-ميار في رسالة عشانك
" واحد ..إثنين..ثلاثة..أربعة..خمسة
وقت ما بتوتر أو بخاف بغمض عيني وبعد لحد خمسة ، معرفش ليه الرقم ده بالذات بس بحس إن الحياة بتمشي على ٤قواعد لو مشينا بيهم هنرتاح وهناخد هدية خامسة عليهم ..بفكر نفسي إن اللي هيحصلّي سواء خير أو لأ ف هيعدي زى أى وقت عدى "
شهد شاورت بإيدها قدام عيني -ميار!
-هاتي الجواب
- إنتِ بخي....
هزيت راسي ب أيوة ومديت إيدي آخد الجواب
- بخير
" واحد .. أنا بخير طول ما بتنفس ، وطول ما أنا صندوق أسراري ومحدش يقدر يمسك كلمة عليا ، ماشي أنا مش بخير دلوقتي؟ شوية وهبقى بخير ،هعرف أرجع لنفسي تاني مع الوقت زى كل مرة"
فتحت الرسالة
" الحبّ هو اللعبة الوحيدة التي يشترك فيها اثنان، يكسبان فيها معاً، أو يخسران معاً." ل/ قائله
(ضحكت بسخرية ورميت الجواب في الدُرج مع باقي الجوابات اللي بتجيلي من وقت ما جيت أشتغل مع شهد في محل الورد بتاعها
أنا خسرت وهو لأ ، أنا اتطلقت و اتحولت لشخص تاني وهو لسه زى ما هو ..هو مخسرش أى حاجة .)
- برفيوم النعناع اللي على الجوابات ده حلو اوي يا ميار
- اه
- والكلام حلو
- قرأتيه؟
-لا.
ابتسمت - في حاجة صح؟
قربت مني واترددت قبل ما تقول
- يوسف خطب.
ضحكت - مبيضيعش وقت .
سندت الورد على جنب وبصتلي
- بتضحكي على ايه؟
" إثنين .. لو محولتش المشكلة لنكتة ف هموت من الحزن على نفسي ، الحياة مجرد نكتة ، لو مضحكتش وعديت ف الزمن هيدوس عليا وهصحى ومفيش حاجة هتتغير "
روحت البيت وأنا مضطرة ارسم ابتسامة بايخة على وشي لكل اللي أقابله ، لو ضحكت ف هيقولوا شوف المطلقة بتضحك ازاى ومش شايلة هم اللي حصلها ..هزعل هيقولوا شوف عملت ايه في نفسها؟
و المفروض كانت تستنى شوية ، مفروض تستحمل وتكمل معاه هى مش آخر ولا أول واحدة زعلت من زوجها شوية ، ما الناس كلها كده ..لحظة! يعني ايه مفروض؟ مين اللي فرضه اصلا؟ ومعنى إن الناس كلها غلط ف أمشي أنا وراهم عشان أتجنب كلامهم؟
" ثلاثة ، متاخدش بكلام الناس ..هتمشي معاهم هيتكلموا عليك ، هتمشي عكسهم هيتكلموا عليك ف أفضلك امشي زى ما تحب طول ما إنت ماشي صح! افشل وحاول وافشل تاني ميهمكش في الآخر إنت اللي هتتحاسب مش هما"
قعدت في البلكونة وبصيت على البلكونة اللي قدامنا ..ساكن فيها راجل عجوز وزوجته ، بيقعدوا في الوقت ده يشربوا شاى وبيضحكوا ، ولإني بعيد عنهم معرفش بيضحكوا على ايه ، بستريح وقت ما بشوف الضحكة بتنور وشوشهم
تليفوني عمل صوت على الترابيزة اللي جنبي ف عرفت إن جاتلي رسالة ، مسكت التليفون وفتحته ،غريبة إن رسالة تجيلي من رقم مجهول..أنا مش بدي رقمي لحد اصلا!
" الإنسان مش مضطر يبقى جامد طول الوقت ويمثل إنه بخير ، الحياة مش معركة ، امسكِ الفرشاة ولونيها زى ما تحبي هتلاقيها أبسط بكتير مما تتخيلي"
أنت تقرأ
يومًا ما سنلتقى
Short Storyقصص قصيرة متنوعة بالعامية المصرية ،بها مزيج من الخيال والواقع والحزن والسعادة ، ربما ستتضارب مشاعرك و أنت تقرأ ، ولكن فى النهاية ستعرف السعادة طريقها لقلبك ..
