يومًا ما سنلتقى

(١٥)

-هو إحنا لازم نغير البيت ده !طب ما تخلينا هنا وروح شغلك عادى
-المسافة بقت بعيدة بعد ما إترقيت فالشغل
-مش عارفة ليه !،بس مش مستريحة لشغلك الجديد ده
-ليه؟
-كل ما بيزيد الشغل عليك كل ما بتبعد عنى ،وشغلك هنا مكفينا وزيادة
-وقت الشغل غير وقتك،أكيد هفصل مابينكم
-إحنا هنمشى إمتى؟
-الصبح
-طب تعالى نخرج او نتمشى عالبحر ،بما إننا هنمشى بكره
-المكان هناك أحلى بكتير ،وفيه بحر كمان و......
-هتخرجنى ولا أعيطلك؟
إبتسم-أخرجك
بطبيعتى بخاف من أى مكان جديد أروحه،لا أنا متعودة عليه ولا على الناس هناك،ولا بأوقات شغل سيف،كل ما الشغل هيزيد عليه كل ما هيبعد عنى أكتر وهيهملنى،وأنا مش مستعدة ابدا إنه يترقى فالشغل على حسابى أنا
-قربنا نوصل؟
-الشارع الجاى خلاص
دخلنا فعمارة كبيرة،معرفش ازاى بقيت فى بيت تانى،وسيبت الأول،البيت الأول رغم إنه صغير إلا إنى كنت مطمنه فيه
قعدت عالكرسى -سيف
-نعم؟
-ينفع متبيعش البيت القديم ؟
-ليه؟
-حباه أكتر،إحنا إختارنا كل حاجة مع بعض هناك،ف مش حابه نبيعه
-حاضر
-أنا جعانة
-تعالى ناكل تحت ،وبالمرة أفرجك عالأماكن
-ماشى
أكلنا وطلعنا فوق تانى
عملت قهوة وقعدنا فالبلكونة
-بقولك ايه يا سيف
-انتى مش بتفصلى كلام؟
-إنت متجوزنى من٩ شهور يعنى المفروض تكون حفظتنى
-ماشى إحكى
-هو إنت شغلك ده اللى بيبقى فيه بنات كتير لابسين فساتين بترتر وكعب عالى وشعر أصفر و......
رفع حاجبه -أنا مهندس مش صبى رقاصة !،فإتعدلى كده أحسنلك
ضحكت -بستفسر بس
-أنا داخل أنام عشان عندى شغل الصبح
-هتبدأ من بكره؟
-أكيد
نمت وصحيت الصبح ،عملتله الفطار ونزل
قعدت شوية أقرأ فالكتب اللى جيبتها معايا وبعدين إتصلت بيه
-أ.......
-حبيبتى معلش إقفلى دلوقتى وهتصل بيكى بعدين
-ماشى سلام
إبتدينا ،أكيد قاعد مع واحدة لابسة فستان بترتر أكيد
نزلت إشتريت الأكل من تحت ،...طلعت عملت الغدا وقعدت فالبلكونة أستناه ،أكيد هييجى بدرى زى الأول،إستنيته ل٧بليل ومجاش
بيهزر! أنا أصبر على أى حاجة إلا الأكل
سمعت باب الشقة إتقفل،فقومت ووقفت قدامه
كتفت إيدى قدامى -لسه بدرى
ضحك وشدنى من إيدى عشان نقعد- تعالى بس هحكيلك من غير ماتقلبى وشك
- ياسيف الساعة ٧ياسيف، وإنت عارف إنى بجوع بسرعة
إبتسم -حقك عليا، والله كان عندى شغل كتير عشان أول يوم ،هغير هدومى وآخد شاور وناكل
-الأكل برد علفكره
-عايزة تقنعينى إنك مأكلتيش منه قبل ما آجى؟
-دوقته بس
-١٠ دقائق وجاى،متخلصيش الأكل هه
ضحكت -عيب عليك
أسبوع بعدها مبقاش ياكل معايا،وبييجى ينام ،وقته كله بقى للشغل ،حتى مبقاش يتكلم معايا،ويوم الأجازة اللى أخده قضاه نوم ومخرجناش زى ما وعدنى
جه من الشغل،أخد شاور وفتح اللاب بتاعه
-أحضرلك الأكل؟مستنياك تيجى
-كلى انتى ،أنا أكلت بره
-أنا مستنياك من ......
-ثوانى بس
قعدت جنبه -طب عايزة أحكى معاك عشان ماما إتصلت بيا و.....
-معلش يا حبيبتى مشغول،شوية بس وهفضالك
هزيت راسى -مشغول فإيه؟
-المفروض أعمل مشروع وآخد عليه جايزة الأسبوع الجاى، وفى مشروع بعد٥ شهور ،ده لو نجحت فيه هترقى فشغلى وأبقى مدير
إتكلمت بسرعة -متترقاش تانى ياسيف بالله عليك كفاية كده
بصلى -مترقاش تانى ازاى يعنى؟
-حياتنا مش ناقصة تتدمر أكتر من كده
-أنا بس مشغول اليو.......
زعقت -إنت مبتفضاش أصلا
عدى أسبوع تانى ممل ،بقى ياكل بره وييجى يفتح اللاب وينام،والمفروض إنه هياخد الجايزة بكره
-سيف
مردش فإتكلمت -ياسيف
-ها؟
-ماتفضالى شوية عايزة أحكى معاك
سند اللاب جنبه وبصلى -ايه مزعلك؟
-مفيش
-المفروض عندى شغل وانتى بتهزرى
(هو مش هيضحك زى كل مرة ويقولى مالك١٤ مرة وأجاوب فال١٥!)
-أنا مش عايزة أتكلم
مسك اللاب تانى وشغله -طيب
-هو ايه اللى طيب !لا قولى إحكى،أنا عايزة أحكى
زعق -ماتبطلى شغل الأطفال ده ،فى ايه؟
مسكت اللاب منه وحدفته عالأرض -هو ده اللى باعدك عنى؟
-............!
-انت مبقتش تتكلم معايا ولا بتاكل ولا بنخرج ولا بنقعد مع بعض ،انت مبقتش تحكيلى ايه حصل فى يومك وكل ما أسالك تقولى بعدين !
-ايه اللى عملتيه ده؟
وقفت -كل اللى شاغل بالك الشغل وبس ،وإزاى هتستلم الجايزة وإنك لازم تاخدها حتى لو على حسابى وحساب أى حاجة صح؟
وقف وضرب بإيده عالحيطة -بتعصبينى وبترجعى تزعلى من ردة فعلى
-يارب ما تاخد الجايزة ياسيف،يارب ما تنولها
قرب منى وضغط على إيدى جامد وزعق -إخرسى ،أنا مش بعد ما بنيت كل ده يضيع بسبب غبائك
بصيتله وبرقت -إنت لا يمكن تكون الشخص اللى أنا حبيته وإتجوزته ابدا !(شيلت إيده وعيطت)- أنا بقيت أخاف منك يا سيف ،أنا بقيت أفكر فالكلام قبل ما أقولهولك ،والنهاردة بس أول مرة مفكرش وقولته علاطول ، وشوف إتعصبت ازاى!،أنا لاعايزة شغلك ولا عربيتك ولا الفلوس اللى بيدوهالك فالشغل،كل اللى طلبته هو إنت،كتير عليا إنت ؟
-يارا
-هو إنت بقيت تنام عادى كده من غير ما ضميرك يأنبك !مبتحسش بالذنب ؟أخدتنى من بيت بابا وجيبتنى فسجن هنا بتكلم مع نفسى وبس!
رجع ل ورا خطوتين وبعدين إتقدم تانى -أنا آسف والله ما أعرف عملت كده ا......
-متعتذرش،مش مسمحاك،والله ما مسمحاك ياسيف
-إسمعينى
-اول مرة أقولك مش مسمحاك،وأول مرة أخاف منك،وأول مرة تبعد عنى بالشكل ده،وأول مرة تكون إنت السبب فدموعى
-بالله عليكى..........
-الظاهر كده هتحصل حاجات كتير إنت وعدتنى بإنها متحصلش
-طب تعالى نتكلم
-تصبح على شغلك،...أقصد تصبح على خير،ولا الإتنين مبيفرقوش عندك صح!
-أنا عارف إنى إنشغلت عنك ،بس.......
دخلت الأوضة وقفلت الباب،مستنتهوش يكمل كلام،قعدت عالسرير وكملت عياط
طلعت النوت وكتبت "أنت أقربهم إلى قلبى وأبعدهم عنى "
قلبت الصفحة وكتبت "لماذا أنا أشتاق إليك كل هذا الشوق،إذ كانت أنا تعنينا نحن الإثنين كما إتفقنا!"ل غسان كنافى
هو كتير عليا لما أطلب شخص مالدنيا ! أكتر حاجة بتربطنى بالشخص اللى قدامى الإهتمام،..الإهتمام لما بيروح ،الحياة بتبقى مملة زى قبل أول مرة إتقابلنا فيها كده
معرفتش أنام للصبح ،باب الأوضة خبط
-إفتحى الباب عشان خاطرى
-..........
-طب مش هتيجى معايا النهاردة؟
-.........
-قوليلى أى حاجة،والله ماعرفت أنام،عارف إنك بتعيطى دلوقتى،وعارف إنى قصرت معاكى جدا ،وعارف إنى خلفت بوعدى،بس آسف،أول مرة تقوليلى مش مسمحاك،الكلمة دى كبيرة أوى عندى،ومعرفش إزاى كنت سبب دموعك، بس أقسملك بالله هنبتدى من جديد النهاردة،ولو إتغيرت معاكى تانى،أنا بنفسى اللى هقولك يلا نرجع شغلى القديم
(حطيت إيدى على قلبى وعيطت،معرفش ليه لما بزعل نفسى بيضيق وقلبى بيوجعنى بالشكل البشع ده !)
-طب ردى عليا حتى!
-............
-هاجى بدرى النهاردة وهخرجك ونعمل مع بعض الأكل اللى بتحبيه،هو مايتاكلش اه بس ما علينا هاكله عشانك.
ضحكت وسط دموعى ومردتش
-أنا همشى دلوقتى
فتحت باب الأوضة لما سمعت باب الشقة إتقفل،كان حاطط جواب قدام باب الأوضة،مكتوب فيه " جيبتلك بطيخ إمبارح،عشان عارف إنك بتحبيه"
ضحكت وسندت الجواب عالترابيزة
بعد نص ساعة إتصل بيا
-علفكره مسمحاك
صوت غريب اللى رد عليا -حضرتك صاحب التليفون ده عمل حادثة على طريق(....)ونقلناه المستشفى
معرفش ازاى روحت هناك بالسرعة دى!، ولا ازاى كلمت ماما،فى حاجة مش مظبوطة هنا !،هو قالى هنبدأ من جديد،والله أنا مسمحاه بس يقوم
وقفت قدام الدكتور اللى خارج من أوضة العمليات
-دكتور هو عامل ايه؟بخير صح؟
-العربية خبطته جامد،هو بخير بس عنده شلل شبه كُلى، هيحرك راسه ويتكلم وبس
شهقت وحطيت إيدى على قلبى -ايييه؟
-حضرتك تقربيله ايه؟
عيطت -زوجته
-طب المفروض تبقى جنبه،متعمليش كده،أو.......
-ليه علاج صح؟
-أكيد...بس مش هنا وتكلفته عالية شوية
-مش مهم
-تمام تعالى ورايا
شهر بنتنقل بين مستشفيات كتير على أمل إنه يتعالج،بعت الشقة اللى كنا قاعدين فيها،ورجعنا بيتنا القديم،لإن مصاريف العلاج كانت أكبر من طاقتى
-يارا
وقفت قدامه -نعم؟
-إسمعينى للآخر وبلاش تقاطعينى
-لو موضوع كل مرة فبلاش نتكلم أفضل
-أنا قاعد زى الميت بالظبط،فلازمتها ايه تضيعى الباقى من حياتك؟
-حياتى هى إنت،إنت لو ضعت هضيع أنا،أنا مشتكتش عشان تتكلم،أنا مبسوطة كده
-وأنا مش فرحان بالوضع ده،لا أنا بشتغل ولا بتحرك،مبعملش حاجة غير الكلام
-طب ما أنا مكنتش بعمل حاجة غير الكلام
-يارا !
-إنت لو بتتنفس بس هكون راضية بالوضع ده والله
-هيستمر لإمتى الوضع ده؟
-يستمر زى ماهو عايز،لما أشتكيلك إبقى إتكلم ولا قول اللى عايزة
-وأنا مش هستنى لما تشتكى
زعقت -متبقاش أنانى !دى مش حياتك لوحدك، أنا جنبك والله ما هسيبك ،طب خلى عندك أمل عشانى حتى!
-إفهمينى
قعدت عالأرض وعيطت -حرام عليك ليه بتعمل فيا كده؟
عينيه دمعت -منتهى العجز، إنى شايفك دلوقتى بتعيطى ومش عارف أحضنك حتى
قربت منه وحضنته -أنا آسفة،سامحنى بالله عليك،والله ما كان قصدى أزعلك،الدنيا ضاقت بيا وإنت مرضتش تسمعنى فإشتكيت لربنا،مكنتش أعرف إن كل ده هيحصل
إبتسم -هو مين اللى مفروض يطلب السماح من التانى؟
-إحنا الإتنين
-طب ها بقى؟
-بص نعد ل٣ ونتأسف مع بعض
-يابنتى لو أنا متجوز واحدة فرابعة إبتدائى عرفينى
إبتسمت -ومجيبتش بطيخ زى ما كتبت فالجواب
ضحك -انتى لسه فاكره؟
-الأكل مبيتنساش
بقيت أشتغل عالنت (إلكترونى) عشان نعرف نمشى حالنا،فلوس الشقة اللى بعتها كانت تكفى بس مصاريف العلاج،بجانب إنى بدرس للمشروع بتاعه عشان أكمله وأبقى عملت حاجة فرحته
بعد شهرين بدأ يحرك إيده والجزء اللى فوق منه،العالم مكنش هيساع فرحتى فالوقت اللى عرفت فيه إن العلاج جاب نتيجة
بعدها بشهر ونص حرك رجله وعرف يمشى بعد٤شهور ونص علاج
-هتيجى معايا النهاردة؟
إبتسمت -أكيد هاجى ،ده أنا عملالك ربع المشروع متنساش ده
-ربع المشروع!
-أيوة ياسطى ربع المشروع،هتنكر مجهودى؟
-ياسطى !لأ ده إحنا نقعد و......
شديته من إيده وضحكت- هنتأخر والله يلاا
والعالم مكنش هيساع فرحتى بردو لما شوفته بيستلم جايزة مشروعة التانى النهاردة بعد ٥ شهور
وقفت قدامه وضحكت -غفلتك وصورتك شوية صور  وإنت بتستلم الجايزة،هزفك بالصور عالواتس لما أروح
ضحك -أنا كان فمُخيتلى إنى هلاقيكى ماسكة ورد وعينك مدمعة
-وتقولى أنا اللى بتفرج على هندى كتير!،هات هات الجايزة القمر دى ،فرحانة أوى بأول نجاح ليك ياسيف
-لينا...أول نجاح لينا
"رأيتُكَ ضوء فى نهاية نفقٍ مظلم"
#يومًا_ما_سنلتقى
#ميار_طلعت