يومًا ما سنلتقى

٦٥

- أتخطب مرة بس وبعد كدا نفركش عادي
- تؤ تؤ مينفعش
- طب أجرب إحساس الخيانة والنكد والمرأة ذات القلب المنكسر زي الروايات
- أنا قصرت معاكِ في النكد ياشهد ؟ متحسسنيش اني مقصرة
- بصراحة لأ
- خلاص يبقى بلاش
- والله هفرح أنا متأكدة ، طب ألبس الأبيض دقيقة بس..دقيقة اتصور بيه وأقلعه تاني
- ياحبيبي دي أفكار سوداوية ما بعد١٢ ، هتصحي الصبح هتشيلي الفكرة دي من دماغك وهتحسي إن الأكل مسيطر على أفكارك عادي
- طب مش لو سيف اتقدملك هتوافقي؟
-  سيف مين؟ سيف سيف؟ ده لو آخر واحد في الدنيا مستحيل اوافق..جطعة رخامة متنقلة  ، اخر مرة شوفته كنت هتخانق معاه من غير سبب
- عشان هو هادي؟
- عشان..من غير سبب والله ، هو في حد عاقل يحب اصلا؟ الناس اللي بتتجوز دي عقلها بيروح منها وبيرجعلها بعد الجواز
- طب حيث كدا بقى أنا وافقت على العريس وهنعمل خطوبة علاطول بما إنه مش غريب
التليفون وقع من إيدي ، لحظة! هي بتهزر؟ أنا عرفاها لما بتروح لفرح بترجع  عايزة تتخطب لأى حد وخلاص..لو شافت كلب معدي هتحبه ! ده تأثير الأفراح أنا قولتلها بلاش تروح
مسكت التليفون وحطيته على ودني - دمك تقيل ومتهزريش! 
- هتختاري معايا الفستان هه هه هه
- فستان ايه؟  هو انتِ مبتهزريش؟
-  لأ أنا عقلت وقررت أتخطب
- متفكريش وانتِ لسه راجعة من الفرح ، استني لما عقلك يرجعلك
- ولو ولو هتخطب
سكت دقيقة معرفتش أتكلم ، أو مش لاقية كلام أقوله في موقف زي دا! من وأنا صغيرة عايشة مع ماما هنا ومبشوفش بابا إلا كل سنتين مرة ده لو افتكر ، شوفت دموع ماما كل يوم قبل ما تنام وهي بتحكي لصورة قدامها إنها غلطت باختيارها وانا اللي بدفع تمن ده ، مينفعش أتجوز وأجيب أطفال تعيش مشوهه نفسيًا في العالم ، مش هيلاقوا اللي يتقبلهم، هيمشوا في الطريق ناقصين حاجة ، وأنا بحبها ومش عايزاها تتأذى ومش هسمح لحد يإذيها
- ميار ..مشمش انتِ سمعاني؟
سألتها بهدوء  - هتتخطبي لمين؟
- لعمر ابن خالتو ، شوفتيه صح؟ ما أنا مكنش ينفع أتخطب غير لما أقولك ..متقلقيش عنده أخ توأم ، وعنده صحاب ف أنا عاملة حسابك في الليلة دي لو متخطبتيش  لسيف
مضحكتش لهزارها كالعادة وحاولت أداري على صوتي المخنوق - رايحة هعمل حاجة وجاية
- طب والعريس؟ والخطوبة؟
- مش هسيبك النهاردة غير لما أعرف كل حاجة
ضحكت - راضية عني يعني؟
- زعلانة شوية صغيرين اني لسه عارفة ووقت ما آكل من أكل الخطوبة هحس إني مبسوطة وعد

مسحت دموعي وهمست - هتصل عليكِ كمان شوية.

قفلت التليفون وسندته جنبي على السرير ، ضميت رجلي ليا وركزت عيني على التليفون ، هي هتتصل تقول انها بتهزر صح؟ مينفعش حد تاني يشاركنا الدايرة اللي عملناها سوا ، أنا بحبها ف محدش يحبها غيري ، غصب عنها هتتشغل عني وهنكلم بعض قليل وممكن منخرجش وبعدها هتجيب أطفال ..هتكّون أسرة هي وهو وأنا مش هكون في الأسرة دي ، أنا بدأت أكرهه والله، كنت عارفة إن أكيد هييجي يوم وتتجوز وتكّون أسرة بعيد عن هنا وده الطبيعي ، المشكلة إني مكنتش عاملة حساب إنه هييجي بدري كدا
أنا صاحبتها الوحيدة..أنا اللي مفروض أفرحلها وأكون جنبها في اختيارها ونتيجته ، ابتسمت وقت ما افتكرت صوتها الفرحان ، هي مبسوطة ؟ خلاص أركن كل حاجة على جنب دلوقتي
اتصلت عليها بعد ١٠ دقايق ، ردت بسرعة
- كنت عارفة إنك هتتصلي ، اصلا مينفعش أروح أجيب الفستان من غيرك ، خططنا ال.....
- أنا اللي هختار اللون ! وهنحدد الأكل اللي هنجيبه وقتها ، ملييش في المطبخ اه بس مش هسيب مامتك لوحدها يعني يعني
سمعت صوت نطتها من على السرير وهي بتضحك
- أنا جيالك دلوقتي هه! سخني الأكل عقبال ما آجي عشان مأكلتش ونشوف على النت فساتين ونختار منها