صرخة صمت 🌬

الحلقة الأولى

🔸️الحلقة 1
هدوء قاتل...أعصاب متوترة...خوف رهيب...و صراع داخلي تقص مع صوت القاضي لي تكلم و هو يغزرلي
القاضي:بناءا على ما تقدمت بيه الضحية و أقوال الشهود بقضية الحال...و المتمثلة في التحرش و الإغتصاب العمدي...بعد النظر و التدقيق و التحقق و استنادا لغياب الأدلة الكافية...حكمت المحكمة حضوريا ببراءة المتهم أمير أصلان و عدم فتح القضية مرة أخرى
غمضت عينيا على صوت المطرقة لي ضربت بالقاوي و حليتهم على صوت غناية فيروز << قديش كان في ناس على المفرق تنطر ناس و تشتي الدني و يحملو شمسية و انا بأيام الصحو ما حدا نطرني...قديش كان في ناس على المفرق تنطر ناس و تشتي الدني و يحملو شمسية و انا بأيام الصحو ما حدا نطرني...صارلي شي مية سنة مجروحة بالهدكان...ضجرت مني الحيطان و من صبحية بقوم و انا عيني على الحلى و الحلى على الطرقاات بغنيلو غنياااات و هو بحالو مشغوول...نطرت مواعيد الأرض و ما حدا نطرني...صارلي شي مية سنة عم ألف عناوين مش معروفة لمين و وديلهون أخبار بكرا لابد السما لتشتيلي على الباب...شمسيات و أحباب بياخذوني بشي نهار و اللي تذكر كل الناس بالآخر ذكرني...قديش كان في ناس على المفرق تنطر ناس و تشتي الدني و يحملو شمسية و انا بأيام الصحو ما حدا نطرني...ماااا حدا نطرني>> و النسمة الباردة متاع الصباح...الغناية هاذي تاخذني لبعيد و تخليني نتخايل حياتي بعيد على البلاصة هاذي و الدار هاذي...و تخليني نكبش في أحلامي أكثر...قص عليا صوت أيمن لي حل الباب و طل عليا يحكي
أيمن:إيمان...بابا هوني
ضيقت عينيا مستغربة...طفيت الراديو و لميت اوراقي بالزربة...حطيتهم في القجر...منعرفش علاش جا في الوقت هذا كيما منجمش نتخايل ردة فعلو...كان يشوف الاوراق هذوما...أصلا مستحيل حد يتوقع لي يدور في راسو...خلطت على أيمن لي قرب منو يبوس فيه...يمكن هو الوحيد لي ينجم يقربلو...غزر لأمي يحكي
حازم:حضرت لي وصيتك عليه ؟
زينب:سي حازم...أنت قلت باش تجي على 12:00 و الساعة توا 10:00
قرب منها بالزربة...شدها من شعرها بالقاوي لي خلى فولارتها تهبط معاه...و قحرلها يحكي
حازم:باااش تنااقشني توااا ؟
زينب:م..منقصدش...هاني باش نحضرهم فيسع انا و إيمان
حازم:وحدك...نحبك تحضرهم وحدك في نص ساعة كهو
هزتلو براسها باهي...دزها بالقاوي بعدها عليه...دخلت للكوجينة بالزربة...هز راسو يغزرلي...للحظة وحدة لقيت روحي نغزرلو بنفس الحقد اللي كبرت بيه سنين..الراجل هذا ما عندي حتى إحساس ناحيتو...مهما فركست داخلي خاطرو بالنسبة ليا عبد كيفو ميجيش أب و ميستحقش العيلة هاذي...قحرلي يحكي
حازم:شنوووووة ؟
نزلت عينيا من وجهو و خلطت عليها...خاطر حتى انا معنديش جرأة باش نرد الكلام في وجهو...أما هي عندها و تنجم...تنجم تخلصنا منو نهائيا و متظطرش باش تتحملو هو و أمو...جبدتها من يدها نحكي
انا:ماااكش مجبورة تحضر الفطور لصحاابو...أرفض أمي أرفض و كااان ضربك براا اشتكي بيه و انا نشهد معاااك
علاااش تخليه يعمل فيك هكا ؟
زينب:إيمااان يزززي عيش بنتي...خلينا نعديو النهار هذا من غير مشااكل
أنا:هااو تعداا و غدوة و بعد غدوة...ياااخي مفديتش منو مفديتش و إنتي معاه طول السنين هاذي...قداااش مزال باااش تتحمل يااا أمي...23 سنة أخرى و لا لين يعرسلي براجل كيما هو...تكللم
زينب:إيمااان
أنا:سمعتو أمس و هو يفاتح في أمو بالموضوع...يحب يااخولي راجل متسلط كيفو هو و يخليني نعدي حياتي بالطريقة هااذي
حاوطت وجهي بيديها زوز...كبست عليا و غزرتلي تحكي
زينب:مستحيل نخليه يعمل لي في راسو المرة هاذي و كيما حاولت نمنعو سنين لي فاتت باش نمنعو توا...صدقني إنتي باش تاخو الراجل لي يحبك و ترتاح معاه كهو
نزلتلها يديها و جبدت روحي منها...وخرت لتالي...نحكي
انا:مش صحيح...إنتي مستحيل تنجم تاقف في وجهو يا أمي و نتوقع مزال باش يعمل فينا أكثر من هكا
أمي:إيمان اسمعني عيش بنتي
دورت وجهي و حليت لي بوات...نعاون فيها و نحكي فرد وقت
أنا:معاادش فما وقت...عالأغلب باش يخليني نوصلهم أنا كي العادة
خذيت نفس طويل و كملت رتبت الماكلة لي حضرتها خاطر نعرف لي ماهيش باش تلحق وحدها و باش يستغل الوضع و يخلق مشكل جديد يخليه يضربها و يتخلق معاه سبب آخر يخليني نكرهو أكثر و أكثر..مش قاهرني وضعي قد ما قهرتني هي لي ما تحب تعمل حتى خطوة و تحررنا من الجحيم هذا...لي نعرفو أنا أنو خارج البلاصة هاذي و البقعة لاحنا محصورين فيها...فما عاالم آخر...فما عدالة على الأقل...يمكن لو شتاكت بيه مرة وحدة راهو متمداش معاها لهدرجة و لا حقرها بالطريقة هاذي خااطر معندهاش وين تمشي أصلا أنا عمري ما ريتو أب...قد ما ريت أنو هو إنسان ظالم و مستبد و حقار زادة...يمكن أول مرة ريت ضحكتو وقت اللي جا أيمن لدنيا...خاطرو حس بالرجولية كيفو كيف رجال الدشرة لي هوني بعد ما يجيهم المولود ذكر...أما الأنثى بالنسبة ليهم خلقت للإهانة و الذل كيما لي معيش أمي فيه...منعرفش قداش باش يدوم الحال هذا و قداش مزال باش نعانيو من الجباروت و القهر متاعو أما أنا عندي إيمان في روحي و عندي إحساس انو باش يجي النهار و نخرج من هوني و باش نسترجع كلشي حرمني منو و الأهم أني باش نبعد أمي عليه و باش نخليها تكمل حياتها مرتاحة و نفس النهار هذا هو باش يتأكد أنو الظلم ظلمات و الظالم لي كيفو مهما طغى باش يجي حد يرجعو لحجمو الطبيعي في الأخير.
خذيت نفس طويل و دورت راسي...جات عيني في عينها غزرتلي ندرا كيف و خرجت من الكوجينة...عديت يديا زوز على وجهي و شيعت راسي لتالي...منعرفش شنية لي قاعدة نخمم فيه توا بالظبط...أما لي متأكدة منو أني بالرسمي معادش نجم نتحمل أكثر من هكا تنهدت بالقاوي و خرجت عندهم...غزرلي يحكي
حازم:في يدك عشر دقايق باش تخلط عليا...واضح كلامي
أنا:واضح
حازم:إن شاء الله هكا و متطلعش كيما الدغفة متاع أمك
انا:قتلللك واااضح...يعني باش نخلط عليك في الوقت مش لااازم تسبها في كل فرصة
قرب مني و وقف قدامي بالظبط...تبسم على جنب و هز حاجبو يحكي
حازم:من امتى ترد الكلام في وجهي
انا:من تووااا
مد يدو باش يضربني...وقفت بيناتنا بالوقت و شدتلو يدو تحكي
زينب:بنتي لااا..قتلك باااش نعديلك كلشي أما مستحيل نخليك تمس بنتي و لا ولدي مهما صار
حازم:يحرزلك إنتي و هي معادش عندي وقت...أما مبعد نعرف شنية نعمل معاكم
قحرلها و هز روحو خرج...تلفتت عندي بالوقت و حطت يدها على خدي تحكي
زينب:لباس يا روحي ؟
هزيتلها براسي ايه و جبدت روحي لتالي...هزيت القفة في يدي و خلطت عليه...كان مجاش بابا راني إستجرمت فيه بالحق...دورت راسي نغزر لأيمن لي خلط عليا بالوقت و حط يدو على القفة يحكي
أيمن:خليني نعاونك
انا:مش عندك دروس ؟
أيمن:نكملهم مبعد...زيد أنا منحبش نشوفك متغشة خاطرك تخوفني
ضحكت بالوقت...خاطر في كل مرة نتغشش فيها و نفقد أعصابي...نلقاه معايا رغم أنو يخافني و رغم بابا يفضلو عليا في كلشي...أما ولا مرة حسيت روحي نغير منو بالعكس نعدي معظم وقتي معاه...خاطر يهمني برشا انو ميطلعش نسخة من بابا و لا يكون كيما هو في تصرفاتو رغم مزال عمرو ثمن سنين كهو...اللي عرفتو من أمي انو أجهضت أكثر من مرة بعد ما جابتني و كلو جراير الضرب و الستراس و التعب لي تعدات بيه...لين جا هو لدنيا و رغم معاملة بابا ليه مختلفة أما هذا مأثرش عليه و على تربيتو...محسيتش بروحي كيفاش وصلت للمعمل...غزرتلو نحكي
انا:أيمن برا أعطيلهم خبر لإحنا وصلنا عيش خويا
أيمن:باهي
جبد يدو مني و قرب يجري من العساس...بقيت واقفة في بلاصتي...خاطر بالرسمي ما نحب نشوف حد توا...شوية و جا معاه...قرب مني...فك القفة من يدي و قحرلي يحكي
حازم:ترجع لدار...رد بالك تمشي لبلاصة أخرى
هزيتلو براسي باهي و رجعت لتالي...خلط عليا أيمن يحكي ورا بعضو...على أجواء المدرسة و الأساتذة تبسمت بوجيعة...خاطر انا مسيرتي حبست بعد ما خذيت الباك و ضاعو ربع سنين خاطرو منعني من اني نمشي للفاك بحجة انو رفض نعيش في الإقامة و لا وحدي و ظطريت نرضى باش ينقص النكد على أمي أما الوضع ماشي و يزيد على حدو...فقت من سرحتي على صوت كرهبتو لي قصت علينا الثنية...نزل البلار يحكي
أمير:متستحقش توصيلة أمونة
قحرتلو...كبست على يد أيمن و زربت في خطواتي...شد الفران و نزل بالزربة...خلط علينا و وقف في وجهي يحكي
أمير:كي نحكي معاك تجاوبني...مش أنا لي تتجاهلني وحدة كيفك
انا:شنية باش تعمل ؟ تحبني نتوقع في بلاصتك انا خير
أمير:قوتك هاذي هي لي تشدني ليك
أنا:سي أمير...ننصحك تبعد من ثنيتي توا...خاطر كل محاولة منك تخليني نقلل من قيمتك اكثر...ساعة حتى خواطري بدات تدور من توا
غزرلي ندرا كيف...ملامح وجهو تكبست...قربلي أكثر يحكي
أمير:متخلينيش نحطك في راسي...خاطر وقتها باش نتعبك برشا في حياتك
أنا:تهديدك ميخوفنيش...اللي تشوفو مناسب أعملو...و استنى الرد مني...خاطر لا أنت و لا منصبك يفرق معايا و توا ابعد من ثنيتي و الا المشكلة باش تبدا مني
ضحك و مع كل ضحكة صوتو يقوى...نزل عليا أكثر لين ولى وجهو مع وجهي...و تبسم يحكي
أمير:صدقني يا بنت حازم...باش يجي نهار و تولي بين يديا...في فرشي و تحتي زادة
انا:مانيش مسؤولة على مخك العاطل وين هزك...اما تأكد يا أمير أصلان...كان حطيت يدك عليا في النهار من النهارات...وقتها تكون وقعت على نهاية حياتك و اسمي باش يولي الكابوس اللي يرافقك في كل لحظة تمر عليك
جبدت روحي منو و دورت راسي لأيمن لي بعد عليا و انا نحكي معاه...مديتلو يدي...قرب مني بالزربة كبست عليه و مشيت من غير ما نتلفت ورايا...خاطر هذا مش أول لقاء بيناتنا...و مش أول مرة يحاول يبزنس فيا بالطريقة هاذي و اللي يخليني ننقم عليه و نعيفو أكثر خاطر ما يفرق حتى شي على الرجال اللي هوني...كبس على يدي يحكي
أيمن:إنتي لباس ؟
أنا:لباس يا روحي...منحبكش تعاود لبابا لي ريتو باهي
أيمن:متخافش مني...أنا مستحيل نخبر بابا...حتى أني نسمع كلامك أنتي و كهو
تبسمت بالوقت و نزلت عندو...حطيت يدي على خدو نحكي
أنا:نحبك ديما هكا...ذكي و قوي...متخليش بابا يأثر عليك بتصرفاتو و كلامو المرزي...و صدقني باش يجي نهار و نخرجو من البقعة هاذي...لبلاصة مزيانة برشا
أيمن:فيها بحر ؟
أنا:مممم فيها بحر و كلشي مزيان تحلم بيه...احنا عندنا أحلامنا و باش نحققوها مع بعضنا باهي
أيمن:باهي أمونتي...نحبك برشا أنا
انا:و أنا نحبك يا روحي
قرب مني أكثر و دور يديه زوز على رقبتي...كبست على ظهرو بالوقت...و عديت يدي على شعرو...بالرسمي منحبوش يتأثر بالعادات و التقاليد لي موجودة هوني و لا باللي يحاول بابا يغرسو فيه...هو باش يتربى بعقل سليم و موزون...ينجم يفرق بين الصحيح و الغالط...و مستحيل نخلي حد يتعدا حدودو معانا و لا حتى يحاول يسرق حريتنا منا.
#إيمان_أيمن_أمير❤