يومًا ما سنلتقى

٤٥

- شايف الطرحة الكاشمير اللي جوا دي ياسيف ؟
ضيق عينيه وقرب من المحل أكتر وشاور بإيده
- تقصدي اللي لونها بمبي دي!
(بصيتله بطرف عيني ، أخطاء زى كده مينفعش يخطأ فيها ! ده مبيعرفش يفرق بين الألوان وهو ابن عمي! اخص على صلة القرابة ايييخص)
-  اولا اسمه بينك ، ثانيا ده كشمير
سكت دقيقة يستوعب وهز راسه ب ماشي
- مختلفناش
حطيتله الفلوس في ايده وشاورت عالمحل
- ادخل قولها مش هاخد الطرحة غير ب ٣٥ وقولها وإنت محموق كده وبعدين يعني هى هتنزلك فيها
- والطرحة اصلها بكام
- ب ٥٠ جنيه
- انتي بتّاجري بيا؟
رديت بتلقائية - اه
- هدخل اجيبلك الطرحة تدري ليش؟ لإنك ما كذبتي
( إنسان غريب ، يعني لو متاجرتش ب ابن عمي هتاجر بمين؟أروح أجيب حد من الشارع يعني؟ خلاص انعدمت أخلاقنا )
طلع بره المحل وهو رافع كيس صغير في الهوا وبيضحك
سقفت بإيدي لفوق وضحكت - جيبتها صح؟
نزل الكيس ومدلي إيده بيه
- لا معجبتنيش ف جيبت واحدة غيرها
الابتسامة اللي على وشي اختفت ورفعت حواجبي
- بتهزر!
- لا والله شكلها وحش ف جيبت غيرها
أخذت من ايده الكيس وبصيت فيه - كحلي!
- اه غامق كده وكئيب و........
- حلو أنا هروح أقول لبابا وآخد تمن الطرحة الكاشمير ويبقى معايا طرحتين جداد
- لا استني نرجعها
- تؤ تؤ  عجبتني خلاص
( أنا عمري عمررري ما فكرت أستغل الناس اللي حواليا ابدا ، الأفكار السوداوية دي معرفلهاش طريق مطلقاا)

(روحت نمت لإن مفروض عندنا محاضرة مبنحضرهاش الساعة ٧ ، أهم حاجة الانضباط في المواعيد )
صحيت قبل الساعة ٦ بشوية وصليت الفجر واتصلت بيه ، بس تليفونه مشغول
( تليفونه مشغول الساعة٥؟  أكيد اتجوز من ورانا ...اتجوز من ورانا ومعاه مجدي ومكة )
لبست ونزلت لما رن عليا
اتقدم منى أول ما شافني وابتسم
- صباح الخير
كتفت ايدي قدامي ورفعت حواجبي - اتصلت بيك الساعة ٥ عشان مفروض تصحى للزفت الجامعة ، تليفونك الساعة٥ مشغول لييييه؟ إنت ارتبطت من ورانا يالا!
- ارتبطت ايه ما تقعدي على جنب بقى!
- كنت بتعمل ايه؟
-  بكلم صاحبي
وقفت وعليت صوتي - بتكلم صاحبك الساعة ٥! بقية الساعات قصرت معاك في حاجة! وعلى كده حددت إنت وصاحبك ميعاد الخطوبة؟
- صاحبي هه صاحبي فوقي !
- مش فارقة اصلا اصلا
- ايه النكد ده عالصبح ، وبعدين افرض يعني افرض بكلم بنت افرض ايه فيها يعني
- ده أنا أقتلك
- الله! مش عشان تفرحوا بيا وبعدين كلنا إخوات يعني
- وأنا هروح أكلم شباب من الجامعة وكلنا إخوة بردو
- عشان أبوكي ي....لا ونوصل الأمور للحج ليه ، ممشيني معاكي كيس جوافة! ما تتعدلي عالصبح

عليت صوتي - متعليش صوتك عليا عشان هتخانق.
زعق وشاور بإيده في الهوا - انتي اللي بتزعقي

سكت دقيقة وبعدين مشيت وأنا بتكلم
- محدش يمشي مع التاني ، كل واحد يروح ويرجع مع نفسه حتى تعرف تكلم صاحبك وأنا أكلم صحابي
- ياريت

( ياريت! روح الهي....الهي تتجوزني
مش عمايل ولاد عم دي لأ ! هو ماله أخد الكلام على قلبه ليه؟ هو أنا هحضر المحاضرة الأولى بجد ومش هنهرب منها ونروح نفطر شاورما؟ ولا ولا استنى يالا أنا كنت بهزر  )