يومًا ما سنلتقى

(٥٥)

" تعرفي لو كنتِ حلوة كانوا اتكلموا عليكِ ، سيبك من كلامهم ده كله وتعالي معانا يعني إحنا هنإذيكِ؟"

جملة عدت عليها ٤ سنين وما زالت بتتكرر في ودني وبتقف قدامي في كل مرة باجي آخد خطوة جديدة
- شهد
قفلت الرواية وبصيتلي - نعم؟
- اللي بيغلط غلط بيتحاسب؟ حتى لو تاب؟
- دي عاشر مرة تسألي السؤال ده وكل ما أجاوبك ترفضي تسمعي !، ها هتسمعي للآخر؟ بتت......
- أنا بسأل عادي ..واحدة سألتني فبسألك ، خلاص بعدين نشوف إجابة السؤال ده يا شهد

سألت قبل ماآجي وأسألها ، سألت واحدة وقالتلي مينفعش نمشي من الدنيا غير وأنا مُعاقبة على خطئي ، خوفت أسأل وأسمع نفس الإجابة ف أشيل هم فوق همي ، أنا عايزة حد يريح ضميري اللي بيقتلني في كل مرة بيفكرني إني مكنتش أد ثقة أهلي فيا

- هو ممكن ربنا يعاقبني في شكلي؟ يعني هو عارف إني هغلط ف عاقبني من الأول؟
- هو حد مبرمجلك دماغك على سيستم معين تقريبًا ، إنتِ قمر والله

وقت ما كنت في أولى ثانوي اخترت صحاب غلط ، أو كنت ساذجة لدرجة إني مكنتش أعرف إن في أصحاب بتإذي ، سنتين ماشية معاهم وفي كل مرة باجي أحكي لماما ببقى عارفة إنها هتزعل ، أو ممكن متنزلنيش الدروس ، طب ولما أنا عارفة من الأول إنه غلط ،  كملت ليه؟ كل ما أغمض عيني بتتجسد المواقف كإنها كانت امبارح
- شايفة شيماء اللي هناك دي ؟ كانت بتكلم شباب كتير وبتخرج معاهم ومقضياها
- بس شيماء متعملش كدا يا دنيا
- انتِ بس اللي متعرفيش البنات كويس

وقفت ساكتة وقتها ومردتش غيبتها ، هل أقبل يتقال عليا كدا من ورايا؟ أو الناس تقف تتفرج وقت ما واحدة تتهمني بحاجة كذب؟ أهو أنا عملت كدا

- ما تفكك من الحصة دي وتعالي نتمشى شوية
برقت وجسمي انتفض لمجرد الفكرة - أنا قايلة لماما إني رايحة الدرس
- انتِ كبرتِ يا ميار ، يعني مش من البيت للدرس والدرس للبيت والعبط ده! وبعدين إنتِ ذاكرتِ؟
- لأ ، أنا كنت هعتذر للمستر وهذاكر اللي فات والجديد على بعضه ، كنت تعبانه ف مذاكرتش
- هيهزئِك قدام الشباب فوق وقدام الولد اللي قولتلك إنه بيحبك
رجعت خطوتين وزعقت - ولد ايه  اللي يحبني ده احنا صغيرين ،عيب اللي ..........
رجعت عند صحابها وإبتسمت - طب اطلعي ، محدش هيطلع معاكِ ومفيش بنات غيرنا فوق ،اطلعي ومترجعيش تعيطيلي
- ماشي أنا هطلع

سيبتهم وطلعت السنتر ، وقفت على السلم وقت ما سمعت المستر وهو بيزعق وطرد واحد بسبب إنه مش مذاكر ، هو أنا لو دخلت هتطرد زيه كدا صح؟ بغباء نزلت تاني وقولت مش مهم حصة والمرة الجاية هبقى اسأل أخدوا ايه وأتحجج بإني تعبانة
- نزلتِ يعني؟
- المرة دي بس
- طب ما تروحي
- لو روحت ماما هتسأل مشيت ليه ؟
- تعالي تعالي

دخلنا كافيه وقتها ، كان فيه شباب قاعدين ، وقفت برا وبصيت ل دنيا
- تعالي نروح مكان تاني ، الكافيه ده في شباب
مسكت إيدي عشان ندخل - لأ دول معانا عادي ، شايفة اللي جوا ده ،كان عايز يكلمك بس قولتله بعدين
نفضت إيدي ورجعت ل ورا -  أنا غلطانة إني سمعت كلامكم وجيت
-احنا في أولى ثانوي يعني مش صغيرين ، والكلام الاهبل اللي في عقلك ده وإن حد هيتكلم عليكِ من غير ما يعرفك ويكلم ابوكِ ده مش موجود ؟ لو حلوة كانوا اتكلموا عليكِ، سيبك من كلامهم ده وتعالي يعني إحنا هنإذيكِ؟