يومًا ما سنلتقى

٨٧

- انت ياا.... ( مرفعش عينه من الكتاب ف سندت على السور ورفعت راسي بتكبر )- انت يا بتاع انت.
-..............
- أنا مش بكلمك ؟

كمل قراءة ومردش ، فكملت كلامي :
- تعرف إني أول مرة أشوفك؟ وإن شاء الله تكون الأخيرة ، أنا مبحبش التجمعات العائلية ، وبما إنك مش سامعني فأنا مبحبكش انتَ كمان ، انتَ والتجمعات وأستاذ صالح اللي معايا في الشغل وكام حد تاني كده بدون ذكر أسماء إيمان السيد وياسمين وسعاد وخالد وهند ...في واحد مبيحبنيش اسمه طارق ، وأنا كمان مبحب...(سكت دقيقة وبصيت للسما ورجعت بصيتله)- مش حكاية مبحبهوش ، هو يعني مبيحبش يتعامل معايا .. هو ذكي ، وشاطر في شغله ، طموح ، ومبيتكلمش مع حد من البنات ، تقيل كده وصاحب قرارات ، هو حد يُعتمد عليه يعني ، بُص أنا مش مهتمة بيه أصلًا ! هو معاه ٣أصحاب ، إتنين منهم في الشغل وواحد تاني صاحبه من وهو صغير ، هو مبيحبنيش ، يعني مفيش فيا حاجة عجباه ، لا تفكيري ، ولا ذوقي ولا هدومي ،  هو معترفليش ب ده صراحةً ، بس كان بيلمح يعني..صاحبتي في الشغل اسمها عُلا ، عُلا دي بقى.....انت مش سامعني على كده صح ؟ أفضل بردو كنت حابة أتكلم .

ملتفتش ليا ، أكيد مش سامعني من الهاندفري اللي ودنه ، بيقرأ وبيسمع في نفس الوقت ؟ إنسان غريب !

شربت من كوباية العصير اللي في إيدي وبصيت له :
- بالمناسبة أنا اسمي ميار

جسمي انتفض بفزع وكوباية العصير وقعت على الكتاب اللي في إيده ، وقت ما قال بهدوء :
- مسألتكيش عن اسمك .

قام بسرعة وبعد الكتاب عن رجله
- ايه اللي عملتيه ده ؟
رجعت خطوة ل ورا ورديت بسرعة :- آسفه مكنتش أقصد أنا كنت....( سكتّ وحاولت أتنفس ببطئ ، حاولت أهدي نفسي ، ده سمع كلامي ؟ سمع كل كلامي ؟هو ازاي سمعني؟ ضغطت على إيدي واتكلمت بإنفعال )- انت ازاي تسمعني وأنا بتكلم؟ ازاي تجرأ!

رفع حواجبه كإنه مستوعبش كلامي :
- نعم!
- انت سمعت كلامي ؟ انت سمعتني ؟
- أيوة
- ازاي تقول أيوة ؟ سمعتني ازاي ؟والهاند فري اللي في ودنك دي بتعمل......

رفع سلك الهاندفري قصاد عيني وابتسم ببرود :
- اه تقصدي ده ؟ مبحبش أوصله بتليفون

غطيت وشي بكف إيدي بكسوف ، ونزلته ببطئ :
- سمعت أنهي مقطع بالظبط ؟
- تقدري تقولي مُلخص قصة حياتك
سكتّ دقيقة ورفعت إيدي وضحكت بتوتر :
- دي مش قصة حياتي أنا ضحكت عليك ، دي قصة كتبتها كده وقولت أقولهالك ، يعني اعتبرها قصة .......
قاطعني بنفاذ صبر : مش هاممني كل ده ، دلوقتي هنتصرف ازاي في الكتاب ومفيش نسخ تاني منه؟
- كتاب ايه؟

شاور بعينه على الكتاب اللي كان ماسكه ، على شوية عصير يعني بوظوا الصفحات يعني؟ أعتقد إني معايا نسخة من الكتاب ده في البيت ، كنت شرياه مع مجموعة كتب نادرة ، هبقى أقرأه وأقوله المُلخص .