يومًا ما سنلتقى

(١٦)

-يوم ليا ويوم ليك
-بس إحنا متفقناش على كده!
-هو مش إنت اللى قولتلى بعد الجواز هنقسم كل حاجة ما بينا !،إنت ولا مش إنت؟
-أيوه أنا
-يبقى مجتش على الطبخ
-الطبخ ده ليكى انتى مش ليا
-أقعد كده وإهدى وخلينا نتفق
-أنا هادى
-مش إنت كان حلمك إنى ألعب معاك كورة وبلايستيشن؟
-حصل
-يبقى مع كل يوم هتطبخ فيه هلعب معاك بلايستشين
هز راسه ب لا- تؤ،مش عرض مغرى بردو
-طب هلعب معاك بلايستيشن رافع فستانه لحد الركبه،أظن مفيش إغراء أكتر من كده !
-إتعدلى
-هسهر معاك للصبح
-وإيه تانى؟
-وهخلصلك جزء من الشغل
-وإيه تالت؟
-وهصحى أكويلك أى طقم تشاور عليه لمدة أسبوع
إبتسم -شهر
-ما حلو الأسبوع ياسيف
-يبقى نرجع للأ......
-يبقى شهر،وماله الشهر!
-إتفقنا
وطيت صوتى -مستبد
-قولتى حاجة؟
-بقولك مستعد !،متبقاش قفوش كده
أنا كان كل مفهومى إن بعد الجواز هنسافر بلاد العالم وهنمشى تحت المطر ونشرب قهوة،أنا كنت كل اللى عيزاه أتصور بإيدى اللى فيها الخاتم وأذل بيها صحابى ، أنا ايه اللى دخلنى فالحوارات دى كلها!
-سيف
مردش فإتكلمت تانى -سيف إصحى
-..........
-يولاا ياسيف ،انت لحقت تنام؟
طلع راسه من تحت المخدة -ايه؟
-قوم
-ليه الساعة كام؟
-أنا زهقانة ،قوم إحكى معايا،أو تعالى نلعب بلايستيشن
-مصحيانى عشان البلايستيشن؟
-اه
-هاخد ريال مدريد
-ماشى وأنا هاخد المنتخب
هز راسة ومشى خطوتين وبعدين رجع -منتخب ضد ريال مدريد! انتى مبتعرفيش فالكورة وجايه ترخمى صح؟
-ما أنا مش لاقية حاجة أعملها،ومش عايزة انام،ومينفعش أتصل بماما دلوقتى
-تقومى تقرفينى أنا؟
-أقرفك ! الله يرحم لما كنت هتموت وتسمع صوتى
حط المخده على وشه تانى -طيب سيبينى أنام
-انت إتجوزتنى ليه؟
-السؤال ده إتسأل ييجى عشروميت مرة
-هو مش انت اللى جيت طلبتنى من أهلى؟
-حصل
-وانت اللى مضيت عالعقد بكامل قواك العقلية؟
-حصل
-هل تفاجئت بشخصية جديدة فيا بعد الجواز؟
-محصلش
-يعنى مضحكتش عليك !يبقى تقوم تلعب معايا بلايستيشن
-تعالى نامى دلوقتى ووعد منى بكره هلعب معاكى
-ماشى
فردلى إيده أنام عليها،نمت وحضنته بالإيد التانية
-ايه مزعلك؟
-هو أنا معنديش صحاب ليه ياسيف؟
-طب ماأنا موجود
-ما انت بتقولى بطلى كلام
-وبتبطلى فعلا؟
-لا مش ببطل، بس المفروض يبقى معايا صاحبة ونتفق عليك وكده
-خلاص،إتفقى معايا عليا
-هتنحرف وهتطلع الباد بوى اللى جواك؟
-شوفى هبهرك (سكت شوية وكمل )- آسف عشان خليتك تفكرى إنك معندكيش صحاب ،بس حقيقى ببقى تعبان وانتى مبتبطليش زن
-طب أنا ملييش حد غيرك أتكلم معاه
-حقك عليا
ضحكت -طب خرجنى وهاتلى برفيوم جديد وأنا هرضى عنك
إبتسم-ماشى
مش عارفة ازاى فضلت طول حياتى معنديش أصحاب! ومعرفش إن كان الغلط عندى ولا عندهم،أنا بطبعى بخاف من الناس وكلامهم وبخاف أقرب منهم وبفضل إن علاقتى تكون بأى حد تكون سطحية ،سمعت كتير عن أصحاب أكتر من إخوات وما زالو مكملين، وصحاب خانوا بعض بسبب الغيرة ،وحاجات كتير أنا ف غنى عن وجعها،معرفش ازاى كان ممكن أكمل لو صاحبتى سابتنى لوحدى بعد ما أكون إتعلقت بيها !،أسئلة كتير بسألها لنفسى وبخاف أدور على إيجابتها لسبب أنا مش عرفاه لحد دلوقتى
-سيف سيف.. إستنى
-ها؟
عطيته الفون ومسكت البلالين ورجعت خطوتين ل ورا وديرت وشى وضحكت
-فى ايه؟
-غفلنى ياسيف بسرعة
-أغفلك ازاى وانتى عارفة إنى هصورك؟
-غفلنى وأنا بضحك والشمس آكلة نص وشى ويأكنى مش آخده بالى
-هتطبخى وهتكوى وهتنفذى اللى هقوله
-كده كتير أوى مش هينفع
-شوفى مين يصورك
-سيف بليز الشمس هتعمينى
-براحتك
-إنسان مستبد أنانى
-ها؟
-موافقة
ضحك وصورنى
-إستنى بقى!
-إيه تانى؟
عطيتله البالونات ومسكت طرف الفستان وبصيت فالأرض
-صورنى
قرب منى وبص فالأرض مكان ما أنا بصيت
-فى حاجة وقعت منك؟
-يااربى!غفلنى غفلنااااى
-ماشى، بس مسمعكيش بتتكلمى لمدة أسبوع
-يلاهوى !ده أنا تحصلى حاجة حرام عليك
-انتى هتعيطى على صورة!
-إنت معندكش إخوات بنات؟
-لأ
-طب ترضى زوج أختك ميصورهاش؟
-بقولك معنديش إخوات
-طب ترضاها لنفسك؟
-ما أنا أكيد مش همسك كُم التيشيرت وأبص فالأرض وأضحك
-إنت قولتلى إنك هتراعى تفاهتى
-ماشى صورتك
-إحلف!
-والله صورتك
-يلا بقى صورنى صور الكلبوبات أم فلتر سناب شات
-قسما بالله لو ما مشيتى من قدامى ل.......
شاورت بإيدى عشان يبطل كلام -وعلى إيه تحلف! إحنا نروح بالزوق أفضل
-هنشترى البرفيوم ونروح تمام؟
-تمام
مشينا شوية ووقفنا قدام محلات كتير
شاور بإيده على مكانين -هنروح المحل ده ولا ده؟
إخترت واحد -نروح ده،شكله من بره شيك
المحل حلو وريحته حلو و....ايه ده بنت !
شديته من إيده -تعالى نروح المحل التانى
-إحنا لسه مسألناش
-مش مستريحالها،بص بتبصلك ازاى !طب والله إنت تتكسف تبصلى كده
إتقدمت مننا ووقفت قدامنا -عايزين حاجة معينة؟
إتكلمت بسرعة -عايزين برفيوم فوحلُقى بس للأسف مفيش،شكرا
ضحكت وهى بتبص لسيف -بس فى برفيوم رجالى
وقفت قدام سيف وعليت صوتى -ما تتعدلى أحسنلك !انا واقفة هنا
عملت نفسها مسمعتش وإتكلمت تانى وهى بتبصله - بس واضح إن زوق حضرتك راقى ،القميص تحفة
إتقدمت منها -أنا اللى إخترتهوله يا مشمحترمة
-حضرتك ده محل محترم
-هتزودى كلمة تانى أقسم بالله ل.......
سيف شدنى من إيدى - يلا نمشى
-أحسن بردو
روحنا البيت من غير ما أتكلم طول الطريق
قفل باب الشقة وإتكلم -وصلنا البيت،إفتحى ماسورة النكد يلا
-كويس إنك عارف إن إنت غلطان
-غلطان ! مين اللى إختارت المحل؟
-أنا
-ومين قرر إننا ندخله عشان شيك؟
-أنا بردو
-يبقى مين اللى غلطان؟
-إنت
-ياولى الصابرين !عايزة ايه دلوقتى؟
-كنت سيبنى عليها أعدلها (قلدت صوتها )-البرفيوم حلو شوف ده كده هيهوهيهو،البرفيوم يجنن(زعقت )-ايه اللى بيضحك ف ريحة البرفيوم هه؟ وشغالة تقرب منك تقرب منك كان ناقص تبلعك
ضحك وهز راسه -ها؟
-لأ ولا النظرات اللى كانت بتبصها ليك !النظرة دى ملهاش إلا تفسير واحد
-ايه هو؟
-حاطه عينيها عليك معروفة يعنى
إبتسم -كملى
شاورت بإيدى وقلدت صوتها تانى -ألا شوف كده يا كابتن،وهات إيدك كده وهيهى عندى برفيوم للرجالة
-وأنا رديت؟
-لأ كنت ترد ،كان ناقص ترد وأروح أنا أحجزلكم فقاعة اللؤلؤة ،تعرف!لايقة عليك أصلا،يلا روح إتجوزها وطلقنى
-ياا....
-بس والله لو إتجوزتها فعلا لأقتلك إنت وهى، ال تتجوزها وتطلقنى ال،لييه مفيش محاكم ! مفيش بيت أسرة؟
-يارا
-حذارى لو لقيتك حاطط من نفس البرفيوم اللى وريتهولك ،ولا برفيوم قريب من ريحته ،ولا برفيوم فى حرف من حروف التانى،ويلاااهوى بقى لو لمحتك معدى فالشارع بتاعها يلااهوى،ده يبقى نهاار........
زعق -إهدى
قعدت عالكرسى وبربشت -حاضر
-انتى عطيانى فرصة أتكلم؟
-إهدى ياسيف مش كده يا حبيبى،المفروض يبقى فيه نقاش وهدوء ما بينا
إبتسم -بحبك
ضحكت -وأنا كمان
-ياروحى معنديش غيرك أصلا
-يلاهوى!ده إنت اللى روحى،هروح أعمل الغدا بقى
مشيت خطوتين وبعدين رجعت وضيقت عينى وشاورتله
-قرب كده
-فى ايه ؟
عليت صوتى -قررررب
وقف قدامى -قربت
قربت براسى منه وشميت ريحة القميص
ضحكت -اااه أصل أنا بقول بردو فى حاجة مش طبيعية
-انتى اللى مش طبيعية
-الريحة دى ريحة البرفيوم اللى.......
مسكنى من ياقة الفستان -ده مكان ما هى جربت
مديت إيدى -القميص لو سمحت أحسن أقسم بالله ما أخليلك منه ......
-من غير ما تتتكلمى هغير وأديهولك،بس هعمل.......
-لأ ياروحى ،القميص الأول وبعدين تشوف هتعمل ايه،ريحة البرفيوم معفرتااانى
-مامتك قالتلى نروحلها النهاردة
-ليه؟
-معرفش
-ماشى ،غير القميص ونروحلها
إبتسم -طيب
الحياة حلوه بمشاكلها وبكل ما فيها سواء حزن أو فرح لما بيبقى معانا شخص واحد بس،يهون علينا،مكنتش فاكره إنى كان ممكن أحب شخص للدرجة دى،معرفش إزاى أُجبرت إنى أحبه،شبه التعويذة كده!
-هو انتى مش هتسألينى عاملة ايه مع جوزك وكده يا أمى؟
-ده أنا ماصدقت أستريح منك،طالما هو ساكت يبقى كتر ألف خيره
-ايه ده! يعنى مش يابخته اللى إحنا من بخته
-نهائى
-غدر الأمهات،متشكرين يا أمومة
-انتى دايما كده تلاقى رد للكلام؟
-رب الكون ميزنا بميزة،يعنى سبحان الله
-لأ أنا هكلمه ييجى ياخدك ،أحسن ما ضغطى يعلى زى كل مرة
ماما دى حماتى أنا والله مش حماته هو ،أو مرات أبويا مثلا !حاجة فالرينج ده
-ألا قولى ياسيف!
-ها؟
-هو فعلا مش يابخته اللى إحنا من بخته؟
-لأ،ده يابخته أوى طبعا
-إنت بتبصلى كده ليه؟إتعدل أحسنلك
-عنيفة أوى
-لا ده إحنا عندنا مواهب بردو
-يعنى هتنحرفى وهتطلعى الباد جيرل اللى جواكى
-شوف..هبهرك
"رأيتكَ ضوء فى نهاية نفقٍ مظلم!"