يومًا ما سنلتقى

اسكريبت (١١)

-أنا رايحة النهاردة عند ماما
-طيب
-مش هتيجى معايا
-لأ،معلش عندى شغل كتير النهاردة
-تمام
مكنتش أعرف إن الحياة بره بيت بابا وأمى مملة بالشكل ده،أنا عارفه إنه مش بيحبنى وطلب منى أديله وقت،وعارفه إنه كان بيحب بنت خالته ياسمين ومحصلش نصيب وإتجوزت واحد غيره
-ماما أنا زهقت
سندت الشاى وبصيتلى -من إيه؟
لوهله كنت بفكر أحكيلها وللحظه نسيت إنى وعدت نفسى مش هحكى حاجه تخصنى أنا وهو
-مني (سكت شوية وكملت) -زهقت مني، لا أنا عارفه عايزه إيه،ولا أنا رايحه بنفسى على فين !،ماشية لإن الحياة عايزة كده،وحاسه إني فـ مكان غير المكان اللي حلمت أبقا فيه
-حصل حاجه بينك انتي وسيف؟
-ابدا،هو بيحبني جدا،مش مقصر معايا والله،هو مشغول الأيام دي وقالي هيجيلك لما يفضى
-قربي منه
أقرب! أنا طول فترة جوازنا بجري عشان أقرب منه، وإكتشفت إني بجري فنفس المكان،ومتقدمتش خطوة واحدة بس
إتنهدت وسكت
إبتسمت -إملي عليه حياته تعرفي! (سكتت شوية وكملت) -الراجل مهما كبر بيفضل طفل صغير،يعني لازم تهتمي بالأكل بتاعه، وباللبس بتاعه، بالحاجات اللي بيحبها،إسأليه عن تفاصيل يومه
-حاضر
-وإعمليله الأكل اللي بيحبه
-حاضر
-متعمليش الحاجات اللي تزعله
-حاضر
-إعملى........
-ايه يا ماما ايه! ،من أول ماإتجوزت،إعملى. ومتعمليش، أخرجى ومتخرجيش،متعمليش اللي يزعله، هو أنا مش من حقي أزعل؟ هو أنا مش ليا ......
-ها؟
-لو على سيف،هو قالى إنه مش فاضي الأسبوع كله وحقيقي مشغول
-سيف جالي إمبارح
-إيه؟
مسكت كوباية الشاى وإبتسمت -قالك صح؟
-هه! ااااا....اه....اه قالي طبعا (مسكت الشنطة ووقفت)- أنا همشي عشان إتأخرت
هزت راسها وإبتسمت
روحت، كان هو مشغول فى الفون
قربت منه -أنا جيت
إتكلم من غير مايبص -إتأخرتي ليه؟
-محستش بالوقت
-متتكررش
-مقولتليش ليه إنك روحت لماما إمبارح؟
-وهو أنا هتحرك بإذن منك
-طب سيب الفون وبصلى وإنت بتتكلم
سند الفون عالكنبة وإتنهد -خير؟
-أنا شكلى بيبقى زفت قدام ماما كل مرة،فـ لو سمحت لما تروح قولى ونروح مع بعض عشان ماما متشكش فـ حاجه
-لو إفتكرت هبقا أقولك
-طب أحط الغدا
-أكلت
عليت صوتي -أحسن بردو
-لو عليتي صوتك تاني هتزعلي
مردتش ودخلت الأوضه
طلعت بعد شوية ووقفت قدامه -بقولك إيه
-ها؟
-عايزة أخرج شوية
-ما انتي لسه جايه
-أيوه بس إحنا بقالنا كتير مخرجناش مع بعض
-ماشى نخرج بكره
إبتسمت وقعدت جنبه -إنت فاكر بكره يوم إيه؟
-الأحد؟
-لأ، مناسبة يعنى
-لأ، مش فاكر حقيقي
رفعت حواجبي -بجد!
-في ايه يعني بكره مش فاهم؟
وقفت -ولا حاجه
كنت فاكرة إنه هيكون عارف عيد ميلادى إمتى،أو حتي يقولي كل سنه وانتي طيبة،والله الكلمه هكون راضية بيها،أكيد هو مش ناسي وهيعملي مفاجأه ويقولي بحبك،
منمتش طول الليل من فرحتى بالتخيلات الوهمية اللي بفكر فيها
نزل الشغل الصبح،وأنا عملت تورتة وحطيتها فالتلاجة،بفرح نفسي بنفسي باين
سمعت باب الشقة إتقفل،أكيد هو،جريت وقفت قدامه وأنا بضحك معرفش ليه -إنت جيت؟
-شايفة إيه؟
-أيوه عارفة بس،.....طب إيه مش عايز تقولي حاجه؟
-ريحة البرفيوم حلوه
-لأ غيرها
-مش فاهم أنا في ايه! ،انتي مش طبيعية من إمبارح وأنا عايز أغير هدومى عشان نازل لصحابى
حطيت إيدى فوسطى ورفعت حواجبى -يعني حلال تنزل مع صحابك،وعيد.....(سكت وضحكت تاني،أكيد عامل حجة أصحابه عشان يجيبلي هدية أو ورد)
-انتي مش طبيعية والله،من شوية كنتي هتتخانقي ودلوقتي بتضحكي!
-لأ عادي إنزل مع صحابك وبراحتك
رفع حاجبه -يعنى مش هتنكدي،وتسمعيني قاموس كل مرة؟
مسكت إيده وإبتسمت -الله إنت بقيت حافظ كلامى؟
-عادى
إتنهدت -هو إنت بتحبنى؟
سكت ومردش
-طب ماتحبني ياسيف
-مينفعش تطلبي الحب
-إشمعنا
-ومينفعش تسألي السؤال ده
-طب هسأل آخر سؤال
-ها؟
-أعرف ازاي إنك حبيتني ؟
-تشربى قهوة؟
-دلوقتى!
-هقولك الجملة دى لما أحبك
-تشربي قهوة؟ هي دي!
-بالظبط
-طب دى ايه عـ....
-قولتى آخر سؤال،أنا متأخر
إبتسمت -ماشي
دخلت البلكونة،لقيت النوت بتاعته عالكرسى،معرفش ليه شيلتها فالشنطة بتاعتى، يمكن يكون كاتب فيها هو مبيحبنبش ليه مثلا!
رجعت قعدت فالبلكونة تانى وإستنيته للساعة 2بليل، كنت هيأس وأدخل أنام بس سمعت باب الشقة إتفتح
قومت ووقفت قدامه -إتأخرت ليه؟
-وانتي منمتيش ليه؟
كتفت إيدى قدامى ومعرفش ليه حسيت إنى عايزة أعيط -إنت مش فاكر بجد ولا بتهزر
-وأهزر ليه؟ ماتقولي في ايه؟
نزلت إيدى -ولا حاجه، متشيلش هم
دخلت الأوضة وعيطت،محستش نمت ازاي،ولا الصبح طلع إمتى!
دورت عليه فالشقة ملقتهوش
شهقت -نزل من غير مايفطر!
ايه ده! لحظة كده! هو مفتكرش عيد ميلادى! عنه ما فطر،ال يعني بيفطر معايا كل يوم
هحاول تاني،وأعمل بكلام أمي،وأعمله الأكل اللي بيحبه
فتح باب الشقة ودخل،وقفت قدامه وإبتسمت -حمدلله عالسلامة
-مكنتش مسافر علفكره
شديته من إيده وضحكت -تعالى،(وقفت قدام الترابيزة) -إيه رأيك؟
-حلو
-إنت حلوف
-نعم!
-إنت بتشوف! أقصد شايف الشموع والورد ده (زعقت) -شايف؟
-طيب
-هو مش المفروض عينيك تدمع وتقولي يااه من زمان وأنا شايل الكلمة فـ قلبى، وتقولى بحبك وكده
-لأ
-لأ! طب بص كويس كده،عملتلك الأكل اللي بتحبه
-شكرا
-شكرا !إنت بتكلم أختك ياابنى! إنت عايز تموتنى مشلولة!
-أنا هدخل أنام فـ متعليش صوت التلفزيون
-نعم !
-حقيقى عايز أنام،حلو الأكل تسلم إيدك
-يعنى مش هتاكل؟
-تصبحى على خير
إبتسمت وهزيت راسى،شيلت الأكل وقعدت فالبلكونة،لأ ما هو مفيش إنسان بالقسوة دى !هو إزاى محبنيش لحد دلوقتى؟ ،(وقفت )-مش فالحين غير فى: إعملى الأكل اللي بيحبه يايارا،حطيله شمعة خضرا وشمعة صفرا يايارا وهو طيب وبيحبك، والله لو حطيتله شموع سبوع بحاله ما هيأثر فيه، ده أنا حبيتنى والله بسبب اللى بعمله معاك،مقصرتش فحاجه ولا لاقية غلطة واحدة تكون سبب فإنه ميحبينيش،ومش لاقية سبب ألوم نفسى عشان حبيته!،يمكن عشان ده موسم الكائن المهزأ اللي جوايا وهو اللي بيحركني!  ،لا مش يمكن ده أكيد
لفيت عشان أدخل أنام،لقيته ساند علي باب البلكونة وبيضحك
لحظه! هو بيضحك عادى زيه زى البشر كده!
-ماإنت قمر أهو ياأخى أما مالك فى إيه!
-أمى عزمانا عالغدا بكرة هتيجى؟
-لأ ثوانى! إنت ضحكت وكمان بتسألنى آجى معاك ولا لأ ؟يعنى إحنا هنخرج مع بعض بجد؟
-حاجه زى كده
ضحكت -ينهار جماال
إبتسم -تصبحى على خير
-وإنت من أهله
لأول مرة أنام وأنا بضحك،ومعرفش ليه مستريحتش للفرحة دى،كل ماأفرح النكد بياخدنى بالأحضان تانى يوم
-ها خلصتى؟
وقفت قدامه -اه،تمام كده حلو؟
-الفستان ده جديد؟
ضحكت -اه،إنت لاحظته؟
فضل باصصلى ومبتسم
شديته من إيده -يلا هنتأخر
وصلنا هناك ومعرفش ايه الناس دى كلها، أنا كنت فاكرة أنا وسيف بس!
لحظة كده! ياسمين بتعمل إيه هنا؟
إتكلمت بصوت واطى ومسكت فإيده جامد -ياسمين جت ليه؟
-وأنا أعملها إيه يعنى؟
-متسلمش عليها طب
-إمشى وإنتى ساكته
أكلنا وكنا قاعدين بنشرب الشاى،هو بيبصلها كده ليه!
دوست على رجله جامد -إشرب الشاى ياحبيبى
إبتسم -طيب
إتكلمت هى -بس ماشاء الله كونت نفسك ومستقبلك بسرعة ياسيف
رديت بسرعة -مايكون ولا ميكونش،شاغلة نفسك ليه؟
سيف بصلى وإتكلم بصوت واطى -عيب كده،ردى عليها بأسلوب أحسن من ده
-يعنى مزعلك أوى إنى رديت عليها بأسلوب وحش! وأسلوبك معايا هو اللى حلو! (وقفت )-لأ وعلى إيه أسيبكم أنا مع بعض وأمشى
مسك إيدى -إستنى
زقيت إيده ومسكت الشنطة -إشبع بيها
مشيت ومستنتهوش يرد،ركبت تاكسى وروحت البيت معرفش الشعور اللى حساه ده إيه،بس لأول مرة أحس بكده،طول الطريق كنت بعيط
فتحت باب الشقة،كان هو ورايا علاطول
مسكنى من إيدى -إستنى
زقيت إيده وبصيتله -بقت حلوه صح ؟أحلى منى مش كده؟
-إهدى،أنا حاسس بيكى و.....
ضحكت وأنا بعيط -هو إنت بتحس؟ ،لأ متهزرش (سكت شوية وكملت )-إنت لو كنت بتحس مكنتش هتعاملنى كده،ده أنا بعملك كل حاجه حلوه وبستناك عشان تفرح،وفالآخر بتقولى تصبحى على خير
-اصبري هفهمك
-تعرف إنى بنام كل يوم على أمل إنك تقولى كلمة حلوه أو تحبنى!  ،تعرف إحساسى لما ببصلك وببقا عارفة إن قلبك مش معايا،إنى حتى مش عارفة أقرب منك،أو إنك تثق فيا وتحكيلى،بس كان عندى أمل إنك تحس بيا،والله ما حبيت حد فحياتى غيرك،أنا عطيتك قلبى وحياتى وكل حاجه،وإنت ...إنت مقولتليش كلمة واحده حلوه،متخيل! 4شهور متجوزين ومقولتش كلمة حلوة! أنا بعمل كل حاجه عشان أخليك سعيد ومبسوط،وإنت مصمم تكسرلى أجنحتى،مصمم تخلينى أكرهك،(سكت شوية وكملت)-حاولت أكرهك والله بس معرفتش،ليه بتعمل فيا كده؟ ليه ضيعت الأمل الوحيد اللى كان فإيدى؟
-ضيعته؟
-اه ضيعته، ضاع لما وصلنا عند مامتك
زعق -تقصدى إيه؟
-لو مكنتش تعرف قصدى مكنتش زعقت
-اللي فدماغك ده كذب،إنتى اللى .....
-ونظرتك ليها إمبارح كانت كذب؟
عينيه دمعت ومردش
عيطت أكتر -ده إنت عينيك ملمعتش غير لما شوفتها، ده أنا أول مرة أشوف عينيك بتلمع كده،ومقدرش أقولك حسيت بإيه وقتها غير إنى بموت،مكنتش عارفه أتنفس،إتمنيت بس إنى أبقى مكانها دقيقة واحدة، إتمنيت إنك تبصلى زيها (زعقت )-كتير عليا! كتير عليا إنك تحبنى؟ (قربت منه ومسكت إيده )- إنت بتكرهنى ليه؟
-أنا عمرى ماكرهتك
-إتجوزتنى ليه لما عارف إنك هتفضل تحبها؟
-والله نسيتها
-أنا مش بلوم عليك،أنا بلوم نفسى إنى بدوس على قلبى وكرامتى كل يوم عشانك،بلوم نفسى إنى لحد دلوقتى بحبك
-إسمعينى
-سمعتك 4شهور بحالهم،وإنت مسمعتنيش ولو لساعة حتى! ،فاكر لما كل يوم أتحايل عليك عشان تاكل،أو عشان تسمعنى
-كنت عارف إنى لو قعدت معاكى هقولك إنى بحـ....(سكت ومكملش)
-إنك إيه؟
-أنا .......
-قولها،ولو متردد قولها،ولو مش حاسس بيها قولها،وأنا والله هعيش معاك على أساس الكلمه دى
أخد نفس وطلعه بالبطئ -آسف
عليت صوتى -إنت إيه يااخى!مبتحسش!
-إهدى
-طلقنى
-نعم!
-أنا معملتش حاجه تهليك متحبنيش،ورغم كده بردو محبتنيش، طب ليه ؟،قولى سبب،والله ما لاقيه سبب واحد حتى،طلقنى أنا زهقت
-إياكى تقوليها تانى
-هقولها وهفضل أقولها لحد ماتطلقنى
-مش هيحصل
-هسيبلك البيت وأمشى
مسك إيدى جامد -رد فعلى مش هيعجبك دلوقتى لو قولتيها تانى،متخلينيش أكرهك فيا أكتر من كده
شيلت إيده ورجعت خطوتين لـورا ،مكنش ورايا إلا الحيطة-طلقـ....
قرب منى أكتر -أنا لما بقول كلمة مبرجعش فيها
حسيت إنى لوحدي،بحارب العالم لوحدى. ،وإنى خلاص هستسلم لليأس
سمعت باب الشقة إتقفل فعرفت إنه نزل
دخلت بسرعة حطيت هدومى فشنطة وروحت عند أمى،مكنش قدامى غيرها،كنت هموت لو فضلت أكتر من كده،ده مش بيت ده سجن
-عايزة أعرف حصل إيه بينكم عشان تلمى هدومك وتجيلى فالوقت ده ؟
-محصلش حاجه ياأمى، أنا بس مش عايزة أكمل معاه
-لا إله إلا الله،يابنتى قوليلى حصل إيه؟
-ماما بصى .....
سمعت باب الشقة بيخبط جامد،،(وقفت بسرعة )-متفتحيش ده هو
-إدخلى وإقفلي الأوضة عليكى،متخافيش
-والله لو أخدنى من هنا هصوت
-إدخلى بس
دخلت وقفلت على نفسى الأوضة،ربع ساعة وماما خبطت
-إفتحى،هو مشى
فتحت الباب بسرعة -قالك إيه؟
-كان عايزك تروحى معاه
-ده بيحلم! نجوم السما أقربله
ضحكت -الله يهديكى
شهر من غيره،من غير ماأشوفه ولا أرخم عليه، كنت بعاقبنى لما خرجت من البيت مش بعاقبه هو،مينفعش نتعلق بشخص لدرجة إننا بنخسر نفسنا لو بعدنا عنه
-مستريحة كده؟
-بقولك إيه ياشهد،متجيبليش سيرة الموضوع ده تانى
-ولو كلمك دلوقتى،هتتجنى وتلمى هدومك وتروحيله
-أنا عمرى ابدا ابدا ابدا ماهرد عليه ابدا
الفون رن فرديت بسرعة -سيف
صوته كان تعبان-وحشتينى
تنحت وبعدت التلفون عنى،أبص عالإسم يمكن غلط،بصيت لشهد -شوفى كده هو سيف اللي متصل ولا بيتهيألى
-ردي ردي
إتكلم تانى -البيت وحش أوي من غيرك،مش عارف أعيش ولا أنام،مش عارف أدخل البيت من غير ماتجرى وتنطى قدامى وتضحكى
بصيت لشهد تانى -البيت وحش من غيرى !إلحقى ده بيقولى كلام حلو !
مردتش فإتكلم -أنا هاجى بكره،ومش عايز غير إنك تسمعينى،إسمعينى بس
-موافقة
قفلت الفون بسرعة،لإنى لو كملت أكتر من كده هقوله مسمحاك وأرجع تانى،مسكت الشنطو بتاعتى عشان أطلع النوت،لقيت النوت بتاعته هو،إفتكرت إنى شيلتها فالشنطة لما لقيتها فالبلكونة
فتحتها بسرعة،كان ملزق فيها صور كتير ليا،وكاتب تحت كل صورة، إتصورتها إمتى وفين، كاتب عيد ميلادى وعيد جوازنا،كاتب إنه ....لمست حروف الورقة بإيدى،كاتب إنه بيحبنى من أول شهر إتجوزنا فيه،إنه لما يعترفلى بحبه همشى زي بنت خالته وهشوف حبه ده ضعف،كاتب كل حاجه عملتهاله وأد إيه كان بيفرح بيهم،إنه مبيعرفش ينام يوم ما يزعلنى،كاتب الألوان اللى بحبها والأماكن اللى حلمى أروحها،
قفلت النوت وأنا بضحك،منمتش اليوم ده وكل ما أخلص قراءة النوت أعيدها من الأول بنفس الشغف والفرحة، وكأنى بقرأها للمرة الأولى
سمعت باب الأوضة بيخبط،بس المرة دى مش ماما،المرة دى هو اللى دخل
جريت وقفت قدامه -سيف
فالوقت ده كنت عايزة أحضنه،وأقوله إنه وحشنى والله، ومسمحاه على كل حاجه
-آسف على كل حاجه عملتها وزعلتك
-مسمـ....
-إسمعى للآخر
-أنا نسيت ياسمين من ساعة ما قالتلى إنها هتتخطب لواحد تانى،أقسم بالله أنا مفيش حد فحياتى غيرك، أنا عملت كده يوم ما روحنا عند أمى،عشان أشوفك هتغيرى ولا لأ،حاولت أكرهك فيا عشان عارف إن مينفعش أتعلق بواحدة ممكن تمشى تانى،بستغرب إنك كل مرة بتبتسمى أو تضحكى وكأنى مزعلتكيش،وحاولت أقنع نفسى إنى هعرف أكمل عادى من غيرك،معرفتش ...كل حاجه بتفكرنى بيكى فإرجعى معايا
ضحكت -أنا بحبك
ضحك -تشربى قهوة؟
""رأيتك ضوء فى نهاية نفق مظلم "