يومًا ما سنلتقى

٨٠

" فاضي نتمشى؟"

مسحت الرسالة بسرعة وقفلت التليفون ، هو مش قاعد في الأوضة اللي جنبي ومش راضي يتكلم معايا ؟ خلاص براحته ينام زعلان عادي
بصيت على السرير :
- سرير واسع كبير ليا لوحدي ، أنا مبسوطة ، هو اللي غلط أصلًا

فكرت شوية وقولت - أنا حاسه إن أنا اللي غلطانة! ( سكت دقيقة وكملت )
- ولا هو؟ ما هي بردو مش من حقها تكلمه بالأسلوب حتى لو بنت عمته ! أنا مش كيس جوافة يعني ، أقوم أصالحه؟

قومت من على السرير - اه هروح أصالحه ، مينفعش ينام يزعلان ، مبيهونش عليا زعله

قعدت على السرير تاني - وهو ليه ميصالحنيش؟ ما هو مبيهتمش بيا وأنا ساكتة ، اشمعنا أنا يعني!

( مكنش ينفع نعنِد إحنا الإتنين في وقت واحد ، طرف يشد والتاني يرخي ، عارفة إني غلطانة وقت ما اتخانقت معاه وهو عنده مشاكل تانية برا ، كان ممكن نتخانق وقت تاني ، أنا ممكن أروح أكلمه دلوقتي وأسيب روح السترونج وومان أنا معدتش باقية على حاجة)
قومت من على السرير وخرجت برا الأوضة ، خبطت على باب أوضته وقولت بتردد:
- صاحي؟
-..........
- لو مش هترد مش هدخل علفكرة! واعتبر إن ده آخر كلام ما بيننا!
-...............
- طب حيث كده بقى أعملك عشا؟
-.................
- شاي طب؟ آسفه والله عشان خاطر زعلك مش عشان اللي أنا عملته ، مش عيزاك تنام زعلان
-................
- عايز تنام زعلان يعني ؟
-...............
- همشي ومش هرجع تاني هه!
-...............
- سيف انت نمت؟

فتحت الباب وملقتهوش في الأوضة ، أكيد مش هينزل الشارع في الجو ده !
مفكرتش قبل ما أمسك التليفون وأتصل بيه 
- فينك؟ فاكر يعني إننا لما نتخانق فهتبات برا البيت؟ انت عارف الجو عامل ازاي برا؟
- .......................
- خرجت عِند فيا ؟ وأكيد مأخدتش الجاكيت صح؟ سيف ارجع وبطل اللي بت........
- أنا في البلكونة
- ايه
- في البلكونة
بصيت عليه في البلكونة ورفعت راسي ويكأني متكبرة:
- ااا....طب علفكرة بقى أنا مش بكلمك عشان خايفة عليك مثلًا ، لأ انت روح بشرية وربنا هيحاسبني عليها يعني
- طيب

قفل التليفون بعدها وشوفته وهو بيسنده على الترابيزة قدامه ، هو مبيسيبنيش وقت زعلي عشان أنا أسيبه دلوقتي وأروح أنام ، نركن الزعل وقت ما حد فينا يحتاج التاني ، وهو محتاجلي دلوقتي ، محتاج يحكيلي مشكلته حتى لو ملهاش حل..عالأقل يحكي

عملت شاي ليا أنا وهو وسندته قدامه على الترابيزة الصغيرة في البلكونة
قعدت على الكرسي قدامه وشاورت على الكوبايتين :
- شاي معلقتين سكر زي ما بتحبه

مردش عليا فسألته - انت زعلان؟
-لأ
- عارفة إنك زعلان بس لازم أسألك كسؤال بديهي
كده
- مش فاضي أتخانق دلوقتي
- مش جاية أتخانق معاك  ، أنا زعلت من بنت عمتك وأسلوبها معاك بس ......
- شوفتيني رديت؟
- لأ
- يبقى ايه لازمته الخناق؟
- معرفش والله أنا لقيتني بتخانق فجأة
- أنا عارف حدودي مع اللي قدامي ومستحيل أعديها ، وكرامتك من كرامتي فأكيد مش هقلّ منك قدام حد ولا هحطك في موقف بايخ
- عارفة
- وطالما عارفة ، بتعملي كده ليه؟
- مش عارفة
- روحي نامي
- أنا مكنش قصدي أزعلك
- حصل خير
- طب حصلت معاك حاجة في الشغل عشان كده زعلان؟
- لأ روحي نامي
- متزعلش مني
-  خلاص مش زعلان منك والله