يومًا ما سنلتقى

(٦٢)

- هو سيف مكلمكيش؟
إتنهدت - لأ، الكمين اللي راحه مفهوش شبكة ، قالي ده قبل ما يمشي
- طب نلحق نجيب الأكل قبل ما حاجة تحصل زى الأسبوع اللي فات
- مش هتحصل حاجة ياشهد ، خافي على الناس متخافيش على الأكل
- طماطم اللي هناك دي؟

" من صغري بحب سيناء ، يمكن لإنها الأرض اللي اتولدت عليها أو لسبب تاني معرفهوش ، سحر غريب بيخليني أحب الأرض دي ، مفكرتش يوم أخرج منها زى الناس حوليا ، دي أرضنا ولو إحنا خرجنا منها مين هيبقى؟"

روحت البيت ودخلت البلكونة ومسكت الفرشاة وقعدت أرسم ، أوقات بتخيل مصر ، أم ولابسه طرحة ونازل منها ضفيرتين ، ولابسة عباية بنفس ألوان العلم ، وفاردة إيديها الإتنين حاضنة بيهم البلد 

- هو سيف مكلمكيش؟
سيبت الفرشاة وبصيت لماما - لأ ، قريب هيكلمني يا ماما
كل يوم بشوف عساكر في الشارع ، يا هما هما اللي شوفتهم امبارح يا غيرهم ، بيقفوا في الحر وتحت أشعة الشمس والتراب والقرف ، أو في البرد والشتاء وهدومهم تتبل وتنشف عليهم ، عشان بس نعرف نمشي إحنا في شوارعنا تاني بأمان ، أوقات بسأل " ايه اللي جابرهم على كدا؟" الناس مبتقدرش تعبهم وفي ناس بتشتم عليهم وبيستقلوا بمجهودهم وبردو مازالوا بيحمونا، طب ليه؟

- محمود جه مع صحابه
بصيت مكان ما شاورت وإبتسمت - اسمه عمر يا ماما ، متخليش الاسم يعلق معاكِ عشان ممكن يزعل
- والله شبه أخوكِ محمود ، شكله وتصرفاته ، وقت ما بيشوفني وهو معدي شايلة كياس كتير وأنا راجعة من السوق ، بيجري يشيلهم عني ، ويوصلهملي لحد هنا ،  عارفة لو مكنتش أنا اللي بصيت على محمود قبل ما ينزلوه قبره؟ كنت قولت هو ده ( سكتت شوية وضحكت ورفعت إيدها لفوق تشاورله)- ربنا معاك يا ابني

أخويا محمود استشهد في كمين من سنتين ونص ، كان بيقولي دايمًا " أنا ممكن أخرج من البيت ده ، و أموت من غير سبب ، أقعد في البيت مستخبي من ايه؟ من واجبي؟ من واحد جاى ياخد مني بيتي وأرضي؟ أنا دعوتي الوحيدة هي إني أموت شهيد ، عايز اسمي يتذكر مع بقية  الأبطال اللي سبقوني ، متخافيش عليا "
فاكرة آخر مرة شوفته فيها وهو بيحضر شنطته عشان يمشي
- متنساش تاخد معاك البلوفر عشان الجو برد
- مش هنسى
- وخلي بالك من نفسك ، المكان بيبقى كله عقارب هناك ، وخليك مصحصح كدا عشان اللي بيهجموا عليكوا كل فترة والتانية دول ،فاكر لما حكيتلي؟
ساب الشنطة وتعابير وشه اتغيرت وقفل الباب بسرعة ورجع وقف قدامي - أمك لو سمعت هتعيط وهتتعب تاني! اللي بحكيه ميطلعش برا يا ميار! متندمنيش إني حكيتلك حاجة
هزيت راسي بسرعة - ماشي ماشي ( وطيت صوتي وقربت منه  )- هى العقارب كتير فعلا؟بتخافوا منها يعني؟
- العقارب دي بتتشوى! بتتقلى ! بنلعب بيها ، نحدفها كورة لبعض ، أما نخاف منها؟ لأ موردش في قاموسي دا ، اللي خلانا منخافش من الموت ، هنخاف من عقرب؟
- أخويا البطل اوي
- خلي بالك من ماما ، أنا سايب راجل هنا مش بنت
- يووه! متبصليش كدا أحسن والله أعيط
مدلي إيده بورقة - متفتحيهاش دلوقتي
أخدتها منه وسألته - اشمعنا يعني؟
- هتعرفي وقتها
- وقتها ده اللي هو امتى؟
- أنا حاسس إنه قريب