يومًا ما سنلتقى

٨١

بص من فوق الكُبري وسألني : - هتنُطي من هنا؟

مردتش عليه ، معرفش جه امتى في الوقت ده وجالي أنا ليه؟ كل اللي كنت عيزاه إن كل حاجة تنتهي ، النهاردة ودلوقتي

- بلاش ، هتبقي خسرتِ دنيتك وآخرتك
- ..............
- أنا عارف إنك مش بخير ، والدنيا قاعدة فوق كتافك دلوقتي بس بلاش تسمحيلها إنها تهزمك ، صدقيني متعرفيش بُكرا جاي ب ايه ! مش يمكن كل حاجة تتغير للأفضل؟
- صعب إني أصحى كل يوم وأنا عارفة إنه هيتكرر تاني بنفس الهموم ونفس الأشخاص ونفس السيناريو الممل ، كل يوم بقول استني لبُكرا الدنيا هتتغير ..وويجي بُكرا وأستنى بعده وبعده والدنيا مبتتغيرش ولا الناس بتتغير ولا حد حاسس إني مبقتش قادرة أكمل .
- حياتك أغلى مما تتخيلي ، أوقات بتفقدي الرغبة إنك تكملي لدقيقة كمان ، وبتتمني إن كل حاجة تخلص وتنتهي ، بس لسه عندك وقت متعرفيش ايه اللي هيحصل فيه .
- أنا زهقت..لو دي الحياة اللي مفروض أعيشها ف مش عيزاها .
- مفيش طريقة للحياة بتتفرض علينا ، إحنا اللي بنختار ده ، بنختار ازاي نعيش وبنرسم الطريق بإيدنا ، اختيارنا أوقات بيطلع غلط وأوقات بيتفرض علينا مواقف لازم نعيشها ونعديها ونختار نغيرها لأفضل.

شاورت بإيدي في الهوا وأنا بعيط :
- معنديش اختيار ، افهم معنديش اختيار ، ووقت ما بيبقى ليا إختيار بختار  غلط ، دايمًا بفشل في كل حاجة بعملها ، أنا أغبى شخص على الكوكب ده .
- ايه المشكلة إننا نختار غلط ؟ ماهي دي الحياة ، بنروح ونيجي ونلف ونحط مليون خطة ومليون احتمال عشان منغلطش وفي الآخر بنغلط ، بنغلط عشان نتعلم ونفيد غيرنا بالتجربة اللي عيشناها ، بنغلط عشان يبقى عندنا وجهة نظر وطريقة نعرف نعدي بيها الغلط بأقل خساير ممكنة لما يقابلنا مرة تانية ( سكت دقيقة وكمل ) - عارف إننا بندفع تمن الغلط ده ،  بنخسر كتير بسببه وبنتأذى كمان ، بس بننضج بعدها ، ببقى حريص أكتر لما أتعرض لموقف شبهه ، وببقى واعي وأنا بدّي لغيري نصيحة لما يسألني في موقف زيه ، اللي بيغلط مش غبي واللي بيفشل مش غبي ، الغبي الحقيقي هو اللي بييأس ويقعد مكانه يندم على غلطه..بنغلط عشان نتعلم مش عشان نضيع الباقي من عمرنا في ندم على حاجة راحت.
- أنا عُمري ما نجحت في حاجة ، أنا عايشة عشان أفشل وبس.

بص على الكتب اللي في إيدي وابتسم :
- في كلية ؟وجايبة الكتب معاكِ ليه؟
- قولت أتخلص منهم عشان دول السبب في كل حاجة وحشة في حياتي ، الكلية هي أكتر مكان ممكن نضيع طاقتنا فيه
- مش يمكن عشان مش ماشية صح؟ أوقات المشكلة بتبقى في إننا نغير الطريق  ، أنا كنت زيك .
سألته بسرعة - فكرت تنهي كل حاجة؟
سند بايده على السور - لأ كنت أذكى من كده ، الكلية مش وحشة زي ما الكل شايفها ، يمكن بنتعامل مع الأشخاص الغلط جواها بس هي مش وحشة ، الكتب والمعلومات اللي جواها بيفيدوكِ أكتر مما بياخدوا من طاقتك ووقتك ، بس عشان مش بتلاقي الشخص الصح اللي يوصلك المعلومة بتحسي إنك مش مستفادة وبتضيعي وقت وخلاص ، الجامعة بتكوني فيها صحاب ، بتخرجي من البيت وبتقابلي ناس وبتغيري جو ، بجانب الوقت ده لازم تعملي حاجة بتحبيها ، " لازم " مش ممكن اه وممكن لا ! زي الرسم ، الرياضة ، الشِعر ، أي حاجة بتحبيها عشان  متحسيش إن اليوم تقيل .
- أنا حاولت وفشلت ، صدقني أنا حاولت ، عملت كل حاجة وبذلت كل جهدي عشان أنجح
- وبعدها؟
رفعت الكتب وابتسمت - منجحتش في مادة ، معرفش ازاي وليه ؟ بس منجحتش
- نجحتِ في كام؟
- أربعة ، بس الكل بيبص للجزء اللي فشلت فيه ، محدش بيحس بالجهد اللي بذلته طول السنة ، بالطاقة اللي راحت عشان أذاكر واحاول أستوعب وأفهم عشان محدش يقول إني قصرت ..صدقني لو الاختيار معايا مكنتش اخترت إني أفشل
- أنا بحييكِ على قدرتك في إنك تعدي أربع مواد كاملين ، في كتير ميقدروش يعملوا ربع اللي عملتيه.