يومًا ما سنلتقى

(٥٤)

- مفيش حد وحش ، كل واحد في حاجة حلوة بتميزه
قعدت قدامه - ازاي يعني؟
-يعني في اللي جميل بروحه أو جميل بشكله أو جميل بضحكته أو جميل بكلامه
-ازاي يعني؟
ضحك وقفل الكتاب اللي ماسكه وسند النضارة جنبه
-مش هتنامي النهاردة
-إنت وعدتني إنك هتحكي معايا بعد ما ترجع من الشغل وأهو رجعت
- بقالنا ساعة بنحكي
- هو عادي أحكم على حد بمظهره؟
- لأ
-ليه؟
- زى سؤال ينفع تحكمي على البرفيوم من برا؟ قبل ما تجربيه؟
- لأ
ابتسم - ليه؟
رديت بتلقائية - لإني مجربتهوش عشان أحكم عليه
سكتّ وابتسمت ، تقريبًا أكتر حد بحب أسمع إجابته عن أسئلتي ..أوقات ببقى عارفة الإجابة وببقى حافظة هو هيقول ايه وبحب أسمعها منه تاني
- أكلتِ؟
- لا استنيتك ..هجهز الأكل
دخلت المطبخ ف دخل ورايا
-  أساعدك في ايه؟
- إنت النهاردة إتأخرت وأكيد جاى تعبان ف استريح وأنا هعمل كل حاجة
- متأكدة مش عايزة مساعدة؟
ابتسمت وهزيت راسي - متأكدة

لو يعرف إني ببقى مبسوطة أد ايه وأنا بحضرله الأكل عشان أسمع جملته "  كنت جعان ..الأكل حلو اوي تسلم إيدك" ولإني عارفه بردو إنه مش هيشتكِ من تعب الشغل ف بفهم لوحدي ، وقت ما بيكون فاضي بيساعدني من نفسه ووقت ما بيكون تعبان بيسألني إن كنت عايزه مساعدة ولا لأ عشان ميزعلنيش

- كنت جعان ، الأكل  كان حلو أوي تسلم إيدك
- بكرا عندك أجازة ما تيجي نخرج؟
سكت شوية وإتكلم - مريم جاية النهاردة فمينفعش أسيب البيت أول ما ييجوا
- ليه والبيت هيعضهم وإنت مش موجود؟ وبعدين ايه كل شوية مريم مريم اللي طلعالي جديد دي ، هى مش لسه جاية الشهر اللي فات
- ميار!
- طيب ، خلينا قاعدين عشان مريم ترتاح
- متكبريش الموضوع

شهد نادت علينا من تحت ف لفيت وبصيتله
- انزل هما وصلوا
- وإنتِ ؟
- جاية وراك

لميت الأطباق وغسلتها ودخلت الأوضة أقرأ في الرسايل اللي كان بيبعتهالي قبل الفرح
" اتبقى٣ أسابيع ونكون في بيت واحد..متلفيش مع شهد كتير عشان لو مشيتي وراها ف هترجعوا بعد سنة ، لو ناقص حاجة ف ممكن نجيبها سوا بُكرا "

هو مبقاش يكتبلي رسايل زى الأول ليه؟ أو بيتغير ليه وقت ما بتيجي بنت خالته وكإني مش موجودة؟
باب الأوضة خبط ف داريت الرسالة تحت المخدة ومسكت التليفون ، سيف فتح ودخل
- منزلتيش تقعدي معانا ليه؟
- كنت بغسل الأطباق وكسلت أنزل
- طب تعالي ..مريم سألت عليكِ و.......
- اه بنت خالتك؟ سلمت عليها الشهر اللي فات والموضوع خلص ..أنا مش هقعد معاها كل مرة و أنا هناسبها؟
-طب والله في حاجة حصلت ما بينكم
-  أنا بكلم صحابي على التليفون ومش فاضية

(هو عارف إني مش بحب بنت خالته أو المفروض يعرف! هى مستفزة اصلا .. كل مرة بتحكيلي نفس الكلام  وذكرياتها هى وسيف وإنه كان بيحبها زمان بس يا حرام! الكرة الأرضية اتقلبت على وشها ووقعته في طريقي أنا واتجوزنا بالصدفة ، سبحان الله يعني !)