يومًا ما سنلتقى

(٥٢)

- أكتب على جوجل إني لوحدي طب يمكن أصعب عليه ويبعتلي حد؟
- قرطاس أنا صح؟ أمي كان نفسها تسميني قرطاس بس الحاج صمم يسميني سيف
- هو مش أنا بواسي الناس المكتئبة وبقف جنبهم وقت ما يحتاجوني؟وبلمح الاكتئاب من كلامهم بس؟
- حصل

"طب وأنا؟ يعني أوقات بتمنى أخرج مني وأواسيني وقت الزعل لإني هبلة وبضعف ، وأنا مبحبش أحتاج لحد، ولإني عارفة إن بعد فترة الاكتئاب دي ما تروح هندم إني حكيت.. ف بسكت"

- عارف إنك مكتئبة والله وعارف إنك مبتحبيش الحال ده ف عشان كدا هتنازل عن قعدة القهوة واللف برا البيت وهواسيكِ ، أقولك؟ قومي نخترع أكل ونحرق الحلل جوا قومي ..إنتِ خرابة نفسيتك بترتاح لما بتخربي الحاجات اللي حواليكِ

"مش حابة الحال ده ، لا أشخاص ولا وقت بيساعدوا على إني أخرج من اللي أنا فيه دلوقتي ،ليه محدش حاسس إني مضغوطة فعلا؟ بدون سبب وبدون مبررات أنا مكتئبة ..محدش يسألني ليه لإني مش عارفة ليه ومش عارفة مالي!مش طالبة حاجة  غير إنهم ميقللوش من زعلي ، مش طالبة غير حد يسمعني بس!  "
هو اللي بيخرجني من اكتئابي عالأقل بيفضل جنبي ..بيبقى عارف إني مبحبش حد يقلل من زعلي مهما كان السبب ف بيفضل  ، اتخانقنا ليه دلوقتي؟ طب أحكي لمين؟
دخلت المطبخ لماما ووقفت جنبها ، مسكت الخضار بملل وقطعته
- ماما هي خالتو بخير؟
- وابنها بخير
سيبت الخضار واتوترت - ملييش دعوة بيه ولا عايزة أسمع عنه حاجة اصلا اصلا
- اتخانقتوا ليه لما إنتِ كل يوم بتسألي عنه؟
- معرفش

"أنا لو هاخد جايزة ..ف هاخد جايزة في اختراع أسباب أخسر بيها ناس بتحبني ، مبيبقاش قصدي ، عشان كدا مبحبش حد يكلمني وقت زعلي لإني بقول كلام مقصدهوش ، وعشان كده بردو مبحبش حد يسيبني وقت زعلي لإني مبحبش أقعد لوحدي ، يمكن في الوقت اللي أقدر أفهمني فيها هرتاح!"

دخلت الأوضة ومسكت التليفون ، فتحت شات الواتس ما بيننا على رسالة قديمة
" نامي ومتخترعيش سبب تنكدي بيه على نفسك ، كل حاجة هتكون بخير ..أنا جنبك متقلقيش"

إبتسمت وافتكرت لما اتخانقت معاه المرة اللي فاتت
-  علفكرة محدش يفرق معايا! أنا ميهمنيش حاجة في الدنيا دي كلها غير نفسي
- وبالنسبة إنك قولتِ إنك اللي كسرتي الأطباق عشان أختك متتهزأش لوحدها! وإنك قولتي للدكتور إنك ضيعتي كتابك وإنتِ عطياه لصاحبتك اصلا عشان متطردش من المحاضرة ، وحاجات تانية كتير، أقولك؟
لو فكرتِ في نفسك زي ما بتفكري في مصلحة غيرك هترتاحي
- أنا مرتاحة
- ليه بتعندي؟
- أنا م........
- وقت ما اشترينا التيشيرت اللي إنتِ لبساه حاليًا قولت إنه " مناسب للحزن" وهتشيليه لوقت النكد ،
بتنعزلي في الكهف بتاعك ده وبتبقي كسلانة وبتإلشي ألش بايخ عشان متبينيش إنك زعلانة
- طيب خلصت؟ يلا روح شوف وراك ايه
قعد قدامي في البلكونة وأكل من الكيك اللي في الطبق
- ورايا واحدة دماغها ناشفة ومكتئبة وبتاع ..بس الحال ده هيتبدل النهاردة أنا وعدتها
- إنت عارف إني.......
- أنا فاهمك ..ملهوش داعي الكلام والتبرير
- انا مش عايزة أكلم حد
- متكلميش
- ومبعرفش أقعد من غير ما أكلم حد
إبتسم - اتكلمي
- شكرا حقيقي مش عارفة من غير كلامك ده كنت هعمل ايه!، قوم روح يالا