Unicode
သူတို့ တူညီတဲ့ဆေးကိုပဲ အသုံးပြုနေကြပေမယ့် သက်ရောက်မှုကတော့ အတော်လေးကို ခြားနား၏။
ယွီကျစ်ယွီကတော့ ဆေးကို အစက်ချပြီး ပွတ်လိုက်ရုံပဲ။ ဒါပေမယ့် ဖူဟန်ကျတော့ သူ့လက်ချောင်းထိပ်လေးတွေနဲ့ စက်ဝိုင်းပုံစံ ဆွဲပြီး လိမ်းပေးသည်။ အားအနေအထား ကျွမ်းကျင်စွာစက်ဝိုင်းပုံပတ်ဆွဲလိမ်းတာက ဆေးအဆီကို ပိုမိုပျော်ဝင်စေပြီး ပူလာတဲ့ အာနိသင်ကို ဖြစ်ပေါ်စေသည်။
ယွီကျစ်ယွီရဲ့ အသက်ရှူသံတွေ မမှန်တော့။ တုန်ယင်နေတဲ့ သူ့ပုံစံကို ဖူဟန်မမြင်အောင် နှုတ်ခမ်းကို တင်းတင်းစေ့ပြီး စောင်နဲ့ ဖုံးကွယ်ထားလိုက်သည်။
ကနဦး၌ ဖူဟန်က သူ့ကို လျစ်လျုရှုထားပေမယ့် ယွီကျစ်ယွီ စိတ်အေးသွားပြီး သက်ပြင်းချမိချိန်မှာပဲ ရုတ်တရက် သူ့ကို ဖက်လာသည်။
"အေးနေလို့လား"
ယွီကျစ်ယွီသည် သူ မအေးဘူးဟု ပြောချင်ပေမဲ့ ပွေ့ဖက်မှုကြောင့် သူ့နှုတ်ခမ်းကို ကိုက်လိုက်မိပြီး ပါးစပ်ကနေ ထွက်လာမယ့် စကားလုံးတွေကို မျိုချလိုက်မိသည်။ သူ ဓာတ်မတည့်တာကို မပူပင်ရတော့ဘဲ ထိုအစား သူ့ရင်ထဲက လှိုင်းထန်လာပြီး နောက်တစ်မျိုးသော ယားယံမှုနဲ့အတူ စိတ်တွေ ရှုပ်ထွေးလာရသည်။
ဖူဟန် ခေါင်းငုံ့လိုက်ပြီး ယွီကျစ်ယွီ လက်မောင်းထဲ ထည့်ဖက်ထားတဲ့ စောင်အစုအဝေးကို ကြည့်ကာ "မင်း ဘာတွေ ကွယ်ထားတာလဲ"
"ဒီလိုဆို ပိုပြီး သက်တောင့်သက်သာ ရှိလို့"
ယွီကျစ်ယွီ တိုးတိုးလေး ဆိုလိုက်၏။
ဖူဟန်က ဘာမှမပြောဘဲ ဆေးဘူးအဖုံးကို ယူပြီး ဆေးဘူးကို ပိတ်လိုက်သည်။
"တစ်နေ့ကို သုံးကြိမ် လိမ်းရမယ်။ လိုအပ်ရင်တော့ ပိုလိမ်းလို့ရတယ်။ တကယ်လို့ မသက်သာရင် ထပ်ပြီးလိမ်း"
"အင်း အင်း၊ အလုပ်သွားလုပ်တော့"
"နောက်တစ်ခုရှိသေးတယ်"
ဖူဟန်ရဲ့ စကားသံက အရမ်းကို တည်ကြည်နေ၏။ ယွီကျစ်ယွီ နောက်လှည့်ကြည့်မရဲဘဲ သူ့လည်ချောင်းကို ရှင်းလိုက်ကာ ပုံမှန်အသံဖြစ်ပြီထင်မှ ပြောလိုက်သည်။
"ဘာကိစ္စလဲ"
YOU ARE READING
ဇာတ်လိုက်နဲ့စေ့စပ်ပွဲပျက်ပြီးနောက် သူ့ဦးလေးနဲ့လက်ထပ်လိုက်တယ်
Romanceဖူဟန် × ယွီကျစ်ယွီ
