يومًا ما سنلتقى

٨٢

- من غير صوت طلع اللي في جيبك يا عسل
- بنت ! يعني يوم ما أتثبت ، أتثبت من بنت!
- هدّيك مناديل بدالهم متحكيش كتير
- هي دي طريقة البيع الجديدة؟
- هات اللي في جيبك وخد مناديل وخلاص ، انت هتصاحبني!
- امسكِ اللي في إيدك كويس عشان ميقعش منك الأول وبعد كده نشوف الحوار التاني ده بعدين

مسك مني المقص وعدله ورجعهولي تاني
- كده مظبوط ، وابقي شوفيلك حاجة غير المقص الصغير ده عشان لما تيجي تموتي حد هيموت مالضحك.
ابتسمت - شكرًا ( رفعت إيدي بالمقص تاني
وكشرت ) -هات اللي في جيبك
- مين انتِ ؟ دورك ايه من الحوار ده؟ حرامية؟ قطاعة طرق؟ شغالة عند حد؟
- لأ أنا مستقلة بنفسي ، تقدر تقول قطّاعة طُرق بس في مستوى أرقى ، بديك حق فلوسك مناديل عشان أحللهم
- أقنعتيني
- ها تاخد كام باكو؟
-  اللي بيثبت حد مبيثبتهوش في النهار الساعة ٨ الصبح في شارع عمومي
- هو التثبيت ليه مواعيد؟ سوري أصل أنا جديدة فتلاقيني في الشغلانة مش أد كده
ضحك - روحي بيتك
- لأ ما أنا مصحتش بدري وخرجت وواقفة هنا بكيسين مناديل عشان أروح بيتي في الآخر ! أنا قررت أشتغل.
- هو ده شغل؟
- انت شايف ايه؟
- طب روحي البيت لتتخطفي

ملحقتش أرد عليه لإنه مشى ، أول مرة أقف في الشارع وأحاول أعمل كده ، مش عارفة الفكرة جاتلي منين أصلًا !

- احلفي بالله وقفتِ تثبتِ واحد!
- ياشهد أنا بحكيلك في ايه وانتِ تقولي ايه!
- ميار ، انتِ مستوعبة عملتِ ايه؟
-  معييش فلوس ، خلصت
- تقومي سارقة!
-  كنت هديله بحق فلوسه مناديل ! مش هسرق ومعرفش فكرت كده ازاي أصلًا ! اقفلي الموضوع ده بقى
-  طب وهتعملي ايه؟
ابتسمت - هروح بُكرا تاني
- جدعة هي دي......ايه!!
قومت من على السرير وفتحت الشباك ووقفت جنبه وابتسمت :
-  شكله كده حد محترم ومن الناس اللي نادر تشوفيهم  في الزمن ده
- هو مين؟
- وحلو
- على ايه؟
- وضحكته حلوة
- إحنا دلوقتي في مشكلة الفلوس مستوعبة؟ لو مش هنضايق روح قاعة اللؤلؤة اللي جواكِ ف ممكن نفكر في حل مشكلتنا الأول !
- لابس نضارة وشايل شنطة وهادي ، ده حتى مرفعش صوته ولا فضحني
- والله لو ما اتعدلتِ وفوقتِ لأسيبك تفكري لوحدك

مكنتش مركزة معاها ولا عارفة أفكر في حاجة غير
" ممكن ألاقيه بكرا؟ " ، لما صحيت روحت الشارع اللي وقفت فيه امبارح في نفس الوقت ..
لقيته جاي من آخر الشارع فوقفت جنب الحيطة على جناب الشارع وكتفت إيدي
- هي ماما لصة؟
وقف وبصّلي - نعم!
اتعدلت واتقدمت منه خطوة :
- عشان تجيبلنا واحد يخطف قلوبنا بطلِّته كل يوم
- انتِ كل يوم بتيجي بحاجة جديدة؟
اتعدلت في وقفتي واتكلمت بتوتر :
- لأ..بس معرفتش أقول ايه
- متقوليش ، تقدري تمشي وخلاص