يومًا ما سنلتقى

٧٧

نزلت صورتي على جروب على الفيس بفستان جديد وكتبت "" رأيكم ايه؟" عشان أعرف رأيهم في الطقم اللي هروح بيه مع ماما في فرح بنت جارتنا
- نزلتيها؟
هزيت راسي ب أيوة واتكلمت بحماس - أيوة ، مستنية حد من الأدمنز يقلبها
- جروب ايه ده؟
- كله بنات كده ف مش هقولك على اسمه لأ
- هو مش أنا قولتلك على الطقم شيك؟ بتشككي في ذوقي؟ نظرتي لأطقم البنات مش عجباكي؟ يابنتي لو ناوية تقطعي صلة القرابة اللي بيننا عرفيني
- انت ابن خالتي وتُحترم وكل حاجة ياسيف ، بس دي أول مرة آخد رأى ناس معرفهاش فاهم؟ حاسة كلامهم هيفرق معايا اوي

في اليوم ده فضلت ماسكة التليفون ، بدخل وبطلع من الجروب مستنية صورتي تتقبل  ، نمت وأنا بفكر في رد فعلهم ، في الكلام الحلو اللي هيقولوه ، في أى تعديلات بسيطة ممكن أضيفها للفستان ف تديله شكل أحلى
وقت ما صحيت ، فتحت التليفون ، البوست بتاعي اتقبل ..المشكلة إني لقيت الناس بتضحك ، الكومنتس عبارة عن " حد لاحظ البلوزة المرمية على السرير وراها؟"
" في مراية أشيك من دي ممكن تتصوري فيها ، أو اطلبي من حد يصورك أفضل"
" وشك مُرهق شوية ، هتروحي المناسبة كده بجد؟"
واحدة عاملة منشن لصاحبتها في كومنت بتضحك فيه " اتفرجي ! ال وأنا اللي مش راضية أخرج بالبلوزة بتاعتي "

الكومنتس اللي ليها علاقة بالفستان كانت قليلة جدًا ، الكل لاحظ  بشرتي المُرهقة ، شكل الحبوب في وشي - اللي أنا مش شيفاها اصلًا - ، البلوزة اللي ورايا ، المراية  ، وحاجات تانية أنا ملاحظتهاش
وقت ما نزلت الصورة كنت مبسوطة ، مفكرتش أعمل إيديت للصورة ونزلتها كده ، لإني كنت شيفاها جميلة ، حسيت إني مخنوقة فجأة ، مسحت البوست وقفلت التليفون
ماما خبطت على أوضتي بالليل ودخلت تكلمني عشان نمشي نروح الفرح
- ملبستيش الفستان ليه؟
- الطقم ده أحلى يا ماما ، مش حابة ألبس التاني
- الفستان جديد وشكله حلو اوي عليكِ ، جبناه ليه لما مش هتلبسيه؟
- مش حباه..هخرج بيه بعدين
- في ايه؟ حصلت حاجة؟ انتِ كنتِ فرحانة بيه امبارح
- يعني ده وحش عليا؟
- انتِ بتحلي أى حاجة تلبسيها

ماما دايمًا بتشوفني حلوة ، في كل حالاتي وفي كل وقت بتقنعني إني جميلة اوي ، إنها مهما بتنزل الشوارع وتشوف بنات حلوين بترجع تقولي إني أحلاهم

-  ها مين نكد عليكِ؟
- تعرف عني كده ياسيف؟ أنا محدش يقدر يزعلني
- مين عكر صفو يومك ، حلوة الصيغة دي؟
- مفيش حد يا سيف ، بجد مفيش حاجة
- الكومنتس مكنتش لطيفة على الصورة صح؟
هزيت راسي ب أيوة ومتكلمتش ف كمل هو - عشان كده مروحتيش بالفستان؟
- أنا اتقفلت من الفستان ..هجيب غيره
- فصلي لنفسك واحد ، كنتِ بتفصلي فساتين حلوة اوي
- فاكر آخر فستان فصلته لنفسي اتقال عليه ايه؟
- شبه بتاع علاء الدين
- كويس إنك فاكر ، ابننا سيف نبيه اوي
- هو علاء الدين بيلبس فساتين اصلا؟ انتِ عارفة البني آدم مؤذي بطبعه ، هيطلعولك عيوب في الحاجة حتى لو مفهاش عيوب