يومًا ما سنلتقى

(٥٧)

- ولا ولا شايف ابن عمك الغتيت اللي هناك ده؟
- ماهو ابن عمك والله ، لاحظي إننا إخوات
- مفرقتش ، المهم تروح تضربه في كتفه كدا وتزعق وتقوله متقربش من أختي وانفعل وطلع روح فريق شوقي اللي جواك
- فريق شوقي كله ؟ ولا أطلع منه فريد شوقي بس
مضحكتش وضربته في كتفه - يا تقل دمك
-طب أروح أزعقله في الفرح؟
- اه ايه فيها يعني؟
بص ل سيف ورجع بصلي وضحك - ميار أنا لو روحت ضربت الإنسان ده في كتفه هيكسر عليا كراسي الفرح كلها ، بصي لحجمه وحجمي ، أنا بني آدم لسه في ثانوي
- إنت هفأ ؟
- طب خليكِ قاعدة لوحدك هنا على الترابيزة وأنا أروح أقف مع الغتيت اللي هناك ده ، حتى القاعدة معاكِ بوخت
- طب روح يا أحمد الهي ......
(لأ مش هدعي لأ ، أنا لسه محتاجاه لمواقف ومصايب لسه هعملها في المستقبل)
أنا وسيف ولاد عم وعلى راسي والله ، لكن هو ايه اللي جابه هنا؟ يعني أنا اصلا مشوفتهوش إلا مرتين قبل كدا ومطيقتهوش فيهم ، ييجي يكلم بابا عليا ويتقدملي بتاع ايه؟ هو ليه الإنسان بيحشر نفسه في حياة أخوه الانسان هه ليه؟

وقفت واتقدمت منه وخبطت على كتفه بصباعي
- إنت يا شاطر
لف وبصلي - خير؟
- إنت تاخد بعضك وتمشي من هنا أحسنلك! أو تقعد ومتجيبش سيرتي لبابا
- ايوة إنتِ مين يعني؟
- والله! استعبط استعبط ما إنتِ مش وراك حاجة غير الاستعباط
- لولا إنك بنت ، كنت عرفتك الاستعباط بيبقى ازاى
- ما تيجي تاخدني قلمين يالا!
- روحي يا حلوة شوفيلك مكان اقعدي فيه
- مين دي اللي حلوة  إنت اتجننت؟أنا ليا اسم أتنادى بيه
- روحي يا شاطرة شوفيلك مكان اقعدي فيه
- هو تقل الدم ده وراثة؟ هه؟
- واضح إنك فاضية وجاية تعملي فيلم هنا ف مش فاضيلك والله

مشى من قدامي وسابني واقفة لوحدي ، كرامتي اللي مرمية على الأرض هناك دي؟ الظاهر هي
روحنا البيت وقعدت في أوضتي شوية وبعدها طلعت وخبطت على أوضة أحمد
- يا أحمد إنت نمت؟
فتح الباب وطلع براسه
- اه وشبحي بيرد عليكِ ناو
- طب ولو اتصلت بالمدرسين بتوعك وقولتلهم إنك فاشل ومبتذاكرش هيحصل ايه؟
فتح الباب وضحك - ونستنى أما يحصل ليه؟ اصلا دي أوضتك بس انتِ سيباني قاعد فيها ك جدعنة منك ، ادخلي ادخلي أنا اصلا مبنامش
دخلت وقعدت على السرير وبصيتله
- مش إحنا اخوات؟
- على حسب
- يا أحمد بتكلم جد والله ، مفروض تقعد جنبي وتقولي اه طبعًا ولو حد فكر ييجي جنبك همحيه من على وش الدنيا
- بصي أخلص اشتراك الجيم وأمحيلك أى حد ، لكن دلوقتي موعدكيش
- طب إنت هتصدق امتى إني بتكلم جد ؟
- قولي والله جيالي في موضوع جد فعلا
قومت من على السرير واتقدمت خطوتين- خلاص يا أحمد كمل نوم
مسك إيدي عشان أقعد - ياستي متبقيش قموصة كدا ، حصل ايه؟
- عارف ابن عمك اللي كان في الفرح النهاردة ده ؟
- اه عارفه
- كلم بابا واتقدملي
حضني وابتسم - بجد؟ يا ألف نهار أبيض ، كبرتي يا......
بعدت عنه وزعقت - كبرت ايه وزفت ايه ، أنا جيالك عشان تطفشه
ماما فتحت الأوضة واتكلمت - أبوكم عزم ابن عمكم بكرا ، ف اصحوا بدري ومتسهروش
قومت من على السرير واتكلمت بعصبية - ويعزمه ليه هو كان من بقية عيليتنا؟
أحمد وقف واتكلم بصوت عالي - طبعًا يا ماما مش هنسهر ، متشيليش هم