يومًا ما سنلتقى

٤٠

"ربنا خلقنا توأم أنا وانتي عشان نسند بعض طول طريق الحياة ، همسك في إيدك ومش هسيبك تقعي  في الحزن ابدًا...أنا جنبك وهفضل هنا جنبك "
حطيت إيدي على ودني من صوت العياط والصريخ اللي بره ، اللون الإسود اللي لابسينه ده بيفزعني ، طب أطلع أصرخ في وشهم دلوقتي وأقولهم يمشوا؟ حتى عيب أكرشهم بره البيت ، هى ماما ازاى سامحالهم ب كده
الباب خبط ودخلت جارتنا
قعدت جنبي على السرير وبصت للأرض
- قوليلهم يمشوا
- البقاء لله ، كلنا هنمشوا من هنا و......
- طب خدي الباب واطلعي
- ياحبيبتي
- أسيبلك الأوضة أنا طب؟
(كلام سخيف زي إن شهد مبقتش موجودة وشهد ماتت وكلام ملهوش أى لازمة
شهد ماتت ازاى؟ أنا حتى لما قالولي إنها ماتت ضحكت معيطتش ، دي..دي كانت معايا قبلها بساعتين ماتت ازاى احنا هنهزر؟
فتحت عيني وبصيت للأوضة المضلمة رغم إن الشمس ملياها ، الأوضة كئيبة وخنيقة وحاسه ببرد فيها وبشتكي لماما دايما إن الأوضة ساقعة من وقتها
عدت سنة من بعد ما سابت إيدي ومشت ، خلفت بوعدها ليا رغم إنها مبتحبش اللي يخلف بوعده
- مش هتخرجي؟
- مش عايزة
- لحد امتى يعني؟ حدديلك وقت وأنا هصبر عليكي لحد أما يخلص ، مدخلتيش الامتحانات ومبتطلعيش من البيت وعدت سنة من عمرك وانتي مبتبصيش للدنيا
-  والدنيا فيها ايه يتبصله يا ماما؟
أنا وشهد توأم ... يمكن دي أحلى حاجة حصلتلي في الدنيا ، شهد كل حاجة ليا ...عالم تاني أقدر أعيش فيه، شايلة معاها كل أسراري ، فكرة إن يبقالي حد أحكيله وأنا مطمنه إن كلامي هيتدفن جواه  ومش هيطلع دي مريحة
- سيف سأل عليكي من.....
- كلمته يا ماما
( سيف جارنا وصاحبنا الوحيد أنا وشهد أو أقدر أقول الحيطة اللي بتسند عليها بعد ما بابا اتوفى من وأنا صغيرة ،الدنيا دي مضحكة والله ، وقعت بابا من إيدها ومن بعده شهد ، طب سايباني أنا أعمل ايه؟)
- طب عشان خاطري اخرجي مرة...اطلعي بره أوضتك شوية وحشني صوت الضحك في البيت
( أنا مش عارفة أضحك ، حاجة مكتفة الفرح جوايا وأنا مبعرفش أعمل حاجة عكس اللي حاسه بيه)
بصت للأرض وعنيها اتملت دموع وطلع صوتها مخنوق - كفاية شهد راحت ،مش عايزة أخسرك
قربت منها بسرعة وحضنتها جامد - حقك عليا
(كان نفسي أعيط وقت ما أحضنها ،  كنت عايزة أقولها شايفة جناحي المكسور والإيد اللي كاتمة قلبي من إنه يشوف الدنيا تاني ، حاسة بيا وأنا عايزة أصرخ دلوقتي؟)

- هتصدقيني لو قولتلك إني شيفاكي بأجنحة دلوقتي وتقدري تطيري وتمسكي بأى حاجة حلمتي بيها
- ده تأثير سهر امبارح مش أكتر ياشهد
- أنا شايفاكي حاجة كبيرة أوى أوى ومش أى حد يوصلها
رفعت راسي ويكأني متكبرة - طب ما أنا مش أى حد يوصلي فعلا ، وأستحق إن يتحارب عشاني
ضحكت وبعدت عني - طب ما يوصلك من غير حرب ايه الدراما الأوفر دي
فتحنا باب الشقة ودخلنا
"استنوا متقفلوش"
بصيت ورايا وضحكت لما لقيته سيف
-تعالى تعالى
ماما وقفت قدامه وبصت على الكياس اللي في إيدينا
-جبتولي الطماطم
- أحلى طماطم في السوق كله
شهد فتحت الكيس وأنا وقفت جنبها ورفعت راسي ب فخر
- ها ايه رأيك؟
بصت في الكيس ورفعت عنيها ببطئ، بس البصة دي أنا عرفاها كويس
شهد إتكلمت - لعلمك ضحكنا عالراجل و......
- انتوا جايبين الطماطم دي من عالأرض؟
وطت وقلعت الشبشب
-جايبين الطماطم دي منين؟
أنا وهى شاورنا على سيف - هو اللي جابها
إتخض وبصيلنا أنا وشهد ووطى صوته - المصيبة المرة دي على ايه  متسيبونيش شبه قرطاس اللب
ميلت من ناحيته ووطيت صوتي -قول اه ومتنحش
( كنا بنتهزأ أنا وهى في كل مرة بنجيب فيها خضار لماما أو أى حاجة من السوق عموما ، مش عارفة أروح أى مكان من غيرها ، مش متخيلة إني أطلع بره البيت وأنا مش ماسكة في إيدها)
هى الوحيدة اللي وثقت فيها لإنها تستحق ده ، يعني مش هنتخانق أنا وهى تاني على مين يقعد جنب الشباك في الميكروباص؟ ولا هنزعق لبعض على مين حطت عينيها على الطقم الأول وأسألها فين الطرحة بتاعتي اللي خرجت بيها الأسبوع اللي فات؟ولا نجيب اندومي من ورا ماما ونخبيها في الدولاب وناكلها لما ماما تنام ؟
وقفت قدام المحل اللي المفروض نشتري منه الدريسات بتاعتنا وقت ما نتخرج عشان نعمل سيشن
- أنا هشتري البينك
-بينك يا شهد!
-اه بينك ، اختاري اللي بتحبيه بس اختاري لشعرك اللون اللي تستفادي بيه
- أنا اللي هقطعلك شعرك دلوقتي
شاورت على الدريس في المحل - طب بصي عليه حلو وهادى وبسمسم ازاى
- زوقك هباب والله ، اللون السُكرى أشيك
- وانا قولت البينك ! ايه عايزانا نروح بألوان مختلفة ؟
- وأنا مش هجيب غير اللي قولت عليه هه ايه رأيك بقى
- إحنا هنتخانق من دلوقتي ولسه التخرج قدامه سنة ،ياشيخة تفائلي خير مش يمكن نسقط!
ضحكت ومسكت في إيدها وكملنا الطريق -على رأيك
(حسيت إني ماشية بجناح مكسور ، لا أنا عارفة أعيش زي الناس هنا ولا أطير في السما فوق وأحس إني حرة
، عايشة في سجن أنا اللي بنيته لنفسي ،ضيعت مفتاحه وقت ما قفلت الباب عليا )
-كتكوت ضعيف الجناح والدنيا غدرت بييييه
- يا تسكتي يا تطلعي بره ياشهد
نطت جنبي على السرير وشالت إيدي من على وشي
- ينهار! بتعيطي؟ده أنا هقسم اللي زعلك نصين
- دي ماما علفكره
- ده أنا هقسمك انتي نصين ياللي مشفتيش ربع ساعة تربية ياعديمة الاحترام ياللي لاقيناكي في الشارع
ضحكت وبصيت للأرض
- متضحكنيش يا شهد
-ها عملتي أنهي مصيبة المرة دي ،قولي يا جلابة المصايب يا شيالة المشاكل والخناق قولي
- ياستي كسرت طبقين من النيش ، وهاتك يا تهزيئ وانتي مش أد المسؤولية ومش حِمل إنك تفتحي بيت وعمرك ما هتكبري وكلام كتير
- جابت سيرتي في الكلام؟
-اه قالتلي انتي والمهزأة اللي شبهك
وقفت ورفعت إيديها الاتنين - حلو غلطت وأنا مستنياها تغلط
فتحت باب الأوضة ونادت بصوت عالي
- انتي ياست هانم ياللي اسمك ماما
ماما دخلت ومسكت الشبشب في إيدها
-خير إن شاء الله ؟
شهد شاورت عليا ويكأنها متعصبة
- وحيدة القرن دي زعلتك في ايه؟ أهم حاجة رضا الأم اه اومال انتي فاكرة ايه؟
(رغم إن الذكريات جميلة إلا إن فيها وجع ، شخص كان مالي عليا حياتي ومشى ، طيف ذكرياته هيفضل فوق قلبي طول طريق حياتي ، هفتكره في كل مكان روحناه سوا وفي كل جملة قالها ، وفي كل شخص يشبهه ، الذكريات بتوجع أوي والله)