"واحدة زيي بتخاف من فكرة الارتباط ف مش سهل تختار ابدًا.."
- أنا اللي لو كنت آخر واحد في الدنيا مش هتقبلي تتجوزيني هه؟
عدلتله الجاكيت وابتسمت
- واجتهدت وبقيت الأول فوافقت
أقوله إني شيفاه مميز عن الكل ؟ في غيره كتير ورغم كده شوفته فرصتي اللي مش هتتكرر
حسيته راجل يُعتمد عليه ، هعيش معاه حياة هادية ، حتى لو فيها مشاكل ف أنا متأكدة إننا هنحلها سوا ، وكمان متربي..حد يلاقي حد متربي ويسيبه من إيده؟
- الساندوتشات متاكلتش ليه ياسيف؟
- ممكن تبطلي تعامليني كإني رايح المدرسة؟ ممكن؟
- طيب حاضر..أعملك ساندوتشات ايه بكرا بقى؟
هز راسه بيأس ودخل الأوضة - مش بتملي ابدًا
مشيت وراه وأنا بتكلم - أعملك قهوة؟
- لأ
-طب شاي..بيقولوا الشاي حلو بالنعناع ، وأنا بعمل الشاي حلو ف دي فرصة متتكررش
- لأ
- طب عصير؟ عملت عصير حلو اوي لو تعرف ، بص هجيبلك عصير ، شكلك عاوز عصير
- مش عايز حاجة ..اهدي شوية
قربت وأخدت الجاكيت منه - هو حصل حاجة في الشغل ؟
- لأ ، الدنيا تمام
- مالك ؟ ايه اللي مزعلك؟
سند إيده على كتفي وابتسم - ميار..أنا بخير ، متقلقيش نفسك
بقاله ٨ أيام بيرجع من الشغل متضايق ومبيرضاش يحكيلي حاجة ، أنا مش هبلة عشان أقتنع إنه بخير فعلا حتى لو هو قالي ده ! والموضوع ده مضايقني أنا كمان ، هو ليه مبيحكيليش؟
وكالعادة قعد برا يتكلم مع حد في التليفون ، وشوية يبعت رسايل ،وبعدها ينام ، ماشي أنا مش متضايقة ، مش هتعصب ولا أخرج برا أبين إني زعلانة ، ها مين سترونج مين؟
هو الاهتمام بيتطلب؟ لأ طبعًا ..خلاص يبقى نعيط
- بتعيطي ليه؟
اتوترت وقت ما دخل المطبخ ووقف قدامي ، مسحت دموعي بسرعة
- اا...الكوباية وقعت متكسرتش ف عيطت عليها
- كنتِ عيزاها تتكسر ؟
- ملكش دعوة ..كل واحد ليه أفكار في عقله ، ف مينفعش أقولها لحد إلا لو الحد قالي على أفكاره
هو فاكر يعني إنه هيداري عليا لوحده؟ لأ ده أنا كمان أخبي عنه أسبابي اللي معرفهاش أنا شخصيًا ..هي سايبة ولا ايه؟
دخلت نمت على السرير آخر الليل وغمضت عيني ويكأني نايمة
سيف قعد جنبي واتكلم بهدوء
- مستحيل ننام زعلانين من بعض ، قومي يا قموصة قوليلي مالك
ديرت وشي الناحية التانية وسحبت الغطا عليا
- علفكرة أنا نمت
شال الغطا من على وشي وابتسم
- زعلانة من ايه؟
- لأ مش زعلانة مين قال إني زعلانة؟ أنا اتكلمت؟
- العصير كان حلو
قومت واتكلمت بعصبية - إنت أصلا مشربتش منه..وأنا عملاهولك إنت عشان بتحبه ، وعملتلك الأكل اللي بتحبه وإنت ولا عطيتني وش حتى ..بس أنا مش زعلانة
- شربت منه والله ، إنتِ عارفة إني مبحبش أكل حد غيرك ف متتقمصيش
شوف بيبصلي ازاى ! عارف إني هشيل قلبي دلوقتي وأحطه مكانه ، أكلي اللي ميتاكلش بقى يعجب حد؟
لأ ده أنا أصالحه بقى
- مش عايز تقولي حاجة؟
- زي؟
- ايه اللي مضايقك؟
- مفيش حاجة..نامي إنتِ بس
أنت تقرأ
يومًا ما سنلتقى
Short Storyقصص قصيرة متنوعة بالعامية المصرية ،بها مزيج من الخيال والواقع والحزن والسعادة ، ربما ستتضارب مشاعرك و أنت تقرأ ، ولكن فى النهاية ستعرف السعادة طريقها لقلبك ..
