يومًا ما سنلتقى

٣٨

- إياكي تتجوزي ولا ترتبطي ،سمعاني! إياكي
-طب .....
-ولا أسمعك بتجيبي سيرة الارتباط قدامي
-ياشهد .....
-الرجالة كلهم واحد ؛ هيرسموا عليكي في الأول وإنهم محور الكون وفي الآخر هيدوكي على قفاكي وهتمشي طول طريق حياتك حاطة إيدك على قفاكي
-طب أقعدي طب ! هو....
-هو! صيغة مذكر؟ مسمعكيش بتجيبي سيرة الرجالة قدامي فاهمة؟
هزيت راسي بسرعة -فاهمة
معرفش هي بتشاور بإيدها ومضيقة عنيها كده ويكأنها بتتخانق ، طب أنا ذنبي ايه طب إنه سابها؟
- سمعاكي
رفعت راسي وبصيتلها -نعم
- سمعاكي وانتي بتفكري بصوت عالي 
- مقصدش (سكت شوية وكملت )- طب وانتي هتتصرفي ازاي ؟
- ايه السؤال ده؟
- يعني عشان لما أرتبط وأتخان يبقى عندي خلفية عن الموضوع
قربت مني وشدتني من ياقة التيشيرت - عشان لو ايه؟
- بعد الشر يعني لو ارتبطت
- يعني الكلام اللي بقولهولك من الصبح ده كله طار؟
- بصي في واحد كلم بابا .....
غمضت عنيها ورفعت حواجبها -هتتجوزي صح؟
- لأ خطو.....
- ارفضي
- ياشهد ده الكراش
- انتي تعرفيه أصلا؟كراش مين انتي بتنزلي من البيت أساسا؟
- لأ بس حاسة إني بكراش عليه ،اسمه حلو
- طب ومامتك قالت عليه ايه؟
- زي كل عريس بييجي ، أخلاق وأدب وإحترام وجاي من كوكب عطارد
- خلاص اقعدي معاه وشوفيه أهو حتى نخرج من النكد ده
- لأ أنا أرفض ، ما انتوا متفرحوش على حسابي أنا!
- اقعدي معاه وبعدين نبقى نرفض
- طب إفرضي حبيته؟
- هتحبيه من أول قعدة مع بعض؟ انتي عايزة تجننيني
- أول ما هيضحكني هحبه والله أنا أدرى بنفسي
- ميار!
- بلااش افتكري إني قولتلك بلااش
- وقتها هنتصرف
-بسيوني أنا لو ما إرتبطش قبل السنة ما تخلص هفضحكم
- طب البسي عشان منتأخرش عالفرح
( يعني أروح الفرح معرفش حد وبفضل قاعدة زيي زي الكرسي ، انتوا جايبني المكان ده عشان تهزؤني ولا ايه؟)
وقفت قدام باب القاعة وبصيت لشهد
- حلو الفستان؟
-اه
-طب الطرحة مظبوطة ؟
- أيوة
- احلفي؟ أصل أيوة دي مش طالعة من قلبك
- والله مظبوطة وأقسم بالله مظبوطة وزي القمر وهربانة من المجموعة الشمسية
-طب ما بلاش ندخل القاعة أصل نفسي هتهفني عالإرتباط وأنا مش أده
- هيعدي طالما أنا معاكي
- أنا بروح من أى فرح وصوت جوايا بيقول ودوني على بيت حبيبي نعيش مع بعض فيه
- دونت ووري تمام؟ دونت ....يلاهوي ايه ده!
-شهد!
إتكلمت بصوت واطي قبل ما تمشي - أنا قررت أرتبط تاني
( أهو من قبل ما ندخل القاعة  ارتبطت ، أما لما ندخل جوا هتعمل ايه؟ أنا قلبي كان حاسس ، الأفراح ليها تأثير سحري على قلوبنا والله)
روحت البيت ونمت ، صحيت على صوت السيد قشطا اللي مصحباها
شدت الغطا من عليا - اصحي
- اطلعي بره يا شهد
- أنا عرفت اسمه من مامتك
- شكرا عشان مسار حياتي كان هيقف لو مكنتيش عرفتي اسمه ، اطلعي بره عشان مهزأكيش عالصبح
وقفت وشدت المخدة من تحت راسي وحدفتها عالأرض
-أنا صاحية من الفجر بجمعلك معلومات عنه
- ماهو بابا عارفه!
- جيبتلك الفيس والانستجرام ورقم الواتس وتاريخ عيلته وأسامي صحابه ...(سكتت وسندت بإيدها على الدولاب وضيقت عينها )-  عنده صاحب اسمه عمر لو ميلزمكوش ف حاجة ف هو يلزمني
-والله هنادي على ماما انتي حرة!
- طب هتقولي لمامتك ايه؟
- قولتلها امبارح إني موافقة أنا قولتلك بلاش نروح الفرح لإني هوافق
- حلو وخليه يجيب عمر معاه
- ييجي يعمل ايه هي حفلة؟
- أنا بقترح اقتراح بس
- طب هما المفروض هييجوا بكره هه ف ألبس ايه؟
- مفروض تسأليني على الأسئلة اللي هتسأليهاله مش هتلبسي ايه؟
- طب أسأل ايه؟
- أولا لازم يكون عنده خبره في الكوميكس والميمز ،يكون بيحب الهزار ومش نكدي احنا مش ناقصين نكد ؛ وميفتحهاش عالبحري ويبقى فرفوش أوي أوي عشان هيخونك ، وأسأليه إن كان محترم وهيخونك ولا لأ!
- ماهو طبيعي هيقول إنه محترم
- متقاطعينيش!
- حاضر
- وإسأليه إنه يحفظك قرآن بدل ما انتي بتطردي من كل دار بتروحيها
- حلوة النقطة دي
-وشوفي إن كان يعرف في إختيارات وأذواق البنات في الهدوم وغيره ولا لأ
-بردو حلوة دي
- وميتجوزش غيرك ويحترمك ويحترم رأيك ، وإن الحياة بتتقسم عليكم انتوا الإتنين ، يعني تتشاوروا في كل حاجة
- ماشي
-وإنه مينيمكيش زعلانة ومينكدش لإن النكد ده شغلنا إحنا
- بس أنا مش عايزة أنكد
- لا هتنكدي لإنك لو منكدتيش عليه هيخونك ولو نكدتي هيخونك شوفي انتي هتتخاني يعني هتتخاني
- بس ماما قالتلي إنه محترم
- سؤال أخير
-قولي
- إسأليه إن كان عمر صاحبه مرتبط ولا لأ
- أنا غلطانة إني بتكلم معاكي على أساس إنك واحدة عاقلة
(أنا أصلا وافقت عشان أتصور بالدبلة وبدل ما أنا بقيت شبه كيس الجوافة وسط صحابي قولت أعمل حاجة صح وأوافق)
المفروض إنه قاعد قدامي ومفروض نتكلم ونسأل بعض بس اللي مش فهماه شهد قاعدة جنبي ليه لحد دلوقتي؟أنا مبسوطة بقعدتها والله حتى مش حاسه بتوتر
قربت مني وإتكلمت بصوت واطي - بت ده شكله محترم
-معرفش
- طب إتقلي عليه عشان نبان إننا ولاد ناس محترمين
-عشان نبان! على أساس إننا جايين من الشارع؟
- ومتنسيش......
مكملتش كلامها لإن ماما نادت عليها
- اسمي سيف
-اه ماما قالتلي
-أنا......
- بص أنا معرفش هما بيسالوا ايه أو بيقولوا ايه في القاعدة دي بس هسألك على كام حاجة كده
-إسألي
- هل هتنكد عليا وهتروحني البيت معيطة لما نتجوز ؟
- أكيد مش هسيبك تنزلي معيطة يعني
- يعني أقعد أعيط في البيت عادي؟ المشكلة عندك في النزول وبس؟
- لا مش كده بس..........
- هتخوني لما أبقى زنانة ومملة ........
- لا لحظة كده! اللي أعرفه عنك إنك زنانة وأنا معترضتش ف بيس يعني
- دي أسئلة ولازم تتسأل
- مين اللي قالك كده؟
-شهد
إبتسم وسند الكوباية على الترابيزة - وأنا لما أجاوب الاسئلة هبقى كده راجل بيرفكت؟
- على حسب كلام شهد ف اه المفروض تبقى كده
- طب هايل كملي
-طب هتخوني؟ وهتبقى راجل تلاتيني مراهق؟ وهنزل صورك على النت وأقول هاخد من وقتكم دقيقة و حسبنوا معايا عليه
-ايه علاقة العمر بالخيانة ؟هو في ايه؟
- هتعمل ايه لو خونتني؟
-على حسب كلامك أنا اللي هبقى خاين فأظن إني مش هعمل حاجة مش هبقى خاين وبجح كمان
-مبحبش النكد ولو تعرف في الكوميكس ياريت تعرفني
-معايا فولدر عالتليفون مليان كوميكس
- حلو ،إنت محترم؟
-نعم!
- يعني شخصيتك محترمة ولا مشمحترم وجاى تعمل نفسك محترم؟
-هو في ايه؟
- هتحفظني قران وتذاكرلي بدل ما ماما بتعايرني بدرجات الفاينال؟
- معنديش مانع موافق
- هتحترمني وتحترم رأيي وردودي وهتختار معايا كل حاجة؟
- أظن إن الحياة بتتقسم ما بينا ف اكيد اه
رفعت راسي ويكأني أنثى متكبرة، وإتكلمت بسرعة وأنا بهز كتفي - طب أنا تقيلة وبنت ناس اوي
ضحك - تقريبا في حد محفظك الكلام ف داخله تقوليه بسرعة قبل ما تنسيه
(هو بيضحك على ايه؟ والله هضحك أنا كمان وهحبه
أنا مستحيل أحبه أصلا مش كده يا ضميري؟ ضميري..ضمي...ايه ده إنت نمت )
عدى ٣ شهور  بعد ما إتخطبنا ، أنا مشوفتش منه وحش ، بحس إننا متفاهمين جدا أو تفكيرنا قريب من بعض
بس أنا  هاخد حذري و هسمع كلام شهد وإن الرجالة كلهم واحد وهيرسموا نفسهم  في الأول وإنهم......
-ميار
الله !قلبي بيتكلم ؟ أنا أول مرة اشوف قلبي بيتكلم
-مد إيدك عشان نصور الدبل
- ليه؟
- عشان أنزلها ستاتس عالواتس زي صحابي المخطوبين
-لازم؟
- مش عارفة بس أنا قولت لما هرتبط هصور الصورة دي ، نفسيتي هترتاح
- ايه ده؟
أخدت التليفون من أيده وصورت - صورت بالكاميرا بتاعتك عشان معنديش مساحة عالتليفون مساحته هتخلص خلاص
-انتي مليتي المساحة بتاعتي ، أكل تصوريه ..هدوم تصوريها ...وبتنزلي صور لفساتين على التليفون ولما بتشتري بتشتري غيرهم أصلا ، طب هعمل بيها ايه مش فاهم
- عشان مساحتي متخلصش ، دي من أساسيات وقواعد الخطوبة ولسه هنجيب التيشيرتس اللي زي بعض
- ماما جابتلك حلل امبارح بس كنتي نايمة تقريبا
- وجابت حلل ليه؟
-عشان نحطهم في المطبخ بلاش غباوة
-  ايه ده هو أنا هطبخ؟
-اه ده من أساسيات الجواز بقى
-شوفت الموضوع قلب بجد ازاي؟ أنا كان غرضي أتصور بالدبل بس والله ،بيبي إحنا أتحسدنا
- انتي ايه مميزاتك؟
-معنديش مميزات
-وعيوبك؟
-كلي عيوب ها ايه تاني؟
- حيث كده بقى......
- متاخدش الكلام على قلبك ياعم ، شوف أنا هبهرك كل يوم بشخصية بحيث ميبقاش في ملل في حياتك
- واضح
- أما الراجل  مفروض يدخل من البيت ب وردة او يحفظله بيتين شعر أو يجيب أيس كريم مثلا!
- وده من أساسيات ايه؟
-من أساسياتي أنا

"رأيتك ضوء في نهاية نفق مظلم"