန်က အရာရှိဝေကို မယုံလို့ သူ အဲ့တုန်းက လိမ်ပြောခဲ့တာလို့ပဲ အခိုင်အမာ ဆိုနေတာ။ အရာရှိဝေကလည်း ရွေးချယ်စရာမရှိဘဲ ကျွန်တော့်ကို အကူအညီတောင်းတယ်၊ ကျွန်တော်သာ မေးမြန်းရင် အဖြေရနိုင်မယ်ထင်လို့ ကျွန်တော်လည်း သဘောတူလိုက်တာ"
YOU ARE READING
ဇာတ်လိုက်နဲ့စေ့စပ်ပွဲပျက်ပြီးနောက် သူ့ဦးလေးနဲ့လက်ထပ်လိုက်တယ်
Romanceဖူဟန် × ယွီကျစ်ယွီ
