يومًا ما سنلتقى

(٣٠)

-ماما أنا مش هتجوز من العيلة ،يعني مش عايزة أطلع
-  بعد ما وافقتي عليه وكتب كتابك؟
-ما أنا رجعت في كلمتي مش حوار يعني
-ومضيتي على العقد ليه؟
- بابا اللي قالي لو مش هتتجوزي ده مش هتتجوزي غيره ، انتوا اللي أجبرتوني عليه ف متزعلوش لما أطلق منه
- كتب الكتاب معداش عليه ١٠ دقائق وعايزة تطلقي !، إحنا مأجبرنكيش على حاجة ، إحنا شايفينه كويس ليكي وهيناسبك وهيستحمل البلاوي اللي بتعمليها
- المطلوب مني ايه يعني؟
- اطلعي اقعدي معاه بره ، مش كفاية مضيتي على العقد ودخلتي قعدتي هنا
إبتسمت - ماشي
مسكت إيدي ورفعت حاجبها - إياكي تعملي حاجة ! أنا عرفاكي كويس
- عيب يا أمي لأ طبعا
ملقاش إلا سيف بن طنط شكرية ويجوزهولي ،ايه ده لحظة! أمه مسمهاش شكرية أصلا ، بس أنا مبطيقهوش  ، طول الوقت هادي كده ومحترم فنفسه ،ايه الملل ده! أما هألش مع مين وهبعت كوميكس ل مين ؟يعني طموحاتي وتخيلاتي للجواز هتتبخر؟ وال ايه الفرح الأسبوع الجاي!
-اقعدي طب
- ماشي هق... وإنت مين عشان تقولي أقعد ولا أقف أصلا؟
-جوزك مثلا!
- وأنا برجع ف كلمتي ،مش عايزة أتجوزك
-ليه؟
- أنا مش بستريحلك
-ووافقتي ليه؟
-عشان بابا بيحبك
- وهو بابا اللي هيتجوزني ولا انتي؟
- ما تبطل أسئلة 
-عايزة نتكلم ف ايه؟
- نسكت ،تعرف تسكت
-أنا بحب أصحي بدري وبشرب شاي بلبن مش قهوة ، ومبحبش السمك ، وبحب أخرج كتير يعني مبحبش الكسولة
- بعيدا عن إني ميهمنيش كل اللي قولته ،بس أنا دلعي كسولة ، حتى إسأل بابا هيقولك بنتي أكسل خلق الله
- هستحمل مرة وإتنين ومليون بس هييجي وقت صبري بينفذ فيه ، وابعدي عني وقت ما أتعصب
- هو إنت بتتعصب بجد؟يعني مش هادي طول الوقت وكده؟
-مبحبش حد يزعجني وقت ما أنام ، بحب البلايستيشن والألش
( اووه يااه ، بلايستيشن وألش ،أهو طلع فيه حاجة بحبها )
- أمي بتختارلي هدومي الصبح ف انتي هتبقي مكانها ، بعرف أختار هدوم بس بفضل إن يبقى معايا رأى شخص تاني
- وايه كمان؟
-هساعدك في أى حاجة في البيت ، بس وقت ما برجع من الشغل تعبان هيكون البيت كله عليكي
(معنديش مشكلة إن البيت يبقى كله عليا لإن ده واجبي بعيدا عن إني هفرح لو ساعدني  ، وهفرح لو شاركنا بعض كل حاجة سواء في البيت أو غيره  ، وواجبي إني أهتم بيه وبالحاجات اللي بيحبها أو يكرهها ،وبتفاصيل حياته سواء كانت كبيرة أو صغيرة ، ماما قالتلي صاحبي جوزك ، يعني مفروض ييجي يحكيلي أنا دايما ، أيا كان اللي هيقوله سواء يزعلني أو يفرحني ، بس منخبيش على بعض حاجة ، طالما الثقة والإحترام موجودين ما بينا ف جوازنا هينجح)
-وانتي؟
- أنا ايه؟
- إتكلمي عنك
-هتعرف بعدين ،ده إذا كملنا
( أنا برضى بالكلمة الحلوة ، يعني ممكن أبتسم طول اليوم بسبب كلمة ، وممكن معرفش أنام ويومي يتشقلب بسبب كلمة بردو ،بحب الهدوء بس بفضل أنام وسط دوشة وناس ، أكتر مكان بفضل إني أروحه هو الملاهي، بحب الورد والبطاطس ، مبحبش حد يعلي صوته عليا ومبحبش إن حد يؤمرني بحاجة ، بيتضحك عليا بكلمة بس بمزاجي، بسامح كتير بس مكانة الشخص بتتغير ومستحيل ترجع زي الأول ، ومبحبش حد يقلل مني ،كرامتي رقم واحد وأي حاجة تانية بتيجي بعدها ،انا أنانية من ناحية الأشخاص اللي بحبهم ، يعني لما أحب حد يبقى ميحبش غيري وحياتنا تتقفل علينا إحنا الإتنين وبس)
عدى ٣شهور، فكرة إن أنا وهو في بيت واحد مش وحشة زي ما تخيلتها ، الحياة معاه هادية وبسيطة ،بيحب الهزار وبيعرف يألش أكتر مني
رفعت المخدة وأخدت الرسالة من تحتها ، إتعودت إنه يسيبلي رسالة كل يوم تحت المخدة ولما أصحى بقرأها،بنام مبسوطة وبصحى مبسوطة أكتر عشان أعرف كاتبلي ايه
فتحت الرسالة
"لأنكِ تُشرقين دوماً ، ما عاد الليل يزعجني"
Walaa Walka
إبتسمت ورشيت على الرسالة برفيوم من بتاعه وحطيتها في الصندوق مع باقي الرسايل وشيلته في الدولاب
هو ميليقش ابدا بالصورة اللي كنت متخيلاه بيها زمان
- خيارة
-الاسم  اللي بتقولهولي ده بينرفزني
قرب مني وضيق عينيه - إعترفي إنك بتحبيه
ضحكت -شوية
(أنا فرحانة بإن يبقالي اسم مميز يناديني بيه ، فرحانة ب فكرة إنه يميزني عن الكل ولو ب شئ بسيط)
المفروض النهاردة نتغدا عند مامته في الشقة اللي تحت ، عشان أتعرف على عيلته لإني كنت رافضه إني أقابلهم أو كنت خايفه
رغم إن شقة مامته تشبه بيتنا إلا إن الأشخاص الموجودين فيها دلوقتي مزعجين أو أنا مش مرتاحة ف وجودهم خاصة البنت اللي بتبصلي كإني مراة أبوها ،سيف قالي إن اسمها (مروة) وتبقى بنت عمته
رفعت حاجبها وبصيتلي - وانتي هتفضلي ساكتة كده؟
-أتكلم وقت ما أنا عايزة
- طب ابقي إنزلي بدل ما انتي مش بتخلي سيف يزورنا
-هو حر علفكرة
- طب ما تتكلمي عدل ، ايه الأسلوب ده ، انتي ضيفة هنا و....
كنت هرد بس سيف إتكلم - ده بيتها قبل ما يكون بيتك ، يعني انتي  اللي ضيفة ، هى تقعد هنا أو تقعد فوق ده شئ ميخصكيش ، ولما تتكلمي صوتك ميعلاش ( سكت وبعدين بصلي)- اطلعي فوق وأنا جاي وراكي
-لا مش....
زعق -اطلعي
طلعت الشقة ودخلت الأوضة وقعدت على السرير
٥ دقائق وجه ورايا
-خير؟
- آسف ، مكنش قصدي أزعقلك ، أنا مكنتش عايز الموضوع يكبر
- طيب ، إقفل الباب عايزة أنام
- انتي مش بتنامي في الوقت ده
- وأنا قررت أنام،عندك مانع؟
- براحتك بس مش هتاكلي؟
- لأ كُل تحت ليفتكروا إني هخطفك ولا حاجة وأنا مش طايقة أقعد هنا أصلا
-بلاش نتكلم دلوقتي
فردت عليا الغطا وغمضت عيني - أحسن بردو 
ساعة والباب خبط
- علفكرة عارف إنك مش نايمة
- لا نايمة ومبحبش حد يزعجني قبل ما أنام
-اللي أعرفه وإكتشفته إنك بتحبي تنامي وسط دوشة
- هنام ومش هرد
شال الغطا ومسك إيدي عشان أقوم
- متناميش زعلانة عالأقل
-  إنزل أقعد تحت عشان متزعلهاش
- أفكارك دي غلط ، أنا مقولتش اطلعي فوق عشان أضايقك ، أنا رديت حقك قدامك وباقي الكلام  مينفعش أقوله قدامك عشان هى متتحرجش، هى بنت عمتي بردو
- طيب عايز ايه دلوقتي؟
-متزعليش
-لا هزعل ، هزعل للصبح  ، أو ممكن أزعل يومين ، والفترة دي متقربش من حاجاتي ولا أنا أقرب من حاجاتك و إياك إياك تشرب في المج بتاعي
( هو زعل؟ يلهوي ل يكون زعل فعلا! هو طيب ويتحب والله بس مش معنى كده إنه مبيزعلش ، هو أنا زعلته ف ايه أصلا!
نمت ، ولما صحيت ملقتهوش في الشقة ، مفروض النهاردة أجازة ف أكيد عند مامته تحت ، مامته طيبه وتتحب بردو ، انا مشوفتش منها وحش لحد دلوقتي وتعتبر في مكانة أمي
هو مش هيفطر معايا يعني عشان قولتله محدش ييجي جنب حاجة التاني! أنا عمري ابدا ابدا ابدا ما هلبس من هدومه هو فاكر نفسه مين... الله ايه التيشيرت القمور ده!
أخدت التيشيرت بتاعه من الدولاب ولبسته ، مش هيحصل حاجة لو لبسته مرة يعني
- ايه ده؟
لفيت وبصيتله - عارفة إننا وعدنا بعض محدش يلبس من حاجات التاني ،ومحدش يتخطي حدوده
- لأ مش إحنا،انتي اللي قولتي كده وأنا نفذت وعدي
- لإنك لازم تنفذ وعدك لإنك راجل ،أما أنا مش راجل و مقولتش إني مش هرجع ف كلامي ،لأ أنا برجع في كلامي عادي لإن التيشيرت ده عاجبني ودخل دماغي وهاخده وهضيقه عند الخياطة وأقصره شوية عشان طويل صح؟ انت شايف انه طويل؟
سند عالدولاب وهز راسه -فعلا أنا شايف إنه عايز يتقصر ويتض.... ايه ده! ده تشيرتي ،اقلعي التيشيرت أنا عايزه ، ومش معنى إنك مش راجل يبقى ترجعي ف كلمتك !
-ترضى راجل يدخل على أختك الاوضة ويقولها اقلعي التيشيرت بتاعي
- لا طبعا مرضا..... لحظة!وهي تلبس تيشيرته ليه اصلا! وبعدين أنا جوزك انتي ليه محسساني اني ماشي معاكي
-بقولك ايه متسألنيش اسئله صعبة!
- اقلعي التيشيرت مبهزرش
-لأ ،افتح الدولاب بتاعي وخدلك أى تيشيرت يعجبك بداله ، انا مش هاكل حقك يعني
-أخرج بتيشيرت عليه قطط وحصين ملونة بقرن بينك؟
- اللي تشوفه
قرب مني ف رجعت خطوتين ل ورا -  اطلع بره أوضتي
- دي اوضتنا
نزلت من على السرير وإبتسمت - إنت صح
-رايحة فين؟
-هتشوف
طلعت من الدرج قلم ومسطرة وقعدت على السرير تاني
-بتقيسي السرير بمسطرة ليه؟ ايه اللي بتهببيه ده بوظتي الملاية
-قسمت السرير بالنص ولو عديت النص بتاعك تبقى مش أد كلمتك ، خلينا كده بقى
( نسيت أقوله إني كنت جيباله مج عشان بيشرب في المج بتاعي عشان يستفزني يعني، المج ده مش هخليه يشوفه لأ ، هو التيشيرت أغلى من المج ولا ايه؟)
-  شوف جبتلك ايه؟
- جيبالي مج عليه سبايدرمان؟
-ملقتش غيره للولاد ، الباقيين كلهم بناتي اوي ، وبعدين أنا حبيت أجيبلك زيي  يعني لو مش موافق ف.....
-هتعملي ايه؟
- ف هتوافق بالعافية ،أنا مش بعد ما جيبته يعني ، والهدايا لا تُرد
إبتسم - شكله حلو ،شكرا
( ده إنت اللي حلو ومقطقط والله ،تاخد قلبي ؟
-هجيب فطار وجاى
-إنت مفطرتش؟
-لأ ،إستنيتك تصحي
قفل الباب ومشى ، دخلت الأوضة وطلعت النوت وكتبت :
"فلتكن آخر كلماتي أنني أثق في حبك!"
Rabindranath Tagore"
قطعت ورقة من النوت وكتبت
"لم أتعمّد أن أحبك لكن حبّك تعمّدني " ل :سارة صالح
سيبت الورقة في جيب الجاكيت بتاعه وطلعت أقعد في البلكونة
سمعت باب الشقة إتفتح ف دخلت وقفلت البلكونة
- تعالي نحضر الفطار
هزيت راسي ب ماشي ودخلت معاه المطبخ
- إعمل سلطة
- لا حضريها انتي وبلاش تاكليها قبل ما تتعمل
- أنا باكلها بجد؟
هز راسه وضحك - بالظبط زي دلوقتي
نزلت الخيارة من إيدي وحطيتها في الطبق ، انا باكل وأنا سرحانة  والله،استني هفهمك طب ، أنا مش مفجوعة لأ
- أنا خارج مع صحابي ، القميص ده حلو؟
وقفت قدام الدولاب وطلعتله قميص وجاكيت - القميص الأبيض بيبقي شيك عليك ، وإلبس الجاكيت ده
(أنا عطيته الجاكيت ده مش لأجله لأ ،لأجل الورقة اللي في جيبه)
- سيف
- ها؟
-ينفع أسألك سؤال مشمحترم برئ؟
ضحك - انتي بتقولي ايه؟
-قولي إسألي يا ميار
-إسألي
-أعرف ازاي إني حبيتك؟
- مش عارف  إن كان الحب ليه أعراض ، زي أعراض الصعر كده ولا لأ
-يعني أنا كده بحبك؟
- هو أنا اللي مفروض أجاوب؟
( طب أقوله إني بحبه ازاي ؟ أجيب بالونة وأفرقعها في وشه وأقوله بحبك ، ولا  أدخل عليه الأوضة فجأة وأقوله ششش بحبك ، ولا أطلع السرسجة اللي جوايا وأقوله إنت السند والإحتواء وإنت اللي تتحب بغباء؟ ولا أديله رقم الواتس؟ ايه الغباء ده ما هو معاه رقمي 
لأ هو هيعرف من الورقة وخلاص )
الجرس رن بعد ما سيف نزل ب ٥ دقائق ، أكيد لو هو كان دخل علاطول يعني
- ايه ده! إنت نسيت حاجة؟ مفروض المفتاح معا..
-ايه اللي في الورقة ده؟
-  يعني إنت مش فاهم؟
- لأ فاهم بس عامل نفسي مش فاهم ، ف فهميني
- بص إنت إنسان طيب ومناسب و......
- هو انا جاي أقدم أوراقي ف دار أيتام؟
- ششش،بحبك

"رأيتك ضوء في نهاية نفق مظلم"