يومًا ما سنلتقى

(٥٦)

- هو إنتِ مش قولتيلي اتخطبيله وبعدها هتفكري في طريقة شيك تخرجيني بيها برا الموضوع ده؟
- حصل
- شهد متعصبنيش! أنا اتخطبتله إرضاءًا لبابا وعشان ماما متحسسنيش إني حرماهم مالفرح في البيت ، وإنتِ عارفة ده
- حصل بردو والله
- طب أخرج من الموضوع ده ازاى ؟ أنا مش لاقية سبب
- إنتِ مش مرتحاله؟
- لأ مرتحاله عادي هو كويس بس مبعرفش أتكلم معاه ، عارفة الكوميكس اللي كنت شيلاها لما اتخطب دي؟ عرفاها؟ أهي مركونة زى ما هى مطلعتش منها كوميك واحد ، وحساه جد دايمًا ومش شايف الحياة  سهلة كدا زى ما أنا شيفاها ، شهد كتب الكتاب فاضله أسبوع والله هروح فيكِ في داهية لو ما اتصرفتي!
- ورقة وقلم واكتبي ورايا أسباب للفركشة يا ست الكل .
جبت النوت زى الهبلة ورجعت قعدت على السرير وكملت كلام معاها في التليفون - ها؟
- مبقاش يهتم ولايسأل ولا يعرف حاجة عني ورصي شوية نكد
-ما هو بيسأل ياشهد
- خلاص ، يبقى قولي هو مش نفس تفكيري ومش هينفع اكمل مع راجل تفكيره عكس تفكيري تمامًا
كتبت وراها وسيبت القلم - أكتب تمامًا؟
- اه عشان تبيني إنك رافضة جامد اوي
مسكت القلم وكتبت - عكس تفكيري تمامًا حلوة دي ،( سكت شوية وكملت)- في حاجة صغننة بس حابة استفسر عنها
- ها؟
- معلش هو ايه هو تفكيري اللي هو عكسه عشان لو سألوني؟
اتكلمت بعصبية - يعني أنا اللي هقولك إنتِ بتفكري ازاى ؟ ما تتلمي عالصبح
- شوفيلي حاجة غيرها عشان مش لايقة بصراحة
- طب أقولك حاجة حلوة؟
- قولي
- اديله فرصة
- أدي فرصة لمين؟ تقصدي أتجوزه ؟ يعني يقولولي مدام وأسكت! افهميني ! أنا بعد الجواز مش هسهر معاكِ للصبح ونص مكالمتنا هتبقى عياط بيبي وأقولك مش سمعاكِ واستني البنت بتعيط ، ومش هنخرج مع بعض كل شوية ، وهصحى بدري بمنبه ، يلاهوي! ده أنا عمري ما عملتها ، صلي عالنبي في قلبك كدا وطلعي الأفكار السوداوية دي من عقلك
- وقت ما هتجوز هعمل كدا عادي
- ومش هتخرجي معايا؟
- لأ هنخرج بس مش زى الأول وحياتك هى هى بس هتختلف في حاجات بسيطة وممكن تبقى أفضل من الأول ، ميار بعيدًا عن الهزار ف الجواز مش وحش.
- طب متتكلميش جد كدا عشان شكلك بيبقى وحش والله!
- طب لو الموضوع ده تم ف في واحد كدا  ابن خالته 
- ابن خالة مين؟
- سيف يا ميار ، ابن خالة سيف ، ركزي معايا واربطي الأحداث ببعض عشان ممدش إيدي عليكِ
- اه اه ماله؟
- يلزمني
- عارفة لو مكنتش في بيت محترم وفي إنسان محترم قاعد في الصالة  برا مربيني هه هه عارفة؟ كنت رديت........
(بصيت في شاشة التليفون وقت ما قطع مكالمتي مع شهد ، حطيت التليفون على ودني واتكلمت بسرعة )
- شهد اقفلي دلوقتي عشان سيف بيتصل
- تذكري إنتِ أنثى رقيقة وتصرفي كالأميرات
- طبعًا طبعًا

(اتصرف كالأميرات؟ شوفوا هبهركم)
قفلت مع شهد ورديت عليه - ايه ياسطا في حاجة؟
ضحك - وعليكم السلام، أنا كلمت أبوكِ وإستأذنته نخرج بكرا
( أنا هرفض أخرج وهتحجج بأى حاجة ، اصلا أنا مبحبش الخروج )
- فاكرة الفستان اللي كنتِ عايزة تلبسيه وقت ما نكتب الكتاب؟ دورت على واحد زيه ولقيته في محل على البحر ، ف ممكن نروح ونشوفه ؟
(ايه ده أتيليه؟ أنا نقطة ضعفي الفساتين أم ترتر)