يومًا ما سنلتقى

اسكريبت (١٢)

-فاكر يا محمد لما قولتلى بعد الجواز هنخربها خروجات؟
-مش دلوقتى بعدين
-إحنا فى البعدين دلوقتى!
-بكره
-بقالى سنه مستنيه بكره ده
-أنا نازل أقعد مع صحابى أفضل
-إنت عارف كويس قوانين وعقوبة إنك تقعد مع صحابك؟
هز راسه ب(أيوه) - نكد أسبوع ومفيش بطاطس محمرة ولا فشار
رفعت حواجبى -يعنى إنت عارف ده كله ومتراجعتش فقرارك؟
-هجيب  أكل من بره
-ماشاء الله صحابك مقويين قلبك
ضحك -سلام
لحظه!ده نزل وسابنى فعلًا،اه ما هو اللى تهون عليه البطاطس المحمره تهون عليه أى حاجه
بعد ساعة سمعت باب الشقة إتقفل
ضحكت وناديت بصوت عالى -محمااااا تعالالى
وقف قدامى وضيق عنيه -بتضحكى يبقى عاملة مصيبة
-مصيبة !وأنا! عيب الكلام ده عيب،يلا سيب الفون وشمّر وتعالى ساعد معايا
-بتعملى إيه؟
-لقيت الشقة متكركبة فقولت أرتبها
-إيه القماش الجينز الكتير ده؟
بصيت للقماش و بصيتله وبربشت- ده بنطلونك ياحبيبى
-نعم!
-أنا قولت أعمل ست بيت شاطره وأقصه مربعات،نسند عليه كوبايات الشاى  عالأطباق،بدل ماهى بتعلِّم فالطبق
-ااه،وأكيد اللى فالجردل هناك ده (سكت شوية وكمل )- أوعى يكون اللى فبالى !
ضحكت وهزيت راسى -هو يا محمااا،هو قميصك الجديد
-قميصى يتحط فجردل؟
-هفهمك؛قميصك قطن وبيمسح كويس، والصراحة الله أكبر عليك ف تنقية الخامات ياولاا يا محماا
-القميص والبنطلون عشان نزلت مع صحابى ومخرجتكيش!
-لأ وفى كمان جاكيت البدلة ،قصيت كمامة عشان أمسك بيها الكيك لما يخرج مالفرن،يرضيك أتلسع يعنى؟
-والبلوفر الأسود ! بالله عليكى اوعى تكونى عملتى فيه حاجه!
-لأ ماأنا مش قليلة الزوق بردو عشان أبوظلك البلوفر الإسود ،فأخدت الأبيض
-عشان بتلبسيه معايا؟
-حياة الأسرة مشاركة متبقاش قفوش كده
إتقدم منى -حياة الأسرة مشاركة!اااه قولتيلى بقى
جريت وقفلت باب الأوضة
وقفت ورا الباب -قولتلك متاخدش المواضيع على قلبك
خبط -إفتحى الباب
-فى بدلة كاملة جوه ،ف لو عايز تنزل مع صحابك وتسيبنى هنا لوحدى قولى عشان فى أوضة جوه عايزة تترتب
مردش عليا
لزقت ودنى فالباب وناديت عليه تانى -محمااا إنت واقف؟
نص ساعة وباب الأوضة خبط -إطلعى إعمليلى أكل جعان
-مش كنت عامل نفسك أسد وهتشترى أكل من بره
-بما إنك مش راضية تعمليلى أكل،فى مليون واحدة......
فتحت الباب بسرعة -مليون واحدة إيه وأنا موجودة!
مسكنى من ياقة التيشيرت -أنا يتعمل من قميصى زعافة!
-مسّاحة لو سمحت،عملت منه مسّاحة،وبعدين كنت بضحك معاك هيخوهيخو
رجع خطوتين ل ورا وضحك -فاكرة فستانك الأسود المنقط؟
-اه فا......(برقت )-وغلاوة مامتك إوعى تكون عملت حاجة
-عملته مفرش للترابيزة بره عشان تفضل نضيفة لما ناكل عليها ، وعشان تعرفى إنى مش زعلان منك ، حضرت أنا الأكل
قعدت عالكرسى جنب الترابيزة وعيطت -ليه كده؟
-بتعيطى ليه دلوقتى؟
-حرام عليك
-مش اد الهزار متهزريش مالأول
زعقت -طب ما تاكلش عليه بقى عشان هاخده عند الخياط أعمل منه أى حاجة
ضحك -هجيبلك واحد غيره
-متهزرش عشان عفاريت الدنيا بتتنطط قدامى دلوقتى
-فى عفريت فالأوضة جوه
-أهو أحسن مالعفريت اللى قاعدة معاه
دخلت وقفلت الأوضة وقعدت عالسرير
-ال عفريت ال،فاكرنى هخاف وهضعف !هه بيحلم
نور الأوضة إشتغل وطفى لوحده فجريت عنده عالأوضة
ضحك -غيرتى رأيك
-هه!...ااا...لأ أنا عارفة إنك بتخاف تنام لوحدك فحرام يعنى
-اللمبة بايظة هصلحها الصبح بهزر معاكى،عشان عارفك هبله وبتصدقى أى حاجه
-علفكره أنا هنام عالكنبة أصلًا ماشى!
-براحتك
حاولت انام عالكنبة معرفتش
إتكلمت تانى -طب بص بقى!أنا هنام عالسرير وهحط مخدة بينا تمام؟وإياااك ..إياك تفكر تعدى الجزء بتاعك
ابتسم -طيب
قعدت شوية وبعدين قومت -إصحااالى بقى كده
زعق -اييه؟
-متزعقش وإسمع
إتنهد -خير؟
-فاكر لما كنا مخطوبين وقولتلى إنك متعرفش بنات؟
-أنا معرفش غيرك فعلًا
-لا ياحبيبى لأ،فى بنت إسمها آيات عملت لاف على صورتك من ٣سنين ،شهر يناير ،يوم ١٧،الساعة ٣العصر فاكر؟
-إنتى شغاله مع المخابرات !وبعدين إنتى لو مش عايشه معايا كل يوم كنت نسيت إسمك،عيزانى أفتكر من٣سنين؟
-كل ده ميلزمنيش،رد على سؤالى
-أقسم بالله ما أعرفها
-طب بص بقى!متحاولش تروح بعينك كده ولا كده عشان هعرف وهجيبك،اه يا حبيبى هعرف وليا مصادرى الخاصة
ضحك -تصبحى عل  خير
-وإنت من أهله
نمت وصحيت على صوت المنبه،صحيته وصلينا الفجر
-هتيجى النهاردة الساعة كام؟
-مش عارف
-ماشى
قفل باب الشقة ومشى
رتبت البيت وعملت كيك،هروحله الشغل  ونروح مع بعض وأهو يجيبلى فستان منقط
دخلت من باب المكتب ورجعت بسرعة لما لقيت بنت بتتعامل معاه بطريقه مقرفه،بتخونى يا محمااا!نهارك أبيض
روحت بسرعة البيت،قفلت باب الشقة وقعدت عالكنبة
-لأ ماهو أنا مكنتش لازم أمشى،كنت طبيت عليهم وطلعت مسدس من شنطتى وقتلتهم
وقفت -بس آخر مسدس مسكته كان مسدس خرز
قعدت -كنت أصوت وأعمل فضيحة!
وقفت -بس كده المكتب هيتقفل
ثانية!ما بتقفل وأنا مالى،حصلت يخونى!ومع دى!ده صاحبه أدهم أحلى منها
سمعت باب الشقة إتفتح،إهدى،إتصرفى طبيعى
قعد جنبى -إنتى هادية كده ليه؟
-شوفت جارتنا! جوزها بيخونها ومعرفتش إلا النهاردة
-مين دى؟
-مش لازم تعرف إسمها
-طب خانها ليه؟
-عشان معندهوش دم،حلوف،أصل الرجالة بيجرى فدمها الخيانة
-وبتتكلمى بحُرقة كده ليه؟
-كلكم مصطفى أبو حجر
-يابنتى مالك؟
زعقت -متشغلش بالك
أسبوع مبهزرش معاه ولا بنتكلم كتير ولا بنسهر زى كل يوم،مستنياه يقولى ويعترفلى بغلطه وأنا والله هسامحه
وقفت قدامه -أعملك قهوة ولا هتنزل الشغل؟
-أُقعدى
قعدت جنبه -ها؟
-إتغيرتى ليه؟
-عادى،هى دى أنا إن كان عاجبك
-لأ ماهو أنا زهقت،دى مش عيشة!مبقيتيش تضحكى ولا تتكلمى معايا زى الأول،بقيتى مملة
-شوف إنت عملت إيه وصلنى لكده
-يعنى إنتى مش هتقولى مالك؟
-تؤ
وقف -سلام
أنا مملة!أكتر حاجة بكرها هى الخيانة والكذب،ممكن أسامح على أى حاجة إلا الحاجتين دول،ماهو ممكن يكون بهدلها بعد ما مشيت ،لأ مش ممكن ...ده أكيد،ماهو مكنش لازم أنكد عليه بردو!هروحله الشغل أصالحه
روحتله الشغل ،بصيت من طرف باب المكتب، لقيتها واقفة جنبه،حطت قدامه ورق ومسكت إيده،إتنفض وشال إيده بسرعة!ينهااار!دى بتمسك إيده عادى وهو متجوز!،روحت البيت وأنا بعيط،لميت هدومى وروحت عند ماما ؛شهرين قاعدة مع أمى لا بكلمه ولابرد عليه لما بيتصل،رغم إنه حاول يرجعلى كتير بس فكل مرة بصمم عالطلاق
-بتعيطى ليه دلوقتى؟
-أصل أنا خارجه من فرح يا أمى فبعيط من جماله
-أكيد لسانك الطويل ده السبب فإنكم تزعلوا من بعض
-لأ هو خاين أنا حكيتلك
-طب لما مسكت إيده هو عمل ايه؟
-وقف وبعد عنها
-طب ولما إتكلمت معاه ،رد عليها؟
-كان ناقص يرد عشان أقتله وأقتلها
-يبقى بيخونك إزاى؟
-لإن دى مش أول مرة،قبل كده كنا واقفين فالبلكونة وتخيلته وهو بيضحك لجارتنا وهى بتضحكله
-تخيلتيه؟
-إحساسى بيقولى كده
-وإنتى اللى مش عايزة تكملى معاه!ده ليه الجنة والله؛خلى غيرتك ليها حدودو بلاش تفلت منك عشان ميزهقش وتنكدى عالراجل بدون سبب
مسحت دموعى -أنا هلم هدومى وأروح بيتى
ضربت كف بكف -لا حول ولا قوة إلا بالله
-لأ ما أنا مش هسيبه يتجوزها فالشقة،أكيد خاربها خروجات هو وهى
-الله يهديكى وتعقلى
لميت هدومى وروحت البيت، كنت عارفة إن الوقت ده هو بيبقى نازل الشغل فيه
فتحت الشقة لقيته ف وشى ،رفع حواجبه وتنح -إنتى بجد؟
شهقت والشنطة وقعت منى -نازل الشغل من غير ماتسرح شعرك!
-يبقى إنتى فعلا
قربت منه -ومش حاطط البرفيوم اللى بحبه
-وحشتينى
-أنا قاعدة فبيت ماما بقالى قرن وإنت مكلمتنيش؟
-أنا اللى كنت بكلمك
-اه بس مكنتش بترد
-إنتى اللى مش بتردى
-ماشى أنا مردتش ،إنت متصلتش تانى ليه؟
-يابنتى ماأنا بكلمك كل يوم
-ما إنت محاولتش تتصل بيا كل يوم بدل المرة إتنين
-ما إنتى مبترديش
-مجيتش تحت البيت تغنيلى (طلى من الشباك) ليه؟أحسن منى فإيه البت اللى جوزها غنالها (طلى من الشباك)؟كان زمانى حارقة دم جارتنا بنت طنط أم سماح
-إنتى اللى قولتى مش عايزة تشوفينى ومصممة عالطلاق
-ولو ولو،أنا كنت تعبانة وإنت مسألتش عليا
-أنا كل ثانية بتعدى عليا من غيرك كإنها سنة
-طب ماأنا عارفة إنى أتحب والمكان من غيرى وحش
-وحشتينى
-إستنى بقى خلينى أكمل الخناقة عشان كلمة حلوة كمان والخناقة هتتفركش والله
إبتسم -قولى
-الغندورة اللى كلمتنى من فونك وقالتلى إنها خطيبتك وإنك مسمينى عالفوت(بلحة )،أنا تسمينى بلحة أنا؟
ضحك -بلحة!مين ده؟
نفخت -محماااااا،متستفزنيش (إتعليت على أطراف صوابعى وشاورت بصوابعى قدام عينيه)-وعلفكره بقى يا بابا أنا جايه هنا لسببين،السبب الأول هو..... (سكت)
ضحك -طب السبب الثانى؟
-متلخبطنيش
-طب نرجع تانى ل ورا،السبب الأول؟
-إن بكره عيد جوازنا،ومش هسيبك تتهنى معاها،ماشى؟
-إنتى جيتى عشان عيد جوازنا ونرجع لبعض!يااه على طيبتك
-محماااا،إستنى عندك وإرجع ل ورا لسه مقولتش السبب التانى
-ها؟
-السبب الثانى (إبتسمت )-الدكتورة قالتلى إنى حامل
رفع حواجبه ومردش
شاورت بإيدى قدام عينه -محمد
مردش فإتكلمت تانى -يامحمااااا
-نعم؟
-أنا حامل
-إحلفى
-اه والله
نط عالأرض مالفرحة  -أنا مش مصدق والله،هبقى اب؟
-لأ أنا مرجعتش عشان هتبقى أب ولا الجو الأُسرى ده لأ،أنت رجعت عشان الشقة من حق الزوجة وهجيب بيبى وهبقى حاضنة،يعتى بص كده لا هينفع تتجوز ولا تتخطب فالشقة دى،فجيت أكتم على نفسك وأقولك الأخبار دى
-طب تمام هاخد هدو........
-وأكيد الزوجة مش هتقعد لوحدها فالشقة فلازم الزوج يقعد معاها،ودى مش قوانين من إختراعى مثلا تؤ تؤ خالص؛ فاهمنى ؟
ضحك بصوت عالى
-بتضحك على ايه؟
-عشان بحبك
-لأ متثبتنيش
-وحشتك صح؟
-أنا؟
-قفشتك حبك بان
-ولااا!إثبت مكانك كده وإتلم أحسنلك،إحنا متصالحناش
-بصى!إنتى عارفة إن المكتب مفهوش غيرى أنا وأدهم و(سكت شوية وضحك)
-أنا مش شايفه حاجه بتضحك بصراحة
-هى سردينة
-مين سردينة؟
-بت معانا فالمكتب فارضة نفسها عاللى رايح واللى جاى
-إقفل المكتب
-ونقعد نشحت أنا وإنتى؟
-طب هتعمل إيه؟
-همشيها من المكتب
-اه مشيها وإسحلها من شعرها وإفقع عينيها بالشوكة
-إبقى فكرينى ألغى قناة mbcأكشن من التليفزيون
-هااا؟
-والله هطردها وهاخدك معايا كمان
-ماشى موافقة
-طب ما إيه بقى؟
-ماشى مسمحاك ولكن إيااك،إياااك ألمح بنت قريبة منك .
تانى يوم طردها وجاب بدالها واحد راجل،كان نفسى يفقع عينيها بشوكة بس يلا مشمهم
-محمد هو إنت ممكن تخونى تانى؟(مستنتهوش يرد وإتكلمت تانى )-لأ ده أنا هجيلك المكتب علاطول
-اللى معايا فالمكتب كلهم رجالة إتلمى،وبعدين أنا عمرى ماأخونك بطلى التفكير ده
-عملتلك كيك عالترابيزة هناك  روح قطعها
مشى خطوتين ورجع تانى -حطالى فيها صاروخ؟
ضحكت -لأ هى كانت مرة واحدة وخلاص،وبعدين إحنا إتفقنا إمبارح مفيش مقالب بايخة تانى
-إتغيرتى أهو وبقيتى عاقلة
-حبيبى أنا طول عمرى عاقلة وحكيمة (سكت شوية وصرخت)-تعاالاااالى
وقف قدامى بسرعة -فى ايه؟
-مين أميرة أحمد اللى عملالك لاف على صورتك إمبارح؟
رفع حاجبه -دى خالتى
إبتسمت -هه!ااااا.....ماأنا قولت كده بردو بس حبيت أتأكد،يلا روح قطعها
بعد شوية سمعت صوت الصاروخ فرقع،جريت وقفت قدامه وأنا بضحك
بصلى وكان وشه مليان شوكلاتة -تانى؟
-ياااااس
ضحك -كنت شايل هم إنى أقولك العصير وقع عالتيشيرت بتاعك ومش راضى يطلع
-متهزرش!
غمز بعينه -سابقك بخطوة دايما
-طب نتكلم جد شوية !
-فى ايه؟
-أقولك على سر خطير؟
-قولى
قربت منه وضيقت عنيا -أنا اللى قتلت موفاسااا
-مفيش أمل إنك تعقلى صح
-تؤ
ضحك- نهائى؟
ضحكت -نهائى
"رأيتكَ ضوء فى نهاية نفقٍ مظلم"