يومًا ما سنلتقى

(٦٤)

- إنتِ بجد مش فاكرة إن النهاردة عيد ميلادي؟
- عيد ميلادك! ليه النهاردة يو...( سكتت وضربت راسها بخفة) - اوبس! نسيت خالص
إبتسمت - بتهزري يا حنين صح؟
-نسيت فعلا يا ميار ، عالعموم كل سنة وإنتِ طيبة

أقل حاجة تقدمهالي إنها تفتكر يوم ميلادي ! أنا أول واحدة بفتكر وأول واحدة تفكر هتعمل ايه عشان تفرحها ، محبتش أكبر الموضوع وقولت إني نسيت حاجة في البيت وهروح ، هو مش مفروض عالأقل زي ما بعاملهم يعاملوني ؟ طلعت على سلم الدنيا وأنا ماسكة فكرة إن الصاحب موجود عشان يسند صاحبه ، مش يإذيه!
عدت شهور ومبقناش نخرج غير مرة كل شهر ، كلامها قل معايا وتصرفاتها اتغيرت ، ولإني متأكدة إن مفيش حاجة حصلت لكل ده حسيت إني بدأت أتعب والمسافة بتزيد ما بيننا بدون مبرر
- إنتِ مش شايفة إن تصرفاتك دي غريبة؟
- لأ عادي
- طب هو حصل حاجة؟
- محصلش حاجة
بعدها بعدت تمامًا ، مبقتش تكلمني نهائي ، قطعت كل حاجة ممكن نرجع بيها أو حتى نتواصل ، حاولت أخلقلها مبررات لمشكلة مش عرفاها بس عشان نرجع! رفضت إنها تسمع وإنها تشوفني اصلا!

" هى الدنيا ممكن تضحك؟ أقصد تطلع زي ما كنا بنرسمها في كراسة الرسم زمان؟ "
قطعت الورقة ورميتها من شباك العربية ، مسكت الكاميرا ونزلت أصور الطيور وقت شروق الشمس عند البحر،بستغرب وقت ما بشوف البنت الصغيرة بترمي ورقة كل يوم في البحر ، وبعدها بتاخد الورد بتاعها وبتروح تبيعه
تليفوني رن ، فتحت الشنطة وطلعته ورديت
- بردو نزلتِ!
- صباح الخير
- بتعاندي مع مامتك ليه؟
- الحمدلله أنا وبخير وإنت؟
- مش هيفيدك اللي بتعمليه ده
- فطرت؟
صوته ارتفع واتكلم بعصبية - هى ولا بتفكر فيكِ ، عندك كتير غير......
قاطعته - معنديش حد ، افهم معنديش حد ، والله ما عندي ، مينفعش الناس كلها تقول في غيرها في غيرها ، عارفة إن في غيرها بس مش هنا! مش صاحبتي ولا هتكون .
إتنهد - انا مش عايز غير إنك تكوني بخير
- هكون بخير
- فاضية النهاردة نخرج نشوف فستان الفرح؟
إبتسمت - أنا مش ورايا غير إني أبقى فاضية ف ماشي
-الساعة ٦ كويس؟
- ماشي هستناك

طب هي بتسيبني ليه؟ مسمعتش مبررات ليه قبل ما تمشي؟ مش يمكن تكون غلطانة؟ فاهمة الصورة غلط؟ أقل حقوقي إني أعرف السبب اللي هيسيبوني عشانه ، أنا مش صغيرة عشان أتساب في نص الطريق
زي كدا لما تمشي في طريق وتكون مغمي عينك وماسك في إيد شخص واثق إنه هيفضل معاك للآخر ، وفي نص الطريق يسيب إيدك ويتفرض عليك إنك تكمل لوحدك ! لا إنت عارف إنت فين ولا هتكمل ازاى ، بتقعد فترة مع نفسك تايه بتسأل أسئلة كتيرة ملهاش إجابة ، بتحاول تحط مبررات وتستنزف اللي اتبقالك من طاقتك في محاولة إنك ترجع الشخص ده تاني  وفي الآخر؟ مش هيتبقالك إلا نفسك
لو بس سمعتني ومشت يمكن كنت هبقى مرتاحة شوية عن كدا !
غمضت عيني وافتكرت وقت ما هي كانت معايا
- أنا مش هسيبك علفكرة! أنا اصلا ما صدقت لقيت حد زيك
- بجد يا حنين؟
- اه والله ، حياتي اتغيرت تمامًا وقت ما لقيتك