🔸️حلقة 56
🔸️ملاك_تحكي:
حليت عينيا شوية شوية...منعرفش على روحي كيفاش غفيت على كتفو و رقدت الوقت هذا الكل كبسة يدو عليا...خلاتني نحس بقربو أكثر و الأهم لي هو بالرسمي توحشني...نزل راسو غزرلي...كي جبدت روحي منو مديت يديا زوز و عديتهم على وجهي باش نفيق أكثر و غزرتلو نحكي
أنا:منعرفش كيفاش غفيت
آدم:لباس توا عزيزتي ؟
أنا:أنا لباس...إيمان فاقت ؟
آدم:فاقت و طلبت كنان
أنا:حتى أنا نحب نشوفها
آدم:نظن هوما لازم يحكيو مع بعضهم أكثر...هيا توا تاكل حاجة و ترجع باش تطمن عليها
هزيتلو براسي باهي...المهم أنها قبلت تشوفو و تحكي معاه...كبس على يدي و وقفني معاه يحكي
آدم:هيا إيجاا
أنا:شنية قال الدكتور بخصوص حالتها ؟
آدم:باش يوقع أوراق خروجها
أنا:باهي برشا...هاذي أول مرة نخاف على إيمان لهدرجة
تبسم و حل باب الأصونصير...كبس على يدي و دخلني معاه...نزل على الزر يحكي
آدم:الأهم توا...صغرونتي كيفاش تحس في روحها
أنا:والله مش مصدقة اللي صار معانا الكل
قربلي شوية و مد يدو حطها على جنبي...كبس عليا و رجع بيا لتالي يحكي
آدم:معناها متحبش تصدق لي إنتي وليت معايا رسميا
أنا:آدم فاش تعمل ياخي ؟
آدم:نستغل في الوقت لي ضاع مني بكري...ساعة ملحقتش باش نقلك...محلاك الليلة ملاكي و أنو هاذي كانت أحسن خطوة قمت بيها في حياتي الكل...رغم رفضك ليا
أنا:مرفضتكش...أنا طلبت شوية وقت و كهو
آدم:كنت تنجم تاخو الوقت هذا و إنتي معايا عزيزتي يعني مش لازم تجنب تشوفني و تحكي معايا زادة
أنا:يمكن هكا نجم ناخو القرار لي يناسبني
آدم:متطلعش بعدتي عليا...باش تتأكد إذا كنت تحبني و لا لا
أنا:لااا...باش نتأكد إذا أنا نجم ناخو التجربة هاذي مرة أخرى و لا لا...خاطرني منحبش نخسر روحي أكثر من هكا يا آدم
آدم:نعرف أنو اللي عشتو قبل ميتنساش بالساهل أما أنا عند وعدي ملاكي...صدقني باش نداويك منو و من الماضي زادة
عديت عينيا على تفاصيل وجهو...رغم كلشي حسيت روحي توحشتو و توحشت كلامو...كبس على خدي و نزل عليا أكثر...دوب باسني و جبد روحو مع الباب لي تحل...تبسم يحكي
آدم:هيا إيجا...باش نحكيو في كلشي مبعد يا عمري
هزيتلو براسي باهي و خلطت عليه...دخلنا للكافي مع بعضنا...جيت باش نحكي أما سكت كي جات عيني عليها...شهور طويلة تعدات على آخر مرة ريتها و قعدت معاها...أول ما شافتني قربت مني شوية تحكي
إسراء:ملاااك
بقيت نغزرلها من غير حتى كلمة...هي كانت القطرة لي فيضت الكاس...فقت من سرحتي كي باسني من راسي يحكي
آدم:ملااكي...نستنى فيك
هزيتلو براسي باهي..تبسم و جبد روحو مني..غزرتلي تحكي
إسراء:ملا لي سمعتو صحيح...إنتي و إيهاب طلقتو
أنا:نظن أنو إنتي أول وحدة تكون سمعت
إسراء:إيهاب متحفظ على علاقتو بيك و ميحكيش عليك برشا...يعني الكل يعرف لي هو معرس أما حد ما يعرف بشكون...يعني حتى كي جابك ليلتها...كانت مفاجأة مش متوقعة منو
أنا:والله علاقتي بإيهاب زايد باش نحكيو فيها خاطرها تقطعت
إسراء:واضح خاطرك لقيت لي يعوضك بسرعة...أما رد بالك تعاود نفس الغلطة و تبيع حريتك لسجان الجديد...إلا إذا إنتي تعودت تعيش بالطريقة هاذي
أنا:كان فما شكون بحاجة نصيحة توا هي إنتي خاطر حقيقة أنك مجرد عشيقة صعيب برشا أنها تتبدا حتى باش تعدي حياتك الكل في المركز الثاني
إسراء:ماهوش ذنبي كي راجلك إختارني أنا عليك على الأقل...مانيش باردة كيفك و لا مجرد إنسان آلي نلبي في طلبات راجل من غير حتى كلمة
أنا:مدامو إختارك إنتي شبيه معرسش بيك لتوا ملا و إذا كنت نعرف إيهاب حتى شوية...مستحيل يوسخ صورتو بيك إنتي...و مع هكا نتمنى تلقى فرصتك معاه مرة أخرى...كعشيقة أكيد
تبسمت و بعدت عليها...خذيت نفس طويل نهدي في روحي...متوقعتش باش نقابلها و لا حتى نتواجه معاها...خاصة أنو معاد فما حتى شي يجمعني مع إيهاب و معادش يهمني من أصلو...أما كلامها رجعني شهور لتالي و ذكرني في سنين العذاب لي تحملتهم في الوقت لي هو كان معاها و مع غيرها...رغم كلشي عندها حق...أنا كنت مجرد إنسان آلي مش أكثر..فقت من سرحتي كي قرب مني يحكي
آدم:لباس ماهو ؟
هزيت راسي شوية و عديت عينيا على وجهو نحكي
أنا:مممم لباس
آدم:شكونها ؟
أنا:معرفة قديمة...خلينا نمشيو إحنا توا
آدم:إيجا كول شوية و مبعد نمشيو
أنا:معينيش...حتى هاني باش نسبقك أنا
كبس على يدي قبل ما نمشي و ضيق عينيه مستغرب يحكي
آدم:شنية لي صااار ملاك ؟
أنا:حتى شي...سيبني توااا
آدم:ملاااك...لآخر مرة نسألك...شنية لي صار...إذا ملقيتش جاوب منك...نظطر باش نسأل الطفلة لي خلاتك في الحالة هاذي
أنا:شمدخلك أنت آددم ؟
آدم:خاااطر يهمني االي قااعد يصير معااك...رغم أنك لتوا تعتبرني غريب عليك
أنا:باااهي...مداامك تحب تعرف...هاني باش نخبرك توااا...إسرااء هي الطفلة لي كاانت مع إيهاب و هي نفسها لي قالي برشاااا كلام يوجع جرايرها بالمختصر
كان يخوون فيااا معاهااا
آدم:ملااك ياخي ريت روحك...إنتي في الوقت لي لازم تعطي فرصة ليك و ليا...قاعدة تعيش في الماضي متاعك مع إيهاب...ساعة منظنش لي إنتي باش تعطي الفرصة حتى لروحك أنك تنساه...زيد خمم بالقدا بلكشي يستحق أنك تسامحو
قحرتلو و عطيتو بظهري من غير حتى كلمة...زربت في خطواتي و رجعت للأصونصير...كلشي يهمني توا إني نبعد عليه و كهو...حتى فهمت لي هو مشى جملة خاطرو مخلطش عليا...خذيت نفس و قعدت على الكرسي لي مقابلني...معادش نحب نخمم أكثر في اللي صار و لا في كلامو زادة...خاطر لتوا منعرفش نسيطر على روحي و نتعدا كل لحظة عشتها في الماضي.
#آدم_ملاك❤
VOUS LISEZ
صرخة صمت 🌬
Romance🌬🌬🌬 🌬 🌬 #صَرْخَةُ_صَمْتْ 🌬🌬🌬🌬🌬🌬 🌬هل جربت يوما ان تصرخ و انت تعلم ان ليس هناك من يسمعك...او ان تصرخ في داخلك من دون ان تنطق بحرف واحد ؟ 💔 💠 موضوع حكايتنا الجديدة...عكس لي قريتو عليه قبل...عكس انا لي كتبت عليه قبل...ماهيش حكاية جديدة علي...
