يومًا ما سنلتقى

٧٢

" فاكر أول مرة اتقابلنا؟"

- خسرت شغلي
- أحلى حفلة عليكِ لما تروحي
- لأ ما هو انتَ اترفدت معايا
- أحلى حفلة علينا لما...ايه!
- هندور على شغل من بكرا ، ماشي؟
- هاين عليا أقطع صلة القرابة اللي بيننا دي

أنا وهو في مكان واحد؟ يبقى أكيد مش هنعمر فيه معروفة يعني ، أنا عارفة إنه هيلاقي مكان تاني  ، ابن عمي عالفاضي ولا ايه؟

- لقيت مكتبة نشتغل فيها..يكش نقعد فيها أسبوع على بعضه ومنترفدش
- لو اترفدنا ف كل واحد يروح من طريق ، أنا حاسة إن الفقر ماشي ورانا وإحنا مع بعض ، عارف لو كل واحد لوحده؟ الخير هيجري ورانا جري
- طب ما نوفر وقت وكل واحد يروح من طريق من دلوقتي
- بُكرا أفتح محل الورد بتاعي وتيجي تطلب مني أشغلك وأنا هتكبر عليك
- ابقي فكريني آجي أشتري منك وأنفعك عشان فلوس المحل متروحش هدر
- ابن عمي اوي

دايمًا بحس إن الاحترام والجدعنة مرتبطين ب اسم سيف ، خام براءة ،  قنبلة أخلاق ، يتحدف شمال يُرد يمين تاني لإن الشمال مش سكته"
-  البنت قبلت الأدد
- اللي كانت معاك من أيام الثانوي؟
- أيوة هي
- هو إنت قررت إنك هتسيب هند؟
- لأ..هخطبها
- انت بقيت بتاع بنات يا سيف؟ ياابني لو عمي نسى يربيك عرفني!
- هدخل الفرح على قلوبكم واتجوز إتنين
- يافرحة مامتك بيك

أوقات بحس إن غلطتي الوحيدة اللي مش  هسامح نفسي عليها ابدًا إني حكيت لهند عن سيف ، كانت عارفة إني بحبه قبل ما تقرب منه..كانت عارفة إن محدش هيحبه زيي ووافقت تتخطبله ، أنا حبيته قبلها ،  قبل ما يعرفها وقبل ما يعرف إن في حاجة اسمها حب ، هي بتبص في عيني ازاي في كل مرة بنتقابل صدفة فيها؟

- بتحبها؟
- مين فيهم؟
- مبهزرش والله
- هند؟
- أيوة
- عادي
- مينفعش تتجوز شخص مبتحبهوش ف لازم تحبها
- متشغليش نفسك بس ورانا مواضيع أهم من دي

أنا دايمًا بشوف الناس بشكل عادي ، محدش لفت انتباهي غيره ، مشوفتش حد مميز إلا هو ف مينفعش أسيبه
- هاتي الشنطة دي 
كملت مشي-  لأ
أخد الشنطة مني ومشى جنبي - كل دي شنطة! جايبة فيها ايه؟
- كتب
- كل دول؟
- بحب الكتب
- بس؟
- عندنا مواضيع أهم من دي نتكلم فيها ، شوفت النملة اللي قتلت أختها النملة امبارح؟
- موضوع مهم فعلًا
- هي هند عرفت إنك حددت ميعاد الخطوبة ؟
- أكيد اومال أنا هخطبها من غير ما تعرف
- طب يلا نروح

دايمًا بحس إن حاجاتي هتتردلي في يوم ، ولإنه من ضمن حاجاتي ف هيرجع..
- أول يوم شغل ، يلا نمشي عشان منتأخرش ونترفد من أولها
- ده لون طرحة يتراح بيها شغل؟ دي يتراح بيها ميتم..جنازة حاجة في الرينج ده ، إنما شغل؟ والله ولا تنتميله في حاجة
- مش هغيرها
- طب البسي شنطة ملونة
- تعرف لو الإنسان بطل يتدخل في حياة أخوه الإنسان ؟ تعرف هيحصل ايه؟
- غيريها
- لأ
- مش هنمشي غير لما تغيريها ،ده لون ده؟ انتِ مش بتحبيه اصلًا
- حبيته دلوقتي
صوته ارتفع - مامتك جوا صح؟شافتك بقى باللون ده؟ولا نازلة من وراها وخلاص؟  ما......
اتكلمت بسرعة - هغيرها