يومًا ما سنلتقى

(٥٩)

خبطت بالعصا على الورقة الملتصقة بالحيطة - ركز معايا هنا
- مش فاهم ايه لازمتها الورقة والعصايا ، يابنتي لو نفسك ترجعي إبتدائي عرفيني
عدلت النضارة وشاورت بالعصا
- ده ايه؟
- حرف النون
رفعت إيدي - لأ عندك! دي نون النسوة مش نون سادة
- هى في نون سادة؟ سوري والله آخر معلوماتي  كانت نون واحدة قبل ما تحشوها نسوان
رفعت صباعي بتحذير -  إياك ألمحها في أى جملة من جملك ، لأ حقيقة ولا سوشيال ميديا أمين؟
- يعني الحال ضاق أوي وهروح أخونك مع نون نسوة ؟
- يا سيف قول أمين وريحني ، راعي عقلي وأراعيك
- ماشي أمين
- ودي تاء مربوطة صح؟
- ايوة
- متتكتبش في أى كلمة غير ليا! لا مربوطة ولا مفتوحة ، أقولك متكتبهاش خالص ، في حروف كتير غيرها
- وسعت منك دي!
- يعني إنت عندك اعتراض؟ سلمى اللي عملالك كومنت من ٢٠١٣ وحشتك؟ أميرة بفستاني اللي عملالك لايك من شهرين بتدفعلك كويس؟ رد عليا ومتبصش لفوق وتنفخ!
- عندك صبر تقلبي في الأكونت ل٢٠١٣؟ ده أنا كنت هعملي بلوك لما شوفت البوست بتاعي متكرر مرتين
- وليه البنات تعملك ريأكت ؟ قصرت معاك في حاجة؟ هما يهتموا بيك وأروح أنا أبيع لب بقى
- ............
- وكمان مش مركز معايا وبتلعب عالتليفون؟
- برد على رسايل
- الرسايل أهم مني؟ لأ ويت كدا! على ما أعتقد إنت وصحابك مبتتكلموش إلا وقت القهوة ودلوقتي مفيش قهوة
- ايوة ايه فيها ؟
- بحسب معلوماتي وربطي للأحداث ف في إثنين بيفتحوا دلوقتي ، سلمى ورشا
- مين دول؟
- سلمى ورشا اللي اشتغلت معاهم في الصيدلية سنة ٢٠١٨ ،سلمى طويلة وبتلبس دريسات ، وسلمى قصيرة وبتسيب شعرها  جيبت الأكونتس بتاعتهم وقلبتها وراقبتهم
- لأ مش متذكر والله
- وايه القميص ده؟ مش هو ده اللي شاريه من أسبوعين؟
- اه هو اللي إنتِ اخترتيه
- وبتسألني لو الست عرفت جوزها عاملها مفاجأة هتعمل ايه!
- ايوة سؤال عادي
- وجايب تورتة ؟
- ايه اللي فيها يعني
- ويا ترى طويلة زى سلمى ولا قصيرة زى رشا؟
- هى مين؟
- وفهمتها إني أختك ولا بنت خالك اللي هتموت عليك؟
- أفهم مين؟
- دوقت القُرص اللي عملتها؟
- قُرص ايه؟
- أصل أنا سبقتك وجمعت الأحداث وعارفة الرجالة بطبعهم فعملت قُرص نوزعها على رو........
- استني! هما قالولك إن عيد ميلادك النهاردة ولا ايه؟
- ايه!
- أختك قالتلك؟ متعرفيش؟ التورتة والمفاجأة والشو ده كله منبهكيش لحاجة
- هو في الحقيقة نبهني فعلا
رفع حاجبه -  ل ايه؟
- لا بلاش تعرف ..أنا نسيت اصلا!
- تقريبًا كنتِ بتقولي قُرص ، قرص نوزعها على  ايهبقى ؟
- قرص؟ أنا قولت قرص؟ يعني ايه قرص؟ أنا أول مرة أسمع الكلمة دي ، دوا ده يا حبيبي؟
- وطبع الرجالة؟
- الرجالة بطبعها حنينة وعاقلة ، هتعمل عقلك بعقلي! إنت قاطعتني من قبل ما أكمل ياروحي
- اتعدلي هه ، اتعدلي وافرحيلك بالكام يوم اللي هتعيشيهم ، أو هتعيشهملي مش ضامن
- فرحانة من قلبي لروح قلبي ، هروح أعملنا شاى ..( بصيت في التليفون بتاعه وزعقت)- مين ريحانة الجنة دي بقى ؟ عملالك كومنت من دقيقتين بتقولك " حلوة الصورة يا حبيبي "،  والله هعرفها وأجيبها وايه ريحانة الجنة وجاية تعمل كومنت لراجل متجوز! دي مش هتورد على جنة دي
- أمي
- نعم؟
- ريحانة الجنة تبقى أمي
- هى مامتك عملت أكونت جديد؟
- اه
- قبل ما تتعصب! أنا كنت عارفة بس بعمل فيك مقلب ههه ، اصلا باين من الاسم إن صاحبته خلوقه وذات علم وتقوى
-ميار !
-  تاكل قُرص؟

#ميار_طلعت