يومًا ما سنلتقى

اسكريبت (٩)

-بت
-........!
-يابت
اتكلمت من غير ماأبص -ليا اسم أتنادى بيه
-طب يا يارا
-متناديش عليا وإحنا متخانقين
-هتستعبطى!
هزيت كتفي -براحتى
-طب مش هنوقع معاهدة سلام ولا ايه؟
-بتزعقلى قدام أهلك،وكسرت المج اللى مرسوم عليه تويتى وعايزنى أكلمك!
بقا أنا يتكسرلى مج تويتى! أنا!
-كنتى بتضحكي مع عاصم ليه؟
برقت -ده أصغر منى،انت مستوعب اللى بتقوله!
وقف وحط إيده فجيب البنطلون -أنا نازل أجيب أكل، تاكلى ايه؟
-وانت فاكر هتكسر عينى بالأكل؟ ،لا يا بيه فووق،كرامتى ثم كرامتى ثم كرامتى
ضحك -طب متتكلميش بـ حرقة عشان شكلك بيبقى وحش فالآخر
-بجد؟
-بجد
قربت منه -لااا ده كان زمان، أنا اتغيرت،حتى انت بنفسك هتستغربنى
-نفس الاسطوانة بتتعاد كل مرة،طب غيرى فالكلام
-انزل انت إشتريلك أكل وأنا هطبخ لنفسى،ومحدش يقرب من أكل التانى
ضحك -موافق
هو فاكر إنى مش هعرف أعتمد على نفسى وأطبخ،يصبر عليا بس وهيلاقيني فحلقة مع الشيف شربينى
مسكت الفون وكتبت:طريقة عمل الكيك بالفراولة
بعد ساعة سمعت الباب اتقفل،قعدت عالكنبة بسرعة ومسكت الريموت،إبتسمت نص ابتسامه،اللى هى بتهكم يعنى ،اه ماأنا اتغيرت
قعد جنبى وابتسم -وده من ايه ده؟
بصيت بطرف عينى -ايه اللى فإيدك ده؟
-بيتزا
-ماشى انت بتتكلم كده ليه أنا بسأل عادى
-مش هندخل على مشهد البراءة وتطلعى من أوضة وتدخلى فأوضة
رفعت راسى وشاورت بإيدى -وانت فاكر إنى معملتليش .....(نزلت إيدى بسرعة وبرقت)-الكييك
جريت عالمطبخ وطلعتها من الفرن،إستوت أهى وبقت بالشكولاتة وقمر،...لحظة! هى مش كانت بالفراولة،قربت منها عشان أقطعها،مالها لازقة فى الصنية كده ليه، بصعوبة عرفت أطلع جزء،حطيته على طبق وأخدته وطلعت
قعدت جنبه وضحكت
ابتسم -متتكلميش،باينه من شكلها
بصيت بطرف عينى -غيران حقود
أكلت جزء،بصيت يمين وشمال وبعدين بصيت للطبق تانى،هو ايه نوع البتاع اللى فالطبق ده!؟دى لو أمعاء كائن فضائى مش هتبقي بالشكل ده،كنت باكل جزء وأعيط وآكل وأعيط
بصلى وضحك بصوت -شاهد كيك من جماله أبكى إنسانة،لاتخرج قبل أن تقول سبحان الله
-بعيط من حلاوته ياأخى سيبنى فحالى
(بعيط على كرامتى اللى هتتسحل  باين)
دخلت المطبخ، سندت الطبق عالرخام،ودخلت الأوضة،قعدت عالسرير، -سهله قوليها "كنت بهزر معاك يا سيف "،لأ بايخة دى،"ههه كنت بهزر معاك ههه هات حتههه"دى بايخة أكتر،طلعت بـ راسى من الأوضة،كان مكتف إيده قدامه وباصصلى ومبتسم
(كرامتى اللي بتودعنى من هناك دى؟!)
دخلت المطبخ وطلعت منه بـ راسى -علفكره لو عايز كيك أنا ممكن أجيبلك جزء
-تعالى كلي مستنيكى، إتأخرتي النهاردة دقيقة
قعدت جنبه وأنا بضحك -مش بقولك أنا اتغيرت
شوية واتكلم -أنا داخل أنام
-لحقت تاكل؟
-اه كملى انتى
اد ايه التغيير بيفرق فحياة الواحد،بيجدد السلام النفسى مابينا وبين نفسنا،وبيعمل لكرامتنا ...كرامة! ،لأ نبص لـ جانب السلام النفسى أفضل.
دخلت الأوضه لقيته نايم،جالك قلب تنام وانت كاسرلى مج تويتى ياظالم!
اممممم،المج بتاعه قاعد وحيد وسط الكوبيات جوه،لأ ميرضينيش لأ
خبطت على باب الأوضه جامد عشان يصحى،...مش هتصحى يعنى!
قربت منه وصرخت -سيييف ولااا اسييف يالااا
فتح عينيه وبصلى -نامى أحسنلك
ايه رد الفعل الهادى ده! أنا توقعت يقوم يجرى بره الأوضة ونجرى ورا بعض وكدا! أنا إتضحك عليا فالجوازة دى
مسكت إيده وشديته -قوم عملالك مفاجأة
-خليها لـ بكره
-لأ ماأنا مش هعرف أنام كده
-.............!
عليت صوتى -قووم
قام من عالسرير ووقف -عارفة لو طلعت حاجة تافهه زى كل مرة!
ابتسمت -لا دى هتفضل معلمة جواك لآخر العمر
قرب منى وضيق عينيه -مش عارف مش مستريحلك ليه
ضحكت -غمض عينيك
-ماشى
طلعته فالصالة ووقفت بعديه بمسافة -فتح عينيك
بصلى وكشر - دى الصالة وده بيتنا ودى انتى فين المفاجأة؟
طلعت المج من ورايا،رفعته لفوق وشاورتله عليه -شايف ده ؟
رفع حاجبه -إياكى!
حدفته عالأرض وإتكسر -أخدت حقى
ضحكت وجريت عالأوضة وقفلت الباب
خبط عالباب -افتحى
حاولت أخليه يتأثر شويه -أنا بحلم بالمج كل يوم،بيجيلي فالحلم من غير إيد يتمسك منها، جاى من غير رجلين، أخدتله بـ طاره عشان يستريح
علا صوته -انتي هتجننينى!
-تصبح على خير
-عمى وعاصم جايين بكره هه
-ينوروا والله
-طبعا مش محتاج أقولك هتتصرفى ازاى!
-حاضر هكراش على عاصم
-ايه!
-هكرش عاصم،هكرشه يعنى هطرده صفي نيتك
-تصبحى على خير
أصبح على خير! داأنا لسه كسرالك المج بتاعك من10د،هو أكيد زعلان ،وأكيد مش هيعرف ينام،ايه اللى عملته ده!إستفدت أنا ايه دلوقتى؟ طب والله حرام عليا،أنا اللى مش هعرف أنام كده،إشمعنا هو مزعلش عليا؟ ، لأ أكيد زعل وأنا هعرف ازاى؟ ،أنا هروح أشوفه،مينفعش ينام زعلان
فتحت الباب وقفلته تانى بسرعة،أنا هضعف ولا ايه؟ لأ ده أنا أصبح على خير وأنام أحسن
صحيت الصبح دخلت الأوضه اللى كان فيها ملقتهوش
حطيت إيدى على قلبى وإتنفست  -الحمدلله أكيد نسى وراح الشغل
نادى عليا من الصالة -صحيتى
رديت بإرتباك -لأ لسه...أقصد ايوه......يعنى كنت بدور عليك.
لقيت علبة فاضية عالأرض،مسكتها وجريت وقفت قدام الباسكيت اللى فالمطبخ بمسافة ...بحس بإنجاز كبير لما العلبة تيجى فالباسكيت من أول مرة
قرب منى- بتعملى ايه،وايه الوقفه اللى وقفاها دى ماتقفى عدل
اديرت بالبطئ وبصيتله -بنشن
بص للباسكيت وللعلبة اللى فإيدى وسكت
-عارفة إنك هتقولى دى حركة أطفـ.....
مسك منى العلبة ومشى خطوة -لما تيجى تنشنى،نشنى من قريب عشان تصيبى الهدف،هتخسرى لو بقيتى فمكانك،جربتها كتير
ايه العلاقة التافهه دى !ماأنا محبتكش من فراغ ياأخى
-طب شيلنى عشان أجيب الأطباق اللى فوق دى
-ماتجيبى كرسى وتطلعى عليه ولا أجيبهملك أنا أحسن
-ايه ده يعنى مش هتشيلنى وأجيب الطبق وألف بالبطئ ونبص لبعض وييجى هوا يطير شعرى؟
-عشان لما بقولك متتفرجيش على هندى كتير بترجعى تزعلى
-يعنى الطبق مش هيقع وتقولى فداكى حياتى!
-طب يرضيكى الطبق يتكسر ونلم فيه جزء جزء
-تؤ
-طب يرضيكى نجرى ورا بعض بمخدات ريش نعام وتكنسى فالشقة طول الليل وتنقيهم ريشة ريشة؟
-ايه ده فى ايييه! أنا بدأت أقتنع
-أنا هقنعك اصبرى بس،ينفع نرش على بعض دقيق وكاتشب والمطبخ يتبهدل؟
رديت بسرعة -لأ إلا المطبخ،مش هعرف أجيب ستيكرز زى اللى عالتلاجة تانى
-بمناسبة الاستيكرز، البشر الطبيعيين بيحطوهم على جلاد كراسات،مفيش حد بيعمل كده غيرك
-فعلا
-يبقى نتصرف ازاى؟
-ألم نفسى وأجيب كرسى وأبطل أتفرج على هندى
-أو تنادى عليا،أو ايه؟
-أنادى عليك
-ودلوقتى نجهز الغدا عشان عمى جاى،نجهز الـ ايه؟
-الغدا
-شطورة
ايه الطاعة اللى أنا فيها دى،أنا مش عجبانى اليومين دول
-أقولك على حاجه يايارا
سيف زعق -عاااصم
-استنى بس،بصى كان فى بنت اسمها بطة كانت بتنيمنا أنا وسيف من المغرب،كانت اكبر من سيف  ب3سنين وكنت أنا فـ1ابتدائى،المهم قالتلنا لو عديتوا من الشارع ده هعلم عليكوا،طبعا قولنا هى بنت وهتخاف تقرب مننا،ولما عدينا من الشارع علمت علينا وقلبت الساندوتشات والفلوس وكل ماتشوفنا فأى مكان تعمل كده،الله يمسيها بالخير بخاف أعدى من الشارع ده لحد دلوقتى
(ضحكت بصوت، كان غصب عنى والله،معرفش ضحكت عالكلام اللى بيقوله ولا على تعبيرات وشه!
-استأذنكم أنا بقا
كنت هرد بس سيف اتكلم -يكون أحسن
بعد اما مشئ وقفل الباب
سيف قرب منى ومسك إيدى جامد -الضحكة اللى ضحكتيها دى متضحكش تانى والـ......
زقيته -مش وقت ما تقولى إضحكى هضحك،وأسكت وقت ماتحب انت واتكلم وقت ما تحب انت! ،لأ أنا ليا شخصيتى واتصرف زى ماأنا عايزة
كتف إيده قدامه -اه وبعدين؟
-انت فاكرنى مش هقدر أعيش من غيرك؟ فاكرنى هخاف
نزل إيده وهز راسه -اه
-فاكرنى بحبك للدرجة دى
-ايوه
-لأ،انت تمشى عادى ،انت مش نهاية العالم يعنى،حياتى مش هتقف عليك
ضرب بإيده فالحيطة جنبى وزعق -اخرسى
اترجفت وحطيت إيدى على قلبى
اتكلم بهدوء -طالما مش فارق معاكى، مش مجبرة إنك تكملى معايا،سهلة أهى
(دخل الأوضة وقفل الباب جامد)
مش فاهمه الموضوع فلحظه وصل كدا ازاى! بحتاج أتكلم وأصرخ وأعيط بس يكون حبل الموضوع فإيدى،لو الحبل فلت هنضيع وقتها
شوية وباب الأوضة إتفتح،خرج منها فوقفت قدامه -لابس كده ورايح على فين؟
نفخ بصوت عالى ومردش
-متمشيش
-لو مبعدتيش دلوقتى، رد فعلى مش هيعجبك
مسكت إيده-متمشيش،انت العالم اللى أنا عايشه فيه،حياتي هتدمر لو بعدت خطوة عتى،والله ما كنت أقصد أقول كده،أنا بس كنت متعصبه و.....
-خلصتى؟
-نعم!
-مش فاضيلك
-بس أنا معنديش صحاب غيرك،افضالى وزعقلى وعاتبنى
-قولتيلى الكلام ده 100مره قبل كده
-خليهم الـ101
-طيب
شال إيده وفتح باب الشقة ومشى
طب إستنى أنا عايزه أحكى،أنا عارفه إنى متسرعة وغلطانه،مشيت ليه أنا محتاجاك دلوقتى،داأنا بسمعك فى كل مرة بتشتكيلى فيها،واجب عليك إنك تسمعلى!
بعد ساعتين سمعت باب الشقة إتفتح، دخل ووقف قدامى وهو متعصب-انتى إمتحانك بكره؟
هزيت راسى بـ ايوه
-امتحانك بعد كام ساعة وانتى قاعدة كده ولا أكنك رايحه رحله
-أنا هاهاهاها
-هتعطسى؟
-أنا هاهاها
-هتضحكى
-هسقط
-هواللى انتى بتعمليه ده طبيعى؟ راضية عن نفسك يعنى؟
ضحكت وسكت
-روحى هاتى كتبك وتعالى عشان أراجعلك
-ايوه بس......
-5د والاقى الكتب عندى فأوضه المكتب
جبت الكتب وحطيتهم عالمكتب قدامه
مسك الكتاب وفتحه -طبعا دى حاجات مفروض زاكرتيها من زمان
هزيت راسى -اممم
-والفصل ده سهل أكيد خلصتيه
سندت إيدى على خدى وابتسمت -طبعا
-والإمتحانات دى مفروض تكون إتحلت،بس الورق أبيض،فأكيد انتي عامله الإجابه فـ إسكتش
-اوماال
-والـ........
مسكت الكتاب وقفلت -أنا أسقط بكرامتى أحسن من اللى انت بتعمله ده
بصلى وضيق عينيه -انتى مفتحتيش الكتاب صح ؟
-فتحته امبارح
-شاطره،بس ليه كلو أبيض مفهوش خط واحد بقلم رصاص حتى
-ماأنا قفلته تانى،معرفتش أفهم حاجه
-.............!
-متبصليش كده ونزل حاجبك وإهدى فى ايه ؟ده أنا اللى رايحه أمتحن ومعملتش كده
-انتى واعية للى بتعمليه ده ؟
-أنا متعوده إنك تشرحلى
-انتى كنتى معصبانى امبارح
-ولو ولو،كان المفروض تيجى تزاكرلى
-أنا هفضل أخاف عليكى لحد امتى؟
-لبقية حياتك عادى، بص أنا مش مزاكره حاجه وخايفه ومتوتره و....(سكت شويه وعيطت)- طلقنى
مسح بإيده على شعره وضحك -ايه علاقة الطلاق بالدراسة؟ ثم انتى لحقتى تعيطى امتي؟ اللى هو الدموع ملحقتش تتجمع حتى!
ضحكت وأنا بمسح دموعى -معرفش، أنا لما بتوتر بعيط معروفة يعنى ،وبعدين قيلالك على مواعيد الإمتحان من شهر صح ؟
-وأنا هفتكر كل ده!
-ما انت لو مهتم كنت هتعرف
-انتي بتقولى اى كلام!
ابتسمت- بس تحسنى روشة وأنا بقولها صح ؟
-روشة!
-طب أقول شبحه!
-..............!
-خلاص هسكت
(ال اسكت ال،أنا كائن رغاى يعيش ويتعايش بالكلام )
-فايدة الكتب اللى معاكى ايه وانتى مش بتزاكرى اصلا!
-هنبيعها بالكيلو بعد الإمتحانات متشلش هم
-إحنا منكلمش بعض تانى أفضل
-لا ماأنا بعد الإمتحان هرجع مكلمكش، بس عشان تشرحلى النهاردة هاجى على نفسى ياعم وأكلمك
-لا وعلى ايه المجهود ده !
-ده على أساس إنك مزعقتليش،وبهدلتنى ومديت إيدك عليا ولمتلى هدومى و........
-ايه ده !ده أنا كـ سيف عمرى ماضربت عيل صغير حتى
-وسعت منى شويه دى،سورى إندمجت،(سكت شويه وإتكلمت) -وفيهااا إيه لما أندمج يعنى هه فيها إيه؟ حتى التخيلات هتقفلى فيها
-إحنا فـ موسم النكد؟
-لا موسم الحصاد
-حصاد البهجة والفرحة،اه افتكرت
-طب ذاكرلى
لأول مرة أصحى لمدة20ساعة متواصلة،ولأول مرة أجرب إن حد يصحينى كل ربع ساعه بالتلج
روحت من الإمتحان عالبيت،سيف كان قاعد بيتفرج على ماتش،وقف قدامى بسرعة لما شافنى -عملتى إيه؟ وإتأخرتى ليه  ؟وكنتى فين ؟
ابتسمت -كنت فين انت؟
قولنا إحنا الإتنين فصوت واحد -أصل شوفت حد زيك،بس قولت لأ
بصينا لبعض وضحكنا -جبتلى المج؟
-كنتى بتجيبيلى مج؟
طلعت العلبة من ورايا -اخر قطعة،شبه المج اللى كسرتهولك
طلع المج من العلبة -الوحيد اللى لقيته مرسوم عليه تويتى
-الظاهر كده هنمضى معاهدة سلام
غمزلى بعينه -طب ما ها بقا!
-ها ايه؟
-ايه!
"رأيتك ضوء فى نهاية نفق مظلم!"