جرس البيت رن ، ف حطيت الطرحة على شعري بسرعة وطلعت فى البلكونة
بضحك لما بلاقيه متعصب بسبب إنى بأخره عالمحاضرات
-هلف الطرحة ونازلة
بصلي ل فوق وشاور على ساعة إيده -الساعة ١٠ يعني المحاضرة الأولى طارت
-دقيقة وهتلاقيني عندك
-كده المحاضرة التانية طارت هى كمان
دخلت لفيت الطرحة ونزلت ،الساعة كانت ١١ إلا ربع
-دقيقه هه؟
ضحكت ومشيت جنبه -متبقاش قفوش كده يا محمد
-لازمتها ايه نروح والمحاضرة تفوتنا؟
-عشان ضميرى بيأرنبنى
-أختاااه أخلاقك عميتنى
-معاكم المضحك جدا الهيخوهيخو والهاها محمد علاء الدين والمصباح السحرى
-عروسته؟
-ياسمين
-٤٢ شارع وولبى سيدنى؟
-دوري
-جاهزون يا أطفال؟
-هاى هاى كابتن
حط إيده جنب ودانه-لااا أسمعكم!
عليت صوتى أكتر -هاااى هاااى كااابتن
حط إيديه الإتنين ورا ضهره ومشى شبه العسكرى
-لو روحتى تجيبى حاجة من المطبخ بليل هتتصرفى ازاى؟
-هجرى المسافة اللى مابين الأوضة والمطبخ وأجرى على أقرب لمبة وأشغلها
-قدامك سرير وانتى وأختك هتتصرفى ازاى؟
- بس أنا معنديش....
- متقاطعنيش وجاوبى
-هقعدها من بره عشان لو فى عفريت ياخدها هى وأنا أشوفه وأصوت وألم عليه البيت
- لو جالكم ضيوف ؟
-أشرب من الحاجة قبل ما أطلعها
-قدامك رصيف كلو مربعات؟
عليت صوتى ورديت شبه العساكر -أمشى على المربعات الفاتحة وأسيب الغامقة وأتجنب الخطوط يافندم
-قدامك زرار للنور؟
-أعلق الزرار فى النص لحد أما أحرق اللمبه
-عجبك طقم فى محل ومعكيش فلوس؟
-أقنع أختى تشتريه
-النور قطع فجأة؟
-أصرخ فى ودان اللى جنبى وأجيبله صرع
-حد بعتلك كلام حلو ؟
-شكرا كلك زوقك ترد فى صدره تقتله
-ولد ضايقك فى الجامعة؟
-أساوى وشه بالأسفلت وآجى أقولك تروح تدفنه
- حد زعقلك ومش عارفة تردى عليه؟
- أتخانق معاه جوايا وأقطع الشبشب عليه وأتريق وأضحك مع نفسى
ونفس الأسئلة المهمة اللى بنسألها لبعض كل يوم
وقف وبصلى - أد ايه أنا فخور بيكى
ضحكت -تربيتك يا ريس
-ها جيبتى سندوتشات ؟
-اه ،بس هناكل إندومى
-تخيلى لو أمك عرفت بكمية الإندومى اللى بتاكليها؟
-لو بتفكر مجرد فكرة إنك تخونى وتروح تقولها ، هعترف بكل حاجة من أول قلم
- فوقى يا موهومة انتى معندكيش حاجة عشان تعترفى بيها
- طب .....
- بالشكل ده مش هنلحق ولا محاضرة
-طب إسكت شوية صدعت
- انتى اللى صدعتى؟
ضحكت - بص قدامك وإمشى
بحس بمتعة غريبة كده وأنا بتأخر عن أول محاضرة ، يا سلام لما الإنسان يأخر أخوه الإنسان عن محاضراته
أخدت المحاضرة وطلعت إستنيته بره
شاورتله بإيدى لما شوفته -ولا أمحماا
قرب ووقف قدامى -لمي لسانك شوية أنا ليا هيبتى فى الجامعة
- طب ما أنا ليا هيبة بردو
ضحك -هيبة ايه! انتى حد يعرفك غيرى هنا؟
-طب عايزة آكل أنا ،ومش عايزة أحضر آخر محاضرة
- لا هتحضريها ، مفيش الكلام ده عندى
- معرفش حد ومالييش صحاب جوه ، ومبعرفش أكون صحاب ، ده أنا طلبت من بنت محاضرة واحدة بس فاتتنى ، بصتلى بصة مراة الأب اللى هو أنا هاخد أبوها مش محاضرة
- كملى
- يا محمد إفهم بقى أنا عايزة كراش
- الكراش مبيطلبش يا برج الجحش
- أروح أقوله مساء العنبر ممكن النمبر وأبقى روشة
- تقولى لمين؟
- للكراش
- انتى عندك كراش؟
- لأ بس معنديش مانع
- هتحضري المحاضرة بردو
مشيت خطوتين من قدامه- طيب
- إستنى طب ناكل
- مش عايزة حاجة
دخلت أخدت المحاضرة وطلعت أستناه عشان نروح ، معرفش مين الشخص اللى وقف قدامى ده
- ميار
-نعم؟
- أنا أحمد ، كنت عايز المحاضرة ال......
- حضرتك تقدر تاخدها من واحد صاحبك
- يعنى مش معاكى
- شئ ميخصكش
إبتسم - حقيقى انتى جميلة
برقت ومسكت فى الشنطة بتاعتى وبعدت عنه ، شاورت لمحمد أول ما شوفته
هو أنا جميلة فعلا؟ يعنى أقصد الناس شايفانى جميلة؟ أول مرة أفكر كده يمكن عشان أول مرة أسمع الجملة دى ، أو....الموضوع ضايقنى فعلا ، مش من حقه يقولى كده ، هو أنا فرحانة ليه؟
-مالك منشكحة كده ليه من أول ما خرجنا من الجامعة؟
-أقولك حاجة ؟
-قولي
وطيت صوتى-فى ولد....
إبتسم وهز راسه -فى ايه يا عنيا؟
- طب إستنى أكمل
-كملى
- ولد اسمه أحمد معانا فى.....
- عارف أنه معانا فى الزفت ، عملك ايه؟
إبتسمت- معملش حاجة هو بس
-قالك ايه؟
أخدت نفس وإتكلمت بسرعة -قالي إنى جميلة
وقف ورفع حاجبه-قالك ايه؟
- إنى جميلة
زعق -دى خالته اللى إسمها جميلة!
-محمد عيب كده!
- ده أنا أساويه بالأسفلت قبل ما يتجرأ ويبصلك ، وببجاحته يقولك جميلة! وهو مال أهله؟
- إهدى طب
-مش متزفت ، رديتى عليه ؟
-لا والله
- متتكلميش مع أى حد و....
- أنا متكلمتش معاه ومبتكلمش مع حد غيرك وإنت عارف ! أنا معرفش حد هناك
-وايه السبب اللى يفرحك أصلا؟ على أساس إنك مستنية واحد زيه يعرفك إنك جميلة ؟
-هو بس ......
إتعصب ووشه إحمر -بلا هو بلا هى ، بصى بلاش نتكلم لحد أما نوصل أفضل
- إنت متعصب ليه؟ أنا بكلمك...
-إسكتى
هزيت راسى ومشيت جنبه من غير ما أتكلم ، مش عارفة أتعصب كده ليه؟ أنا غلطانة إني بقوله حاجة ، أنا أصلا مش هكلمه ولا أعبره تانى ابدا ابدا
-محمد!
- سلام
طلعت الشقة فوق ودخلت أوضتى ، طب هو زعلان ليه دلوقت؟ ما أنا بحكى معاه كل يوم عادى إشمعنا النهاردة يعنى!
نمت ، ولما صحيت لبست إتصلت بيه عشان نمشي
- عايزة ايه؟
- إتأخرت ليه النهاردة؟
-شوية وهكون عندك ، ولو إتأخرتى همشي
- إنت زعلان؟
- سلام دلوقتى
ايه اللى كل شوية سلام سلام ، و جو روتانا سينما اللى معيشنى فيه ده !
٥دقايق والجرس رن ف نزلت
- متأخرتش أهو عشان تعرف إنى أد كلمتى
-طيب
- متزعلش طب عشان شكلك رخم وإنت كده والله
-أحمد ده لو كلمك تانى إرزعي الإسكتش في وشه
-بس هو.....
-تانى بردو؟
- هو ده اللى مزعلك يعنى؟
-.......
- ما خلاص بقى!
إبتسم - ماشي
اليوم خلص بسرعة لإن كان عندنا محاضرة واحدة ، طلعنا قعدنا فى البلكونة عندى بنتفرج على خطوبة جارتنا فى الشارع
-عقبالك يا بت
-لا عقبالك إنت
-ماهو عقبالك وعقبالى مع بعض يعنى فى نفس الوقت
-ايه ده إنت هتتجوز معايا فى نفس اليوم ؟
-مش كتير اللى بيتصرفوا بتلقائية وطيبة زيك
-هتتجوز البيست فريند بتاعتى؟يا ألف نهار أبيض
- انتى عندك بيست فريند؟
ضحكت -لأ
نفخ بصوت عالى ومسح وشه بإيده -يا ولى الصابرين يارب
-قولى وأنا أفرحلك والله
-مش هلاقى زيك تكون فهمانى وعارفة تصرفاتى
-طب ما أنا زيى
إبتسم وسقف بإيده-ايوه هو ده
رفعت حواجبى -عايز ايه يعنى مش فاهمه؟
مسك المج وحدفه
-لا ماهو غبااائك ده ميتسكتش عليه
شهقت وبصيت فى الأرض -يلاهوى ده المج المشمشى ،دى ماما هتقطعنا
-مج مشمشى ايه وزفت ايه.....ايه؟( بص على الصنية وبعدين بص فى الأرض وبصلي )- هو ده اللى إتخانقتوا عليه أسبوع عشان طلع من النيش؟
هزيت راسى ب أيوة وضحكت
بلع ريقه وبص فى الأرض تانى - تعالى نلمه ونلزقه بأمير ولا حاجة
-إحنا ناخد جزء منه ونلف بيه نشوف واحد زيه
-فكره بردو
ماما جت من جوه وبصيتلنا - ايه اللى إتكسر ده
بصت فى الأرض وشهقت - المج المشمى! مين كسره؟
شاورنا على بعض وإتكلمنا فى صوت واحد أنا ومحمد
- هو
-هى
زعقت ودخلت جوه وهى بتتكلم- أنا مش هخلص من تصرفاتكم دى؟
وطيت صوتى وبصيتله - دى هتفلقني نصين بسبب المج ده
- إحنا نجيب مج أصفر بداله
- بس ده مشمى!
- نقولها كان بيطلع فى الروح ولونه إصفر ف لحقناه وجيبناهولك
- أضحك يعنى؟
ضحك - بس تعرفى ! أنا لو معايا أخت مكنتش هتدارى عليا كده
- طب ما أنا أختك
- أقعدى انتى أنا هتجوزك
-ايه؟
- ما أنا كلمت أمك من سنة وقالتلى لما تكبر شوية ، لما تعقل ، وانتى مش عايزة تعقلى أعمل ايه؟وعشان يكون زيتنا فى دقيقنا ومتبصليش كده!
- ماما عارفة؟
- أنا بقول كلمت أمك من سنة ، هى أمك غير ماما؟
-مقصدش والله
عدل ياقة القميص بتاعه - طب ما ها بقى ؟
ضحكت - مساء العنبر ممكن النمبر؟
"رأيتك ضوء فى نهاية نفق مظلم"
أنت تقرأ
يومًا ما سنلتقى
Proză scurtăقصص قصيرة متنوعة بالعامية المصرية ،بها مزيج من الخيال والواقع والحزن والسعادة ، ربما ستتضارب مشاعرك و أنت تقرأ ، ولكن فى النهاية ستعرف السعادة طريقها لقلبك ..
