[Completed] The Breakers Corazon Sociedad Series Batch 1 Book 5: Raffy Choi

Chapter 12.6

PABILING-BILING pa rin sa kama si Arrhea ng gabing iyon. Hindi siya makatulog. Nagtataka pa rin siya kung anong nangyari sa Kuya Justin niya. Gusto niyang tanungin ito kaya lang ay imposible namang sagutin kaagad siya nito.
Napatingin siya sa cell phone na nasa bedside table nang marinig na tumunog iyon. Inabot niya iyon at nakita ang mensahe galing kay Raffy. Bigla siyang napaupo at agad na binuksan iyon at binasa.
Do you have time? Papunta ako ngayon sa Banpo Bridge para magpahangin. Gusto mo bang sumama?
Sender: Raffy Choi
Agad na gumuhit ang ngiti sa mga labi niya at sinagot ito.
Sounds good to me.
Ilang minuto lang ay nakatanggap na siya ng reply na nagsasabing susunduin daw siya nito. Sinabi niya muna dito ang kinaroroonan bago tumayo. Mabilis siyang lumapit sa built-in closet na naroroon. Pinalitan niya ang pajamas ng isang itim na jacket at itim na pantalon. Nagsuot din siya ng scarf, gloves at bonnet. Sigurado siyang sobra na ang lamig sa labas.
Pagkatapos suriin ang sarili sa salamin ay maingat na siyang lumabas ng kuwarto. Wala ng ibang paraan kundi ang tumakas. Mahihirapan siya kung magpa-paliwanag pa siya sa mga magulang at mga kapatid kung saan pupunta. Sana lang ay walang makapansin sa kanya.
Ilang hakbang lang siyang lumayo sa bahay nila para doon hintayin si Raffy. Sana lang ay hindi na ito matagalan, masyado ng malamig dito.
Mukha namang nasagot ang hiling niya nang tumigil sa harapan niya ang isang blue Ford Expedition. Bumaba ang bintana niyon at nakita niya si Raffy na ngumiti at kumaway sa kanya. Gumanti siya ng ngiti at lumakad patungo sa kabilang side para makapasok.
“Matagal ka bang naghintay doon?” nag-aalalang tanong nito.
Ini-iling niya ang ulo. “Kalalabas ko lang. You have a great timing,” dumila pa siya nang tumawa ito sa sinabi niya.