يومًا ما سنلتقى

(٢٣)

-عيد اللى شرحته تانى
حدف القلم وشد فى شعره - دى عاشر مرة أشرحلك
-ما أنا مبعرفش أحفظ ف تلاقينى فى حفظ النصوص مش أد كده
قفل الكتاب وإتعصب -ميار إرحمينى ،دى بلاغة مش نصوص!
مسكت الكتاب وبصيت على غلافه - إتصدق صح !، ده طلع كتاب بلاغة فعلا
-دخلتى لغة عربية ليه لما عارفة إنك مبتفهميش فيها؟
-مش عارفة،بس أنا مبحبهاش ،دخلتها  وأنا مش حباها ،بس فى مواد بحبها زى النحو والصرف و......
-متحكيش قصة حياتك إختصرى
-يووه مش إنت اللى سألت
وقف -إفهميها مع نفسك
-عايزنى أسقط؟ ويقولوا اللى إتجوز الفاشلة راح واللى إتجوز الفاشلة جه!
قعد تانى -أنا ميشغلنيش كلام الناس ،بس أهم حاجة منظرك قدام نفسك هيبقى عامل ازاى؟
-مين زوجى قرة عينى ناو؟
-إفهمى وفتحى عقلك شوية وإرحمينى
(أنا فى تفتيح العقل والذكاء معرفش يا أما إرحمينى)
بعد نص ساعة حدف الكتاب مكان ما حدف القلم
لف وبصلى وزعق -أنا بشرح ل مين هه بشرح ل مين؟أنا زهقت
-ما إنت اللى شرحك وحش أفهم بالعافية يعنى؟
-بصى انتى مفيش أمل منك ،أنا إتجوزتك والحمدلله، والست ملهاش إلا ايه؟
إبتسمت -بيت جوزها ياروحى
مسكنى من ياقة التيشيرت وقربنى ليه -إلا مستقبلها وتعليمها ،إلا ايه؟
بربشت -مستقبلها وتعليمها
-قومى هاتى الكتاب وزاكرى شوية
-جعانة وعقلى واقف ياسيف
-ذاكرى ،وأنا هعمل أى أكل
-طب متحرقش الأكل بليز
-انتى هتتشرطى كمان؟
-براحتك يا بشة براحتك
(شرحه وحش وبيعمل الأكل محروق وبيقولى أنا اللى مفيش منى أمل!، يصبر عليا بس وهيلاقينى من أوائل الدفعة)
-أنا نازل الشغل عايزة حاجة؟
-هاتلى حاجة حلوة وإنت جاى
إبتسم -ذاكرى عقبال ما آجى
-وتشرحلى شرح وحش ونتخانق؟
-لا هغير الطريقة
-تمام
شوية وإتصلت بشهد تيجى تزاكر معايا
١٠ دقائق ووصلت لإن بيتها قريب منى
-ذاكرتى حاجة إمبارح؟
-مش كتير ياشهد
-الإمتحان إتبقاله ٣ أيام بس!
-شكرا على المعلومة اللى مكنتش هعرفها من غيرك
-ميار بطلى هزار وركزى شوية
-ما أنا مركزة أهو
-أنا شايفة أن سيف مش مخليكى مشغولة فى البيت أو.....
-سيف بيعمل كل اللى يقدر عليه عشان يساعدنى وأنجح ،بس أنا مش فاهمه، مش حابه المادة ياشهد
-دى إجبارى ، يعتى لازم تذاكريها
-طيب
-خلصتى المواد الباقية؟
-اه خلصتها
-طب حلو
ضيقت عينى وقربت منها -انتى مخلصتيش البلاغة صح؟
-لأ مش حكاية إنى مخلصتهاش ،بس الموضوع إنى....يعنى......
رفعت حاجبى -شهد!
-مفتحتهاش
شهقت -يلاهوى
-أنا قولت لماما إمبارح ،لقيت كف نازل آكل نص وشى
-انتى مهزأة يا شهد؟
ضحكت -فى سامر كورس متقلقيش
رغم إنها كانت بتهزر  بس قلبى إترجف وخوفت بمجرد التفكير فى الموضوع ده
-أنا بهزر علفكره! وبعدين أنا أقدر ألم المنهج فى يومين، أنا بحب البلاغة
-طب أتصرف ازاى؟ أنا حاسه إنى تايهه
-مبعرفش أشرح والله ،طب ركزى مع سيف لما يشرحلك
(مبحبش أقول لحد إنى محتاجاه ،بس حسيت إنى صغيرة ومش عارفة أتصرف ،الدنيا ضاقت أوى والأيام بتقع من إيدى)
أخدت الكتاب وطلعت قعدت جنب سيف على الكنبة وأنا بعيط
-أنا محتاجالك ،أتصرف وخلينى أنجح
-العياط ده هيفيدك بحاجة يعنى؟
-مش فاهمه ومش عارفة أذاكر ولا عارفة أنام
-لما كنت بقولك ذاكرى كنتى بتاخدى الموضوع بهزار ،عاجبك حالك دلوقتى؟
-حقيقى مش وقته الكلام ده ،أنا خايفه أفشل
-مش هيحصل بإذن الله
-أنا مذاكرتش ربع المنهج حتى!
-هنذاكره مع بعض
سندت الكتاب على الترابيزة وإتنهدت -أنا مش هروح الإمتحان
-قومى إغسلى وشك وإستهدى بالله كده وتعالى نتكلم
حطيت وشى بين إيديا وكملت عياط -مش هروح الإمتحان ،هروح أعمل ايه وأنا مش عارفة حاجة؟
-إنك تحاولى ده فى حد ذاته نجاح
-وبعدين أندم إنى محلتش حاجة؟
-هتندمى لو مروحتيش، حاولى وإعملى اللى عليكى
-ياسيف....
-أنا واثق فيكى وعارف إنك تقدرى تنجحى
-إنت مش قولتلى إنى فاشلة ومفيش فيا أمل
-لو كنتى فاشلة صح مكنتش حاولت إنى أذاكرلك حاجة،يابت انتى أذكى منى أصلا
أخدت منديل من على التربيزة ومسحت دموعى وإبتسمت
-مش للدرجة دى يعنى
-انتى محتاجة تثقى فى نفسك وهتحققى كل حاجة
-يعنى ممكن أنجح؟
-أنا متأكد من ده إن شاء الله
-هتذاكرلى؟
-إدخلى نامى ،شوية وهصحيكى
-لأ أنا مخلصتش حاجة
-انتى منمتيش من إمبارح ،نامى وأنا هلخصلك فى الكتاب ده شوية
-إنت عندك شغل بكره
-أخدت أجازة عشان أذاكرلك
-يعنى.....
-كان زمانك نمتى وصحيتى دلوقتى ،بطلى كلام
ضحكت -ماشى
نفسيتى بتبقى وحشة جدا أيام الإمتحانات حتى وأنا مذاكرة ،ببقى نكدية وعصبية جدا فى الأيام دى وبعيط كتير ،وبخسر ناس أكتر ، أكتر وقت ببقى محتاجة فيه أى حد يبقى جنبى وعمرى ما طلبت من صحابى ده ولا قولت لبنت إنى محتاجاها حتى لأختى ،عمرى ما قولتلها ولا هقولها ،بلاقى سيف دايما جنبى لإنه بيبقى عارف إنى محتاجاه وبييجى من غير ما أطلب ده ،الوحيد اللى بحكيله كل حاجة ،وثقت فيه لدرجة إنى بحس إنه أنا ،هو جميل لدرجة إنى مينفعش أوصفه ،أو مفيش حروف تكفى إنى أكتب عنه،الوقت مكنش كافى للباقى
-ركزى بس ف اللى شرحتهولك
-بس......
مسك إيدى -متخافيش ،أنا هستناكى لما تخلصى ،هطلع من الشغل بدرى ،وهاجى أجيبك
هزيت راسى -ماشى
-متقفيش مع حد وانتى طالعة
-حاضر
-اللى عرفاه حليه واللى مش عرفاه فكرى فيه ،إوعى تحتاجى لحد
-حاضر
-متراجعيش مع حد وانتى نازلة
-إنت متقمص شخصية ماما ليه كده؟
-معنديش غيرك عشان أخاف عليه
-طب يلا عشان إتأخرت
روحت الإمتحان وأنا عندى أمل إنى أجيب درجة النجاح حتى!كنت فاكرة إنى أقدر ألم المادة قبل الإمتحان بكام يوم ، كل حاجة إتبخرت لما شوفت الإمتحان ..عرفت إنى مش هنجح ،لما خرجت قولت لسيف ،رغم كده لسه عنده أمل إنى أنجح
-أنا عارفة إنى محلتش كويس
-متيأسيش
-بتجيب الصبر ده منين؟بقولك محلتش
-أنا واثق فيكى
أنا كنت عايزة أنجح عشان أفرحه وأثبت لنفسى إنى أقدر على أى حاجة ،محدش قصر فى حقى ف ليه أنا قصرت؟ هو محرمنيش من حاجة وفضل واقف جنبى لآخر لحظة ف ليه أنا أفشل؟بخاف من كلمة فشل جدا ،بخاف بمجرد التفكير فيها ،معرفش ليه إتفاجئت لما النتيجة طلعت ومنجحتش فى البلاغة يمكن عشان حاولت أكذب نفسى وأتمسك بأى أمل وخلاص
-ننزل بكوليكشن العياط والنكد
مردتش عليه وكملت عياط فإتكلم تانى
-مش هقولك متعيطيش لإنه حقك ،بس حقيقى العياط مش هيفيدك فى حاجة
-سيف لو سمحت كفاية
-ما السنة كلها كانت قدامك ،لازم تتزنقى الزنقة السودة دى قبل كل إمتحان ،ومش بتتوبى ابدًا
ضحكت -مش هضحك علفكره
-فى سامر كورس هتدخليه وتنجحى
-مش عايزة أكمل، أنا يأست
قعد جنبى ومسك إيدى - أنا لما قولت إنك تقدرى تنجحى مقولتش كده عشان أشجعك لأ ،قولت كده عشان شايف إنك عايزة تنجحى
-إنت مقصرتش معايا وضيعت أيام فى الشغل و.....
-مش ندمان إنى حاولت معاكى ،ولو الزمن رجع هختار إنى أحاول معاكى تانى
-آسفه عشان ضيعت ثقتك فيا
-أنا لسه واثق فيكى ،وواثق إنك تقدرى تنجحى لو عايزة ده
-أنا معنديش طاقة أكمل تانى
-قدامك وقت كبير تذاكرى فيه ،أنا جنبك ،إوعى تندمى إنك حاولتى ،مش غلط إنك تفشلى وتنجحى ،الغلط هو إنك تصممى على الفشل
-صدقنى هبقى نكدية فوق ما تتخيل لو فشلت تانى
-نكد براحتك يابشمهندس طارق ميهمكش
-مش هضحك بردو
-هتنجحى بإذن الله،أو أنا هعاقبك
-طب نبدأ مذاكرة من بكره تمام؟
-تانى؟هتفضلى تأجلى المذاكرة تانى وتتزنقى تانى؟
ضحكت -خلاص هجيب الكتاب
سيف علق  ليا ورقة جنب السرير مكتوب فيها :
"أنا ناجحة وهنجح ،وهفضل أحاول لحد ما أفتخر بنفسى"
وجنبها قلب أزرق ،وطلب منى أقرأها كل ما أحس إنى هفشل،أو كل ما أحس باليأس
المرة دى دخلت الإمتحان وأنا واثقة إنى هنجح ،عدى الإمتحان وإستنيت النتيجة تطلع ،وكنت واثقة فى ربنا إنه هيفرحنى لإنى تعبت ،لما عرفت إنى نجحت قولت لسيف أول واحد لإنه أكتر واحد هيفرح وهيشاركنى فرحتى وأول واحد بيبقى جنبى سواء حزينة أو فرحانة
-مين الشخص القمر اللى كان بيذاكرلى مين؟
-مين؟
-والله!
ضحك -خلاص عرفت

"رأيتك ضوء فى نهاية نفٍق مظلم"