يومًا ما سنلتقى

٧٨

- مكنتش صدفة وقت ما حلمت بيك وقابلتك

سمعتوا عن حد حلم بشخص ميعرفهوش وقابله بعدها بيوم؟
طب حد مشى ورا حلمه؟ مش الحلم اللي بنسعى عشان نحققه ده لأ ، الحلم اللي بنشوفه بعد ما ننام؟ من شهرين بالظبط وأنا بحلم حلم متكرر ..طيارة مكتوب عليها "٢١٢" وورقة نتيجة بتاريخ" ١١/٧ " وساعة عقاربها واقفة عند رقم "٢"
نمت وحلمت نفس الحلم بس بإختلاف إن الطيارة هبطت في المطار ولمست الأرض ، وشخص واحد بس نزل منها
صحيت على صوت الرعد ، الدنيا كانت بتشتي جامد في اليوم ده ، بصيت في الساعة كانت "١:١٣" بعد نص الليل ،أنا عمري ما صحيت في الوقت ده ! حتى ملحقتش أنام إلا ساعتين بس ، يمكن......( قومت من على السرير بسرعة وقت ما افتكرت الحلم ، بصيت في النتيجة كانت ١١/٧ !! كنت بقول لشهد صاحبتي إن  هتحصل حاجة في حياتي هتغير ملامحها ، هتنورلي حياتي من تاني بعد الضلمة اللي عايشة جواها سنين)

اتصلت بشهد بس مردتش ف غيرت هدومي وأخدت الجاكيت ووصلت لحد باب الشقة بعد ما اتأكدت إن تيتا نايمة ومش هتحس بغيابي
بصيت للباب والجاكيت اللي على إيدي وهمست :
- ايه اللي بفكر فيه ده؟ أنا رايحة فين؟

رجعت خطوتين : - أكيد مش هنزل ، مش هروح المطار دلوقتي يعني! حلم ايه وهبل ايه؟

اتقدمت خطوة تاني من الباب : - لأ هروح ..مش طبيعي إني أحلم بالتاريخ ده قبله بشهرين

غمضت عيني وضغطت بإيدي على الجاكيت  "مش مهم حد يصدقك ، صدقي نفسك وامشي ورا حلمك"

فتحت الباب وأخدت الشمسية ونزلت قبل ما اتردد تاني وأرجع في كلامي، معرفش ليه ضبطت المنبه على الساعة "٢" و بعت رسالة لشهد لإنها الوحيدة اللي حكيتلها الحلم
" أنا نزلت من البيت ورايحة على المطار ، مش صدفة إني أحلم نفس الحلم شهرين كاملين مش كده؟"

وقت ما وصلت المطار ، كان في طيارة ماشية على الأرض كإنها لسه نازلة من الجو ، منبه التليفون رن في اللحظة اللي الطيارة لفت فيها ووقفت مكانها ، قربت شوية من السور وضيقت عيني لإن اللي مكتوب عليها مكنش ظاهر من الشتا والضلمة ، في اللحظة اللي البرق نور في السما شوفت اللي مكتوب عليها بوضوح ، دي..دي  مكتوب عليها "٢١٢"!!!
غمضت عيني وفتحتها تاني ، أنا مش بيتهيألي صح؟ أنا واعية وشايفة الرقم كويس ..الساعة ٢ دلوقتي زي الحلم بالظبط ! فكرت إني أجري بسرعة لجوا المطار عشان كنت واقفة برا وشايفة الطيارة من ورا  السور
معرفتش أجري ولا أحرك رجلي ، إيدي كانت بتترعش ورجلي ثابتة على الأرض كإنها جزء منها !
مسكت الشمسية بإيد وحطيت إيدي التانية على قلبي عشان أهدى
- اهدي  ، اهدي متهربيش ، مفيش حاجة تخوف

غمضت عيني وحاولت أتنفس بهدوء ، منكرش إني خايفة ، مرعوبة كمان ! كنت فاكرة إن وقت ما الحلم هيتحقق هفرح ، هجري في الشارع وأقول للناس كلها إن حلمي اتحقق ، معرفش ليه خوفت؟
مشيت ببطئ لباب المطار ، محدش كان موجود لا حد طالع ولا داخل ، الباب اتفتح وخرج منه شخص واحد بس..ده..هو!! هو اللي شوفته في حلم امبارح ، البلوفر الاسود والشال اللي لافه على رقبته ، والجاكيت وشنطة السفر
مع كل خطوة كانت بيتقدمها ناحيتي كنت بفكر أصرخ أو أجري أو أنادي حد ، والغريب إني وقفت مكاني مستنياه يتكلم ، يشاور ، أو يعمل أى حاجة..هي الناس اللي حلمها بيتحقق بتبقى حاسة زيي كده؟
وقف قدامي وابتسم - اهلًا