يومًا ما سنلتقى

(٣٢)

-إحنا ندخل إحنا الاتنين في وقت واحد والتهزيئ هيتقسم علينا
- ما انتي لو بطلتي تتأخري مش هتجيبي لنفسك التهزيئ ، وأدخل معاكي ليه وأجيب لنفسي الكلام؟
- عشان مفروض إنت ابن خالي وكاتب كتب كتابي ومفروض نقسم المصايب بالنص ، وبعدين هو إحنا مش كنا بنجيب فساتين؟
-بنجيب؟ ايه النون اللي في الكلمة دي؟ بتتكلمي بصيغة الجمع ليه؟ هو أنا هلبس من الفساتين دي!
- هتشترك معايا في المصيبة أحسن والله ل.....
-هتعملي ايه يعني؟ ده أنا شايل عنك نص بلاوي حياتك
-سيف! إنت لو مدخلتش معاياا مش هروح معاك الشغل بكره!
ماما فتحت باب الشقة وبصت علينا إحنا الإتنين
- بتقسموا أنهي مصيبة المرة دي؟
بصيت لماما وشاورت عليه ويكأني متعصبة -ماما لو سمحتي! أنا قولتله بلاش نتأخر ماما هتزعل ،قالي لأ أنا هكلمها ، قولتله ماما هتزعق ،قالي لأ أنا هكلمها ، أنا مش هروح معاه في أى مكان من النهاردة ،مش كل مرة أتأخر وأتهزأ بسببه ، أنا زهقت ..زهقت
قرب مني وإتكلم بصوت واطي - مش للدرجة دي هه! دراما أوفر أوي
بصيتله بطرف عيني ووطيت صوتي - ده تمويه ياض تمويييه
- والله أسيبك وأروح!
- مش من الرجولة ان الإنسان يسيب أخوه الإنسان مزنوق قدام أمه ويمشي
ماما بصت من تحت النضارة وزعقت - بتتكلموا في ايه ؟
- ابدا يا أمي بقوله مش هروح معاك الشغل تاني ولا هنتكلم ،ياكش تتقطع صلة القرابة اللي بينا
إبتسم وبص لماما-حقك عليا المرة دي يا خالتي
(فيها ايه يعني لما أتأخر خمستلاف مرة وأجيب السبب فيه فيها ايه يعني؟ هو أنا كنت هاكل من لحمه ! في حياتي مشوفتش إنسان عديم الاحساس كده)
- عدي الجمايل ياكش يطمر فيكي
- هجيبلك عسلية بكره
- انتي هتجيبيلي أنا؟
-اه هجيبلي أنا وإنت على حسابك
- طب قومي شوفيلنا حاجة ناكلها
- معندكش اكل في شقتكم اللي فوق؟ ولا إنت مولود مفجوع كده؟
-أمي مش فوق
- طب قوم شوف في أكل ايه في التلاجة وهاتلي معاك
- أنا شغال أقولك جعان ، وأمي مش فوق ، عشان تحسي على دمك شوية وتقومي تعملي أكل بس أقول ايه ،حلوفة
مسكت التليفون وضحكت- لو لقيت مخلل أبقى هات معاك
( سيف أكبر مني ب ٤ سنين ، بس بحسه قريب من تفكيري لإننا إتربينا مع بعض ،ولإني معييش إخوات ف هو كل حاجة بالنسبالي ، إشتغلنا في نفس المكتبة عشان نروح ونيجي مع بعض ، بنحكي لبعض كل حاجة ب حيث لو حد فينا عمل مصيبة يبقى التاني جاهز بالحل بتاعها )
- إتأخرتي ليه؟
-ما انا قولتلك يا ماما
- إتأخرتي ليه ؟
- إسألي سيف
- عشان معكيش رد مقنع المرة دي فأروح أسأله تكونوا طبختوها سوا صح؟
-صح
-بت!
-كنت بشتري فساتين ، وجاهزة لأى تهزيئ ، أنا تحت أمرك ، بس الأول أعملك كوباية شاي تهديكي
- ابقي شوفي حجة مقنعة المرة الجاية
-عنيا ،بكره أقابل سيف ونألف حوار جديد
( نفسي أعرف ايه السر الموجود في كلمة شاي دي اللي بتهدي أعصابهم)
نمت ولما صحيت نزلتله تحت ، لازم أخليه يستني نص ساعة لازم 
-عايزة آكل
-طب قولي صباح الخير حتى!
-صباح الخير عايزة آكل
- هناكل ماشي، وبطلي تأخير أحسن مما أم...(سكت وبص على إيدي)- حظاظة فلسطين دي مش غريبة عليا!
- دي بتاعتك أيوه ، خبطت عليكم بليل ومامتك جابتهالي لإنك كنت نايم ، لايقة مع الفستان صح؟
- لايقة اه
-طب هاخدها بقى
- أنا بقيت أخاف أشتري حاجة قدامك عشان عارف إنك هتاخديها
- بطل تشتري حاجات حلوة تعجبني وأنا مش هاخدهم
-  لحظة !ما انتي اللي بتنقيهم!
- بنقيهم عشان آخدهم ؛خليك مفتح وناصح كده
(كل مرة بفهمه نفس الكلام ومبيسمعش كلامي ،طب هعمل ايه تاني!
- انتي ماسكة الشنطة بإيدك الاتنين زي العيال اللي طالعة من المدرسة ليه
-لإني عيله زيهم ،بيس يا مان بيس
- أمك لو سمعتك دلوقتي كانت عطتك بضهر إيدها
-حياة الكبار كئيبة
- مملة ، حياتهم مملة
- طب عايزة آكل ، هاتلي أكل وهاتلي عسلية
- انتي بتخرجي من موضوع بتدخلي ف موضوع تاني وبتتكلمي عن موضوع ثالث، ببقى ماشي مشتت مش عارف أنا هتكلم في ايه ولا أركز ف أنهي موضوع
- بتاع بطاطس سوري اللي هناك ده؟
- تقريبا
-طب عايزة فطير بالسكر
- طب والله ما جايب حاجة غير لما ترسيلك على حل ، أنا ماشي
مشيت بسرعة وراه  -لوتفي إستني يا لوتفي
يوه!هو زعل ولا ايه؟ الانسان بقى قموص اوي اليومين دول
-شوف عمك الضو جابلك ايه!
مبصش عليا وكمل ترتيب في الكتب
- كيك من اللي إنت بتحبه
بص بطرف عينه وإبتسم -سخن؟
- لسه عملاه الصبح
فتح العلبة وبصلي وكشر - فين الكيك؟
- ما أنا جوعت وأكلته قبل ما أنزل
-.......!
- جيبتلك قطعة والله متبصليش كده
- انتي بتعملي ايه في حياتك غير الأكل
- بنام وب آكل وبعيط عشان ببقى محتاجة آكل وبروح الشغل عشان أجيب فلوس وآكل وبعمل أكل عشان آكل
- لأ ما شاء الله عليكي الصراحة
- هطلب منك طلب ومترفضش تمام؟
-على حسب الطلب
-لا قول مش هرفض الأول
-ماشي مش هرفض
- عايزة أشتري طرحة بعد الشغل عشان مجبتش امبار..
-لأ..مستحيل ...تعرفي لو عملتي ايه بردو لأ
( بيج ساد والله ، يعني أخرج بالفستان من غير طرحة ولا شوز؟)
- بقالنا ٣ ساعات بنلف على زفت طرحة
- في درجة في اللون الأبيض كده بدور عليها
- هو اللون الأبيض في درجات؟
-اه طبعا
-الحمدلله مش حياتي
- ولسه هنجيب شوز وشنطة و.....
- آخرك معايا الطرحة وكلمة كمان مش هيبقى فيها طرحة خالص
-بتتكلم جد؟
- ايوة ومتبصليش كده وتعملي نفسك بريئة
- يعني مش هتيجي معايا؟
- لأ هنروح
-بس أنا مش هروح، أنا هشتري حاجاتي
-انتي هتعيطي ولا ايه؟
-ما أنا لو كان معايا أخت ولا.....
-يادي أم الجملة اللي بسمعها كل مرة
ضربته ف كتفه وضحكت - طب بالله عليك مبتأثرش فيك؟
- إنجزي، قدامك ساعة مخلصتيش والله همشي
- تشكر يا بيه
- أستغفر الله العظيم
- متمشيش مكشر ياسطا
- بقولك ايه! إمشي وانتي ساكتة
-طب متزعقش طب
-يا الله منك ، عايزة تعصبيني؟
(فيها ايه لما ألف سبع تمن ساعات عشان أدور على طرحة ولا فستان! خلاص للدرجة دي محدش طايق التاني؟ رايحة بينا على فين يا دنيا
- حلو الشوز ده؟
- لأ التاني أحلى
- متأكد جدا ولا نص نص
- والله ده شكله ما حلو ف مش هيليق ابدا
- خلاص هشتري التاني
- في فستان شكله حلو في المحل التاني تعالي نشوفه
-أحلى من بتاع امبارح؟
- اه
-موافقة
( ما إنت قمر أهو وإنت بتنقيلي هدومي ،أما في ايه بس!
-تعرف إن لما ماما زنقتني عشان تسألني إتأخرت ليه ، أنا بعدتك عن الموضوع تماما تماما تماما
-كدابة
-بصراحة اه
- وصدقت المرة دي؟
-لأ قالتلي نشوف حوار جديد عشان قفشتني المرة دي
- انتي متصلتيش عليا قبل ما تنزلي كنت نزلت معاكي ، هى من حقها تخاف عليكي ، بطلي تتصرفي من دماغك
-  هو أنا صغيرة؟إنت ممل جدا وكل شوية تعيد في نفس الكلام ، أنا زهقت
-طب امشي نروح أفضل
- لا مش همشي عايز تمشي امشي ، مش براحتك يعني
- أنا ساكت لحد دلوقتي ف متزوديش في الكلام عشان متزعليش
- أنا همشي بس بمزاجي
( أهو النكد سيطر عليا أهو ، أنا لو قاصدة أتخانق معاه مش همسك في أسباب تافهه زي كده)
-ماما
-ها؟
- هو لو حد إتخانق مع حد والحد ده غلطان  والحد التاني....
- بلا حد بلا سبت قولي إنك انتي وسيف إتخانقتوا
- لأ مش اوي ...هو يعني... الموضوع بس.. اه إتخانقنا وأنا الغلطانة
-  اتصلي بيه صالحيه
-بكره يا ماما الساعة ٣ الفجر دلوقتي
أتصل بيه دلوقتي أعمل ايه!من سابع المستحيلات إني أتصل بيه ، فين الأدب؟فين الإحترام؟ فين التليفون أتصل بيه
-صحيتك؟
سمعت صوت نفسه بس مبيتكلمش
-........
-عارفة إني غلطانة علفكرة وبعتلك قلب مكسور عالواتس ،أهو أنا قلبي زيه كده
(ايه الدراما كوين دي! مفروض يعرف إني مبعرفش أكلم كتير ويتصالح مع نفسه يعني
- طب هو إنت زعلان؟
-انتي متصلة عشان تسألي؟
- متزعلش ومفروض لما أقولك متزعلش يبقى متزعلش
-هقفل!
- آسفه طب ، والله معرفش ايه اللي حصل ، بس أنا رديت من غير ما أفكر وبعدين ندمت ف إتصلت بيك
- انتي بتتكلمي دايما من غير ما تفكري والموضوع ده مش كويس ليكي أولا ، وبيستفزني جدا
-طب هتصل بيك لما أنزل وهسمع كلام ماما ، وهفكر قبل ما أتكلم ، إنت كده مش زعلان؟
-متأكدة من النقطة التالتة دي؟
- لأ بس هحاول
- ماشي تصبحي على خير
- يا سيف متزعلش بقى
-خلاص مش زعلان
-إحلف!
- والله ما زعلان نامي عشان منتأخرش على الشغل زي كل مرة
-ماشي ، تصبح على خير
(أنا عارفة إنه مش هينام غير لما نتصالح ، ومكنش ينفع نفضل زعلانين يعني ، أما أصدع مين بكلامي اللي ملهوش لازمة عالصبح !
- إنت اللي قولت لماما تصحيني بدري عن ميعادي؟
-اه عشان منتأخرش
- أهو رايحين الشغل بدري ياكش ناخد جايزة نوبل ولا حاجة
- إفصلي كلام عشان بمشي مصدع وبروح مصدع بسببك
(ايه ده! ايه الوقاحة دي! أما لو أنا متكلمتش مين  هيتكلم يعني!
- الفستان ده شكله حلو عليكي
- عشان تعرف إن ذوقي حلو
- ده أنا اللي مختارهولك إمبارح
-وأنا وإنت ايه يا روحي؟
- متجوزين؟
- واحد ..أنا وإنت واحد ، خفة دمك دي هموت بسببها مرة
- والطرحة دي مش قولتيلي إنها مش هتليق ابدا
- وإنت هتاخد بكلامي يعني!صحيت لبستها لقيتها لايقة أعمل ايه؟
- لو لقيتك بتعندي معايا تاني ه.....
- هتعمل ايه؟ ما أنا لو كان معايا أخت ولا أ....
- لا شوفيلك جملة تاني عشان مبقتش أتأثر
-خالص؟
-خالص
-طب متضحكش طب!
- يعني مستحمل صداعك وشايلك الشنطة وهتتشرطي كمان
-الشنطة تقيلة والله
-طب هتعملي ايه النهاردة بعد الشغل؟
-هشتري أكل
- نعم؟
- هشتري طرحة
-ايه!
-هنروح البيت

"رأيتك ضوء في نهاية نفق مظلم"