يومًا ما سنلتقى

٤٦

" قصرنا في حاجة من ناحيتك عشان تجيبي المجموع ده؟"
" متتصرفيش  انتي هتعكي الدنيا ، إحنا هنتصرف"

بابا دايما شايفني إني فاشلة ومش هحقق حاجة ووجودي زى قلته من بعد ٣ ثانوي ، والله عملت كل اللي أقدر عليه ، كل حاجة عملتها ومجبتش المجموع اللي هو عايزة ،رغم كده دخلت جامعة أنا مش حباها عشان بس أرضيه وينسى موضوع النتيجة ده شوية ومنساش
من ساعة ما فتحت عيني وعرفت أفرق بين الصح والغلط مكنش ليا قرار ، يا ماما يا بابا اللي بيتصرفولي دايما حتى معرفتش أكونلي صحاب أو شلة زى ما بيقولوا ، ووقت ما بعارض بس الدنيا بتتقلب واني مفروض أمشي على الطريق اللي هما هيمشوا عليه!
أوقات بخاف إن ملامح شخصيتي تتمحي ، بجانب طاعة الوالدين مفروض يبقى ليا شخصية ، كلامهم على راسي والله بس فين وجهة نظري أنا؟ كلامي أنا؟ وأفكاري أنا؟)

- ماما أنا حابه أشتري الدريس ده
مسكت واحد تاني وقربته مني - لأ ، ده أحلى
- ما أنا قيسته مطلعش حلو
- هتشوفي أكتر مني؟
- مقصدش يا ماما بس ......
- أنا غلطانة إني جيت أنقي معاكي حاجة 

مشت ف مشيت وراها واتكلمت بدون تفكير كالعادة
- خلاص يا ماما هنشتريه
- لا مفيش خالص ، أنا مش هعيد كلامي
- يا ماما أنا بس كنت بقولك رأيي
- رأيك ده اللي هيبقى أفضل من رأيي
- أنا اسفه

(معرفش بعتذر على ايه؟ اللي قرأت عنه إن الاعتذار ده لما أغلط وأنا مغلطتش .. مضطرة أعتذر عشان مبحبهاش تزعل مني ،عشان مش هتكلمني وانا ملييش حد أكلمه اصلا ..هكره نفسي فوق ما أنا بكرهني لإني شايفة نفسي دايما غلط)

- رايحة الجامعة ؟
- اه يا بابا
- متتأخريش ومتلفيش زى بقية البنات وبلاش.......
-من البيت للجامعة ومن الجامعة للبيت ، حافظة الكلام وبعمل بيه

( عارفة إن النصيحة حلوة ،بس أوقات تكرارها بيكون ممل.. يعني نصحتني ؟خلاص أنا هعمل بالنصيحة ولو معملتش تعالى إنصحني تاني ، لكن أنا بشوف ده قلة ثقة وملل ..أنا بتخنق أو بموت بالبطيئ بكتر التكرار)

وصلت الجامعة وطلعت التليفون من الشنطة ، فتحته وحطيته على ودني
- وصلت ياسيف
- مالك؟
اتنهدت ومردتش ف اتكلم هو تاني
- حد ضايقك؟
فكرت شوية قبل ما أرد وبصيت للكارنيه اللي في إيدي  - لا ابدا بس نسيت الكارنيه في البيت

- وهتدخلي ازاى؟
- بالبطاقة عادي
- طب هتصل بأبوكِ وهقوله نخرج النهاردة
- ماشي
- متنسيش تاكلي قبل ما تدخلي المحاضرة عشان متفصليش
- طيب يا سيف
- سلام
- سلام

قفلت التليفون وكملت طريقي للمدرج ، حضرت المحاضرة ومفروض أصور المحاضرات اللي فاتتني ، ولإن ملييش صحاب هنا ف مش بكلم حد اصلا
فكرت أروح للبنت اللي بتحضر للدكتور ده دايما بس رجعت تاني ، هى ممكن ترفض وتحرجني
اتقدمت خطوة - وممكن توافق عادي
رجعت وبعدين اتقدمت تاني ووقفت في مكاني وبصيت للسما واتنهدت
- اعملي حاجة واحدة في حياتك من غير ما تترددي بقى
أخدت نفس واتقدمت منها هى وصحابها
ابتسمت - صباح الخير