يومًا ما سنلتقى

٤٨

- ميار قومي بسرعة
ديرت وشي الناحية التانية وداريته بالغطاء
شدت الغطاء من عليا واتكلمت بنفس الصوت العالي
- اصصصحااااي
بصيت لشهد بطرف عيني وأخدت المخدة حطيتها على راسي ونمت !
مبحبش حد يصحيني ابدا! ابدا! حتى لو كان الموضوع مهم عمري ما بنتبه ليه، أنا واحدة تحب .....
- الواد سيف جه اللي كان ساكن في آخر الشارع زمان
اتكلمت من غير ما أبصلها - ما ييجي

بييجي جيران وبيمشوا غيرهم ،ايه يعني لما ييجي واحد اسمه سيف؟ كان مين يعني؟ تحصلها حاجة لو سابتني أنام في اليوم الوحيد اللي عندنا أجازة ،حسبي الله في دي صُحبة

- قومييي بسرعة بقولك
- في أكل برا ،روحي كلي
- كراش ابتدائي فكراه؟
على ما أعتقد أيام ابتدائي كنا أطفال بريئة ومفيش كراشات..يعني كان آخرنا نلعب مع بعض بس!لكن كراش وبتاع ا.....ينهار ليكون هو!
رفعت طرف المخدة وبصيت من تحتها
- اللي في بالي صح؟
هزت راسها وضحكت -  صح
- جه فين؟
قومت من على السرير ومشيت للبلكونة وأنا متلخبطة
-هو فين ؟
مسكتني من ياقة القميص وضحكت - اطلعيلهم كده خليه يطفش
-يعني هو برا؟
-اه برا وجاى يخطبك يا ميار ....(ضربتني على راسي وزعقت) -فووقي، بقولك لسه جاى ،الواد لسه جاى طازة النهاردة
-يعني نستخدم قانون تكاتف الجيران؟ والتعاون والصداقة وأودي لأمه طبق رز باللبن وهى ترجعه بقى وبتاع؟
- إنتِ تقريبا مزنوقة في سنة ١٩٩٠ ومخرجتيش منها!
- أنا مبقتش أحبه دلوقتي أصلا!
الله! ما خلاص ابتدائي عدت ونسيت المدرسة وولعت في ذكرياتها ب جاز ،ده أنا حتى كل ما بفتكرها بشم ريحة الجلادات الخضراء بتخنق!

-طب خلصتي فطار وشربتي شاى وهرتب معاكِ البيت
- تعرفي لما بتتكلمي كده ببقى عارفة إننا هنعمل مصيبة ف ها؟
- بصي عليهم من فوق
-من فوق ازاى يعني ؟ هما في الشارع؟

بصت لفوق وإتنفست وغمضت عنيها ، باين أوي إنها بتتخانق معايا جواها

قامت من على الكنبة وشدت إيدي
- في العمارة اللي جنبكم تعالي
لبست الطرحة وبصيت عليهم من الشباك ، بما إنه سكن في العمارة اللي جنبنا بالظبط بس الشقة اللي تحت بتاعتنا يعني ف الرؤية واضحة  واصلا اصلا مش غرضي إني أطلع أبص عليهم ابدا! ده من باب المعرفة بالشئ ، ولا قصدي إني أطلع بالليل ويبقى قاعد في البلكونة وجو عمر الشريف وفاتن حمامة ده
- شهد هو إحنا هنتقابل في البلكونة ونبتسم لبعض فتحصل قصة حب ويخطبني ونتجوز ونعيش في تبات ونبات زى ما عقلي بيقولي؟
مسكتني من شعري - لأ ده إنتِ عايزة تتهزأي مش أكتر ! أنا بقولك بصي بس
بصيت لتحت وابتسمت لإن محدش موجود
- حلوة البلكونة ما شاء الله! خلصنا بقى! سيبيني في حالي
دخلت الأوضة  وقعدت على السرير ، بس المهزأ هيفضل مهزأ طول عمره ولإني مصاحبة مُهزأة دخلت في البلكونة تاني
صفرت وبصت لتحت - اوبااا ،ينهااار طويل وناعم
رميت التليفون على الغطا وبصيتلها - في ايه؟
- الحقي الحقي
أخدت الطرحة من على السرير وحطيتها على شعري
ووقفت جنبها
- ايه في خناقة؟
لفت راسي بإيدها للبلكونة اللي تحت - خناقة ايه بصييييي
ايه البنت دي! بنت يا حيوان إتجوزت وسيبتني؟ نسيت الجلادات اللي بينا؟ اخصصص تتقطع إيدي وقت ما غششتك واجب العربي
- مين دي؟
- دي بنت
ضربتها في كتفها ورفعت حاجبي - أنا أحلى
هزت راسها وضحكت - ترو ترو
- أيوة عايزة ايه ؟عرفنا إن البنت حلوة
-سيبك من البنت وبصي على الدبلة اللي منورة ايدها
-  لأ ويييت كده! إيدها بتنور لوحدها ! ف أبسلوتلي هتنور بال.....نهاره مش فايت لو طلع اللي في بالي صح!
حطت إيدها على كتفي - حبيبي هو إنتِ المعلومة بتوصلك متأخر ولا عندك عجز في نمو العقل؟
كتفت إيدي وسندت على سور البلكونة وضيقت عيني وأنا ببص على إيد البنت - إنتِ متأكدة إن هى دبلة ، أنا حاسة إنه خاتم وهى عايزة تخضني بس
- ادخلي اشربي شاى تاني شكلك مش مركزة ، بصي بصي دي دبلة ،طب والله دبلة
- حسبي الله فيكِ مصاحبة بجعة ، بتصحيني على المصايب
- تفتكري متجوزين؟
- أكيد معاهم ريان ورمانة وراسكي
- ريان؟ ايه الاسم الغريب ده
- استظرفي كتير وهرميكِ من فوق
- ده أنا بهرج معاكِ ،وبعدين إحنا هنسيب الموقف يعدي على كده
وشي احمرّ ومعرفش ليه إتنرفزت
-ايوة عايزة ايه يعني؟
- الكراش راح
- أنا مش فكراه اصلا ! وسعي من طريقي
دخلت من البلكونة وطلعت قعدت على السرير ومسكت التليفون كإني مشغولة فيه
شهد دخلت بعديا وأخدت التليفون من إيدي
-عليا الكلام ده؟
- شهد علفكرة اللي في دماغك مش صح
- طب ايه اللي في دماغي! إلا إذا كنتِ بتفكري فيه
- ياشهد إحنا في جامعة !،كبرنا خلاص عالحركات دي
- تعرفي تسكتي وتسيبيني أنا أتصرف!
شدتني من إيدي وطلعنا البلكونة تاني
- تعالي
- بالله! ما تعملي مصيبة
- عييييب
دخلنا البلكونة تاني ومعرفش ليه مسكت مشبك غسيل
-مسكتِ المشبك ليه ؟
- ششش اقفي هنا وراقبيني
- شهد بالله ما تحدفيه عليها
رفعت إيدها لفوق وهى بتضحك وحدفت المشبك جامد على البنت ، في نفس الوثت في شاب دخل البلكونة والمشبك خبط في راسه هو
-اووبس!
شهد قعدت في الأرض وضحكت جامد وأنا معرفتش أتحرك من مكاني
بصيت عليها وبعدين بصيت عليه وضحكت
رفع راسه وبصلي وقت ما ضحكت ! طبعا لو حلفتله إني مش أنا اللي حدفت المشبك مش هيصدقني
-لا والله! ايه المضحك في كده مش فاهم
- حضرتك المشبك هو اللي نط عليك
(ايه اللي بقوله ده؟ أنا لو قصدي أفهمه إني بلمحله مش هعمل كده! ياشهد الكلب!)
- أقصد هو اللي اتحدف ، أخويا الصغير حدفه
-أخوكِ!
بصيت لشهد وضربتها برجلي -اه أنا هربيه ، أصله مترباش  ،مشفش ساعة رباية
شهد بصتلي ووطت صوتها وضحكت
- ده أنا مش مشوفتش ساعة رباية !، ده أنا مشوفتهاش ثانية واحدة حتى
مسكت مشبك تاني وحدفته وهى في الأرض
وشه احمرّ ورفع حواجبه
- هو في ايه؟
- والله هى
صوته ارتفع وشاور بإيده في الهواء بعصبية
- هى! مش كان أخوكِ من شوية
"استنى بس هقولك ! هوضحلك، الإنسان ليه بيعمل كده في أخوه الإنسان ، أنا هروح أبدل شهد بمروحة من توشيبا عالأقل ليها فايدة"
- هو ايه العبط ده مش فاهم
- طب أهو إنت بقى