يومًا ما سنلتقى

(٦٣)

- سيبيه وتعالي قبل ما يشوفك
- مش هيشوفني متقلقيش
- وافرِض شافك؟
- وافرِض مشافنيش يا ماما ؟
- أبوِك لو جه وم.....
-هاجي قبله وبعدين ده ابن أخته وكاتبين الكتاب !مش كفاية بلملم شتات العيلة!كمان هتزعقولي على تأخيري؟
ضحكت - اقفلي طب
قفلت التليفون وحطيته في الشنطة ووقفت ورا عمود النور أراقبه وهو قاعد على الصخرة قدام البحر ،من وقت ما بباه اتوفى وهو بييجي هنا ..كدب عليهم وقال إنه بخير وإن شوية وقت بس هينسوه ،ولإن أنا
مش هما مصدقتهوش
إتكلم وهو باصص قدامه - تعالي
بصيت حواليا وطلعت من ورا العمود وقت ما قال
- متبصيش حواليكِ كتير وتعالي
إتقدمت وقعدت جنبه - هو أنا كنت باينة؟
- شغل المراقبة وmbc أكشن مش شغلك لأ
- طب ما تيجي تقعد معانا قاعد لوحدك ليه؟
- وإنِت بتيجي هنا ليه؟
- عشان إنت لو مكاني هتعمل كدا
- كل يوم؟

يلاهوي هو بيشوفني؟ طب ليه الإنسان بيسيب أخوه الإنسان واقف ورا العمود لوحده؟
غيرت الموضوع - تعرف إن الفرخة ليها جناحين مبتعرفش تطير بيهم ،هل إنت تعرف إن الفرخة..........
- أعرف إنسان بيقعد في البيت تعرفيه؟
- بصراحة لأ
مش عارفة بندفع ليه وبنزل من بيتي وراه ، خوفي عليه طبيعي لإنه قريبي ولإنه زوجي ،بس الوقت ده كان ممكن أنزل ألف مع شهد شوية .. ندور على درجة الطرحة اللي مش لقياها ، ناكل أكل ملوث..نتأخر ونتهزأ ، أقعد على النت معملش حاجة غير إني ألعب ..أنكد على حد مثلا!
ياريته يقّدر إني فضلته على التليفون والُطرح
- تعرف إني بفضلك على التليفون واللف والأكل؟
-............
- طب مرة واحد مردش على واحدة مراته قامت عملت منه لانشون ، عارف اللانشون؟
-............
- لأ ما أنا مش هفضل أهزر وإنت تسكت ..لو مهزرتش ف اعتبر إننا مش قرايب من النهاردة!
- سهلة ! أنا معرفكيش اصًلا
- ده كلام انفعالي متهور متاخدش بيه ! نبدأ من الأول؟ نبدأ .. تعرف إني بفضلك على التليفون و......
إبتسم - تعرفي إن محدش بيقعد معايا كدا زيك!
بصيت في الأرض وضحكت - بص يا سيف إنت تكمل زعلك أحسن ، أنا هسكت خالص
مردش ف رفعت راسي وبصيتله - لأ والله بهزر!
- تاكلي؟
وقت ما الإنسان بيحس إنه هيضعف ، بيقف يضحك على زعله من بعيد ويستقل بيه لإنه عارف إن محدش هيقدر ، وقت ما بزعل وبعيط، وقتها مببقاش بخير
بقول لماما بإبتسامة "أنا بخير هدخل أنام شوية"
وبدخل أكمل عياط تحت الغطا ، وقت ما ماما بتدخل تشيل الغطا من عليا بتبتسم وتقول " أنا مش زيهم عشان تضحكي عليا " ببقى عايزة أشكرها ، عايزة أحضنها لإن في حد بيحس بيا هنا ، بقيت متأكدة إني
مش لوحدي ، أهو أنا عيزاه يثق فيا ، يعرف إنه مينفعش يخبي زعله عني ، لازمتي ايه ولازمته ايه لو كل واحد هيخبي زعله عن التاني ؟

مسكت إيده وقت ما جه يقوم وبصيتله - اللي إنت فيه ده مش هيريحك
- مين اللي حابب ينكد دلوقتي؟
- مبهزرش! أنا هنا موجودة جنبك ، إنت عارف إني مش هخيب ظنك صح؟
- عمرك ما خيبتيه
- يبقى ندعيله ، دعوة منك ومني هيبقوا إتنين وهيفرح بيهم ، ازعل عليه مقولتلكش لأ!، بس متبقاش لوحدك
- مع الوقت هبقى بخير