يومًا ما سنلتقى

اسكريبت (٢)

-صباح الخير
-صباح النور،استني احضرلك الفطار قبل ماتنزل
-مستعجل والله،ابقي شوفي ماما عايزه اي عشان علا النهارده مش موجوده
-ياسيف ماانت.......
-مسك ايدي- عشان خاطري
اوقات كتير باجي علي نفسي عشان الكلمه دي،خاطره عندي بالدنيا،مورنيش حاجه وحشه عشان ارفضله طلب
نزلت الشقه اللي تحت بتاعت مامته،وكالعاده وقفت10دقايق عشان تفتحلي
-صباح الخير ياماما
-اي في حاجه ولا اي؟!
-كنت بشوفك لو عايزه حاجه يعني
-وانا لما اعوز حاجه، هطلب منك انتي ولا اي؟
عملت نفسي مسمعتش- طيب ياامي انا رايحه السوق،هعملك الغدا معانا
-طيب،انا داخله انام(وقفلت الباب)
اتنهدت ونزلت،ام سيف عمرها ما حبيتني من ساعه مادخلت البيت،بقول كل يوم يمكن تحبني،بستني الصبح يمكن يدوب جليد القسوه اللي فقلبها من ناحيتي،بقالي6شهور متجوزه،مشوفتش من سيف حاجه وحشه،يمكن ده السبب اللي مخليني ساكته مثلا،او اني بقول لنفسي دي زي امي فمزعلش!
اتصلت بشهد تنزل معايا،استنيتها ربع ساعه تحت البيت عقبال مانزلت
-كل ده ياشهد! ،سيف لو اتصل وملقنيش فالبيت هيزعل
-اكيد امه هتقوله،مانا عرفاها
-وهتقوله ليه؟دي طيبه علفكره
-والله انتي اللي طيبه،مش عارفه ليه بحس انها كرهاكي
-لا بالعكس،دي بتعاملني زي علا بنتها،متحكميش عليها قبل ماتقابليها
-يمكن
ببقا عايزه اصرخ من كتر الهموم اللي جوايا،اناا مخنوقه،من كتر المشاكل مبعرفش احكي فبعيط،الزعل زي شخص جوانا بيخنق قلبنا لحد ما نموت بالبطئ
-يلا نروح ياشهد
روحت،لقيت مامته واقفه عالسلم
اتخضيت وجريت عليها- ماما..مالك؟ في حاجه؟ انتي كويسه؟
-كل ده فالسوق بتعملي اي؟
-استنيت شهد وروحت ياامي
-وتروحي مع شهد ليه؟
رديت بهدوء- عشان مبحبش اروح لوحدي
-تتاخري انتي،وماخدش العلاج بتاعي،ده لما يجيلي سيف
امممم،عايزه تتخانق زي كل مره
-العلاج جنب السرير ياامي،ثم اني سألتك الصبح لو عايزه حاجه
-طب اتفضلي ادخلي اعمليلي الغدا
-حاضر،هطلع الحاجه فوق بس ونزلالك
-ولا تطلعيها ولا تنزليها،اسنديها جوه
اتنهدت-حاضر ياامي
دخلت المطبخ وسندت الحاجه عالرخام وبدأت اطبخ..
(طب مانا قادره اصرخ فوشها اجبلها صرعه طب،ما في اي يا ست انتي حبييني بقا الهي تنستري)
حد مسكني من ضهري فصرخت
-اهدي اهدي،في اي؟ ،دا انا،ناديت عليكي كتير ومردتيش،ماما قالتلي انك هنا
حطيت ايدي علي قلبي-حرام عليك ياسيف والله
قرب مني وضيق عينيه -في حاجه مزعلاكي صح؟
-ااا...اناا..ل..لا..لاا طبعاا
اتكلم بهدوء- حصل اي؟!
ابتسمت ومسكت ايده عشان اهرب من نظراته
-تعالي نطلع ،انا خلصت هنا،هعملك الاكل فوق،انت لسه جاي صح؟
مشيت خطوتين،مسكني من ايدي وشدني ليه
-اي اللي حصل؟!
-انا كنت.........
صوتها جه من وراه-عشان هي تعبانه شويه،اطلعو فوق يلا
-بس هي مش تعبانه،انا عارفها(مسك ايدي جامد وبصلي)اي اللي حصل قولي
سحبت ايدي وجريت علي فوق،ثانيه كمان وكنت هعيط،او اصرخ فوشها اجبلها صرعه تانيه،دخلت وقفلت الاوضه، فضلت اعيط ونمت
-صباح الخير
-صباح النور
-لو مش حابه تحكي اللي احصل ا......
-مفيش حاجه حصلت عشان احكيها،صدقني
-طب انا نازل لماما تحت،عملتلك الفطار وسيبته
مسكت ايده- انت مش هتاكل معايا؟!
ابتسم- تعالي يا ستي ناكل بره،بس كدا ياعم
اكلنا،وغسلنا الاطباق مع بعض،هو نزل لمامته،وانا روحت السوق مع شهد
-بتحبي سيف علي كدا يا يارا؟!
-لا متجوزاه صدقه،او بزكي بيه عن نفسي مثلا
شهد من اغبي مخلوقات الله،صاحبتي من ابتدائي وجارتي، مش عارفه مصحباها ليه،بس وجودها مطمني،هي بتعرفني من غير مااتكلم،بحبها عشان مبتضغطش عليا اني اتكلم،بتسمع عياطي وبس
-وبتحبي حماتك؟
-اي حماتك دي! اسمها ام سيف او مامتي
-مش موضوعنا يا لطفي، بتحبيها يعني
-شهد اخرسي شويه، اه بحبها،ويلا نروح عشان سيف فالبيت
-سيف فالبيت،سيف هيزعق،سيف هيزعل،سيف فالشغل،كل شويه سيف سيف،فين انتي من كل ده،فين حياتك؟
-لما تتجوزي يا شهد يا سنجل هتعرفي ان جوزك هو حياتك وحياتك هي جوزك
-وارنبنا فمنور انور وارنب انور فمنورنا صح!
-انا بقول نروح احسن مااضيع شبابي واقتلك
روحت البيت وقفت قدام شقه ماما (ام سيف)كنت هرن الجرس بس سحبت ايدي بسرعه،لما لقيت سيف بيتكلم باسمي
-حصل اي لكل ده هه!يارا مبتحكيش اه،بس انا عارفها، عنيها بتطفي لما بتزعل
-يعني هي محكتلكش حاجه
-لو حكتلي مكنتش هبقا هنا
-ماشي، انا مبحبهاش
-عملتلك اي هي؟ شوفتي منها اااي وحش!؟
-عشان اخدتك مني،انا ملييش غيرك هنا،وعلا سافرت
-حرام عليييكي،حبي ليها غير حبي ليكي،ابوس ايدك ريحيها عشان ارتاح،مش بيجيلي نوم لما الاقيها نايمه وهي معيطه،مش عارف اضحك وانا شايف عنيها مطفيه من كتر الهموم،هي بريئه لدرجه ان قلبها من ازاز،بلاش تخبطي عليه جامد عشان ميتكسرش
-يابني انا كان قصد........
-عن ازنك ياامي
جريت عالشقه فوق،وقفلت الباب،قلبي كان بيدق جامد، قعدت عالكرسي فالصاله استناه،طب استناه ولا اعمل نفسي نايمه،،ناايمه اي وانا لسه جايه من السوق! عقلي مش شغال ليه دلوقت!
ربع ساعه ولقيته دخل،جريت عليه وحضنته وفضلت اعيط،حضني وفضل يهيديني
مش عارفه ليه بعيط دلوقتي،يمكن عشان لقيت حد حس بيا،او هيشيل عني همومي ولو نصها حتي،فارمي نفسي من سابع سما وانا واثقه انه هيجعلي جناحين عشان مقعش! او يمكن عيوني ارتاحت فآن الآوان ان دموعي تتحرر!
-ليه مقولتيليش
-محصلش حاجه عشان اقولها
ابتسم -هتفضلي طفله لحد امتي؟!
-انا مش طفله،انا كبيره،بطبخ ومتجوزه،وبعرف اعمل صنيه بطاطس(مسحت دموعي بكفوف ايدي وضحكت)-ماما قالتلي زمان لما تعرفي تطبخي هتبقي عاقله
ضحك -والله انا ما بخاف عليكي غير منك،براءتك دي هتئزيكي
-متخافش عليا،انت جنبي صح،انت قولتلي طالما انت جنبي مخفش
مسك ايدي وقعدنا،رد بهدوء
-بلاش تيجي علي نفسك عشان ترضي حد حتي لو انا،بلاش تسعدي الناس علي حساب أذية قلبك،فكرك مبشوفكيش وانتي نايمه معيطه كل يوم،وبعدين انا مش قاعدلك العمر كله، الله اعلم
-مش قاعدلي العمر كله،اومال هتقفلي مثلا!
ضحك -قعدتك مع شهد دي مش مطمناني،بس بحبك
مسكت ايده -الله قولها كدا تاني ياسيف
-شهد!
-لا لا التانيه
-مطمناني!
-سيييييف!!!
-بحبك
ضحكت-ايوه هي دي،ويلا بقا اعمل معايا الاكل
ضحك-الله! مش كنتي لسه كبيره وبتعملي صنيه بطاطس و......
-لا مانا اخدت بكلامك وصغرت وبقيت طفله
جريت عالمطبخ جوه وانا بضحك
-طب والله متجوز طفله
حطينا الاكل وقعدنا
-سيف انا بعد الاكل نازله عند ماما
رفع حاجبه وبصلي-ماما،اللي هي امي انا!
-لا ام الجيران يا سيف ام الجيراان،انت مالك قلبت علي شهد كدا ليه؟!
رد بهدوء- ماشي انزلي انتي،وانا هغير هدومي ونازل وراكي.
نزلت تحت، بس غير كل مره،المره دي فرحانه،مفيش هموم علي كتافي تتقل حركتي
رنيت الجرس وكنت باصه للارض،الباب فتح علاطول
-طب والله لولا اني عارفه ان دي شقتك كنت قولت اني غلطت فالعنوان،فين ال10دقايق اللي بستناهم عال.....
قطعت كلامي وبصيتلها لما سمعت صوت عياطها
-انتي بتعيطي؟ مالك ياامي مين مزعلك وانا اجيبه من ياقه القميص
مسكتني من ايدي وشدتني جوه،قعدنا عالكنبه
-هو انتي هتاخدي ابني مني؟!
-اناا؟ دانا بغير منك والله،سيف كل شويه امي امي،امي بتطبخ غير كدا،امي بتقولي كذا،دا قالي النهارده ماما لازم تاكل معانا كل يوم،دا انا حبيتك من حكاويه،انا بزعل منك، وابانلك هاديه ،بس متعرفيش جوايا عامله فيكو اي،رغم اني ببقا شايله منك وعايزه اصرخ فوشك فاجيبلك.....(حطيت ايدي علي بقي وبرقت)-انا اتكلمت كتير صح ؟
ضحكت وحضنتني- هو انا ازاي محبتكيش
-مش عارفه والله،ازاي انا متحبش،بقا الكيوت دي متتحبش،لا اخص عليكي
-سامحيني عاللي حصل والله يابنتي انا .....
-حصل اي ؟!مش فاكره،انا بنسي بسرعه
-انتي بريئه بدرجه تخوف ليه ؟
-طب.......
سيف خبط عالباب ودخل
-امي اناا.........
قامت ومسكت ايده-متتكلمش،مراتك ومن حقك تجبلها حقها حتي لو مني،اوعي تيجي عليها اوعي،انت فايدك حاجه كبيره اوي فخاف عليها،هي دي اللي هسيبها معاك وانا مطمنه،راضيها وخد رضايا،سامحوني
قومت وحطيت ايدي علي كتفها -انتي امي،يعني مش هزعل منك ابدا
-ربنا يخليكي ليا انتي وسيف
-ويخليني ليكو ...الله! في اي بتبصلي كدا ليه ياسيف؟
ضحكت وقامت-انا داخله انام شويه،اقعدو هنا
قعدنا قدام التلفزيون
-في ماتش النهارده عن....
-ماتش اي ! لا انا عايزه كرتون
-كرتون!
وقفت-لو مجبتليش قناه كرتون مش قعدالك فيها
-مش قعدالي فيها،هتقفيلي مثلا!!
قعدت وبصيتله-سيف انت قعدتك معايا مش مريحاني،بس بحبك
-قوليها كدا تاني
-معايا!
-لا لا التانيه
-مريحاني!
-هاااااا!!
-بحبك
"رأيتك ضوء في نهايه نفق مظلم"