يومًا ما سنلتقى

٧٤

أنا عمري ما بغير على الناس اللي حواليا ، يعني مبشغلش عقلي كل ربع ثانية إنهم خرجوا من غيري ، اتعرفوا على حد جديد ، لأ خالص ، وبما إن جوزي فاكر إنه بيستغل غيرتي عليه في كل مرة ف قررت أتصرف بذكاء للمرة الأولى في حياتي ، لإن كل واحد ليه مساحته الشخصية اللي مفروض ندهاله

- فاكرة البنت اللي قولتلك إني شوفتها في الكافيه لما كنا قاعدين فيه أنا وصحابي
- اه طبعًا فكراها ، القمر ده ميتنساش ، ده من مواصفاتك ليها حبيتها
فاكرة تعابير وشه لما رفع حواجبه بإندهاش
- حبيتيها؟

" مش هتقمص زي كل مرة وأقول بنت ايه وازاي تشوفها وازاي تحكي وأزعل وتقلب بخناقة ، ليه ؟لإن بالصدفة ..بالصدفة العابرة شيماء صاحبتي عرفت من ولاء صاحبتها اللي صاحبة بنت عمتها شغالة في الكافيه هناك ، إن جوزي مبيروحش الكافيه ده أساسًا ، أكيد هتسألوا عرفت جوزي منين؟ بالصدفة بردو "

- عارفة يا ميار
- لأ عرفني
مسك الكتاب ويكأنه مشغول في القراءة ، وبصلي بطرف عينه :
- شروق اللي معايا في الشغل بتفطرنا فطار ملوكي
- كل الدعم لشوشو...كل الدعم يا قمر 
قفل الكتاب - نعم!
- ابقى سلملي عليها ، وقولها إني حبيتها هي كمان

" مش هتخانق وأقول زي كل مرة ، إني بعمله فطار أحلى من أى مكان ، وبيصحى يلاقي هدومه مكوية ، وفطاره جاهز ، وبعمله شاي وقهوة أحلى من اللي عم عبده القهوجي بيعملهم ، وإن زهرة شبابي ضاعت وأنا انطفيت ، تؤ تؤ ، ليه بقى؟ لإن  سبحان الله بنفس  الصدفة العابرة بتاعت المرة اللي فاتت عرفت من مرات صاحب أخ جوز ابن خالة شيماء صاحبتي اللي شغال معاه في المكتب ، إن المكتب مفهوش بنات ، ولما عرفت إن فعلًا فعلًا في بنت اسمها بيبدأ ب حرف الشين من" شروق" في الشركة ، شيماء قالتلي إن - للأسف الأسيف - حد مجهول اشتكى لمدير الشركة ونقلوها من الدور خالص
- أنا رايح القهوة
ابتسمت - تروح وتجيلي بالسلامة يا حبيبي
- ايه ده!
- في ايه؟
- مش هتقولي حاجة؟
- لأ
- مش هتتصلي كمان ربع ساعة وتنكدي؟
- مستحيل
- طيب ، مع السلامة
وقف عند باب الشقة ولف يبصلي:
- انتِ قولتِ حاجة؟
-لأ

" هو ماله مستغرب ليه كده ؟ يقصد يعني إني عايزة أقول زي كل مرة متنزلش وانت اتجوزتني عشان تفضل تخرج مع صحابك وتسيبني هنا لوحدي ، ومفروض نخرج احنا الإتنين؟ تؤ ،ليه؟ لإن من حقه يخرج مع صحابه ومن حقه يبقاله وقت يقضيه زي ما هو عايز ، زي ما بالظبط ليا أنا كمان وقتي ، وبما إني عارفة إن لو قولتله تعالى نخرج إحنا الإتنين هيقول خليها بُكرا وبُكرا يقول مش فاضي ف خليه يخرج مبسوط

ناديت عليه بسرعة قبل ما يخرج - سيف
- اه..أنا كنت عارف إنك هتقولي حاجة ، ما مش معقول هتسكتي ، متبقيش ميار لو سكتي
- هنزل أنا كمان على طريقك
- ايييه؟؟
ابتسمت - هخرج أنا كمان
- تخرجي تروحي فين؟
- هروح لماما وآخد أختي ونروح نشتري فستان عجبني
- مش انتِ قولتيلي هنروح نشتري الفستان ده مع بعض؟
- وانت قولتلي مش فاضي يا حبيبي فاكر؟
- مامتك قاعدة في الشقة اللي عند خالتك دلوقتي صح؟
- صح ماشاء الله ذاكرتك قوية
- اللي هي عندها ابن خالتك اللي أكبر منك ؟
ضحكت- اه اللي كنا بنلعب مع بعض زمان ده ، عمر دمه خفيف اوي ، ده لما كنا.........
- انتِ هتحكيلي قصة حياتك !
- الديتيلز يا سيف ، الديتيلز مهمة ، طب هل أنا اتضايقت لما حكيتلي عن شروق وشيماء  والكام بنت دول؟
- اه وقلبتِ اليوم نكد
- في غير السبعتاشر مرة اللي اتضايقت فيهم؟
- لأ بصراحة
- خلاص بقى أما في ايه مالك؟ وبعدين ده عمر ، زي أخويا عادي

" وطبعًا طبعًا ابن خالتي مسافر من قبل جوازنا وعمل إقامته هناك هو وخالتي ، بس الإنسان لازم يستغل ابن خالته الإنسان ولا هي صلة قرابة وخلاص! الواحد ميطلعش منها ب حاجة يعني؟"
- هاجي معاكي نجيب الفستان
- لأ ميرضينيش ، انزل لصحابك واتبسط
- ١٠ دقائق ، قدامك ١٠ دقائق ملقتكيش مفيش خروج خالص
- هما ٥ دقايق وهتلاقيني قدامك

" وطبعًا لإنه باين إنه متعصب ف مش هقوله ال١٠ دقائق دول بقف فيهم قدام الدولاب أختار منه طقم،  ولازم عالأقل ساعة ألبس فيها ، أنا أقوله حاضر وكل ما ينادي أقوله بلف الطرحة أهو قربت ، بدور على الدبوس خلاص أهو "

- لما تيجي تتأكد من شعرك إنه متسرح ، ابقى أرفع إيدك الشمال وطبطب بيها على شعرك مش إيدك اليمين ، ولما تصدع..اكيد يعني الإنسان مُعرض للصداع يا حبيبي ، ف بردو أرفع نفس الإيد الشمال واسند راسك عليها ، و يا سلام بقى لو عرفت تمشي وانت رافع إيدك الشمال كده وموجهها للشمس ف هتاخد فوايد كتير
- ليه يعني؟
- عشان بتبقى قمر في الحركة دي وأنا بحب أشوفك قمر دايمًا

" طبعًا مش هياخد أى فوايد غير إنه هيتجنب جزء من نكدي ، هو جوزي وقمر ويُحترم وكل حاجة ، و الإيد اليمين مبتفرقش عن الشمال في حاجة أصلًا ، بس عشان كل اللي يبقى مُقبل عليه يلمح الدبلة في ايده من بعيد ف يعرف إنه مرتبط ب أنثى موجودة في البيت ومش هيرتبط بغيرها إن شاء الله"

- هتفطر هنا بما يرضي الله ولا شوشو تفطركم؟
- مبحبش آكل من إيد حد غيرك
- أصيل ..لأ أصيل وبتعرف تثبتني ، أحلى فطار عليك

مشيت خطوتين ورجعتله
- وانت جاي من الشغل هتروح الكافيه اللي فيه........
- القعدة معاكي تغنيني عن كل الدنيا
- عجبتني..عجبتني وأقنعتني
- ده لإنك إنسانة قنوعة وبترضي بأى حاجة
- طب بمناسبة إني إنسانة قنوعة والكلمتين الحلوين دول ، كنت بفكر أعمل أكل هنا وناخده نروح نقعد على البحر شوية مثلًا ، بس قولت لأ هو هيقول مش فاضي ف قولت أسكت وخلاص
-  مين قال مش فاضي؟ لأ أنا فضيت
- ياراجل؟
- الساعة ٥ كويس؟
- اللي تشوفه يا حبيبي
- يبقى الساعة ٥ ، أجيبلك حاجة وأنا جاي؟
- سلامتك

" وأهم حاجة أهم حاجة ، إن لكل واحد مساحته الشخصية ووقته الخاص اللي يقضيه في أى حاجة هو حاببها ، وصاحبته شيماء اللي بتجيبله المعلومات لحد عنده بدون اى مجهود يُذكر ..وطبعًا عمري ابدًا ابدًا ما غيرت على حد ولا شغلت عقلي ولو بربع ثانية في المواضيع دي"