" أقولكم سر؟ أنا بحب التجمعات العائلية لدرجة إني بتمنى إنها متتكررش تاني ابدًا في حياتي"
معرفش ليه ببدأ كتابة في أول الصفحة ب " أقولكم" رغم إني معنديش حد يقرأ ده..ومعنديش اللي أقوله إني كاتبة أسرار في النوت ، حتى عيلتي مش متفاهمين ابدًا معايا..يمكن لو كان عندي حد يقرأ كان زمان العالم اتغير
ماما خبطت على باب أوضتي ودخلت براسها - خالك وعياله جُم
هزيت راسي ب ماشي وقومت غيرت هدومي ، أد ايه عيلتي كانت وما زالت السبب الوحيد في نجاحي وتقدمي والطاقة الإيجابية اللي في حياتي..بإختصار عيلتي هي كل حاجة حلوة في حياتي
طلعتلهم وأنا راسمة ابتسامة مجاملة على وشي
- نورتونا
- اللي فاتحة النت ٢٤ ساعة ومش فايقة لمستقبلها أهي..مش فاهم انتِ مش زي بقية بنات العيلة ليه؟
مش بقولكم هما كل حاجة حلوة في حياتي!أد ايه عيلتي عيلة طيبة ومبتدخلش في حياة غيرها
قعدت على الكرسي جنب بنت خالي"مروة" ، كان نفسي أقول بنات زي بعضينا بقى وبنحكي مع بعض وضحك وهزار وضرب بمخدات فايبر وريش نعام بس للأسف ببصتها دي بتقفلني من الدنيا كلها
مروة مسكت التيشيرت بتاعي وابتسمت
- بكام ده؟
- ب ١٠٠ جنيه
رفعت حواجبها بإندهاش - هي لسه في حاجة ب ١٠٠ جنيه؟أنا أقل حاجة بجيبها مبتقلش عن ٣٠٠ أو ٤٠٠ ولو مكانتش براند مجيبهاش
ابتسمت بسماجة - يلا معلش هنعمل ايه بقى!
هو الإنسان عنده ٣ مرارات؟ ابدًا..يبقى ليه يعرض أعضاءه للخطر في سبيل النقاش مع إنسان تاني؟
المشكلة إني مسألتهاش عن سعر هدومها ولا برندات الميكب والشنط وغيره ، ومش من حقها تقلل من حاجة أنا لبساها وعجباني ، لإنها ببساطة حاجتي والياء اللي في الآخر دي ترجعلي أنا ! مش ترجعلنا كلنا
بصيت لمرات خالو وقت ما اتكلمت بضحك
- بس انتِ اسمريتِ من الشمس ولا دي بشرتك؟ أصل عيلتنا كلها بيضاء معرفش طالعة ل مين
مروة ردت عليها - وأنا كمان قولتلها كده يا ماما..وقولتلها بردو تشوف حل للحبوب اللي في بشرتها ، مبوخة شكلها
خالو - وانتِ على كده يا ميار ماشية في الجامعة؟ ولا بتقعدي تعيطي وقت النتيجة زي الثانوي ؟
مرات خالي ردت عليه - هي لو تقفل النت وتبطل التفاهه اللي بتعملها دي وتقعد تذاكر زي بنتنا مرة الله أكبر عليها..كانت هتفلح
هو كيلو الطماطم وصل لكام النهاردة؟ ٥ جنيه تقريبًا؟طب ليه مكنش ب ٥ إلا ربع مثلًا ولا ب ٥ وربع؟ موضوع يستحق النقاش وأكثر أهمية من النقاش مع عيلتي
ماما جت بصينية الشاي من جوا - ميار ادخلي اقفي عالأكل قبل ما يتحرق
مرات خالي سألت بسخرية وهي بتشرب الشاي
- وعلى كده هي بتعرف في الأكل؟
سمعت ماما وهي بتجاوب عليها - دي أشطر مني..كل اللي يدوق أكلها يقول أحسن من اللي أنا بعمله
أنت تقرأ
يومًا ما سنلتقى
Truyện Ngắnقصص قصيرة متنوعة بالعامية المصرية ،بها مزيج من الخيال والواقع والحزن والسعادة ، ربما ستتضارب مشاعرك و أنت تقرأ ، ولكن فى النهاية ستعرف السعادة طريقها لقلبك ..
