يومًا ما سنلتقى

٦٩

نتيجة ٣ ثانوي طلعت "
رغم إني عارفة إن النتيجة هتطلع في الوقت ده ، إلا إن قلبي انتفض بمجرد سماع الجملة..أنا نقصت في العربي كتير وكمان الأنجلش، و...و ايه تاني؟ أنا نسيت أنا عملت ايه
- اهدي
- اقفل الموقع وافتحه تاني كده يا سيف
- والله قفلته وفتحته ١٠ مرات..في ضغط عليه ف نستنى شوية مش هيحصل حاجة
- سيف
بص في شاشة اللاب قدامه - أيوة
- إنت ابن خالتي ف أيًا كان اللي هيطلع ه......
- يابنتي لو سقطتِ هتجوزك ونستر على بعضينا متخافيش
ضحكت- بتهزر! النتيجة طلعت وإنت بتهزر
- متقلقيش والله..خير ان شاء الله إنتِ عملتِ اللي عليكِ ف....الموقع فتح
غمضت عيني ورفعت إيدي حطيتها على وداني ، خلاص مش عايزة أعرف ، أصلًا مش مهم أعرف ، هو منطقش ليه؟
فتحت عين واحدة وبصيت على تعابير سيف ، خوفت أبص على الشاشة ف سألته
- أنا عملت ايه؟
- جبتي أعلى مني ب ١% مش هعرف أتروشن عليكِ..

لحظة أعلى منه ب ١% ، هو جاب...يلهوي!
بصيت في الشاشة بسرعة ورغم إني نجحت وجبت مجموع عالي إلا إني كنت عارفة إنه مش هيجيب كلية " فنون جميلة" ، العربي نقصني جامد والإنجلش كمان
- بقولك نجحتِ .. فين زغروطة ممس؟
- أنا مش هدخل فنون صح؟
- التنسيق مطلعش ، متسبقيش النكد من دلوقتي
ابتسمت - الحمدلله..قوم هاتلنا حاجة بقى حق نجاحي ده
- لأ لحظة انتِ فهمتِ غلط ، انتِ اللي هتجيبي مش إحنا
- يعني أذاكر وأنجح وأوزع عليكم حلويات؟ ياسطا عننا ما احتفلنا

وقت ما التنسيق طلع ، مجموعي مسمحليش أدخل فنون جميلة ، الكلية دي كانت بالنسبالي أكبر حلم أنا حلمته ، مكان هيتقدر فيه كل رسمة أنا رسمتها وهرسمها ، هي الناس بتحس ب ايه لما حلمها بيضيع؟

- بنعيط أهو وطلع عندنا إحساس زي بقية الناس
رفعت راسي ومسحت دموعي -  أنا سيبتلكم الشقة كلها وقعدت في البلكونة ، حتى البلكونة مش سيبنهالي!
- بقيتِ درامية جدًا ، بنت إنتِ مش عجباني اليومين دول
- مبعيطيش على الجامعة لأ ، لو فاكر يعني إني بعيط على........
قعد قدامي وابتسم  - مش عيب إننا نعيط على حلم راح علفكرة ، حاجة اتعلقتِ بيها ف طبيعي هتتوجعي وقت ما تروح ، ايه يعني حلم يروح؟ شوفي غيره ، مش هتفضلي واقفة مكانك ، قولتلك قبل ما النتيجة تطلع ٣ ث مش بتحددلك مستقبلك ، دي تحصيل حاصل مش أكتر
- عارف المشكلة إني محطتش اختيار تاني ، مش لاقية جامعة تانية عشان مفكرتش غير في دي ، أروح فين دلوقتي؟
- أختارلك أنا؟
ضحكت وأنا بعيط - زي ما اختارت لنفسك من سنتين؟
-ابتدينا.. هتخبطي في الحلل هضحك على أحزانك وهتروشن على أحلامك البائسة ، نعيط في هدوء ونلم الليلة كده عشان نكون لطاف مع بعضينا
- هو أنا مش تعبت وذاكرت؟
- أيوة
- مأخدتش على أد تعبي ليه؟ هتساوى باللي مذاكروش وده مش عدل
- مبتتحسبش كده..ربنا مبيضيعش تعب حد ، متعرفيش ايه السبب في إنك تجيبي المجموع ده لا أقل ولا أزيد.. و ليه صاحبتك جابت أعلى منك رغم إنكم بتذاكروا مع بعض ، بس بعدين ..وقت ما تحطي رجلك على بداية الطريق وتمشي فيه لقدام هتعرفي السبب وهتحمدي ربنا ألف مرة على نصيبك
- يمكن
- أقولك سر؟
هزيت راسي ف كمل - حلمك مش بيقف على نتيجة ولا سنة دراسية..تقدري توصلي لحلمك ولو بعد٥٠ سنة
- وافرض مُت؟
ضحك - بصي إنت مينفعش معاكِ الكلام..كملي عياط أفضل