يومًا ما سنلتقى

(٣٧)

- إنت بتصحيني ليه؟
مسح على وشه  ونفخ - للمرة العاشرة بقولك الجامعة
-مالها؟
- قاعدة في الصالون بره
نمت وحطيت المخدة على راسي - تصبح على....
شد المخدة وحدفها على الأرض
-قومي إتأخرتي
قعدت وإبتسمت وبعدين نمت تاني -روح شوف شغلك يا سيف، ال جامعة ال ده انتوا ناس فاضية بصحيح
-وبتعيطي لما بصحيكي بالتلج!
شيلت الغطا من عليا وقومت  - انا إتجوزتك عشان تفشلني ، عشان تكسلني أروح الصبح للجامعة وتقولي خليكي النهاردة نخرج ، مش تعيشلي دور ماما التانية ، فوق كده وركز معايا
-قدامك ١٠ دقايق ألاقيكي جهزتي
- ال١٠ دقايق بتوعك دول بقفهم قدام الدولاب عشان أختار طقم ولسه هعمل الشاي بلبن وأكوي هتكون المحاضرة طارت ف على ايه أروح وأطرد
-روحي واطردي هبقى مرتاح
-إنت زوج مش جدع علفكرة!
-كله من وقتك
- سيف! استهدى بالله كده واعقل ، جامعة ايه اللي أروحها ، بكره ياعم
بص في الساعة ورفع حاجبه -اتبقى٩ دقايق
(كده تزعل عمك الضو منك؟ قلبي غضبان عليك )
- تفتكر بعد الأربع صفحات اللي ذاكرتهم امبارح هبقى دكتورة ولا معيدة
- هتبقي معيدة فعلا ، بس معيدة السنة
- طب افرض مت من الضحك دلوقتي؟
( جامعة ايه دي اللي أصحالها من الصبح عشان أروحها؟ده لو فرح أختي مش هصحاله بدري كده!
طب حتى هاتوا الجامعة جنب البيت وأروحها بالبيجامة ،لكن فكرة إني أختار طقم كل يوم دي مرهقة )
روحت البيت وإستنيه لما جه من الشغل
طلعت قعدت جنبه على الكنبة وبصيتله بطرف عيني
-راجع بتقولي اللي مابينا وبتسألني مكملناش؟
- هنبدأ بقى هنبدأ
شاورت على الكوباية اللي قدامه وضحكت - ناولني الكوباية دي يا بيبي
مسك الكوباية  ومدلي ايده بيها - لما نشوف اخرتها
- اشطا على الطيبة ونار الحب الدفينة والعشق الممنوع والمسلسلات التركية الهبطانة والراجل اللي مبيقدرش يتنفس من غيري
-كل ده عشان ناولتك كوباية؟
- لاحظ أننا في بداية الجواز وأنا بحاول أطبق حياتنا على حياة الروايات وإنت مش مساعدني ومش بتخليني ألعب معاك بلايستيشن وبتتريق على الرز المعجن بتاعي وحد خنيق كده
- بتلعبي بلايستيشن وبتعيطي لما تخسري
- محصلش
-عيب لما تكوني ست كبيرة وتكذبي
- ده إنت أد جدي يالا إصحى كده
( ال أعيط لما أخسر ال، عمري ابدا ابدا ابدا ما أزعل لو خسرت ، أصلا أصلا اللعب مكسب وخسارة)
إتعصبت ووقفت قدام الشاشة وفصلت الفيشة  - مفيش لعب خالص
- وسعوا يا ولاد القموصة جت
-إنت غشاش
- وانتي عيوطة
- متقلدنيش! ده كلامي ف متقلدنيش
- وإلا؟
- معنديش تهديد أقدر أهددك بيه حاليا بس إتس أوكاي هفكر وههددك ف إعمل نفسك كإني مهدداك وكده
-وظيفتك ايه في الحياة ؟
رجعت قعدت جنبه -مش كفايا مالية عليك فراغك وحياتك ، بغنيلك صبح وليل وببعتلك جوابات على الشغل
- أنا معنديش مشكلة في الرسايل خالص والله ...بس غُنى لأ...إرحميني غنى لأ ، بصي نكدي براحتك وعيطي وطلعي أمينة رزق اللي جواكي بس متغنيش
- معنى كده إن صوتي وحش؟
هز راسه ورد بسرعة -اه
شهقت وحطيت ايدي على قلبي - اييييه !
إتخض ووقف وشاور بإيده -ايه في ايه؟
وقفت ومشيت ويكأني بكلم نفسي
-هيطلق بنتك يا ماما... هبقى أرملة
- مشى ورايا وضحك - اللي بتتطلق بتتسمى مطلقة علفكره
بصيتله وأنا متعصبة- لا ما أنا هقتلك ، أومال أسيبك تتجوز غيري! ( لفيت وكملت مشى بنفس الدراما الأوفر )أخدني لحم ورماني عضم ، هيرميني في الشارع بأربع أيتام
- ٤ أيتام ايه أنا متجوزك من شهر ونص
- واريفر يعني متدققش ف كلامي أنا إنسانة درامية وبحب الدراما الأوفر طحن
-طحن!
- شاهد قبل الحذف ، رجل يرمي زوجته في الشارع بعد شهر ونصف من الزواج  (وقفت وسقفت بإيدي وضحكت )- إتصدق هيبقى عنوان حلو في الجريدة ، وهتبلى عليك في جروبات البنات وأقول كان بيطفي السجاير في إيدي
قعد على الكنبة ومسك الريموت -  اولًا مبشربش سجاير ثانيا خلصي جو السي بي سي دراما ده عشان جعان
(طب مع السلامة انتي بقى يا كرامتي)
-مالك؟
-  بموت جوايا وببكي على حالي
- وأحزانك اللي جيالك!
ضحكت -جوزي أوي
- طب ......
- تعرف اللي بحبه فيك أن عقلك مستحضر الكوميكس أو الكوبليه اللي بقوله ، المهم إن دماغنا زي بعض
- جعان طب
- ما تيجي تاكلني ياسيف ! ده أنا لسه عملالك أكل
- ده كان امبارح
- ايه فيها يعني؟ في ناس بتقعد بالأسبوع مبتاكلش
ضيق عينه وقرب مني- وانتي بتاكلي كل ساعة ليه؟
- وإحنا نعمل زي الناس ليه؟أعملك إندومي والله حلوة
- اندومي!
- طب أحمر بطاطس؟ بحب جنبها مكرونة ، هعمل بطاطس ومكرونة
-بتسألي وتردي في نفس اللحظة بحيث متيدينيش وقت للإجابة
-هتحبهم وهعملك عصير جوافة إنت بتحبه
-بس.....
- وبكره أعملك اللي عايزه والله بس ناكل مكرونة عشان مينفعش مناكلش مكرونة
( وبعد الغدا أعمل فشار وأبقى كده عملت واجبي وزوجة مثالية وقدرت أفتح بيت وماما تفتخر بيا ، أنا حساني بتكلم عني وعن اللي عايزة أكله وبقنعه بالعافية إنه كمان بيحبهم )
ساب الشوكة من إيده وشاور على الطبق - علفكرة المكرونة حلوة
- والبطاطس حلوة بردو
-انا اللي عاملها
هزيت راسي وكملت أكل - وأنا اللي مقطعاها
- بت!
-أجيبلك تاني؟
- لأ مش عايز
سيبت الشوكة وضحكت - استنى هغنيل....
- أنا كنت هنام أصلا ،تصبحي على خير
( بقى أنا الرز بتاعي معجن وصوتي كمان مش حلو؟ ايه يا دنيا هتعملي فيا ايه تاني !)
فتحت باب الأوضة جامد ف خبط في الحيطة
جسمي إتنفض على صوت الباب ورجعت خطوة ل ورا -يلاهوي! أقصد ميلاهويش ...احم
( إتقدمت خطوتين تاني وبصيت عليه بطرف عيني لما صحى وبص عليا ، وغنيت بصوتي الكرواني العذب)
- واااديي الليل بجرااحه ونااا.....
زعق وحدف عليا المخدة -بببس ايه التلوث  ده!
-أنا واحدة جوزها مش عايزها تغني وبيكتم المواهب الدفينة اللي عندها ف جيت أغني في أوضتي اللي إتفقنا تبقى بتاعتي أنا وإنت ف أنا هغني في النص بتاعي وإنت نام في النص بتاعك
-وبعد الليل بجراحه وناره عشان نخلص في اليوم ده!
قعدت على السرير وفردت صوابعي وعديت عليهم
- لأ ده آدي الليل بجراحه وناره ، وآدي عذابه وآدي مراره و.....
- هتنامي ولا أنام في الأوضة التانية لو عجباكي دي
-صوتي حلو؟
-اه حلو وفيه كوميكس من أصالة وتامر حسني في بعض وهقدملك في ذا فويس الموسم السابق
- ما كان من الأول ياعم ،  بعيدا عن الموسم السابق وإنك عايز ت هاها على أحزاني وتبان روش بس أهو كده تريحني وأريحك
مسح على راسه وزعق -طيب إتخمدي
-اسمها نامي يا روحي ، ومتتقالش بزعيق عشان مننكدش على بعض وأعيط
-نامي يا.....
(باين أوي إنه بيتخانق معايا في سره وإن الكلمة مش طالعه من قلبه لأ ، ده أنا هطلع عينك بس أصبر عليا)
-فين الابتسامة ؟
رجع بضهره ل ورا وإبتسم -نامي ياروحي ،تصبحي على خير
ابتسمت وحطيت راسي على دراعه- وإنت من أهله
( طب والله بحبه ، لو مكنتش بحبه مكنتش غنيت قدامه ولا هزرت معاه ، أنا لو مرخمتش عليه أتحرق ..أتبخر كده)
بما إن النهاردة يوم أجازته ف أكيد أكيد هينزل يقعد مع صحابه ودي حاجة متفوتنيش ابدا
حطيت ايدي على كتفه ووقفت وقفة سرسجية - ما تيجي ننزل عالقهوة ياسطا
بص على ايدي وبعدين بصلي ورفع حاجبه -  انتي عبيطة! بتغمزي بعينك كده ليه؟
- أنا قولت بدل ما تنزل لصحابك وأقعد لوحدي وننكد على بعض وجو الدراما كوين ، أبقى فرفوشة وأنزل معاك ، بيس ياعم بيس
- هو في ايه؟
ضحكت - زهقانة
- هخرجك بكره حاضر
- ملييش ضعوة هنزل دلوقتي
-ضعوة! مالك عالصبح في ايه؟
-احنا بالليل يا بيبي
- اهدي هه اهدي
- شوف أنا مبحبش العند ، هتنزل تقعد عالقهوة لبعد ١٢ بليل ، هنزل أقعد عالقهوة لبعد الفجر
- عيدي الي قولتيه كده تاني
- تؤ ..ابدا ابدا ابدا
- بتتنططي كده ليه ما تقعدي في مكان 
- بحاول ألطف الجو يعني إكمننا.... إكمننا وكده يعني
- كده يعني اللي هى ايه؟
- خلاص روح ..روح إنت أصلا بتحب إني أنكد عليك روح ، بس يكون في علمك إن أنا ديموقراطية يا تنزل القهوة وتاخدني معاك يا نقعد إحنا الاتنين هنا ونفتحها قهوة ها؟
- فين هديلك مساحتك الشخصية يا سيف ! هسيبك براحتك أنا إنسانة متحررة
-روح ياحبيبي مش هنكد عليك
-حبيبي!
-اه روح إطمن
بعد ٥ دقايق إتصلت بيه
- ها وصلت؟ مبسوط بقعدتك مع صحابك؟ بتاع القهوة بيدفعلك كويس؟ هتيجي امتى؟
- اقفلي اقفلي والله ما رايح أنا لسه مخرجتش من الشارع أصلا
( طب هو زعلان ليه دلوقتي؟ يعني أقعد لوحدي وأكلم نفسي مثلا! مش أخلاق دي لأ)
- أعملك شاى؟
-........
- بالنعناع !
.....
-طب قهوة
-لأ
- متكشرش  طب
-تعرفي تسكتي؟
-لأ
- هو النهاردة أجازة ليه؟
- خليك راجل حسيس كده و دحلاب لما ادحلب عليك وجاملني وقولي صوتي حلو
- انتي مبتعرفيش تتكلمي جد ابدا؟
- أنا واحدة زيي مبتعرفش تتعايش مع الحياة الجد ، الكار ده مش كاري والله ، معرفش إن كان ده بالنسبالك كارثة ولا لا ، بس إنت لازم تتعايش  مع الموضوع
- طيب
- أنا قررت إني مش هغني تاني
- كنت بهزر علفكرة متزعليش
مدتله إيدي بصندوق صغير - مزعلتش ، وعشان القرار المهم ده جيبتلك هدية
فتح الصندوق ورفع حواجبه - فلاشة!
- عليها كل حاجة بصوتي

"رأيتك ضوء في نهاية نفق مظلم"