يومًا ما سنلتقى

٤٣

-انتي شايفة إن الطلاق هو الحل المناسب؟
-مش شايفة غيره أصلا ، من الأول وإحنا مش متفاهمين ، إنت عارف إن الجوازة دي مكنتش هتكمل كتير ، ف لوسمحت ريحني وإرتاح
- انتي مش متفاهمة
- ولا إنت عارف تفهمني يا سيف ،لازمته ايه الجواز؟
- انتي اللي بتقنعي نفسك ب صورة غير اللي موجودة ! فيها ايه لو كل واحد اتنازل ونتقابل ف نقطة نعرف نكمل مع بعض فيها!
- الكلام سهل والله ، بس الفعل صعب ، لو قولتلك ماشي هنبقى بنضحك على بعض ، سبق وحاولنا ورجعنا لنفس النقطة تاني ، بنجري في نفس المكان
(المشكلة إن تفكيره مش زي تفكيري ، أوقات بحس إني في عالم وهو في عالم تاني خالص)
- نحاول تاني؟
- المحاولة هتبقى زي عدمها ف بلاش ؛ بنتعب أكتر كل مرة والمسافات بتزيد ما بينا
( ماما اللي خليتني أتجوزه لإنها تعبانة ومش حِمل نقاش، قالتلي إنها مطمنة عليا وأنا معاه ، ومش فاهمة ايه علاقة تعبها بجوازي منه؟ الحياة دي متعبة ومملة ومش مرتاحة فيها ، ولا حتى عارفة أفهمه، هو صعب وهادي وأوقات بيبقى بارد وبيتجاهل تصرفاتي ، وأوقات تانية بحس إنه طيب وإن الحياة معاه سهلة ، الموضوع أصعب بكتير مما كنت أتخيل قبل الجواز )
طلعت قعدت جنبه على الكنبة وبصيت قدامي
- بتتفرج على ايه؟
-عايزة تقولي ايه؟ ادخلي في الموضوع علاطول
اخدت نفس وطلعته ببطئ واتكلمت بسرعة- أنا عايزة أروح لماما
- ماشي بس هاجي اخدك بالليل
- لأ عايزة أقعد معاها كام يوم
- على الساعة ١٠ كده تكوني خلصتي؟
- هقعد معاها أسبوع
وقف ومشى خطوتين - أنا هشرب شاي تكوني لبستي، تشربي معايا؟
- سيف!
-أظن بتشربيه ٣ معالق
- هنزل وهقعد معاها أسبوع ومش هتراجع في قراري ابدا
وقف دقيقة وابتسم ورجع قعد عالكنبة مكانه - تمام مفيش نزول
عليت صوتي - إنت مش بتحبني ولا أنا ب.......
علا صوته ورفع إيده بتخذير -بلاش!
- ماهي دي الحقيقة ، طب هنقعد سنة؟ سنتين مثلا؟ وفي الاخر هنتطلق عشان مش نافعين مع بعض
- أنا هادي لحد دلوقتي وبلاش تزودي في الكلام أكتر ، أنا عامل حساب اللي انتي فيه وحساب لمامتك .....
- واتجوزتني عشان ماما صح؟ أنا صعبانة عليك يعني؟
إنت إنسان مستفز
إتحرك من قدامي ووصل لباب الشقة عشان يمشي
- مفيش فايدة فيكي
-اه أنا مفيش فايدة فيا ومش هحب عيشتنا وإعمل اللي تعمله
قفل باب الشقة وراه جامد ، جسمي إتنفض على صوت الباب وقعدت عالكنبة
(مش هنكر إني بحس من ناحيتة بمشاعر لطيفة كده ، زي إني بحترمه وبطمن بوجوده وبحب أسمع صوته دايما ، صوته أمان، أو ..أو بحبه ،بس مش عايزة حد يحبني لسبب ،لشكلي مثلا ولا لشخصيتي ،ولا عشان وصية حد ، مش طالبة حاجة غير إنه يحبني لإني أنا من غير أسباب ، مش يحبني عشان ماما مثلا! طب افرض كان بيحب واحدة قبلي !)
لبست ونزلت من غير ما أقوله ، تقريبا كنت حاطة عقلي في التلاجة قبل ما أنزل ، مكنش ينفع أخرج من غير ما أقوله ، لا لحظة كده ! عايزة يتخانق يتخانق ، كده هو جه في ملعبي
المسافة اللي مابين بيتنا وبيت ماما كبيرة ومعرفتش ازاى مشيتها ، عقلي مزحوم بتفكير كتير في الآخر بيوديني لطريق ضلمة ، لو بس يقولي إنه اتجوزني عشان بيحبني ..إتجوزني عشان عايزني أكمل معاه الطريق بكامل إرادته ومن غير ماحد يضغط عليه، لو بس يفهمني! )
طلعت النوت من الشنطة وكتبت
"ربما لم يرغب المرء في الحب بقدر رغبته في أن يفهمه أحدهم " ل /جورج أورويل
دخلت النوت في الشنطة تاني وروحت لماما ،كنت عارفة إن وقت ما هحكيلها هعيط ، مبعرفش أحكي عن حاجة تعباني من غير ما أعيط ...هما باكيدج كده مع بعض)
قعدت جنبي على السرير وحضنتني - اهدي طب حصل ايه
-مش عارفة آخد عالوضع الجديد يا ماما ، مسؤولية كبيرة اوي أنا مش أدها
- لإنك مش عاطية نفسك فرصة إنك تبدأي حياة جديدة ، متخيلة إن الطلاق سهل؟
بعدت عنها ورجعت بضهري ل ورا - ومتخيلة إن الحياة مع واحد أنا مش فهماه سهله؟
- انتي محاولتيش
- أهو بتغلطيني زي كل مرة ، انتي لو مش امي عرفيني!
- انتي بتحبيه
اتخضيت وقومت من على السرير وشاورت بإيدي على نفسي - أنا؟لا طبعا...مستحيل...اطلاقا
- لسه بردو بتقولي كلام عكس اللي جواكي ، متغيرتيش
- هو مش لما حد بيضمن وجود حد وحبه ليه ف بيسيبه
ضيقت عنيها بمكر - والحد ده بيسأل ليه؟
رديت بتلقائية - يمكن يكون بيحب حد
ضحكت - يبقى بتحبيه
- ايه!...هو..مش...لا لا واصلا هنطلق قريب
بصت للأرض بخيبة مصطنعة- ماشي وأهو يتجوز واحدة تحبه
انفعلت وعليت صوتي -يتجوز ايه ده أنا أقتله ، ال يتجوز ال ،أروح أنا أبيع ترمس بقى
- مش انتي عايزة تطلقي
- اه...لا
اخدت نفس وقعدت جنبها وسندت راسي على رجلها
- هو ليه مش عايز يفهمني؟ ليه صعب كده ، طب ولو قولتله إني بحبه ماهو هيضمن وجوده ويمشي ، هو كمان مبيحبنيش
- وليه ميكونش بيحبك؟
- عشان مش عارفة
الجرس رن ف ماما ابتسمت - روحي افتحي ل جوزك
اتعدلت وبصيتلها -عرفتي ازاى إنه هو؟
-مين هييجي الساعة ١١ بليل غيره؟
(طب ما تروحي تفتحي انتي يا ماما وتكسبي ثواب ، يعني أنا عرفت إني غلطت بس هو اللي عصبني! مش اخلاق دي يا عم)
فتحت الباب وانا عارفة اني هلاقيه واقف وحاطط ايده ف جيبه وبيهز رجله بتوتر
- يلا
-طب مش ......
رفع حاجبة واتكلم بعصبية -يلا! مش هكرر كلامي كتير
( بصيت ورايا لماما ملقتهاش ، الأمومة في أبهى الصور )
-دقيقة طب هلبس الطرحة وجاية
- لو كترتي عن الدقيقة .....
- قولت جاية!
دخلت الأوضة ولفيت الطرحة
-انتي نزلتي من غير ما تقوليله؟
-عارفة اني غلطت يا ماما
- متحاوليش تعصبيه وسيبيه يهدى
- هجيلك بكره ،سلام
أخدت الشنطة وطلعتله
( طول الطريق مبيتكلمش معايا ، ايه هترمي بينا العربية من فوق الكوبري ولا ايه ياسطا)
دخلنا الشقة ، وقفل الباب جامد
- نزلتي من غير ما تقوليلي؟ على أساس إنك متجوزة كيس جوافة؟
رجعت ل ورا خطوتين - ماهو ..ما....
-سامعك انطقي
- إنت اللي عصبتني وكنت عايزة أكلم ماما ف...ف...
- أنا مش قولتلك هوديكي! وعندتي معايا
- إنت اللي بتعند معايا ، إنت اللي مصعب كل حاجة
ضرب إيده في الحيطة وزعق -  انتي اللي مصممة تنفذي اللي في دماغك ، انتي اللي عايزة تهدمي اللي بينا بالعافية
- أنا عارفة اني غلطت و.......
-افرض كنتي تهتي ولا حصلتلك حاجة ، وكعادتك بتقفلي التليفون
( جوزي اللي بيخاف عليا اوي ، طب أقوم أحضنه طب؟ لا لما أعرفه بالمصيبة التانية اللي عملتها
-بص هو في حاجة تانية
حط ايده في جيبه ولف يبصلي
- سامعك
-  إنت عارف إني مبيبقاش .....يعني....
-عملتي ايه؟
- طب احلف إنك ما هتتعصب!
- دي مش الإجابة على سؤالي
- طب ....طب بص ..هو يعني
-هنضيع وقت كتير ؟
- القهوة اتدلقت على ورق ليك جوه وأنا كنت نازلة
قرب مني وهز راسه بإستفهام - عيدي اللي قولتيه كده تاني
- كان في فنجان على المكتب وشنطتي اتخبطت فيه وانا نازلة مكنتش شيفاه
وشه إحمر وإتكلم بهدوء مخيف - ابعدي عني دلوقتي.
دخلت الأوضة بسرعة وغيرت هدومي وعملت نفسي نايمة ، يعني حبكت تخبطي في الفنجان اللي عالمكتب؟ ده انتي شنطة مشافتش ربع ساعة رباية ، طب اطلع أقعد معاه ولا هيتعصب لأ ، طب ما أنا مبحبش أقعد لوحدي وقت ما اكون متعصبة فأكيد هو كمان زيي ، أنا بشوفه دايما بيشرب شاي وقت ما يتعصب
قطعت ورقة وكتبت فيها
" متزعلش، أنا عارفة إني غلطت ، بس مش هتتكرر وعد ، تخيل إني قاعدة معاك دلوقتي وإني جنبك ف متفتكرش إنك لوحدك ، متنامش زعلان عشان مش بحب أشوفك زعلان ، بس ده مش معناه إني مش زعلانة بردو  ،ما إنت يا تعرف غلطك إنت كمان وتصالحني يا إما تصالحني والاختيار في ايدك ف براحتك يعني
هه !
اسفه"
دخلت المطبخ وعملتله شاى وطلعتله بره ، كان قاعد في البلكونة وساند ضهره على الحيطة ، حطيت الشاى قدامه وسندت الورقة جنب طبق الشاى ودخلت نمت ، بعد ما أجبرت نفسي إني أنام
صحيت ملقتهوش في الشقة بس لقيت ورقة ملزوقة على التلاجة ،مكتوب عليها
" لو فيه أوبشن غير النكد عندكوا ف ياريت ياريت تطلعيه ، أنا اتعصبت إمبارح لإن عمايلك دي بتعصبني ف متزعليش ،خوفت عليكي لما نزلتي لوحدك ، مش عارف أصالحك ازاى او انتي بتتصالحي ازاى فعملتلك عصير جوافة سايبهولك في باب التلاجة ياكش تتصالحي بقى "
ايه ده ايه الوقاحة دي! ازاى ياخد قلبي كده ؟
بما إن بكره عيد ميلاده وبما إني بخطط أعمله ايه من شهر وملقتش حاجة ف هفاجأة
جه من الشغل نام
طب الغدا ياااا! آكل لوحدي يعني!
قعدت قدام الساعة لحد ما جت١٢ بليل
طلعت التورتة من التلاجة وحطيتها على الترابيزة ، ودخلت امشي على اطراف صوابعي عشان ميصحاش ، ماهو بردو حرام يصحى على صوت حاجة عالية
صرخت في ودنه وأول ما صحى فرقت البالونة في وشه
- كل سنة وإنت طيب
قام من على السرير بسرعة - في ايه في ايه
- فطين اصحى يافطين عيد ميلادك النهاردة
بص في الساعة وبعدين بصلي
- عيد ميلاد ايه اللي الساعة ١٢
ضحكت وشديته من إيده عشان نطلع بره -عشان أكون أول واحدة قالتلك
بص على الترابيزة ورفع حواجبه بإندهاش وإبتسم
- انتي عملتيها امتى ؟
- وقت ما كنت نايم
(ولاا! متبصليش كده يالا لأحسن هضعف والله !)
بعد نص ساعة النور قطع
صرخت - شغل الفلاش بسرعة شغله...شغله...ش..
-اااهدي..وترتيني
-العفاريت بتطلع في الضلمة ...شغل الفلاش بسررعة
-التليفون جوه على السرير ، هروح أجيبه
-هاجي معاك
وقفت وراه ومسكت في التيشيرت بتاعه مشى شوية ووقف
بصيت حواليا - و..وقفت ليه؟
متكلمش ف ناديت عليه بصوت أعلى - سيف متهزرش إتحرك
- خفي إيدك من على التيشيرت شوية خنقاني مش عارف أتنفس
وقفت دقيقة أستوعب كلامه وبعدين بعدت خطوتين ورجعت تاني مسكت فيه- اسفه حقيقي
-هاتي إيدك
رفعت حاجبي وإتنرفزت - وفين إيدك دي ،أنا شايفة حاجة
مسك إيدي ودخلنا الأوضة ونور بالفلاش
قعدت على السرير واستغطيت
- نامي طب ،متخافيش
- لأ ، لما النور ييجي
ضحك - مافيش حاجة اسمها عفاريت بتطلع في الضلمة ، أكيد العفريت مش هياكلك وانتي نايمة
- لأ في
- طب نامي وأنا هفضل صاحي لحد ما تنامي
- بجد؟يعني مش هتنام؟
-لا مش عايز أنام ،نامي انتي متخافيش
سندت راسي على صدره وبصيتله -اوعي تغمض عينك!
إبتسم - مش هيحصل
معرفش نمت ازاى ، صحيت لقيته نايم هو كمان ، قومت من غير صوت ومشيت على أطراف صوابعي عشان ميصحاش وفردت الغطا عليه كويس
دخلت المطبخ وعملت الفطار وشاى باللبن لإني بحبه وهو كمان بيحبه
دخلت الأوضة صحيته وطلعت قعدت بره ، ٥ دقائق وطلع ورايا
قعد على الكرسي وإبتسم - تسلم إيدك
- عملتلك الشاى اللي بتحبه
- حلو
- والأكل اللي إنت بتحبه
- جميل
- والفطار اللي إنت بتحبه
- طب ما أنا كمان بحبك
- والعصير اللي.....ايه؟
- لو بس تفهمي أنا بحبك أد ايه! وإني اخترتك انتي تكملي معايا باقي الطريق بإرادتي ، لو تعرفي إن الشمس بتطلع بس وقت ما بشوفك ، لو بس تحسي بإن الحياة حلوة وهادية وإحنا مع بعض
- لو تعرف إنت أنا بكتبلك أد ايه! وبهتم بأصغر حاجة بتعملها ولا بتحبها
بص على الشمس من البلكونة وابتسم - الشمس منورة أوي النهاردة
- لإنك هنا...معايا

"رأيتك ضوء في نهاية نفق مظلم"