يومًا ما سنلتقى

(١٧)

-تفتكرى هيحبه؟
-ايه اللى هيحبه ! ده أنا ك شهد لو مكنتش بنت كنت إتجوزتك
-عشان القميص حلو ؟
-عشان كل حاجة بتعمليها حلوة
إبتسمت -هى ماما تحت ؟
-اه، هى وعمر
-سايبة جوزك وجاية تقعدى معايا !
-يعنى أسيبك تقعدى لوحدك؟
-هتنزلى بالزوق ولا....؟
-هنزل هنزل
وصلت لباب الشقة فناديت عليها -شهد
بصيتلى -نعم
-لو لقيتى سيف تحت ممكن تناديه
-طب ما تناديه انتى
-ما انتى عارفة إنه ممكن يحرجنى
-أنا مش عارفة سكتاله على ايه والله
-شهد ! والله لو طلعت كلمة منك لأمى هيبقى آخر كلام بينا
هزت راسها -طيب
الجواز فى العيلة بتاعتنا مش بياخدوا رأى البنت  ،طالما أبوها موافق يبقى الموضوع إنتهى، يمكن لإن الأب بيبقى شايف الصح زى ما أمى قالتلى !
متجوزين بقالنا سنة وعارفة إنه مبيحبنيش ، وإنه إتجوزنى بسبب حب مامته ليا ، وإنها شايفه إنى مناسبه ليه ، بسمعه دايما وهو بيتخانق معاها بسببى ، وإنه مش عارف يحبنى ولا بينسى اللى حبها قبلى
شاور بإيده قدامى - يابنتى
-آسفة كنت سرحانة ، إنت جيت إمتى ؟
-من ٥ دقائق تقريبا
-ثوانى والغدا يكون جاهز
-أمى عيزانا ناكل عندها النهاردة
-بس أنا عملت ال.....
-أظن إنك سمعتينى !
هزيت راسى -ماشى
أمى قالتلى  لما أروح بيت جوزى هلاقى العالم اللى حلمت بيه هناك ، وحياتى هتتغير للأحسن ، ملقتش حاجة من كل ده غير إنى بعيط كل يوم ، وحياة أسوء من الحياة الأولى
-تسلم إيدك يا أمى
-أكل مراتك أحلى
غير الموضوع
-شوفتى آلاء النهاردة؟
-وإحنا مالنا بيها ؟هو الموضوع ده مش إتقفل
كنت قاعدة بتفرج عليهم من غير ما أتكلم
-لا متقفلش ، وانتى عارفة إنى هتجو.....
ضربت بإيدى عالترابيزة - أنا طالعة فوق
طلعت وبعد ٥ دقائق طلع ورايا
وقف قدامى  وهو متعصب -إيه اللى عملتيه ده
لأول مرة كنت أزعق ولأول مرة أتناقش معاه ، ومعرفش جبت الطاقة دى منين
-اقعد أسمعك وإنت بتقول هتتجوزها والمفروض أسقفلك ؟
-أنا مطلبتش رأيك
-مطلبتش رأيى عشان تتجوز عليا ، وأهلى مطلبوش رأيى عشان يجوزونى ليك ، ولا كان ليا رأيى ولا قرار  ، حتى إنى مُجبرة أكمل معاك
-إن ميكونش ليكى رأى دى مشكلتك
عيطت وضربته فكتفه -حرام عليك أنا ملييش ذنب فكل ده!
زعق -وأنا ذنبى ايه إنى متجوزش اللى بحبها؟
-أنا الراجل اللى أحبه مينفعش يحب غيرى
-وأنا محبتكيش
-إنت معطتنيش فرصة ورايح تتجوز وخلاص !
-بصى .......
-عارف شعور إنك تتجوز عليا ، وإنك مبتحبنيش وواحدة تشاركنى فيك ، طب حتى كنت أخدت رأيى !
-عارف إنك هترفضى
-ولما إنت عارف ليه رايح تتجوز ؟ إنت قاصد تموتنى !
-هسيبك تهدى وبعدين نتكلم
عيطت أكتر -
-لأ متسيبنيش ، مبحبش أقعد أعيط لوحدى ، مبحبش أخبى الكلام كتير جوايا
إبتسم ومسك إيدى عشان نقعد -طب إتكلمى
-هو أنا زعلتك ولا قصرت معاك فحاجة ؟
-لأ
-طب ما أنا بحبك ومش مخلياك محتاج حاجة، ليه بتعمل كده ؟قول فيا ايه وحش وأنا أغيره ، ايه اللى بيضايقك وأنا معملهوش
حضنى -ششششش ، إهدى
-طب فكر فالقرار ده تانى عشان خاطرى
-حاضر
معرفش ازاى نمت وقتها ، صحيت دورت عليه فالشقة ملقتهوش ، معرفش إيه اللى بيدفع الراجل إنه يتجوز تانى على مراته اللى حبته وصانت بيته ، وقبلت بيه بكل عيوبه وكراكيبه ، الست عندها إستعداد كامل إنها تتغير لو  لقت اللى يتمسك بيها جامد ويحبها ، وأظن إن مفيش أنثى عالكوكب بترضى إن جوزها يتجوز عليها برضاها ، معرفش ليه بس بحسها خيانة ، أبشع شعور فالعالم الخيانة
جبت النوت مالدرج وكتبت
" أنا مُنهكة ، ولا أستطيع التفكير بأى شئ ، أمنيتى الوحيدة هى أن أُلقى رأسى فى حضنك وأشعر بيدك فوقها ، وأظل هكذا مدى الحياة " لفرانس كافكا
قلبت الصفحة وكتبت
" الحزن ..هو أن تحب شخصًا لم يفكر فى حُبك أبدًا" ل مجهول
بعدين كتبت
" الحب هو عندما تمنح شخصًا القدرة على تدميرك ، وتثق به فى عدم القيام بذلك " ل إميلى جينكينز
سمعت باب الشقة إتفتح ، كان هو
وقفت قدامه -إنت مروحتش الشغل ؟
-لأ النهاردة أجازة
-مصحيتنيش ليه؟
-نمتى متأخر إمبارح فمرضتش أصحيكى
إبتسمت -شكرا
-فى فطار ولا أنزل أشترى؟
-إنت مفطرتش تحت؟
-لأ هفطر معاكى
-بجد؟
ضحك -اه والله بجد
-٥ دقائق وهيكون جاهز
-هاجى أحضره معاكى
ضيقت عينى وقربت منه -مالك النهاردة ؟
ضحك -بخير والله ، بس النهاردة أجازة فقولت أساعدك
هيحصل ايه يعنى لو فضل كده علاطول !، طب مالدنيا حلوة أهى أما فى ايه ؟
-هنحضر الفطار ولا هنفضل واقفين كده
ضحكت -لأ يلا نحضر
أكلنا وقعدنا فالبلكونة
-ممكن أطلب طلب منك بس متقولش لأ
-ماهو على  حسب الطلب
-هو إنت يعنى .......ممكن.......
-إتكلمى عادى
-ينفع تحبنى؟
ضحك -وهو ده طلب؟
-اه، قرر إنك تحبنى
-الحب مش قرار، مش بإيدك إنك تحبى
-لو كان الحب قرار كانت الدنيا هتبقى أفضل من كده
-كنتى هتقررى إنك متحيبنيش مثلا!
-أنا لو الزمن رجع بيا تانى هختارك إنت ، وأختار إنى أحبك
إبتسم -تاكلى آيس كريم؟
-بالشوكلاتة
-هنزل أجيب وجاى
إبتسمت -ماشى
جبت النوت وكتبت
"لا أتذكر قلبى إلا إذا شقه الحُب نصفين ، أو جف من عطش الحب " ل محمود درويش
بعد١٠ دقائق طلع وهو متعصب
-فى ايه ؟
-إبعدى عنى دلوقتى
-مالك؟
معرفش دخل يدور على ايه فى الأوضة
-طب بتدور على ايه؟
مردش فإتكلمت -رد عليا
أخد الفون بتاعه ونزل لمامته تحت
لبست الطرحة ونزلت وراه ، وقفت عند باب شقة مامته لما سمعته بيزعق
شهد طلعت من تحت ووقفت جنبى
-فى ايه يا.....
شاورتلها بإيدى عشان تسكت
صوته علا أكتر -أهى هتتجوز وراحت منى
-أحسن هى مكنتش تنفعك
-دى حياتى وأنا حُر فيها
-لأ مش حر، هى مكنتش بتحبك
-شوف مراتك اللى فوق .....
مسمعتش الباقى وطلعت على فوق بسرعة لما شهد إتخبطت فالباب من غير قصد
نص ساعة وطلع قعد جنبى من غير ما يتكلم
عملت نفسى معرفش حاجة -مالك ؟
-آلاء هتتجوز
ضحكت ووقفت -يا ألف نهار أبيض
-نعم؟
قعدت تانى -آلاء هتتجوز ! أنا مش عارفة أقولك أنا زعلانة أد ايه ...اه قلبى !
إبتسم -مش للدرجة دى
ضحكت -صدقنى أنا زعلانة بس مش عارفة مالى
ضحك وبصلى -هو اللى بيزعل بيضحك؟
ضحكت بصوت عالى ومعرفش ايه اللى بيضحك
-ثوانى بس !
إبتسم -عارف إنك فرحانة
-ابدا !، أنا زعلانة على زعلك
-بس أنا مش زعلان
-ازاى يعنى ؟
-يعنى......
مكملش عشان فى حد إتصل بيه
-.........
-الحمدلله
-..............
-اه، هى قدامى
-...........
-تمام هقولها
بصيتله -فى ايه؟
-مامتك عيزاكى
-
-دلوقتى؟
-أيوة
-ماشى ، هلبس بسرعة وأروحلها
-ما أنا هروح معاكى
إبتسمت -ماشى
طول الطريق كان ساكت ، وأنا مبعرفش أسكت كتير
-سيف
-ها؟
-هو إنت كان ممكن تتجوزها من غير ما تاخد رأيى فعلا؟
-لأ طبعا
-أومال ليه عملت كده؟
-مش عارف حقيقى، بس حسيت إنى أنانى أوى ، وإنك مستاهليش كل اللى بيحصل ده
-يعنى كان ممكن تتجوز عليا؟
-لأ
-اومال كنت هتطلقنى وتتجوزها؟
-لأ
-يووووه!، أومال كنت عايز ايه؟
-مش عايز حاجة
-ردودك الباردة دى بتغسلنى من جوة
ضحك -كتر قعادك مع شهد موديكى فداهية
-دى صاحبتى وزوجة أخوك، يعنى إلا شهد!
-إنتوا بتتفقوا عليا فعلا زى ما سمعت؟
ضحكت -يلاهوى ياسيف !، ده مش بيعدى يوم إلا وإحنا متفقين عليك
إبتسم -ازاى؟
-فاكر لما كنت بتقولى الأكل بتاعك مش حلو؟
ضحك -لأ مش فاكر
-لأ فاكر ، هى بقى كانت بتقولى معملش أكل ليك عشان تتوب
-أتوب !
-ومرة قالتلى أحطلك بودرة عفريت فالبرفيوم بتاعك ، بس معرفتش أفتحه
-يعنى لو عرفتى تفتحيها كنتى هتحطى البودرة فيها؟
-أكيد طبعا، دى خطة ولازم أنفذها ، الإتقان فالعمل أهم حاجة
-إنسانة خلوقة
-لأ أصل انا مبتنازلش عن حقى ، عارف لما بنتخانق وأفضل ساكتة ! ببقى بتخيل إنى مرة خنقاك ومرة كاسرة على راسك كوباية ، ومرة شافطة عينك بالمكنسة الكهربائية
- شافطة!
-إعرف أنى لما ببصلك وببتسم وإحنا متخانقين ، إنى بتخانق معاك جوايا ، وفى مجزرة جوه إنت متعرفش عنها حاجة
ضحك -طب إنزلى
-إنت قفوش اوى ليه كده ؟ أنا ب هاها معاك
-وصلنا
بصيت من شباك العربية -اه فعلا ده بيت بابا
-ااه شوفى ازاى! طلع هو سبحان الله
-شامة ريحة تريقة
-يابنتى إنزلى
-طيب متزقش
طلعنا فوق وقعدت مع ماما فالأوضة ، وهو وبابا قعدوا فالبلكونة
-سيف إتعدل معاكى؟
-أوى يا ماما، ده أنا يابختى بيه والله
-وحماتك؟
-دى نسخة تانية منك، ربنا عوضنى بيها هناك، دى بتتخانق مع سيف لما بيزعلنى ، وبحكى معاها دايما زى ما كنت بحكى معاكى
إبتسمت -أنا كده إستريحت
-أنا لما ربنا يرزقنى بأطفال ، هخلى ليهم رأى فكل حاجة
بصت فالأرض -يابنتى ما انتى عارفة إنى.......
حضنتها -
-عارفة ياأمى عارفة، وعارفة إن بابا كان شايف إن ده الصح، بس نادر أوى لما بيطلع القرار صح، أنا بحمد ربنا أن نصيبى مع سيف
-ربنا يخليكم لبعض
محستش بالوقت وأنا بحكى مع ماما ، غير لما سيف خبط عالأوضة وإستأذن عشان نمشى
وقف بالعربية جنب مكان عالبحر
-وقفت ليه؟
-ملحقناش نجيب آيس كريم من هناك فقولت نجيب من هنا، إنزلى
نزلت ومشيت جنبه
-فاكر المكان ده ! أول مرة نخرج أنا وإنت جينا هنا وكنت........
-بحبك
-وروحنا إشترينا آيس......(سكت شوية وكملت ) -إنت قولت ايه؟
-مقولتش
-لأ قولت، قول بسرعة مش قادرة اتنفس
ضحك -بحبك
شهقت -يلااهوى
-وهفضل أحبك ولو الزمن رجع بيا هختارك انتى
-تاكل آيس كريم؟
إبتسم -بالشوكلاتة
- بالشوكلاتة
"رأيتك ضوء فى نهاية نفقٍ مظلم!"