يومًا ما سنلتقى

(٥٣)

- وهو إتقدملها ليه؟
- عشان بيحبها
- وهى مبتحبهوش
- هتحبه في الآخر
- وإنتَ ايه عرفك؟ الجزء الثاني بتاع الرواية منزلش اصلًا ،إنت بتألف نهاية سعيدة صح؟
- النهايات كلها سعيدة ف مش محتاج تأليف مني
- بس أنا شايفة إن نهاية طريق معاك مش هتبقى سعيدة
ابتسم وكإني متكلمتش وفرد الغطا عليا - تصبحي على خير

معرفش ايه اللي جابره على كدا؟ صارحته قبل الجواز وإني مبحبهوش ورغم كدا مكمل ، مش بالوصف اللي تخيلته ..وتقريبًا اتزوجت آخر حد كنت ممكن أوافق عليه
يعني ايه لو مكنتش اتجوزته مكنتش هتجوز غيره ! مشاكل مع بابا وأبوه ف يجوزونا على أساس يتصالحوا هما؟ بيفكروا ازاى؟

فتح باب الأوضة ووقف عنده
- أنا نازل ، أجيبلك حاجة وأنا جاى؟
سيبت الكتاب من إيدي وبصيتله - هو إحنا هنتطلق امتى؟
- هاجي على الساعة١١ ف متستنينيش
- مش هستناك

اتنهد وقفل الباب ومشي
أنا مبحبش اللي بعمله ده ولا مفروض أعمل كدا اصلا لإنه مينفعش وعيب ..هى ٦ شهور مش كفاية يزهق مني فيهم؟ أنا زهقت مني هو ليه مزهقش؟

باب الشقة خبط ف لبست الطرحة وفتحت
- خير يا أحمد؟
- قعدة الكبار تحت مملة ف قولت أطلع أقعد معاكِ ..تعرفي! إنتِ الشخص الوحيد اللي مبزعلش منه في البيت ده

دخل جوا في الصالون وسيبت الباب مفتوح
أنا لو كنت اتزوجت سيف في ظروف غير دي كان ممكن أحبه ..عيلته وأخوه ومامته كلهم يتحبوا ، أنا بس حاسه إني مجبرة على إني أكمل وأنا مبحبش أعمل حاجة غصب عني ف كارهه الطريقة اللي أنا عايشه بيها

- في أكل؟
رفعت حواجبي ومردتش عليه وقت ما قعد على الكنبة
ف كمل هو
- ماما عامله سمك وأنا مباكلهوش ..وبما إن سيف مبيحبش السمك ف أكيد مش عامله!
- والله! وهو عشان أخوك مبياكلهوش ف معملش سمك لأ عادي
- وإنتِ مبتاكلهوش ..ماما كانت هتطلعلك بس هو قالها إنك مش بتاكليه
- في بيتزا بتاكلها؟
- أى حاجة أنا موافق

ابتسمت ودخلت جيبتله أكل من المطبخ وحطيته قدامه
- متكدبش وتقول مامتك عامله سمك لإن أخوك قالي ناكل تحت وأنا قولت لا
- يعني باين إني بحور عشان أتصاحب عليكِ؟
- ما تتلم يالا ايه تتصاحب عليا دي؟
- حد يطول أحمد يتصاحب عليه؟ اما إنسانة غريبة بشكل!
دخلت جوا الأوضة وبعدين طلعت قعدت قدامه
- هو انتوا تحت مبتحبونيش ؟
- تحت فين؟
- يعني مامتك وإنت والباقي
- وأنا لو بكرهك هطلع أعمل ايه عندك وآكل وأنا مش جعان اصلا!
- بس أنا مش حابة الحياة هنا
- إنتِ معطيتيش لنفسك فرصة تحبيها..قوليلي مين مزعلك وأنا أجيبلك حقك
- المشكلة إن محدش مزعلني ، تعرف لو حد مزعلني؟ هروح أقول لبابا إنكم زعلتوني ووقتها كل واحد يروح في حاله
- طب ما تجربي تعيشي بعيدًا عن الوهم اللي إنتِ بتفكري فيه ده
- هو إنت هتنزل تقول لمامتك الكلام اللي أنا قولته؟
- لأ طبعا
- ولو قولتلهم عادي ..أنا همشي من هنا قريب
سند الطبق على الترابيزة ووقف
- أنا مش عارف إنتِ بتفكري ازاى بس لو عوزتِ حاجة هتلاقيني تحت