يومًا ما سنلتقى

إسكريبت (٤)

-ولا ولا متزعلش يلاا
-ولا! طريقتك فـ إنك تصالحى حد بشعة
-ماخلاص يابو عمو متزعلش بقا الله!
ضحك-يابو عمو! والله حاسس إنى متجوز عبده موته
-ضحكت يبقى مش زعلان،معروفه يعنى!
-أنا مش قولتلك متضحكيش فالشارع بـ صوت؟
-بس أنا مضحكتش بـ صوت عالى يعنى
-ضحكتى بـ صوت ولا مضحكتيش؟
-ضحكت،حصل يا بيه حصل
-بطلى هزار دقيقة،واتكلمى جد
-جد ولا جدة ههه
وقف -أنا قايم من هنا
مسكت إيده وشديته عشان يقعد -إستنى بس اقعد،مش إنت اللي ضحكتنى هه حصل ولا محصلش؟
-حقك عليا،مش مضحكك تانى
-بجد هتنكد عليا! ،وهتعمل جو الأفلام والأكشن ده!
-خيالك أوسع من معدة إبراهيم صحبى
-وترن الجرس وآجى أفتحلك ،تقوم تجرى ورايا بالمنشار وتفلقنى نصين؟!
-أفلقك!ومنشار! ،حسبى الله،نااامي ناامي
-يعنى هتنام زعلان منى،والله اعيط للصبح
-لأ مش زعلان،خلاص نامى
-من قلبك هه
-يابنتى نامى والله مازعلان
-طب متزقش طب
فرش الغطا عليا -نامى عندى شغل
5دقائق و اتكلمت
-بقولك ايه! ..أنا جعانه
صوته كان شبه نايم -كويس قومى كلى وسيبينى أنام
عليت صوتى -مبعرفش آكل لوحدى، متقنعنيش إنك نمت!
حدف المخده عليا -نااامى أو اسكتى
أنام واسكت! ..وكمان ماكلش!،ناقص ايه يا دنيا هتعمليه فيا أكتر من كده!
قعدت انفخ بـ صوت عالى على أساس يصحى يعنى!
يعنى مش هتصحى؟ طاااايب
قومت جبت 5بلالين نفختهم، وفرقعتهم واحدة ورا التانية جنب ودانه
قام فجأه وهو متعصب!
ينهار أبيض،هتفرم؟ ،لا أكيد هترمى من فوق زى سعاد حسنى،آمنت بيك يارب
رجعت بـ ضهرى لـ ورا -مكنتش أقصد أصحيك علفكره
إتقدم خطوتين منى -ماسكة بلالين ودبوس وقريبة منى،بتعملى إيه بيهم؟
(طب إستنى اشرحلك...أشرحله! أشرحله إيه! ،مانا قاصده أصحيه فعلا! )
-ااااا....كنـ...كنت بلعب
مسك إيدى جامد، قربنى ليه وزعق -متهزريش! ،أنا عايز أناام
حاولت أشيل إيده -سيب إيدى طب عشان معيطش،وتصالحنى وأرفض وتصالحنى وتجيب ورد ،اختصر!
-عايزه ايه هه؟!
-جعانه بقولك
مسك إيدى ومشى خطوتين -عايزه تاكلى! ،ماشى يلا جاى معاكى، بس مسمعش نفسك بعد كده
-إنت هتاكل معايا وإنت مكشر؟
لف وبصلى -إنتى هتتشرطى!
-لأ،بستفسر بس
ابتسم -لا إله إلا الله
(يعنى من أول ما اتجوزنى وهو بيستغفر ويستشهد،حد يلاقى كده! ،هو متعصب ليه مش فاهمه،ماكلش يعنى! )
أكلت ودخل نام
الساعة 4الفجر..إيه الزهق ده! أما ادخل اصحى سيف
-سيف،سيف..ولا. اااسييف، إصحى الشغل
طلع راسه من تحت المخده -الساعة كام؟
-الساعة6صباح الخير
-صباح النور (سكت شويه وكمل) -حضرتيلى طقم؟
-اه كويتلك، وعملت شاى بلبن
-مبحبهوش،اعمليلي قهوة
-بس أنا بحبه، جربه مره وهتحبه
ابتسم -وسعى طب
(أخد شور وطلع لبس هدومه)
-هاتيلى الساعة بتاعتى من جوه يا خياره
-هه! ليه؟ ،اشمعنا الساعة! ما بلاااش
-اشمعنا الساعة! ،ما أنا بروح كل يوم بـ ساعة فى ايه؟!
-والنهارده بقولك بلاااش
-هاتى الساعة أو هدخل أجيبها أنا
شبكت إيدى فـ بعض وبربشت -طـ..طيب
مشيت ببطئ لحد الكرسى وجبت الساعة من تحته -اتفضل
-ايه اللي حط الساعة تحت الكرسى؟
-هه! ماا...معرفش
بص ف ـالساعة-الساعه 7دلوقتى بس غريبه الشمس مطلعتش!
مديت صوتى -بتحصل احياااناا عااادى يعنى
-ومالك بتتكلمى كده ليه؟ (ضيق عنيه وكمل) -شامم ريحة مصيبة خارجة منك
برقت وحطيت إيدى على قلبى -أنااااا،ابدا!
-طب شغلى التلفزيون،5دقائق وهنزل تكون الشمس بانت حتى!
رديت بـ سرعة -لأ
-مالك النهارده؟ ،أنا....(قطع كلامه وبصلى،وبعدين كمل) -إنتى. لابسه كده ورايحه فين؟
أخدت نفس ورديت بـ سرعة -بص الساعة 4ونص دلوقتى
-............!
-حلمى اتمشى عالبحر الساعة4ونص أو5،ولو صحيتك وقولت كده هتزعقلى،صح ولا مش صااااح؟
رمى الشنطة من إيده وقرب منى -إنتى لعبتى فـ عقارب الساعة؟
هزيت راسي بـ لا -لأ طبعا،هى وقعت منى،راحت مظبوطه على الساعة 7هعمل ايه؟،مش ذنبى
ابتسم-انا هموت مشلول بسببك
-لا ياعم بعد الشر، هاا هتمشينى عالبحر،ولا مطبخلكش النهارده؟اختر مما بين القوسين
ضحك -لا وعلى ايه،يلا نتمشى
(ما أنت قمراهو! ،اومال بتقلب على بليل ليه يا اخى!)
-هاتلى قهوة
-مش كنتى بتحبى الشاى بلبن!
-وحبيت القهوة دلوقتى،اعترض بقا اعترض
(قعدنا فـ كافيه عالبحر، انا مش هشرب القهوة بس بحب ريحتها،الوقت ده بيبقى الكون كله هادى وجميل،جميل لدرجة إنى بتمنى إن العالم يكون ما بين الساعه2بليل لشروق الشمس،ريحة البحر بالصبح بالقهوة،متتوصفش!،تقريبا هى تتحس وبس! )
-الساعة7دلوقتى،تعالى اروحك البيت عشان الحق أروح الشغل
-طب ما تسيبنى هنا شوية
رفع حاجبه -بت!
قومت ومسكت الشنطة -خلاص قومت
(روحت وهو راح شغله)
رتبت البيت وعملت الغدا، بقيت شيف شربينى ف الأكل،أكيد الأكل حلو،أكيد
اتصلت بـ سيف
-السلام عليكم
-وعليكم السلام،أكلت؟
-اه فطرت
-طب تعرف حصل ايه النهارده فـ سبونج بوب؟
-يا الله ياولى الصابرين،اقفلى بس ولما آجى احكيلى كل اللي عيزاه،أنا فـ الشغل يا خيارتى
-لا مش عايزة اقفل
-اقفلى والله مابهزرش عندى شغل
قفلت وقلدته وهو بيتكلم -عندى شغل،مش فاضى،أنا سايق،ايه ده مبيفضاش ابدا!
اتصلت بـ شهد بس الفون مغلق
اتصلت بـ سيف تانى
-الو يا صاحبى
-يابنتى عنـ....
-شايف سيف زوجى بيعمل ايه؟
حسيته ضحك -ايه؟
-بيقفل معايا من غير ما يعرف حصل ايه فـ سبونج بوب،انا بقوله كده عشان يحكى معايا،كل شويه أنا فـ شغل،أنا فـ مواصلات، يرضيك؟
-لا ميرضينيش
-وبيزعقلى كتير،ملقتش حد اشتكيله منه فـ إتصلت بيك
-أكيد ميقصدش،أنا هكلمه
-طب احكيلك ايه مزعلنى؟
-احكيلى
-تعرف أنا ببقى هاديه بس من جوايا مره قتلاه ومره شنقاه ومره قتلاه بالنبله، متعدش يعنى،..لما بيزعقلى ببقى عايزة اعيط،ولو عيطت مش ببطل،أو مش بلاقى مقطع اقفل بيه المشهد الدرامى ده،فاهمنى؟
-فاهمك
-قوله لما أصحيه وأقوله أنا جعانه ،يقوم ياكل معايا من غير ما يكشر عشان بنام زعلانه منه،يرضيك أزعل يا صاحبى؟
-هو اسف أوي،من كتر الضغوط بيعمل كده
-أنا قولتله لما تزعلك حاجه تيجى تقولهالى،قولتله نقسم كل حاجه مابينا،اعمل ايه تاني؟،عاملى فيها سيف الدين قطز
ضحك -إنتي أكيد هتسامحيه صح
-هسامحه لو شرب شاى بلبن معايا
ضحك بصوت عالى -أكيد هيرضى،سيف ده غبى عشان يزعلك
-فعلا وبارد كمان، بس هو طيب والله،واقفل بقا كفايه كده (سكت شويه وكملت) -اه صح بحبك أوى يا صاحبى
-وصاحبك ملهوش غيرك
(هو قالى مشاكلنا متخرجش بينا،مبشتكيش منه غير ليه،وعمره ما خذلنى ابدا!)
بعد ساعتين سمعت باب الشقة اتقفل،جريت مسكت كتاب وقعدت عالكنبة،على أساس مشغوله يعنى!
إتقدم، وقعد جنبى،بصيت بـ طرف عينى،لقيته بيضحك وماسك بوكيه ورد أبيض
هضعف أنا كده يعنى؟،هضعف؟ والله هضعف فعلا!
-أنا اسف،سيف صاحبك كلمنى وقالى إنك زعلانه
ابتسمت -وقالك إيه كمان
-بس،مقالش حاجه تانى
-اممممممم،بس بس،متأكد؟
-حاجه زى كده
-طب أجهز الغدا دلوقتى؟
-هاخد شور وأغير هدومى،وآجى أحضره معاكى
ابتسمت -ماشى
مشى خطوتين ورجع تانى -زعلانه؟
-لأ
-من قلبك؟
-مش زعلانه خلاص والله
حطيت الأكل عـ السفرة و اكلنا
-ما تشغلى التلفزيون
-ماشى اجيب قناة إيه؟
-الساعة6 دلوقتى،سبونج بوب أكيد اشتغل
بصيت بطرف عينى -دى الحلقة المعادة
-ما أنا عايز أعرف حصل ايه الصبح!
ضحكت وسكت،والله حلو ومسمسم فعلا لما بتبقى هادى،حماتى مكذبتش لأ
شويه ودخل نام،سهرت أنا اقرأ فـ الكتب
الساعة4 الفجر! طب أدخل اصحيه؟ ،ويزعل زي المرة اللي فاتت! ،هدخل أنام أحسن
-ايه ده !انت لابس كده ورايح على فين دلوقتى
-اتمشى عالبحر
رفعت حواجبى وتنحت.........!
-لا مبتحلميش والله، روحى البسي
لبست ونزلنا اتمشينا عالبحر
-الساعة دلوقتى7،يلا نروح
-خلينا قاعدين يا خيارة،هتتقمصى شخصيتى ولا ايه؟ هنقطع على شغل بعض!
ضحكت -قوم قوم
روحنا البيت، غيرت هدومى وعملت قهوة للمرة الأولى وخرجت،كان واقف فـ البلكونة، ساند عالسور وماسك كوبايه(المج المفضل عنده )
وقفت جنبه -ايه اللي فـ إيدك ده؟
ابتسم -شاى بلبن حبيته،وايه اللي فـ إيدك ده؟
-قهوة حبيتها!
______________________________________