Unicode
ဖူဟန်ကလည်း အကျင့်ဖြစ်နေပြီမို့ တကယ်အိပ်ငိုက်နေပြီဖြစ်သည်။
"ကိုယ် အခု အိပ်လို့ရပြီလား"
"အင်း"
ယွီကျစ်ယွီက ဖုန်းကိုချပြီး ပြန်လှဲချလိုက်ကာ မျက်လုံးပြူးပြူးလေးနဲ့ သူ့ကို စိတ်အားထက်သန်စွာ ကြည့်ရင်း "လောင်ကုန်း နောက်တစ်ခေါက် ထပ်ဆိုပေးပါလား၊ ကျွန်တော့်အတွက် နှစ်ခါပဲ ဆိုပေးရသေးတယ်၊ ဒါပေမဲ့ ကျွန်တော်က ၁၉ နှစ်ရှိပြီလေ။ ၁၇ ခါ ထပ်ဆိုပေးရင် ကျွန်တော့်ရဲ့ နှစ်စဥ်မွေးနေ့တိုင်းမှာ အတူရှိပေးခဲ့တာနဲ့ အတူတူပဲပေါ့"
ဖူဟန်က စောင်ကို ဆွဲခြုံလိုက်ပြီး ဘာမှမပြောပေ။
ယွီကျစ်ယွီသည် ဒါဟာ ဆွေးနွေးလို့ရတဲ့သဘောပဲဟု တွေးပြီး ပို၍တိုက်တွန်းတော့သည်။
"မွေးနေ့သီချင်းက တိုတိုလေးရယ်၊ တစ်မိနစ်တောင် မရှိပါဘူး။ ကျွန်တော့်အနေနဲ့ ခန့်မှန်းရရင် စက္ကန့်အနည်းငယ်ပဲ ရှိတယ်ထင်တယ်။ ၁၇ ခါလောက် ဆိုရင်တောင်မှ မိနစ်အနည်းငယ်လောက်ပဲရှိမယ်။ ပျင်းရင် ဘာသာစကားပြောင်းပြီး ဆိုပေးလည်း ကျွန်တော် စိတ်မရှိဘူးရယ်။ ပြီးတော့ မွေးနေ့သီချင်းက မတူတာတွေ အများကြီးရှိတယ်..."
ယွီကျစ်ယွီက ဖုန်းကို ပြန်ယူပြီး မွေးနေ့သီချင်း အမျိုးမျိုးကို ရှာဖွေလိုက်သည်။ လှန်ရင်းလှောရင်းနဲ့ အရှည်ဆုံးကို ရွေးပြီး ဖူဟန်ကို စနောက်ဖို့အတွက် ပြင်လိုက်သော်လည်း မျက်လုံးမှိတ်နေတဲ့ ဖူဟန်ကို တွေ့လိုက်ရသည်။
"လောင်ကုန်း"
ယွီကျစ်ယွီ သတိထားကာ ခေါ်ရင်း "အိပ်ပျော်နေပြီလား"
ဖူဟန်၏ မှန်မှန်ရှူနေတဲ့အသက်ရှုသံကလွဲရင် ဘာအဖြေမှမရခဲ့ပေ။
ယွီကျစ်ယွီက အိပ်ပျော်သွားပြီလို့ ထင်ပြီး စိတ်ပျက်သွားကာ ဖူဟန်ရဲ့ ပါးကို လက်ညှိုးနဲ့တို့ဖို့ စဉ်းစားလိုက်သည်။ သို့သော် လုပ်တော့မလို့ရှိကာမှ အိပ်ပျော်နေတဲ့ မျက်နှာက အရမ်းကြည့်ကောင်းနေတာမို့ ခဏလောက် ငေးကြည့်နေလိုက်သည်။
ဖူဟန်ဟာ ခက်ထန်တဲ့ပုံပေါက်ပေမဲ့ အခုလို မျက်လုံးမှိတ်ထားတဲ့အခါမှာတော့ တင်းမာတဲ့အသွင်တွေ ပျောက်ကွယ်သွားပြီး ချောမောတဲ့မျက်နှာသွင်ပြင်တွေသာ ကျန်ရှိတော့သည်။ သူ့ရဲ့မျက်တောင်ရှည်တွေဟာ အသက်ရှူလိုက်တိုင်း နိမ့်ချည်မြင့်ချည် လှုပ်ရှားနေပြီး တစ်ချိန်က ဆေးရုံမှာ လူနာဖြစ်နေတုန်းကလိုမျိုး ကျိုးပဲ့လွယ်ပြီး သနားစဖွယ်ပုံရိပ်လေးတွေ ပေါ်ထွက်နေသည်။
YOU ARE READING
ဇာတ်လိုက်နဲ့စေ့စပ်ပွဲပျက်ပြီးနောက် သူ့ဦးလေးနဲ့လက်ထပ်လိုက်တယ်
Romanceဖူဟန် × ယွီကျစ်ယွီ
