يومًا ما سنلتقى

٣٩

- تخنتي اوي يابنتي واشتريلك حاجة بدل الجاكيت ده
(جمل بسمعها كل يوم مع اختلاف السخافات)
ضحكت  وأخدت الموضوع هزار - عاجبني علفكره
- مش عارفة خطيبك إرتبط بيكي على ايه!
(الهزار مش إني آجي على نفسي وأركن نفسيتي على جنب عشان مخسرهمش ، فرق كبير اوي بين الهزار وبين الحقد)
- لإنه شايفني حاجة كبيرة
ضحكت بصوت عالي هي واللي واقفين معاها - حاجة كبيرة في الحجم ولا ايه ؟ أما لو كنتي حلوة شوية كنتي عملتي فينا ايه؟
ابتسمت وبصيت للأرض ومردتش
-اوعي تكوني زعلتي؟
- لا يا سارة هزعل من ايه! وبعدين أنا واثقة اني جميلة
كان المفروض أقول إني زعلت واوقفهم لحد كده ، يمكن انا اللي أستحق كل اللي فيه ده عشان قولت من البداية اني مزعلتش وعديت الموقف ، وتاني مرة عديت عشان مش حابة ابقى لوحدي ومعرفش حد هنا غيرهم ...وجودهم مؤذي اوي وغيابهم مخيف يمكن عشان مفكرتش اني أبعد!
- سارة انا هشتري دريس من المحل اللي جاى ده روحي انتي
- هاجي معاكي احنا صحاب
فرحت بكلمة اصحاب اوي ،هزيت راسي ب ماشي ووقفنا قدام المحل ، شاورت على دريس بفرحة وبصيتلها - ده شكله حلو اوي ، هيبقى حلو عليا
-انتي عيزاه ليه؟
- هنخرج أنا وسيف النهاردة
-طيب
دخلت المحل وقيست الدريس ،شكله كان حلو اوي اوي عليا ، مكنتش أتخيل انه هيبقى كده ،طلعت بره البروفه ولفيت حوالين نفسي بالفستان
-ايه رايك؟
-طب اثبتي شوية
ضحكت ووقفت قدامها -ها؟
رجعت خطوتين لورا وكشرت - مغمقك اوي ومبين انك تخينة
البسمة اللي على وشي راحت وبصيت للفستان -بجد؟
- لو جيتي قعدتي ممكن يتقطع ،خسي شوية خطيبك هيطفش
-وانتي مالك؟
- في ايه يا ميار أنا بكلمك عادي!
دخلت البروفه تاني وبصيت عالفستان ،غريبة والله كنت حباه من شوية دلوقتي مش طيقاه عليا ، غيرت الفستان وسلمته للبنت اللي واقفة بره واخدت شنطتي ومشيت
مكنتش شايفة الناس من كتر الدموع اللي بتقع من عيني ، كنت بعيط بصوت ،لاول مرة اعيط بصوت في الشارع
معرفش وصلت البيت ازاي ،دخلت اوضتي من غير ما اكلم حد وغيرت هدومي
ماما خبطت على الباب ودخلت
-فكراني مش هشوفك وانتي داخلة معيطة؟
عطيت ضهري ليها وعلقت الهدوم في الدولاب - محصلش حاجة يا ماما
-لا حصل ،لما تروحيلي كل يوم معيطة بالشكل ده يبقى في حاجة
اتنفست ببطئ وحاولت إني ابطل عياط -ماما....
- هما تاني مش كده؟ بتضحك البنات عليكي صح؟
بصيت للارض وعيطت أكتر ومردتش
قربت مني ومسكتني من كتفي وزعقت
- بتوهمك بحاجات مش فيكي وبتخليكي تكرهي.....
لفيت وبصيتلها بعصبية وعليت صوتي - لاني مش حلوة ، لا شكلي حلو زيهم ولا بعرف أرد زيهم ، وتخينة والهدوم مبتلقش عليا ،وسيف ممكن يشوفله واحدة حلوة يرتبط بيها ايه اللي جابره عليا اصلا؟
رفعت حواجبها بصدمة ورجعت خطوتين ل ورا
- مش حلوة! ،سيف لو مكنش عايزك مكنش ارتبط بيكي ،هو شايفك جميلة وانا شايفاكي قمر ، وروحك حلوة ، هما عندهم نقص ...سواء في الاخلاق او يمكن.....
قعدت على السرير وضميت رجلي- انا كرهت شكلي وتعبت ...تعبت من كل حاجة
- انتي مش ضعيفة عشان تسكتي ، ولا صغيرة عشان تصدقي!
(الكلمة الحلوة بتفرق اوي اوي حتى لو الشخص مش مبين انه فرحان بيها بس بتفرق معاه جدا ، بتبقى حاجة سخيفة لما بنتريق على بعض بدافع الهزار ، ده مش هزار ده قلة تربية والله )
تليفوني رن ، بصيت على الشاشة كان سيف ، أكيد عشان نخرج زي ما اتفقنا ، قفلت مرة واتنين وثلاثة
بعتله رسالة عالواتس
- عندي برد ف مش هتفهم حاجة من صوتي وتعبانة ف مش هنزل
( مبرر سخيف اوي بصراحة وميصدقهوش طفل حتى ومعرفش قولته ليه!)
- ردي طب
-مش هتفهم حاجة
-ردي!
اتصل مرة كمان ف رديت
- مالك؟ فيكي ايه؟ انا مكلمك الصبح وكنتي تمام وبتضحكي
بعدت التليفون عني وكتمت صوت عياطي وبعدين اتنفست ورديت عليه - عندى برد ،تعبت فجاة
- ده صوت عياط مش برد!
- انا هنام
قفلت وكملت عياط بصوت عالي ، كتمت نفسي بالمخدة عشان ماما متسمعش
اتصل كتير اوي بعدها ومردتش ف بعت رسالة
- بتعيطي ليه؟ ردي عليا !
كنت بعمل (seen)للرسايل ومبردش
- طب فهميني في ايه؟ انا زعلتك؟
-........
-طب احكيلي كإني أخوكي ونركن موضوع خطيبك ده على جنب
( أظن لو كان معايا أخ ولا أخت احكيلهم كانت هتفرق كتير اوي)
- ميار! انا جاى
رديت بسرعة - متجيش  انا تعبانة بقولك
-في حاجة مزعلاكي
-لو جيت هنخسر بعض
-نخسر بعض! هو في ايه مالك؟
- مالك مالك؟ انت اللي فيك ايه؟ ياعم انا مش عايزة احكي هو بالعافية ، بص انا نكدية ومش حلوة وملخبطة ايه جابرك ترتبط بيا؟ اه انا بعيط وهعيط وملكش فيه
- اهدي
- انا مش عايزة اى حد في حياتي لو سمحت
- يعني ايه؟
- اللي فهمته
حدفت التليفون في الحيطة وصرخت ، بقالي سنة بسمع نفس الكلام السخيف، سنة بعاني من تريقة على لبسي وشكلي ،زهقت من كل مرة اروح لماما فيها معيطة ، زهقت من الحياة دي
(مفروض اى مكان نحس انه هيتقل مننا او من كرامتنا نبعد علاطول ايا كانت الخساير...مكان مش مرتاحة فيه يبقى لازمة وجودي ايه؟)
مش ذنبه حاجة والله ، ذنبي انا والغلط فيا انا ،ماما قالتلي اني في لحظة غضب بضيع كل حاجة من ايدي ، مبعرفش افرق بين الحلو والوحش وبضيع كله
من سنة كانت حياتي هادية رغم انها ناقصة اصحاب بس هادية ، اتخطبت لسيف من سنة ونص ، هو عارفني اني بحب اضحك واهزر وعارفني اني مبخبيش كتير جوايا
عدى اسبوع وطلب من بابا اننا نخرج ، خرجت معاه بس عشان رفضت المرة اللي فاتت
- كنت فاكر انك هترفضي
- واهو جيت
- انتي مش باردة عشان تردي كده ف بلاش تتكلمي بالاسلوب ده لانك عارفة اني بتضايق
- طب ماأنا بتضايق ليه محدش فاهم ده؟
- وأنا بحاول أساعدك وانتي اللي رافضه
-مش عايزة مساعدة من حد ومش عايزة حد اصلا ،عايزة أبقى لوحدى شوية ليه مش فاهم ده
( أنا كدابة ، والله ما عايزة أبقى لوحدي لاني بخاف مني ، بيبقى قصدي خليكوا جنبي لما بقول سيبوني لوحدي، مش كتير هيفهمها ومحدش هيفهمني اصلا!)
اتحولت لانسانة تانية تماما، منعزلة دايما في اوضتي وبعيط أكتر مما بتكلم وبقيت أكره اقف قدام المرايا عشان مشوفش شكلي ، مبقتش أتكلم مع سيف كتير لاني هزيده حِمل وأظن إن كل واحد فيه هموم تكفيه لبقية عمره
-هتسيبيه؟
-هخسره
- مرتاحة كده؟
- ماما انا بقالي سنة مش عارفة ارتاح ،اللي زيي مينفعش حد يبقى في حياتهم
- ايه اللي زيي دي! شوفي نفسك جميلة وحبي نفسك والناس هتحبك
حسيتني عبئ ، لأول مرة أحس إني تقيلة على حد ...صدقت بإن الكلمة بتفرق والله ،وبتمنى إني مكنتش صاحبتهم ، حياتي كانت ناقصة واتملت بالضلمة وبالكره والحقد وحاجات انا مكنتش اعرف معناها اصلا!
أنا ذنبي ايه في شكلي طب؟ أنا كنت شايفة نفسي جميلة ف ليه هما مش شايفين ده؟
مسكت التليفون وبعتله رسالة :
" احنا لازم نسيب بعض ...أنا محتاجاك جنبي ومش بتخلى عنك والله بس عشانك ...اعرف أنك تستحق كل الخير اللي في العالم ،مش عايزة نقاش في الموضوع ده لو سمحت رغم إني عارفة إنه حقك ، بس خد الحاجة من بابا وخلاص"
عملتله بلوك وحطيت رقمه في البلاك ليست وقفلت التليفون خالص
فتحت الشباك ووقفت جنبه ،حسيت إن الهوا اتعدم من الأوضة ، بصيت للدبلة وحسيت إيدي تقيلة أوي وقت ما أجيت أقلعها
إتخضيت ورجعتها مكانها تاني ، لما ييجي هقلعها ...لما هو ييجي بس
(مش عارفة ماشية بفكر ازاى ، والصوت اللي بيدعي جوايا بإنه ميسمعش كلامي ويتمسك بيا ده مضايقني ، طب ما أنا اللي قررت ده عيزاه ميوافقش ليه؟ أنا مش عارفة أنا عايزة ايه والله )
روحت الجامعة بعد أسبوع لإن بقالي فترة كبيرة مبروحهاش ، مكنتش عايزة أقف أسلم على حد لإني عارفة أن أول شخص هكلمه هطلع فيه كل الطاقة السلبية اللي جوايا
- ميار! مبتجيش ليه
( بجحة! يعني قليلة الذوق وبجحة وبتسأل ،بتسأل عليا بأنهو وش!)
- ابعدي عن طريقي يا سارة لا أنا صاحبتك ولا انتي صاحبتي
-في ايه؟
قربت منها وابتسمت ببرود عكس النار اللي في قلبي
- شكلك وحش النهاردة ، وشك مكرمش كده وهدومك قديمة، مش عارفة نزلتي من البيت كده ازاى
ضحكت وكملت طريقي وبعدين كشرت ، ازاى اتكلمت كده؟ أنا عمري ما حرجت حد ابدا وعمري ما عيبت على شكل ولا لبس حد؟ حاسه بتأنيب ضمير ليه ؟ أنا كنت عيزاها تحس بجزء صغير من اللي بتعمله فيا
(ربنا وزع الرحمة  في القلوب بنسب مختلفة ، في اللي الرحمة معدومة عندهم وفي اللي بيجرح اللي قدامه من غير ما يفكر شعوره هيبقى ايه واللي  وفي اللي بيغلط وبيندم وبيحس بغلطه وفي اللي لما بييجوا يردو حقهم بيحسوا بندم إنهم جرحوا اللي قدامهم بكلمة ،الناس دي قليلة أوي والله ، رد الحق مفهوش عيب وغلط ،لو هنسكت كتير هيتداس علينا )
روحت من الجامعة ودخلت أوضتي وقفلتها كالعادة ، ماما قالتلي إن سيف بيتصل ببابا كل يوم وبيتصل بيها على أمل أنه يكلمني،حتى ماما زعلانة مني لإنها عارفة إني بتصرف غلط ...سيف حاجة كبيرة اوي اوي مبتجيش الا مرة في العمر ..لما الحظ بيضحكلنا بيهدينا شخص زيه ولو ضيعته أبقى غبيه وأنا غبيه عشان هضيعه
حطيت الكتب على المكتب ومسكت القلم عشان أذاكر
ماما خبطت على الأوضة ودخلت
-سيف بره
إيدي اترعشت والقلم وقع منها
- ايه؟
- شوفيه واسمعيه رغم إنه مش غلطان ، ومش مجبر إنه ييجي أكتر من مرة ف اسمعيه
- دقيقتين وجاية
حطيت الطرحة على شعري وطلعت
أول ما شافني قام وكان هيتقدم مني بس رجع تاني وقعد
قعدت في الكرسي اللي قدامه في الصالون
- عامل ايه؟
- مش بخير من غيرك، وانتي؟
إتنهدت وبصيت للسقف عشان دموعي متنزلش ، لإني كنت عارفة إن وقت ما هكلمه هعيطله ، وأنا مش عايزة أعيط، كفاية عياط
- أنا عمري ما كنت بخير من غيرك ، حيااتي كانت ناقصة كتير  وجيت إنت مليت جزء كبير أوي منها ومش بالسهل إني أسيبك والله ،صدقني مش بالسهل واعرف إني فكرت كتير قبل ما آخد القرار ....
-فكرتي وقت زعلك!في أكتر وقت انتي متضايقة فيه ، وأنا وانتي عارفين إنك بتلغي عقلك تماما وقت الزعل ف فكرتي ازاي؟
بصيتله بتوتر -مش عارفة
- فاكرة وقت ما خسرت شغلي كنت عامل ازاي؟
هزيت راسي ب أيوة ومردتش
- كنت عصبي وبزعق دايما ومبكلمكيش كتير وطلعت أسوء صورة أنا ممكن أبقى فيها ، فاكرة أول حاجة قولتيهالي ايه؟
إبتسمت وهزيت راسي
- قولتيلي أنا جنبك ، فترة وهتعدي وهتقع وهتقوم تاني وهبقى جنبك ، ولو مبقتش جنبك وقت ما تقع مستحقش أبقى معاك وقت ما تقوم
-سيف أنا......
- انتي جميلة وعيني مشافتش أجمل منك لإني مش شايف غيرك ، ولو عايز أرتبط بغيرك مكنتش اخترتك انتي من الأول ،انتي بتيجي مرة في العمر وأبقى غبي لو سيبتك تضيعي من ايدي
-بجد ؟
- انتي بتسألي؟(رجع بضهره ل ورا وضحك )- وبعدين ايه البيت اللي مفهوش أكل ولا أى حاجة ده ؟ هو أنا كل مرة آجي وأمشي كده
- ماما حطتلك أكل المرة اللي فاتت وإنت مرضتش تاكل
- الله! ده انتي بتسألي عليا أهو
إبتسمت - وحشني وجودك
- وحشني الأكل اللي أمك بتعمله ، مبيبقاش ليا عين آكل وإحنا مبنتكلمش ، أنا مش مفجوع لأ
- بتتكلم زيي أهو!
- اه بتكلم زيك وهتكلم وهتكلم هو عشاني؟ ماهو عشانك ..عشان أخرجك من جو المسلسل التركي ده
- إوعدني إنك تفضل معايا
- أوعدك إني مش هخذلك ابدا

"رأيتك ضوء في نهاية نفق مظلم"