يومًا ما سنلتقى

(٣٤)

-أحمد، إفتح كده الأكونت بتاعها وشوفه عاملها ريأكت ولا كومنت ولا بيهزر معاها ولا....
- ما تفتحيه انتي !
-ما أنا عملالها بلوك
- دي بنت خالته ف طبيعي هيكون عندها و...
- ولو ولو ؛ لازم أشوف
- ما أنا مش كل مرة أتهزأ منه يا ميار !
- يعني عايز تتهزأ مني؟
- أنا مش عارف هلاقي اللي يحترمني فى البيت ده امتى؟
- بص يا أحمد ، مش إحنا كتبنا كتب الكتاب وخلاص بقى جوزي؟
-حصل وأنا شاهد على الكلام ده
-يبقى لا يكلم بنات ولا البنات تكلمه ، ولا يعمل ريأكت عند البنات ولا البنات ترأكته
-ايه ترأكته دي؟
- من الريأكت ، متدققش فى الكلام
- ما علينا ،كملي
-أنا هصاحبه
- تصاحبيه ايه! وهو بيلعب معاكي فى الشارع
-شششش إشعرفك إنت
-تعرفى يابت ميار؟
-ايه؟
-سيف كان بيتكلم عنك ا.....
-ايه؟ كلمك عنى أنا؟ قال ايه هه قال ايه؟ أنا مش مهم عندى أعرف قال ايه أصلا
- والله!
- بتبصلى كده ليه ، لا أنا مش عاوزة اعرف أصلا ..اصلا.. مش عاوزة أعرف اه ،قولي كده هو قال ايه؟
-كان عايزك تروحي معاه الفرح النهاردة
- ما كلنا رايحين ، بس مش معاه هو ،خليه يروح وحيد كده ويعرف قيمتي
سيف خبط عالباب ودخل ودخلت وراه شهد
-خبيرة تدمير اللحظات السعيدة موجودة؟
-ايه يالا الغتاتة دي؟ ده إنت ثقيل
شاور بإيده لأحمد وشهد عشان يطلعوا وبعدين بصلي
-زعلانة ليه دلوقتي؟
- ما مش كل ما تيجي بنت خالتك دي  تفضل طول اليوم معاها ،وضحك وهزار ، وأنا أفضل أتفرج عليكم
-ما تيجي تقعدي معانا ! هي أصلا مش بتيجي غير يومين في السنة وبعدين دي زى أختي ،متربية معايا
-طب إبقى خليها تروح معاك بكره
- بس أنا عايزك انتي
-وأنا مش هروح معاك مش حوار يعني
-براحتك
براحتي ايه بس ! لوتفي إستني يا لوتفي
أحمد وشهد راحو الفرح قبلي وأنا روحت متأخر شوية
أنا مش هزعل لو راح معاها عادي ولا هتفاجئ أصلا أيا كان الوضع،  لا ههتم ولا هتفا... ينهااار إييسوييييد قاعد عالكرسي اللي جنبها!
إهدي ،إهدي متتعصبيش متعيطيش ،إوعي تنفعلي
سمعت صوت أحمد جنبي- انتي بتكلمي نفسك؟
شاورت على سيف وزعقت -أخوك برج الثور اللي مشفش ربع  ساعة تربية ده قاعد عالكرسي اللي جنبها يا أحمد...يلاهوي ياأحمد ده بيضحك معاها !
-تعالى نقعد
مسك إيدي وقعدنا على الترابيزة اللي جنبهم
- كلي ،وبينيله إنك مش غيرانة
بصيت عليهم وضربت بإيدي على الترابيزة ومردتش- .......!
-يابت
-أحمد والله هعيط ، أنا أبقى مهزأة لو رديت عليه تاني
شهد جت قعدت جنبي وبصت عليا وبعدين على سيف
- هو في ايه؟
أحمد إتكلم قبلي وضحك- مروة بنت خالتك بتعمل حركات مش لطيفة
- انتوا تروحوا تولعوا فيها أحسن و الله هجيبها من شعرها اللي فرحانة بيه ده
شهد بصيتلي وشمرت كُم الفستان - وأنا روحت فين! ده أنا هقطع نفسي عليها
أحمد وقف وبصيلهم - وأنا أمي لقياني ف صفيحة زبالة يعني أقل أدبي عليها عادي
(بعيدا عن إنها بنت خالتهم وبعيدا عن إن كلامنا مبيتنفزش بس وجودهم في حياتي فارق معايا كتير أوي، بيصلحوا كل حاجة بتتكسر )
- أحمد عايزة أروح
- انتي لحقتي تقعدي
- زهقت
روحت البيت لإني مكنتش عايزة أقعد أكتر من كده
- متزعليش، إياكي تعيطي هه
- أعيط ايه وهبل ايه يا أحمد! إنت بتكلم واحدة كبيرة مش عيلة صغيرة ويلا بقى عشان عايزة أنام
-هجيلك بكره ماشي؟
-طيب
قفلت الأوضة وقعدت عالسرير وعيطت
أنا كنت عيزاه يحس ب قيمة وجودي مش يروح معاها ، أنا كنت بعاقبه ولا بعاقبني أنا مش عارفة!
أنا بغير عليه حتى من أخته ، مبحبش أشوفه بيهتم بحد غيري  بس مكنتش أقصد إنه ياخدها الفرح معاه
نمت ولما صحيت الصبح لقيت رسالة منه
" كان في فاصل بين الكرسي بتاعي وبتاعها ،أنا عارف حدودي بردو ، إستنيتك تغيري رأيك رغم إني متأكد إنك مش هتعملي كده ، متزعليش لإني مبيهونش عليا زعلك ، ومتقارنيش نفسك ب مروة لإني عندي إستعداد أخسر أى حد عشانك يا روحي "
مردتش وإتصلت ب أحمد
-أحمد إلحقني، ده بيقولي يا روحي ، يلاهوي يا أحمد قلبي هيطلع ياخده بالحضن والله لو متصرفتش
- ده انتي لسه قايله إنك مش هتكلميه وهتبقي مهزأة لو رديتي عليه
- مكنتش أعرف إنه هيقولي كلام حلو ، كنت عاملة حسابي على خناقة والله
- أهو تقعدي تندبي ف حظك أسبوع وأول ما يقولك كلمة حلوة تمشي على أربع رجول، مهزأة مهزأة يعني مافيش كلام
- لم لسانك بدل ما أخليك تلملم أحشائك من عالأرض
- باد جيرل أوي
- طب أروح أقوله يا روحي أنا كمان ولا أقوله شكرا
سمعت صوت شهد جنبه وهي بتزعق - إعمليله بلوووك
أحمد ضحك وإتكلم - شهد بتاكل وهنجيلك
فتحت الشباك ووقفت جنبه- تعالوا وفي أكل هنا
- تخيلي كده وإحنا جايين نبيع أخونا مقابل غدا ! شكلي قدام نفسي هيبقى عامل ازاي
-ياكش مايصبح عليكوا صبح لو ما إتصرفت إنت والجحشة اللي جنبك
ضحك - جايين جايين
(يعني ايه يعني ميجوش ويتفقوا معايا على أخوهم؟ مش أخلاق دي )
-تعرفي لو كلمني ياشهد هنتصالح عادي  وهكلمه بكل هدوء وأدب
- ما انتي بتقولي كده كل مرة وب...
- إستني ده بعتلى رسالة
- طب هطلع أشوف أى أكل بره أنا وأحمد عقبال ما تتكلموا
فتحت الشات وقرأت الرسالة
-متزعليش ، وشيلي رقمي من البلاك ليست
رديت عليه بسرعة - وإنت مالك إنت أزعل ولا مزعلش خد بلوك أهو
عملتله بلوك وطلعتلهم بره
- أحمد فين؟
- ماما إتصلت وقالتله يروحلها ، إتصالحتوا؟
- عملتله بلوك
- شاطرة تر ....ايييه؟
-ياشهد ما أنا معرفتش أتصرف ، أعمل ايه طب؟ ما أنا معنديش غيركم
- وأول ما بتتصالحوا بتنسينا أنا وأحمد
- أنساكم ده ايه! ده أنا بمحيكم من ذاكرتي
-معلش
أد ايه كنت مستنية كلمة معلش عشان أبقى بخير ! مسار الكرة الأرضية إتغير وأزمات البلاد إتحلت بسبب الكلمة دي
-أنا عمري ما هكلمه تاني غير لما يعترف بغلطه، وانتي عارفاني كلمتي مبرجعش فيها !
حد خبط الباب ، شهد فتحت وكان سيف
- عاملة ايه ؟
- وإنت كمان وحشتني والله يا سيف ،تعالي أقعد ده ....
شهد  قربت مني وضربتني ف جنبي وإتكلمت بصوت واطي  - طب حتى بيني إنك زعلانة إعملي أى منظر بدل ما انتي مصغرانا معاكي كده كل مرة
بصت لسيف ويكأنها متأثرة -ما تصالحها يا سيف! دي البت قايمة نايمة تعيط
شاور لشهد عشان تخرج وقفل وراها الباب
-إياك تفكر تصالحني لإني مش هتصالح
-انتي اللي كبرتي الموضوع أنا روحت معاها الفرح لإنك مرضيتيش تروحي
-أنا شيفاك ب عنيا دول وإنت بتفكر فيها
- شيفاني بفكر فيها ازاي يعني ما تعقلي بقى!
- فستانها أحلى من فساتني؟ كنت شايفها أحلى مني؟أنا عمري ما هكلمك ، حياتي هتبقى مليانة ب ناس غيرك ، هطردك طرد ال.......
-أنا مكنتش شايف غيرك ، انتي وفستانك كنتوا قمر
-يلاهوي ده انت اللي قمر والله
ضحك - متزعليش على الغلط اللي معملتهوش وآسف على أفكارك ونواياكي السيئة
-لا أنا عمري ما أزعل منك ، أنا عارفة إنك عمرك ما تبص لغيري
-  ولما انتي عارفة إني مش هبص لغيرك زعلانة ليه وعاملة بلوك وحاجة آخر عنف
-متتريقش أحسن والله....
- هتعملي ايه يعني؟
- واللي خلق الخلق لو مبطلتش اللي بتعمله ده لروح أكلم ابن عمتك
(شكلي عنيفة اوي وأنا بقول واللي خلق الخلق ،فخورة بيا والله)
- تكلمي مين يا عنيا؟
-جوز عمتك
- نعم!
-جوز أمك طب
-بت!
- اسفه والله بس الكابشن بيتقال ك......لحظه كده ! صوتك ميعلاش يا أستاذ ومن النهاردة الرسميات والألقاب هتبقي ما بينا ، أنا أقولك يا أستاذ سيف وإنت تقولي يا مس ميار
- هتموتي وتسمعي كلمة مس ميار عارف عارف
ضربتة ف كتفة وضحكت ضحكة معووجة - بكره أتخرج ياض ويقولوا ال مس راحت وال مس جت ده إنت  ..... ايه ده ! متخرجنيش عن الموضوع من فضلك يا أستاذ
-ولو خرجنا يعني !
-ها..هه......
-ها ايه؟
-هنتصالح مثلا!
-ولو قولت إني بحبك
-يلاهوي بجد؟..أقصد شكرا..مقصدش كده يعني أقصد.....
- انتي متتقارنيش ب حد
(سونيا إلحقيني! )
مد إيده وفرد صباعه الكبير -نتصالح؟
فردت إيدي زيه وضحكت -نتصالح

"رأيتك ضوء في نهاية نفقٍ مظلم"